Māa̍ti̍u̍ 27
27
Ā kūɛ̄ a̍ Chi̍i̍sū nāa̍ Māsāa̍ Pa̍i̍lē chu̍a̍
(Ma̍kī 15:1; Lu̍kū 23:1-2; Chɔ᷄ŋ 18:28-32)
1Īdīi̍yo̍ pu̍u̍ŋ, mi̍ wānāā bɛ̄ndūāā sōlīāā lāsa̍lāa̍ a̍ lāŋgba̍ā kālla̍ chūūŋgi̍āŋ ma̍ kɛ̄ɛ̄sīāā le̍ mɛ̄ɛ̍ nda̍ tōsā mī wāŋnda̍ dīī Chi̍i̍sū yɛ̍. 2O̍ ko̍ŋ kɔ̍ɔ̍lī, ma̍ yīī ndu̍ po᷅ŋ ma̍ kūā a̍ ndu̍. Ma̍ yɔ̄ŋgū ndu̍ o̍ Māsa̍ māLu̍o̍ma᷅ŋndo̍ lo̍, dīōla̍ŋ āā, Pa̍i̍lē.
A̍ pīɔ̍m Chu̍dāa̍ o̍kɔ̄ɔ̄
(Wa̍lta̍ Wānāa̍ Chi̍i̍sūa̍a̍ 1:18, 19)
3Mɛ̄ɛ̍ Chu̍da̍sī o̍ pi̍si̍ Chi̍i̍su̍ wo̍ chē māā ā yūlū Chi̍i̍su̍ le̍ dīyɔ̄ɔ̍, mi̍ mɔ̍nɛ̍i̍ bīī ndu̍ le̍ nyɛ̄ o̍ to̍sa̍ wo̍. Mbo̍ chūā ka̍ni̍ŋ hu̍mbūŋ be̍le̍-ya̍a̍ wo̍ŋ mbo̍ mīŋgūl wānāā bɛ̄ndūāā sōlīāā lāsa̍lāa̍ a̍ lāŋgba̍ā kālla̍. 4Mbo̍ dīmī āā, “I̍ to̍sa̍ yɔ̄ŋ wɔ̄ɔ̍ŋndo̍. I̍ pi̍si̍ wāna̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍ ma̍ wā ndu̍ hūnɔ̄ɔ̄ dīyɔ̄ɔ̍.”
Mi̍ wānāā bɛ̄ndūāā sōlīāā lāsa̍lāa̍ a̍ lāŋgba̍ā kālla̍ mūlūl ndu̍ āā, “Na̍a̍ ŋ̄ nɔ̍ mɛ̍ɛ̍ to̍sāā o̍ ke̍ŋ ni̍ŋ te̍. Nūm pi̍la̍ nɔ̍ mɛ̄ɛ̍ to̍sāā ni̍.”
5O̍ ko̍ŋ, mi̍ Chu̍dā wu̍ū ka̍ni̍ŋ be̍le̍-ya̍a̍ mu̍ŋ o̍ chīɛ̄ī Chu̍ūwa̍ so̍lī sa̍lāa̍ wo̍ ni᷄ŋ mbo̍ fūla᷄ŋ. Mɛ̄ɛ̍ o̍ ku̍ɛ̄, mbo̍ kɔ̍ la̍ndu᷄ŋ mbo̍ wū.
6Mi̍ wānāā bɛ̄ndūāā sōlīāā lāsa̍lāa̍ chɔ̄ɔ̄vīāā nyɛ̄ sɔ̄lāā kōŋ. Ma̍ dīmī āā, “Sāwa̍ nāa̍ dīmi̍ māā wānā do̍ū ka̍ni̍ŋ wa̍ā nu̍a̍ā o̍ nyɛ̄ sɔ̄lāā nda̍ hūŋ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ chōo̍ le̍. Ka̍ni̍ fo̍ndōle̍, ka̍ni̍ŋ yɔ̍ŋgu̍ŋ le̍ wāna̍ chi̍o̍o̍ dīyɔ̄ɔ̍ wo̍ŋ ŋ̍ cho̍ ni̍.” 7Mɛ̄ɛ̍ nda̍ kɛ̄ɛ̄si̍a̍a̍ a̍ ndi̍ o̍kɔ̄ɔ̄, ma̍ pīāndū lɛ̄ŋndē wānā cha̍u̍wāā ŋ̄kpɛ̍ɛ̍nɛ̍ pu̍m a̍ ka̍ni̍ŋ mu̍ŋ. O̍ ko̍ŋ kɔ̍ɔ̍lī, ma̍ sīīŋgūū lɛ̄ŋndē lēŋ fo̍ndāŋ nda̍ chɔ̄ wa᷅ŋnda̍ wo̍. Mīāl o̍ mīāl ndu̍ o̍o̍ vi᷅ Chūlu̍sɛ̄lɛ̄m pɛ̍, lo̍ŋ nda̍ a̍a̍ chɔ᷅ ndu̍ ni̍. 8Le̍ sa̍bū kōŋ, pāa̍le̍ hāūle᷅ŋ bɛ̍ɛ̍ ā vēēlū fo̍ndāŋ kōŋ āā, lɛ̄ŋndē kōo̍wa̍ŋ mā tāla̍ le̍ŋ.
