1 MACABEOS 15
15
Antíoco uj cartata apachimun Simonman
1Rey Demetrioj wawan Antíoco, jatun qocha churusmantapacha uj cartata apachimusqa Simonman, tukuy Israel aylluman ima. Simonqa chaypacha karqa kuraj sacerdotetaj, judiospa kamachejnintaj.
2Chay cartaqa kay jina karqa: Rey Antíoco napaykun jatun sacerdote kamachej Simonta, tukuy judío runastapis. 3Wakin sajra runas jap'ikapunku ñaupa tatasniypa reinonta. Noqataj munashani chay reinotaqa watejmanta jap'ikapuyta, imaynatachus ñaupajta karqa, chay jinaman kutichinaypaj. Chaypajqa, ashkha runasta wajyamuni, wakichishanitaj barcosta maqanakuspaj. 4Munayman ari chimpaman chayayta. Jallp'asniyman chayaspataj, chay soldadosta pikunatachus jallp'asniyta chinkacherqanku castigasaj, paykunaqa ashkha llajtasta reinoymanta t'unarparichisqankurayku.
5Kunanqa, imatachus noqamanta ñaupajta reykuna qosorqanku, noqapis qollaykitaj. 6Atillanki qolqeta ruwachiyta sutiykiwan, chaywan tukuynejpi runasqa rantikunankupaj. 7Chantapis, rantikusqanki chay maqanaku armas, chay oqharichisqanki jark'ana wasispis, qanllapatapuni kanqanku. 8Manukusqasniykimantapis, reyman qonayki karqa chaykunamantapis, qonqapullasaj wiñaypaj. Ajinallataj, imatachus kunanmanta qhepaman manukuwaj chaytapis, qonqapullasajtaj. 9Reinoy watejmanta makisniypiña kajtin, imaymana allinkunata qosqaykichej qanmampis, aylluykimampis, templomampis. Ajinamantaqa, sutiykichej may rejsisqa kanqa mundontimpi.
10Pachaj qanchis chunka tawayoj kaj watapi, Antiocoqa kachaykukusqa ñaupa tatasnimpa llajtankuman. Ashkha runas payta qhatiykusqanku. Pisi runaslla Trifonwan qhepakusqanku. 11Antiocoqa qhatiykachasqa Trifonta. Trifontaj ayqesqa Dor llajtaman, jatun qochaj chimpampi kashan chayman. 12Trifonqa rikusqa llakiy payman urmasqanta, yachasqataj runasnin sapitallanta saqerparisqankuta. 13Chaymantataj, Antiocoqa jarakusqa Dor chaynejpi pachaj iskay chunka waranqa chakipi rejkuna soldadoswan, pusaj waranqa caballopi rejkuna soldadoswan ima. 14Antiocoqa runasninta churasqa llajtaj muyuynintimpi. Chaykamataj, barcosqa chayasqankuña chimpaman. Ajinamanta, tukuynejmanta llajtaqa muyuykuchisqa karqa. Mana ni pi aterqañachu llojsiytapis yaykuytapis.
Judiosqa uj tratota ruwanku romanoswan
15Numeniotaj, paywan khuska rerqanku chaykunawantaj kutimusqanku Roma llajtamanta. Apamusqanku cartasta reykunapaj, llajtaspaj ima. Chay cartaqa kay jina kasqa:
16Romanosta kamachej Lucio napaykun rey Tolomeota. 17Kuraj sacerdote Simón, tukuy judío ayllutaj kachasta kachamuwayku paykunaj sutinkupi noqaykuwan watejmanta ruwanankupaj uj yanapanaku tratota, imaynatachus ñaupajta ruwasqa karqa, ajinata. 18Paykunaqa qowayku uj qori jark'anata, tawa pachaj kinsa chunka sojtayoj kiloyojta. 19Chayrayku, nichimushani reykunamampis, llajtasmampis, nispa ama paykunata ni imapi llakichinankuta sajrata ruwaspa, amataj maqanakunankuta, llajtasninkumampis, jallp'asninkumampis yaykuspa. Ninitaj amapuni yanapanankuta judioswan maqanakojkunata. 20Noqaykoqa jap'ikullasqayku chay apachimusqanku qori jark'anata. 21Sichus mayqen sajra sonqoyoj runas, Simonmanta ayqespa qampaman jamunkuman chayqa, jaywaykuy sacerdote Simonman, paykunata leyninkuman jina ruwasqasninkumanta castiganampaj.
22-23Lucioqa kikillantataj escribimusqa rey Demetrioman, rey Ataloman, rey Ariarateman, rey Arsacesman ima. Chantaqa, escribimullasqataj kay llajtasmampis: Sampsameman, Espartaman, Delosman, Mindosman, Sicionman, Cariaman, Samosman, Panfiliaman, Liciaman, Halicarnasoman, Rodasman, Faselisman, Cosman, Sideman, Arvadman, Gortinaman, Cnidoman, Chipreman, Cirenemanwan. 24Chantaqa, apachimullasqataj sacerdote Simonmampis, yachanampaj.
