Lu̍o̍ma᷅ŋnda̍ 13
13
Lā tōsa̍ nyɛ᷅ wānāa̍ cho̍ nya̍ chīla̍ŋ nda̍ ā dīmūl nya̍ wo̍
1Nya̍ kpo̍u̍ lā nɔ̄ mī lā tōsa̍ nyɛ̄ wānāa̍ cho̍ nya̍ chīla̍ŋ nda̍ ā dīmūl nya̍ le̍ tōsāa̍ wo̍. Kāni̍ fo̍ndōle̍, mɛ̄ɛ̍ mī Mɛ̄lɛ̄ka̍ ō ke̍ wāŋndo̍ kpāāyāa̍ le̍ wāa̍ wāŋnda̍ chīla̍ŋ mālāŋ o̍ wa᷅ nda̍ chīla̍ŋ. Ndu̍yɛ̍, wānāa̍ cho̍ wāŋnda̍ chīla̍ŋ nda̍, Mɛ̄lɛ̄ka̍ ha̍ndu̍ nda̍ o̍ fo̍ndāŋndā lāŋ ni̍. 2Le̍la̍ŋ wānā o̍ wāna̍ si̍mu̍l wāna̍ cho̍ nda̍ chīla̍ŋ ndo̍ pɛ̍, mɛ̄ɛ̍ wāna̍ Mɛ̄lɛ̄ka̍ pi̍la̍ hāndu̍ wāŋnda̍ chīla̍ŋ ndo̍, ndu̍ wānā ko̍ŋ ō sīmu̍l ko̍ŋ ni̍. Ndu̍yɛ̍, wāna̍ to̍sa̍ le̍nde̍ pɛ̍, mɛ̄ɛ̍ ndu̍ pi̍la̍ di̍mi̍ ni̍ māā ā hāndu̍ ndu̍ nyɛ̄ pālāa̍ chōo̍. 3Le̍ he̍ī, wānāa̍ to̍sā dɛ̍nɛ̍ wɔ̍ɔ̍ŋndo̍ wa̍, nda̍ nɔ̍ ni̍ mā yɔ᷄ŋ sīōōŋnde̍ le̍ wānāa̍ cho̍ nda̍ chīla̍ŋ nda̍. Kɛ̍ wānāa̍ to̍sā nyɛ̍ bɛ̍nda̍ le̍ tōsāa̍ wo̍ wa̍, nda̍ nɔ̍ mā yɔ᷄ŋ īsīōōŋ le̍ nda̍ le̍. Le̍ he̍ī, tē a̍ hɛ̍na̍ŋ mā wa̍ o̍ īsīōōŋ ni᷄ŋ le̍ wānāa̍ cho̍ nya̍ chīla̍ŋ nda̍ le̍, mɛ̄ɛ̍ to̍sa̍ ka̍a̍ bɛ̍nda̍ le̍ tōsāa̍ wo̍. Tē a̍ to̍sa̍ le̍nde̍ pɛ̍, wānāa̍ cho̍ nya̍ chīla̍ŋ nda̍ ā chāndu̍ nu̍m. 4Kāni̍ fu̍u̍le̍, wāna̍ wa᷅ ho̍ō wāŋnda̍ chīla̍ŋ ndo̍, bu̍ɛ̍i̍ Mɛ̄lɛ̄ka̍a̍ o̍ cho̍ ni̍. Ndu̍yɛ̍ wa̍li̍ o̍ cho̍ tōsāa̍ wo̍ le̍ dɛ̍nɛ̍ nyā kɛ̍ndɔ̄ɔ̍ o̍ cho̍ ndu̍ tōsāa̍ ni̍. Kɛ̍ ndu̍yɛ̍, tē a̍ to̍sa̍ sūɛ̍i̍ wɔ̍ɔ̍ŋnde̍ pɛ̍, ā nɔ̄ mā yɔ̍ŋ sīōōŋnde̍ le̍ wāna̍ cho̍ nya̍ chīla̍ŋ ndo̍. Kāni̍ fo̍ndōle̍, kpāāya̍ cho̍ ndu̍ ō kēna᷄ŋ ndo̍, ō cho̍ le̍ fo̍ndō fu̍u̍ le̍. Bu̍ɛ̍i̍ Mɛ̄lɛ̄ka̍a̍ o̍ cho̍ ni̍. Ndu̍yɛ̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍, ndu̍ nɔ̍ mbō tūsi̍ nda̍ nyɛ̄ pālāa̍ chōo̍ ni̍ le̍ nda̍ chɔ̄mndo̍ māā Mɛ̄lɛ̄ka̍ dɔ̄ūnu᷄ŋ tu̍mbe̍ a̍ nda̍. 5Le̍la̍ŋ, lā nɔ̄ mī lā tōsa̍ nyɛ̄ wānāa̍ cho̍ nyā chīla̍ŋ nda̍ ā dīmūl nya̍ wo̍. Kɛ̍ ndu̍yɛ̍, tē wānā wa̍ ndi̍ tōsāa̍ pɛ̍, ō wa̍ su̍ɛ̍i̍ nūm pi̍la̍ yi̍ya̍ŋ o̍ kɔ̄l nūmndo̍ ni᷄ŋ māā le̍nde̍ o̍ bɛ̍ndā ni̍ mā to̍sa̍. Ō wa᷅ le̍ sīōōŋīi̍ Mɛ̄lɛ̄kɛ̍i̍ su̍e̍e̍ māā yɔ̍ŋi̍ Mɛ̄lɛ̄ka̍ dɔ̄ɔ̍ŋ tu̍mbe̍ a̍ nūm te̍.