9-10O̍ he̍ī ni᷄ŋ, mi̍ nyɛ̄ wāna̍ su̍a̍ā le̍ Mɛ̄lɛ̄ka̍ wo̍ Chɛ̄lūīma̍yā dīmi̍ wo̍ yɔ̄nu᷄ŋ. Mbo̍ dīmī āā, “Ma̍ chūā ka̍ni̍ŋ hu̍mbūŋ be̍le̍-ya̍a̍ wo̍ŋ ma̍ pīāndū lɛ̄ŋndē wānā cha̍u̍vāā ŋ̄kpɛ̍ɛ̍nɔ̍ɔ̍ mɛ̄ɛ̍ Māsānɔ̄ɔ̍ Mɛ̄lɛ̄ka̍ dīmi̍ yɛ̍. Nyɛ̄ sɔ̄lāā wāŋnda̍ I̍sɔ̄lūɛ̄ī chɛ̍l le̍ pāāwāa̍ le̍ ndu̍ wo̍ cho̍ ko̍ŋ ni̍.”
Pa̍i̍lē nyu̍u̍ni̍a̍a̍ Chi̍i̍sū
(Ma̍kī 15:2-5; Lu̍kū 23:3-5; Chɔ᷄ŋ 18:33-38)
11Ma̍ si̍mī Chi̍i̍su̍ māsa̍ māLu̍o̍ma᷅ŋndo̍ lāchī. Mi̍ ndu̍ Pa̍i̍lē nyu̍nā ndu̍ āā vɛ̄ɛ̄, “Nu᷄m cho̍ māsā bɛ̍ndū Chu̍ūwa̍ ni̍?”
Mi̍ Chi̍i̍sū mu̍lī āā, “M̍m̄, nyɛ̄ ŋ̄ dīmi̍ wo̍ chō tōnya̍.” 12Mɛ̄ɛ̍ wānāā bɛ̄ndūāā sōlīāā lāsa̍lāa̍ a̍ lāŋgba̍ā kālla̍ ā chɔ̄m sɔ̄ɔ̍ŋ ndu̍ chōo̍ ō sūu̍ nyɛ̄ o̍ nyɛ̄ le̍.
13O̍ ko̍ŋ, mi̍ Pa̍i̍lē nyu̍nā ndu̍ āā, “Ā tūēī pa̍ sɔ̍ɔ̍ŋ nda̍ chɔ᷄m nu̍m chōo̍ wo̍ŋ?”
14Kɛ̍, nyɛ̄ o̍ nyɛ̄ bɛ̍ɛ̍ Chi̍i̍sū mu̍li̍ a̍ sɔ̄ɔ̍ŋ nda̍ chɔ᷄m ndu̍ chōo̍ wo̍ŋ o̍kɔ̄ɔ̄ le̍. O̍ ko̍ŋ, mi̍ kɔ̄ndɔ̄fi̍llo̍ bīī māsa̍ māLu̍o̍ma᷅ŋndo̍ ta̍u̍.