Antíoco phiñakun Simonwan
25Rey Antíoco jarakushasqa Dor chaynejpi. Siga kachamusharqapuni soldadosta llajtaman. Ruwachisharqataj maqanaku maquinasta. Tukuynejmanta muyuykusharqa Trifonta. Trifontaj mana aterqañachu ni llojsiytapis ni yaykuytapis. 26Simontaj Antiocoman kachamusqa iskay waranqa sumaj ajllasqa runasta maqaysinankupaj. Chay runasqa apallasqankutaj Antiocopaj qolqetawan qoritawan, ashkha imastawan. 27Paytaj mana munasqachu chaykunata jap'ikuyta. Manachayqa, ima tratotachus ñaupajta Simonwan ruwasqa chayta, p'akiykusqa. Chay kutimantapachataj Simonta chejnikuyta qallarisqa. 28Antiocoqa Simompaman kachaykusqa kausaqen Atenobiota, kayta nimunampaj: Qanqa jap'ikushanki Jope llajtatawan Gezer llajtatawan, Jerusalén jark'anatawan. Chay llajtasqa reinoypata kanku. 29Qanqa tukuy chay jallp'asta ch'in pampaman tukucherqanki. Tukuynejpitaj imaymana sajra kajtapis ruwarqanki. Chaymantataj, qampaj ashkha cheqasniyta jap'ikaporqanki. 30Kunanqa kutichipuway jap'ikapusqayki llajtasniyta. Chantapis, qopuway impuestosta jap'erqanki chay cheqasmanta, mana Judeapi kashanku chaykunamanta. 31Chaytachus mana ruwanki chayqa, qonawayki tiyan phishqa pachaj talento nisqa qolqeta, chay llajtasta t'unarparisqaykimanta. Chantaqa, waj phishqa pachaj talentota qonawayki tiyan chay jallp'asmanta impuestosmanta. Chay nisusqayta mana ruwanki chayqa, rispa qanwan maqanakusajpuni.
32Risqa ari reypa amigon Atenobio Jerusalén llajtaman. Rikusqataj Simón atiyniyoj kasqanta. Rikusqa qori vasosninta, qolqe vasosnintapis. Rikusqa may qhapaj kasqanta Simonqa. Tukuy chayta rikuspataj anchatapuni t'ukusqa. Chantaqa, Simonman willasqa Antíocoj nisqanta. 33Simontaj kay jinata kutichikusqa: Mana wajkunaj jallp'asninkutachu jap'ikapuyku, nitaj wajkunaj imasninkuta qhechuykuchu, manachayqa imatachus ñaupa tatasniykojpata karqa chayllata watejmanta kutichikapuyku. Chejnikuwayku chay runasqa sajrata ruwaspa chay jallp'asniykuta qhechuwarqayku, unaytataj jap'ikapunku. 34Noqayku aterqayku jap'ikapuyta imachus ñaupa tatasniykojpata karqa chayta. 35Jope llajtayojkunataj Gezer llajtayojkunataj anchataña llakichiwarqayku. Chay llajtasmantaqa pachaj talento qolqeta qosqayku.
36Chayta uyarispa Atenobioqa mana ni imata nisqachu. May phiñasqa kutimpusqa reypaman. Willasqa reyman Simompa nisqasninta. Willasqataj may qhapaj runa kasqanta. Tukuy rikusqantapuni willakusqa. Reytaj, uyariytawanqa anchatapuni phiñakusqa.
37Chaykamataj, Trifonqa barcopi ayqesqa Ortosiaman. 38Chantaqa, reyqa Cendebeota churarqa kamachejmanta jatun qocha cheqas chaynejpi. Paymantaj qosqa chakipi rejkuna soldadosta, caballopi rejkuna soldadostawan. 39Reyqa Cendebeoman ordenta qomusqa soldadosninwan kachaykukunampaj Judeaman. Chantataj nisqa Cedrón llajtata watejmanta ruwachinanta. Nillasqataj jark'anasta ruwachinanta llajta yaykunaspi. Nisqataj judío runaswan maqanakunantapuni. Reytaj ripusqa Trifonta mask'aj. 40Cendebeotaj Jabnia llajtaman chayamusqa. Chaypi qallarisqa judiosta toreyayta. Chantaqa Judea jallp'asman yaykusqa. Chaypitaj runasta presochasqa, wañuchisqataj. 41Chaymantataj, Cedrón llajtata watejmanta oqharichisqa. Chaypi qhepachisqa caballojkunata, chakipi rejkuna soldadostawan. Paykunaman nisqa kayman jaqayman kachaykukunankuta, Judea ñankunata qhawanankutataj, reypa kamachisqanman jina.
Currently Selected:
1 MACABEOS 15: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.