6Le̍ sa̍bū kōŋ nya̍ māl vɛ̍lɛ̄ pāāwāa̍ ni̍. Kāni̍ fu̍u̍le̍, tē wānāa̍ cho̍ nya̍ chīla̍ŋ nda̍ ā tōsa̍ wa̍li̍ nda̍ chō ā yūlāā le̍ tōsāa̍ wo̍ pɛ̍, mɛ̄ɛ̍ le̍ Mɛ̄lɛ̄ka̍ nda̍ chō wa̍llo̍ ni̍. 7Le̍la̍ŋ, lā yɔ̄ŋgu̍ nyɛ᷅ nya̍ nɔ̄ le̍ nda̍ yɔ̄ŋgōo̍ wo̍. Tē pāāwāa̍ nya̍ nɔ̄ le̍ mālɔ̄ɔ̍ ni̍, mɛ̄ɛ̍ lā ma᷄l pa̍a̍wāa̍. Tē cho̍tīi̍yo̍ nya̍ nɔ̄ le̍ sōlīo̍o̍ ni̍, mɛ̄ɛ̍ lā sōli̍. Tē bɛ̄ɛ̄le̍ŋ nya̍ nɔ̄ le̍ nda̍ kīo̍o̍ ni̍, mɛ̄ɛ̍ lā ke̍ nda̍. Tē chūa̍a̍ nya̍ nɔ̄ mī lā chu̍a̍ nda̍ ā bɛ̄ndū ni̍, mɛ̄ɛ̍ lā chu̍a̍ nda̍ ā bɛ̄ndū.
Ka̍ālā na̍a̍ ŋ̄ nɔ̄ le̍ tōsāa̍ la̍ŋ
8Lā chɛ᷅l mī kūe̍e̍ nyɛ̄ sɔ̄lāā wānā o̍ wānā wa̍ nya̍ chōo̍ le̍. Kūe̍e̍ nya̍ nɔ̄ mī lā wa̍ bɛ̄ŋgu̍ wo̍ ndu̍ su̍e̍e̍ cho̍ kāāli̍āŋndo̍ vēllāa̍ vēllē ni̍. Kāni̍ fo̍ndōle̍, wānā o̍ wāna̍ ka̍a̍la̍ chāa̍ŋ ndɔ̄ wa᷅na̍ chi̍o̍o̍ pɛ̍, mɛ̄ɛ̍ ō tōsa̍ nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ wo̍. 9Kāni̍ fo̍ndōle̍, sāwāla̍ŋ lā di̍mi̍ āā, “Wānā su̍u̍ndā a̍ la̍nɔ̍ pi̍la̍ kɛ̄lɛ̄ŋgāā pɔ̍nɔ̍ pi̍la̍ le̍, di̍ī wāna̍ le̍, yɔ᷅ŋ lēvīī le̍, lu̍ɛ̍ī lēhɔ̄l o̍ nyɛ̄ pi̍la̍ le̍.” Sāwāla̍ŋ nda᷅ŋ a̍ lā pīlɛ̍la̍ŋ fa̍ū bōllē ndɔ̄le̍ŋ le̍ cho̍ sāwa̍ di̍mi̍ āā, “Ka̍a̍la̍ cha̍a̍ŋ nūm wa᷅na̍ chi̍o̍o̍ mɛ̄ɛ̍ ŋ̄ kāāla̍ nūm pi̍la̍ yɛ̍” wo̍ ni̍. 10Kāni̍ fo̍ndōle̍, wānā o̍ wānā tē a̍ ka̍a̍la̍ chāa̍ŋ nūm wa᷅na̍ chi̍o̍o̍ pɛ̍, a̍ to̍sāl wa̍nā ko̍ŋ dɛ̍nɛ̍ wɔ̍ɔ̍ŋ te̍. Tē wāŋndo̍ kāāla̍ chāa̍ŋ ndɔ̄ wa᷅na̍ chi̍o̍o̍ pɛ̍, mɛ̄ɛ̍ wānā ko̍ŋ ō chīi̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍ wo̍ chūā kpo̍u̍.