Pa̍i̍lē ke̍lū yāmɛ̍i̍ māā ā nɔ̄ mā dīī Chi̍i̍sū
(Ma̍kī 15:6-15; Lu̍kū 23:13-25; Chɔ᷄ŋ 18:39–19:16)
15Ī wa̍ māā ka̍ā ndā māā pɛ̄ŋgu̍ o̍ pɛ̄ŋgu̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ndu̍ o̍o̍ fu̍u̍lu̍u̍ pɛ̍, mɛ̄ɛ̍ mī māsa̍ māLu̍o̍ma᷅ŋndo̍ ndu̍ o̍o̍ ma̍l wānāa̍ cho̍ o̍ bīyɔ̄ɔ̍ ni᷄ŋ nda̍ ō pīlɛ̍ ō wāŋnda̍ yēēmā wo̍. 16Bōōndi̍i̍ ke̍ŋ, nda̍ a̍a̍ nɔ̍ wānā pi᷅lɛ̍ o̍ bīyɔ̄ɔ̍ ni᷄ŋ, dīōla̍ŋ āā, Ba̍lu̍a̍bāā, ō wāŋnda̍ nda̍ a̍a̍ si̍nā wa̍la̍ŋ ndo̍. 17O̍ ko̍ŋ, mɛ̄ɛ̍ fāŋgāa̍ chūūŋgi̍āŋ, mi̍ Pa̍i̍lē nyu̍nā nda̍ āā, “Ba̍lu̍a̍bāā wo̍o̍ a̍ Chi̍i̍sū ō nda̍ vēēlū āā Ki̍li̍tī wo̍, ɔ̍ɔ̄ wāna̍ nya̍ hɛ̄na̍ŋ mī mēl nya̍ wo̍?” 18Ndu̍yɛ̍, Pa̍i̍lē ndu̍ o̍o̍ si̍nā māā nɛ̄īyɔ᷄ŋ Chi̍i̍sōo̍ wānāā bɛ̄ndūa̍a̍ nda̍ a̍a̍ nɔ̍ ni̍ māā le̍la̍ŋ nda̍ hīŋ a̍ ndu̍ nāa̍ ndu̍ chu̍a̍ ni̍.
19Mɛ̄ɛ̍ Pa̍i̍lē wa̍ īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍, mi̍ la̍a̍ ndɔ̄ vi̍ām wānā a̍ yōōŋgōo̍ nāa̍ ndu̍ chu̍a̍ āā, “Lɔ̄mā ya̍ I̍ sɔ̍l chɔ̍chɔ̄l a̍ lāŋu̍nɔ̄ kōŋ nda̍ŋ mā kɔ̄ndu᷄ŋ ya̍ ŋ̄dīāl. Le̍la̍ŋ, wo̍ū bā nūm o̍ sūɛ̍i̍ ndɛ̄i̍ ke̍ŋ ni᷄ŋ a̍ ndu̍ o̍kɔ̄ɔ̄ le̍. Kāni̍, ō tɛ̄ɛ̄mbu̍u̍ i̍sɔ̍ɔ̍ o̍ īsɔ̄ɔ̍ le̍.”
20A̍ bōōndi̍i̍ Pa̍i̍lē nyu̍na̍ wāŋnda̍ le̍ wāna̍ nda̍ yēēma̍ le̍ mbō me᷄l nda̍ wo̍, mi̍ wānāā bɛ̄ndūa̍a̍ sōlīāā lāsa̍lāa̍ a̍ lāŋgba̍ā kālla̍ ā sūāā fāŋgāa̍ o̍ lānī le̍ mā dīmu̍l Pa̍i̍lē mbō ma᷄l Ba̍lu̍a̍bāā, kɛ̍ Chi̍i̍sū ndu̍ mbō dīī ndu̍. 21Mi̍ Pa̍i̍lē nyu̍nā nda̍ āā, “Wānāā ŋīɔ̍ɔ̍ŋnda̍ ha̍ā, ɔ̍ɔ̄ wāna̍ nya̍ hɛ̄na̍ŋ mī me̍l nya̍ wo̍?”
Ma̍ dīmī āā, “Ba̍lu̍a̍bāā.”
22Mbo̍ nyūnā nda̍ āā, “Ō yɛ̄ɛ̄nɛ̍ ya̍ I̍ to̍sa̍ yɛ̍ a̍ Chi̍i̍sū ō nda̍ vēēlū āā, Ki̍li̍tī wo̍?”
Ma̍ mūlī āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”
23Mi̍ Pa̍i̍lē lo᷅ lo̍ŋ mbo̍ nyūnā nda̍ āā, “Vɛ᷅? Ō yɛ̄ɛ̍nɛ̍ o̍ yɔ̍ŋ yɛ̄?”
