Lu̍kū 24
24
Chi̍i̍sū mi̍i̍ŋgu̍ yōōmū
(Māa̍ti̍u̍ 28:1-10; Ma̍kī 16:1-8; Chɔ᷄ŋ 20:1-10)
1Ī dīi̍yo̍ pu̍u̍ŋ, o̍ pāa̍le̍ Kpu̍yālē lēŋ chōo̍, mi̍ wāŋ lāāndūa̍a̍ ha̍ā chūā si̍ɛ̍ndīi̍ma̍ nda̍ tōōsi̍a̍a̍ wa̍ŋ ma̍ kūā o̍ sɛ̄īyo̍. 2Mɛ̄ɛ̍ nda̍ fūūlu̍u̍, ma̍ kōmāl pōu̍ wa̍ o̍ sɛ̄i̍ būūlōo̍ ho̍ō sōndōo̍ wo̍ ō fāŋāā. 3Kɛ̍, mɛ̄ɛ̍ nda̍ lūɛ̄ī o̍ sɛ̄īyo̍ ni᷄ŋ, ā sēēlu̍ŋ di̍a̍llu᷄ŋ Māsānɔ̄ɔ̍ Chi̍i̍so᷄ŋ te̍. 4Ā lo̍ kɔ̄llo̍ kēēlāa̍ a̍ ndi̍ o̍kɔ̄ɔ̄, o̍ lē pīlɛ̍ ni᷄ŋ kpe̍, ma̍ chā pūa̍a̍ ā ŋīɔ̍ɔ̍ŋ īsīsi̍ nda̍ īkɛ̄i̍. Nyɛ̄la̍ wa̍ nda̍ lēkɔ̄ɔ̍ la̍ŋ lā wa̍ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍ mɛ̄ɛ̍ nyɛ̄ ŋūāla̍lɛ̍īyo̍ tōsā nu̍a̍ā yɛ̍. 5Mi̍ sīōōŋnde̍ bīī wāŋ lāāndūa̍a̍ ha̍ā. Ma̍ tūndū bōlle̍ lɛ̄ŋ. Mi̍ pūa̍a̍ dīmūl nda̍ āā, “Lā vɛ᷅ wāna̍ cho̍ yōōmū wo̍ nūūvīa̍a̍ nāa̍ nda̍ chɔ̄ wa̍nāā vīlɛ̍i̍ya̍ wa̍? 6Chi̍i̍sū cho̍ na̍nu᷄ŋ te̍. Ō mīīŋgu̍ yōōmū. Lā lōōnu̍ŋ nyɛ᷅ o̍ di̍mu̍l nya̍ lɔ̍ɔ̍ nya̍ wa̍ nya̍ nda̍ā Kāli̍lī wo̍. 7Lɔ̍ɔ̍ nya̍ wa̍ Kāli̍lī wo̍ mbo̍ dīmūl nya̍ āā, ‘Ā chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ mālɔ̄ɔ̄ wānāā wɔ̄ɔ̍ŋnda̍ ō bā mā dīī ndu̍ o̍ yɔ̄m sīŋgāfīlāa̍ chōo̍. Ndu̍yɛ̍ o̍ ko̍ŋ kɔ̍ɔ̍lī, tē pālɛ̍i̍ hīōū pɛ̍ i̍ ya̍a̍ ō mīīŋgu̍ vɛ̄lɛ̄ yōōmū.’ ”
8O̍ ko̍ŋ, mi̍ wāŋ lāāndūa̍a̍ ha̍ā lōōnu᷄ŋ dɔ̍ɔ̍ di̍ōmndā Chi̍i̍sū di̍mu̍l nda̍ la̍ŋ. 9Mɛ̄ɛ̍ nda̍ fāŋa̍ŋ o̍ sɛ̄īyo̍, ma̍ mīīŋgū. Ma̍ kɔ̍ dīmūl bu̍ɛ̍i̍yāā tɔ̍ a̍ ā pīli̍a̍a̍ a̍ wānāā lāāla᷄ŋnda̍ ā tūa̍a̍ nyɛ̄ o̍ nyɛ̍ yɔ̍nu̍ŋ. 10Wāŋ lāāndūa̍a̍ di̍mu̍l wānāā Chi̍i̍sū ve᷅m hɔ̄ltē ndɔ̄ wa̍ sūɛ̍i̍ he̍ī ya̍, nda̍ cho̍ ha̍ā ni̍, Mēēle̍ Māŋgāli᷅ŋ ni̍, a̍ Chōha̍nā, a̍ Mēēle̍, kālāa̍ Chēmi̍si̍, a̍ wāŋ lāāndūa̍a̍ ā pīli̍a̍a̍, ā nda̍ kūɛ̄ nda̍ nda̍ā wa̍. 11Kɛ̍, bu̍ɛ̍īya̍ ha̍ā ā lāāla̍ŋ nyɛ᷅ wāŋ lāāndūa̍a̍ dīmi̍ wo̍ le̍. Ā chu̍e̍ ndi̍ māā sūɛ̍i̍ yɔ̍nu̍ŋ kpe̍e̍kpe̍i̍ le̍. 12Kɛ̍ o̍ ko̍ŋ kɔ̍ɔ̍lī, mi̍ Pītɛ̍ cha̍ŋ mbo̍ kūā o̍ sɛ̄īyo̍ a̍ kīlta̍ŋ. Mɛ̄ɛ̍ o̍ tūndu᷄ŋ mbo̍ to̍fā o̍ sɛ̄īyo̍ ni᷄ŋ, kōlāla̍ fe̍ŋgbɛ̍la̍ wānā vi̍lɛ̍i̍yo̍ wa̍ lēni᷄ŋ nda̍ŋ ko̍ni̍ o̍ che᷅ ni̍. Mbo̍ mīīŋgū a̍ kɔ̄llo̍ kēēlāa̍ a̍ nyɛ̍ yɔ̍nu̍ŋ ndo̍ o̍kɔ̄ɔ̄.