11Lā tōsa̍ he̍ī, kāni̍ fo̍ndōle̍, nya̍ pi̍la̍ sīnā bo̍o̍ndi̍i̍ na̍a̍ ŋ̄ chō ni᷅ŋ he̍ī lēni᷄ŋ nde̍. Bōōnde̍i̍ ī fūūlu̍u̍ le̍ mī wānā o̍ wānā te̍ndū o̍ lūa̍a̍ŋ. Kāni̍ fu̍u̍le̍, bōōndi̍i̍ Mɛ̄lɛ̄ka̍ chō na̍a̍ pīŋī ve̍ ī chō ni᷅ŋ a̍ na̍a̍ kpɛ̍ɛ̍lūŋ, mbo̍ hīāū a̍ te̍le̍ŋ na̍a̍ ŋ̍ dɔ̍ū tīīnda᷄ŋndo̍ sɛ̍nɛ̄ī o̍ Chi̍i̍sū ni̍ŋ ndo̍. 12Nyūmnda̍ŋ mā chō ni᷅ŋ le̍ fāŋa᷄ŋndo̍. Pāa̍le̍ŋ lē chō ni᷅ŋ le̍ sīɔ̍ɔ̍. Lā ŋ̄ mālnu᷄ŋ sɔ̄ɔ̍ŋ wɔ̍ɔ̍ŋūŋ wāŋnda̍ wa̍ tōsāa̍ o̍ nyūmnda̍ŋ ni᷄ŋ ndo̍ŋ. Lā ŋ̄ chūānu᷅ŋ wōlɔ̄ɔ̄lā chɔ̄ūlā so̍vɛ̄i̍ya̍a̍ cho̍ le̍ nyɛ̄ wa̍wo̍ŋndo̍ wa̍ ā sɔ̄ŋgā la̍ŋ. 13Lā ŋ̄ wāŋnu᷅ŋ ka̍ālā bɛ̍nda̍ le̍ mī ŋ̄ tōsa̍ la̍ŋ tōsāa̍. La̍ŋ la̍ yɔ̍nūŋ ni̍ māā ka̍ālā wānāa̍ cho̍ o̍ nyɛ̄ wa̍wo̍ŋndo̍ ni᷄ŋ nda̍ tōsā la̍ŋ. Lā wo̍ū lɛ̄ lābā o̍ nīīlū o̍ nīīlū kōlāā ni᷄ŋ te̍. Ndu̍yɛ̍, lā su̍u̍ndā nya̍ wāna̍ nya̍ cho̍ o̍ nɔ̄ ni̍ŋ nya̍ ndu̍ le̍ wo̍ le̍. Lā wo̍ū bā o̍ nīīlū nɔ̄ɔ̄lɛ̍i̍ ni̍ŋ te̍. Sɔ̍ŋgɔ̄lā wa᷅ nya̍ tɛ̄ɛ̄ŋ, mī pāŋa̍li̍āŋ wa̍ nya̍ tɛ̄ɛ̄ŋ te̍. 14Nyɛ̄ nya̍ nɔ̄ le̍ tōsāa̍ wo̍ cho̍ ni̍, māā lā nɔ̍ ka̍a̍ Māsānɔ̄ɔ̍ Chi̍i̍sū Ki̍li̍tīo̍o̍. Ndu̍yɛ̍, mī lā ma᷄l yīya᷄ŋnda̍ŋ le̍ sɔ̄ɔ̍ŋ wāna̍ chi̍e̍e̍yɛ̍ī yɔ̄ŋ wɔ̄ɔ̍ŋnde̍ ī yēēmā nya̍ le̍ tōsāa̍ wo̍ŋ.
Kisi Bible © Bible Society in Liberia, 2015.