Kɛ̍, ma̍ chɔ̄ɔ̄lū dēŋī chōo̍ cho̍o̍ āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”
24Mi̍ Pa̍i̍lē cha᷅ māā ō nɔ̍lā nda̍ kɔ̄lta̍ŋ mūlī le̍. Ndu̍yɛ̍, mɛ̄ɛ̍ o̍ che᷅ māā wāŋnda̍ cha᷄l le̍ sɔ̍ŋgɔ̄ɔ̍ mālɔ̄ɔ̍, mbo̍ chūā mɛ̄ŋnda̍ŋ mbo̍ pūlū bālā ndɔ̄la̍ŋ nda̍ kpo̍u̍ o̍ hɔ̄l. Mbo̍ dīmī āā, “Tɔ̍ɔ̍ya̍ŋ o̍ tɔ̍ɔ̍ya̍ŋ cho̍ lɛ̍ ya̍ chōo̍ le̍ pīɔ̍m pōo̍ ho̍ō le̍. Nya̍ pi̍la̍ tɔ̍ɔ̍ya̍ŋ pīɔ̍m ndɔ̄ɔ̍ chō chōo̍ ni̍.”
25Mi̍ fāŋgāa̍ kpo̍u̍ a̍ mu̍lī āā, “Na̍a̍ ni̍, chūāūwāā nāa̍ ni̍, tɔ̍ɔ̍ya̍ŋ pīɔ̍m ndɔ̄ɔ̍ ō wa̍ na̍a̍ chōo̍.”
26O̍ ko̍ŋ kɔ̍ɔ̍lī, mi̍ Pa̍i̍lē me᷅l nda̍ Ba̍lu̍a̍bāā. Mbo̍ tōsā ma̍ lūāā Chi̍i̍sū. O̍ ko̍ŋ kɔ̍ɔ̍lī, mbo̍ yɔ̄ŋgū ndu̍ o̍ so̍vɛ̄i̍ya̍ lo̍ le̍ mā ba᷄ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.
Mɛ̄ɛ̍ so̍vɛ̄i̍ya̍ tōsa̍ a̍ Chi̍i̍sū yɛ̍
(Ma̍kī 15:16-20; Chɔ᷄ŋ 19:2-3)
27Mi̍ so̍vɛ̄i̍ya̍ kūā a̍ Chi̍i̍sū o̍ chīɛ̍i̍ Pa̍i̍lē wo̍. Ma̍ chūūŋgīāā ku̍ndā so̍vɛ̄i̍ya̍ kpo̍u̍ ndu̍ lāchī. 28Ma̍ sōlī ndu̍ nyɛ̄lā ndɔ̄la̍ŋ lēkɔ̄ɔ̍. Ma̍ wōū ndu̍ dōmā bɛ̍ndū sīāŋā pūm māā dōma̍ lēmāsā. 29Ma̍ lūā yɔ̄ɔ̍ŋ fi̍ŋɔ̍ɔ̍ ma̍ wōū ndu̍ o̍ lēbōl māā mɔ̍si̍l lēmāsā. Ma̍ mūli᷄ŋ ma̍ chūā yɔ̄mndo̍ ma̍ sūāā ndu̍ o̍ bā kɛ̄ndɔ̄ɔ̍ māā tīnda̍ lēmāsā. Mā bāŋ ndu̍ wūla̍ŋ o̍ lābɛ̄ŋgu̍ ni̍ŋ. Ma̍ sa̍āŋ ndu̍ māmɔ̄ɔ̍ mā dīmī āā, “Māsā bɛ̍ndū Chu̍ūwa̍, vi̍o̍u̍ na̍a̍ chōo̍ kɛ̍ndi̍a̍a̍.” 30O̍ ko̍ŋ kɔ̍ɔ̍lī, ma̍ tūfū ndu̍ lɔ̄lūa̍ŋ chōo̍. Ma̍ mūli᷄ŋ ma̍ bīī ndu̍ tīnda̍ ko̍ŋ o̍ bā. Ma̍ lūāā ndu̍ bōlle̍ŋ a̍ ndu̍, ma̍ lūāā. 31Mɛ̄ɛ̍ nda̍ chīi̍ ma̍ sōlī ndu̍ dōmā si̍a̍ŋā kōŋ lēkɔ̄ɔ̍. Ma̍ mīŋgī ndu̍ nyɛ̄lā ndɔ̄la̍ ndu̍ pi̍la̍ la̍ŋ lēkɔ̄ɔ̍. Ma̍ kūā a̍ ndu̍ le̍ ndu̍ bāŋɔ̄ɔ̍ o̍ yɔ̄m sīŋgāfīlāa̍ chōo̍.
Ā ba᷄ŋ Chi̍i̍sū o̍ yɔ̄m sīŋgāfīlāa̍ chōo̍
(Ma̍kī 15:21-32; Lu̍kū 23:26-43; Chɔ᷄ŋ 19:17-27)
32Mɛ̄ɛ̍ nda̍ wa̍ kɔ̄la̍ŋ le̍ ndu̍ bāŋɔ̄ɔ̍ o̍ yɔ̄m sīŋgāfīlāa̍ chōo̍, ma̍ bɔ̄ŋa᷅ŋ a̍ po̍ pi᷅lɛ̍ dīōla̍ŋ āā, Sa̍i̍mɔ̄ŋ, vīōlɔ̄ɔ̄ wāā lɛ̄ŋndē Sāīlu̍i̍nī le̍ŋ. Bɔ̄ŋa᷅ŋndo̍, ma̍ bīī ndu̍ le̍ mbō chu̍a̍ yɔ̄m sīŋgāfīlāa̍ Chi̍i̍sōo̍. 33Mɛ̄ɛ̍ nda̍ kūɛ̄, ma̍ fūūlūū o̍ fo̍ndāŋ pīlɛ̍, dīōla̍ŋ āā, Kɔ̍ɔ̍kɔ̍tā. Ko̍ŋ cho̍ ni̍, fo̍ndāŋ lākpōkpōo̍. 34Lo̍ŋ nda̍ ke̍ ndu̍ mūɛ̄īmā pūm ni̍, mūūli̍āŋndo̍ ma̍ŋ a̍ nyɛ̄ lōlɛ̍i̍ pu̍m. Mɛ̄ɛ̍ o̍ de̍mbi̍, mbo̍ kɛ̄ɛ̄. Ō ko᷄l te̍.
35O̍ ko̍ŋ kɔ̍ɔ̍lī, mɛ̄ɛ̍ so̍vɛ̄i̍ya̍ ba᷄ŋ ndu̍, ma̍ pīɔ̄ūvi̍āŋ nyɛ̍lā ndɔ̄la̍ŋ. Ndu̍yɛ̍ ma̍ wūū kōo̍ŋ le̍ sīnāa̍ mɛ̄ɛ̍ wānā pi᷅lɛ̍ sɔ̄lā la̍ŋ yɛ̍. 36O̍ ko̍ŋ kɔ̍ɔ̍lī, ma̍ chāl le̍ ndu̍ wāa̍ lēhɔ̄l. 37Ma̍ pōōnyīāā dīōmnda̍ŋ ma̍ hāndū ndu̍ chōo̍ o̍ yɔ̄m sīŋgāfīlāa̍ āā, “Chi̍i̍su̍ cho̍ ho̍ō ni̍, māsā bɛ̍ndōo̍ le̍ Chu̍ūwa̍.” Dīōmndā nda̍ dīmi̍ māā le̍ la̍ŋ nda̍ dīī ndu̍ ni̍ la̍ŋ, la̍ cho̍ la̍ŋ ni̍. 38Ma̍ bāŋ vīīya̍ ā ŋīɔ̍ɔ̍ŋ lātūlu̍ nda̍ Chi̍i̍sū wa̍ā. Mɛ̄ɛ̍ nda̍ ba᷄ŋ ho̍ō o̍ bā ndɔ̄ kɛ̄ndɔ̄ɔ̍ chōo̍, ma̍ bāŋ ō pīlɔ̍ɔ̄ o̍ bā ndɔ̄ mi̍āllo̍ chōo̍.
39Mi̍ wānāa̍ wa̍ hīōūwɔ̄ɔ̍ o̍ nɛ̄ī ya̍ ā yīōū ndu̍ ta̍u̍ ta̍u̍. Ma̍ mām ndu̍. Ma̍ dīmī āā, 40“Nūm te̍ di̍mi̍ māā ā chō chīɛ̍i̍ Mɛ̄lɛ̄ka̍a̍ pīɔ̄lɔ̄ɔ̄ mā mi̍ŋgi̍ ndu̍ tāŋgūl o̍ pālɛ̍i̍ ya̍a̍ bɛ̍ŋgu̍ le̍? Pi̍ŋi̍ ni̍ko̍ nu᷅m pi̍la̍. Tē Po̍ Mɛ̄lɛ̄ka̍a̍ ŋ̄ chō ni̍ ti᷅, mɛ̄ɛ̍ to̍l lɔ̍ na̍a̍ ŋ̄ chō ka̍ŋ o̍ yɔ̄m sīŋgāfīlāa̍ chōo̍ wa̍.”
41Le̍nde̍ ko̍ni̍, mi̍ wānāā bɛ̄ndūa̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā mām ndu̍. 42Ma̍ dīmī āā, “Ō pīŋī chāāŋnda̍, kɛ̍, ō nɔ̍lā mbō pīŋi̍ ndu̍ pi̍la̍ le̍. Ndu̍ cho̍ māsā bɛ̍ndōo̍ le̍ na̍a̍ Chu̍ūwa̍ ni̍. Ō to᷄l ni̍ko̍ o̍ yɔ̄m sīŋgāfīlāa̍ chōo̍. Tē ō tōl lo̍ŋ pɛ̍, ŋ̄ lāāla̍ŋ a̍ ndu̍. 43Ō tīīnda̍ŋ Mɛ̍lɛ̄ka̍. Ndu̍yɛ̍, mbo̍ dīmi̍ māā Po̍ Mɛ̄lɛ̄ka̍a̍ o̍ cho̍ ni̍. Le̍la̍ŋ, tē Mɛ̄lɛ̄ka̍ hɛ̄na̍ŋ a̍ ndu̍ pɛ̍ ti᷅, mɛ̄ɛ̍ ō sōli̍ wɔ̍ ndu̍ ni̍ko̍ le̍ni̍ŋ.”
44Vīyāā nda̍ ba᷄ŋ lātūlu̍ nda̍ nda̍ wa̍, nda̍ bɛ̍ɛ̍ le̍nde̍ ko̍ni̍ ma̍ yīōū ndu̍.
A̍ mɛ̄ɛ̍ Chi̍i̍sū vi᷅ yɛ̍
(Ma̍kī 15:33-41; Lu̍kū 23:44-49; Chɔ᷄ŋ 19:28-30)
45A̍ bōōndi̍i̍ pāa̍le̍ŋ lē sīm o̍ bōlle̍ŋ chōo̍ ve̍ ki̍nɛ̍i̍, mi̍ lē nyūm pɔ̍lī. Mi̍ nyūmnda̍ŋ mā tūāl kpi᷅ŋgbi̍ o̍ lɛ̄ŋndē lēŋ ni᷄ŋ kpo̍u̍. Mi̍ mā lō mā tūālāā ha̍a̍a̍ mbo̍ kūā ha̍vɛ̄i̍la̍ŋ lā yāa̍. 46A̍ bōōndi̍i̍ pɛ̄ŋgī lāwa̍li̍ ki̍nɛ̍i̍ mi̍ Chi̍i̍sū de̍ŋī chōo̍ cho̍o̍ kpe̍le̍ŋ. Mbo̍ dīmī āā, “I̍lā, I̍lā, lāma̍ sāba̍tāni̍?” Ko̍ŋ cho̍ ni̍ āā, Mɛ̄lɛ̄ka̍ nūu̍, Mɛ̄lɛ̄ka̍ nūu̍, vɛ᷅ ya̍ mālɔ̄ɔ̍?
47Mi̍ wāŋnda̍ ā pūm a̍ wa̍ lo̍ŋ nda̍ tūɛ̄ī dīōm o̍ di̍mi̍ wo̍. Ma̍ lō lo̍ŋ ma̍ dīmī āā, “Ō chō Īla̍a̍chā vēēlōo̍.” 48Mi̍ wānā pi᷅lɛ̍ nyāānu᷄ŋ le̍pi᷅lɛ̍ kpe̍ mbo̍ kɔ̍ chu̍ā nyɛ̄ fɔ̄fɔ̄ū pūm. Mbo̍ māl o̍ mūɛ̄īmā wāālɛ̍i̍ma̍ pu̍m ni᷄ŋ. Mbo̍ yīī o̍ sīōndōōle̍ŋ. Mbo̍ hēēlū le̍ mbō ke̍ Chi̍i̍su̍ mbō ko᷄l.
49Kɛ̍, mi̍ wāŋnda̍ ā pīli̍a̍a̍ dīmī āā, “Ma̍l lɔ̍ ndu̍ mī ŋ̄ chē tē Īla̍a̍chā hu᷅ŋ ni̍ŋ mbō pīŋi̍ ndu̍.”
50Mi̍ Chi̍i̍sū de̍ŋī vɛ̄lɛ̄ chōo̍ cho̍o̍ kpe̍le̍ŋ. O̍ ko̍ŋ kɔ̍ɔ̍lī, mbo̍ mālnu᷄ŋ kɔ̍l.
51Mɛ̄ɛ̍ Chi̍i̍sū ma̍lnu̍ŋ kɔ̍l, mi̍ kōlā bɛ̍ndu̍ wa̍ ō lāndāā o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ cha᷄ŋ a̍ tɛ̄ndāa̍ mālūāŋ mbo̍ fūūlūū lɛ̄ŋ di̍. O̍ ko̍ŋ kɔ̍ɔ̍lī, mi̍ lɛ̄ŋnde̍ŋ lē nyīīyā. Mi̍ pōūta̍ŋ lā tɛ̄ɛ̄ndīāā. 52Mi̍ sɛ̄īla̍ŋ lā tɛ̄ɛ̄ndīāā. Mi̍ lā kūūmbu᷄ŋ. Mi̍ wānāa̍ cho̍ le̍ Mɛ̄lɛ̄ka̍ wa̍ a̍ vi᷅ ni᷅ŋ pāāndū wa̍ ma̍ mīīŋgū yōōmū ta̍u̍. 53Ma̍ fūūlīa̍ŋ o̍ sɛ̄īla̍ŋ ni᷄ŋ. Ndu̍yɛ̍, mɛ̄ɛ̍ Chi̍i̍sū mi̍i̍ŋgu̍ yōōmū, mi̍ wāŋnda̍ ha̍ā kūā o̍ chi̍e̍e̍ cho̍ le̍ Mɛ̄lɛ̄ka̍ wō. Mi̍ wānāā fāŋgā fa̍ŋgā chā nda̍.
54Mi̍ wānā bɛ̍ndū so̍vɛ̄i̍ya̍ a̍ so̍vɛ̄i̍ya̍a̍ wa̍ Chi̍i̍sū lēhɔ̄l la̍ chā a̍ mɛ̄ɛ̍ lɛ̄ŋnde̍ŋ lē nyīīya̍ yɛ̄, a̍ nyɛ̄ o̍ nyɛ̍ yɔ̍nu̍ŋ. Mi̍ sīōōŋnde̍ bīī nda̍ ta̍u̍. Ma̍ dīmī āā, “Po̍ Mɛ̄lɛ̄ka̍a̍ lēkɛ̍ndɛ̍ī o̍ wa̍ ni̍.”
55A̍ bōōndi̍i̍ ke̍ŋ, wāŋ lāāndūa̍a̍ ā wa̍ lo̍ŋ ta̍u̍. Ā wa̍ īsīsi̍ kɔ̍ɔ̍lī kɔ̄ɔ̄lī mā tōfā. Chɔ̄nɔ᷄ŋndo̍ o̍ lɛ̄ŋndē Kāli̍līle̍ŋ ni᷄ŋ, ma̍ tūāl Chi̍i̍su̍ kɔ̄ɔ̄lī le̍ ndu̍ wāa̍ mālāa̍ a̍ nyɛ̄ o̍ nyɛ̄ o̍ ha̍ū bā. 56Wāŋ lāāndūāā kāŋ ā ti᷄ŋ a̍ cho̍ ha̍ā ni̍, Mēēle̍ Mākāli᷅ŋ, a̍ Mēēle̍ o̍ ve̍lū Chēmi̍si̍ nda̍ Chōo̍sɛ̍ wo̍, a̍ pūa̍a̍ Sɛ̍bɛ̍dīī kālā nda̍.
Ā mɛ̄ɛ̍ nda̍ chɔ̍ Chi̍i̍sū yɛ̍
(Ma̍kī 15:42-47; Lu̍kū 23:50-56; Chɔ᷄ŋ 19:38-42)
57A̍ pāa̍le̍ de̍lāāle̍ŋ mi̍ lāŋu̍nɔ̄ sūlāā pīlɛ̍ hūŋ, dīōla̍ŋ āā, Chōo̍sɛ̍, wānā wa̍ā Ālīmāti̍a̍ā chi̍e̍e̍. Ndu̍ bɛ̍ɛ̍ bu̍ɛ̍ī Chi̍i̍sōo̍ o̍ wa̍ ni̍. 58Mbo̍ kūā mbo̍ kɔ̍ nyu̍nā Pa̍i̍lē le̍ mbō ke̍ ndu̍ dīāllu᷄ŋ Chi̍i̍so᷄ŋ. Mi̍ Pa̍i̍lē di̍mī māā ā ke̍ ndu̍ dīāllo̍ŋ. 59O̍ ko̍ŋ kɔ̍ɔ̍lī, mi̍ Chōo̍sɛ̍ ku̍ā a̍ mu̍ŋ mbo̍ sīmbū mu̍ŋ o̍ fe̍ŋgbɛ̍ sɛ̍nɛ̄īyo̍ ni᷄ŋ. 60-61Ndu̍yɛ̍, Chōo̍sɛ̍ ndu̍ o̍o̍ nɔ̍ sɛ̄īyo̍ o̍ bā ō tūāūwāā o̍ pōūwo̍ ni᷄ŋ māā būūlū le̍ ndu̍ pi̍la̍. Mɛ̄ɛ̍ o̍ si̍mbū dīāllu᷄ŋ Chi̍i̍so᷄ŋ o̍ fe̍ŋgbɔ̍ɔ̍ ni᷄ŋ, mbo̍ wōū mu̍ŋ o̍ sɛ̄i̍ būūlū ko̍ŋ ni᷄ŋ. Mēēle̍ Mākāli᷅ŋ ni̍ a̍ Mēēli̍o̍o̍ ō pīlɔ̍ɔ̄ ā wa̍ īchāli̍ lo̍ŋ a̍ hɔ̄lla̍ nda̍ ā mūlīāā bā sɛ̄īyo̍. Mɛ̄ɛ̍ Chōo̍sɛ̍ wo̍u̍ dīāllo̍ŋ o̍ sɛ̄īyo̍ ni᷄ŋ, mbo̍ pīmbūl pōū bɛ̄ndōo̍ mbo̍ sɛ̄ɛ̄ŋūū o̍ sōndōo̍. Mbo̍ kūānu᷄ŋ.
Ā hāndu̍ so̍vɛ̄i̍ya̍ le̍ sɛ̄īyo̍ māndāa̍
62Dīi̍māndɔ̄ɔ̍, o̍ pāa̍le̍ pɛ̍ŋgīāālē Chu̍ūwa̍ chōo̍, mi̍ wānāā bɛ̄ndūāā sōlīāā lāsa̍lāa̍ a̍ ku̍ndā Fālīsi̍īya̍ kūā nāa̍ Pa̍i̍lē chu̍a̍. 63Mɛ̄ɛ̍ nda̍ kūɛ̄ ma̍ kɔ̍ di̍mūl Pa̍i̍lē āā, “Fāllo̍, ŋ̄ lōōnu̍ŋ nyɛ᷅ pīlɛ̍ mi̍ lāŋu̍nɔ̄ lāchōōwā kōŋ dīmī ndu̍ lɔ̍ɔ̍ o̍ wa̍ yōōmū wo̍. Mbo̍ dīmī āā, ‘Tē pālɛ̍i̍ hīōū pɛ̍ i̍ ya̍a̍, I̍ cho̍ mīīŋgū yōōmū.’ 64Le̍la̍ŋ, di̍mi̍ mī so̍vɛ̄i̍ya̍ mānda̍ sɛ̄īyo̍ nyɛ̄ kɛ̄ndɛ̍ī ha̍a̍a̍ mbō lo̍ o̍ ko̍ŋ mī pālɛ̍i̍ ya̍a̍ ve̍ hīōū, yɔ̄ŋi̍ bu̍ɛ̍i̍yāā ndūa̍a̍ lo̍ o̍ ko̍ŋ mā chīīmbu̍u̍ dīāllūŋ ndɔ᷄ŋ. Kāni̍, tē ā chu̍a̍ mu̍ŋ pɛ̍, ā chō wāŋnda̍ dīmūl māā ō mīīŋgu̍ yōōmū. Ndu̍yɛ̍ chōōlā lāŋ la̍ŋ bɛ̍ɛ̍ la̍ hi̍a̍ū ni̍ŋ lēwɔ̄ū a̍ lā tāse̍la̍ŋ.”
65Mi̍ Pa̍i̍lē di̍mūl nda̍ āā, “Lā chu̍a̍ so̍vɛ̄i̍ya̍ mā kɔ̍ ma̍ndā sɛ̄īyo̍ nyɛ̄ kɛ̄ndɛ̄ kɛ̍ndɛ̍ī.”
66Mɛ̄ɛ̍ o̍ di̍mu̍l nda̍ le̍nde̍, ma̍ kɔ̍ ho᷅l tāāmāsi̍o̍o̍ o̍ pōu̍ wa̍ o̍ sɛ̄īyo̍ sōndōo̍ wo̍, māā tē wānā ndu̍ o̍o̍ fa̍ŋa̍ pōū kōŋ pɛ̍, ā sīna̍. Ma̍ kɛ̄sī so̍vɛ̄i̍ya̍ le̍ ndu̍ māndāa̍.
Kisi Bible © Bible Society in Liberia, 2015.