Nyɛ̍ yɔ̍nu̍ŋ o̍ nɛ̄i̍ Ɛ̄ma̍yɔ̄ɔ̄wo̍ wo̍
(Ma̍kī 16:12, 13)
13O̍ pāa̍le̍ pi᷅lɛ̍lē lēŋ chōo̍ kpe̍, wānāā lāāla᷄ŋnda̍ ā ŋīɔ̍ɔ̍ŋ ā wa̍ kɔ̄la̍ŋ Ɛ̄ma̍yɔ̄ɔ̄ chi̍e̍e̍. Chɔ̍ŋ Chūlu̍sɛ̄lɛ̄m kɔ̍ Ɛ̄ma̍yɔ̄ɔ̄ ō chō māchūāā le̍ kɔ̄lā ha̍vɛ̄i̍la̍ ti̍ɔ̍ɔ̍ŋ. 14Ā wa̍ kɔ̄la̍ŋ a̍ sūūki̍āŋndo̍ a̍ sɔ̄ɔ̍ŋ yɔ̍nu̍ŋ ki̍nɛ̍i̍ yo̍ŋ o̍kɔ̄ɔ̄. 15Ā lo̍ sūūki̍āŋndo̍ a̍ nyūūni̍āŋndo̍, mi̍ Chi̍i̍sū pi̍la̍ hu᷅ŋ mbo̍ sɔ̄ɔ̄ŋgūū nda̍ īkɛ̄i̍ mā kūā nda̍ nda̍ā. 16Ma̍ chā ndu̍, kɛ̍ ā nɔ̄la̍ mā sīna̍ ndu̍ le̍. 17Mbo̍ nyūnā nda̍ āā, “A̍ yɛ̄ɛ̍nɛ̍ o̍kɔ̄ɔ̄ nya̍ chō yɛ̄ kɔ̄la̍ŋ a̍ sūūki̍āŋndo̍?”
Ma̍ sīm yi̍ a̍ hɔ̄lla̍ nda̍ ā tāmbɛ̍i̍ pɛ̍. 18Mi̍ ō nda̍ vēēlū āā, Ki̍lo̍pāā wo̍, dīmūl ndu̍ āā, “Kpōkō, wānāa̍ hi᷅ŋ Chūlu̍sɛ̄lɛ̄m nda̍ ki̍nɛ̍i̍ mɛ̄ɛ̍ nūm dɔ̍ɔ̍ a̍ si̍nā sɔ̍ɔ̍ŋ yɔ̍nu̍ŋ lo̍ŋ le̍di̍i̍ndo̍ ho̍ō wo̍ŋ te̍.”
19Mbo̍ nyūnā nda̍ āā, “Sɔ̄ɔ̍ŋ yɛ̄ɛ̍nɛ̍?”
Ma̍ mūlī āā, “Bāā a̍ tu̍i̍i̍ a̍ Chi̍i̍su̍ o̍kɔ̄ɔ̄ o̍ fu̍la̍ Na̍a̍sa̍lūɛ̄ī yo̍ le̍? Wāna̍ su̍a̍ā le̍ Mɛ̄lɛ̄ka̍ wo̍ o̍ wa̍ ni̍. Ndu̍yɛ̍, mi̍ Mɛ̄lɛ̄ka̍ a̍ wāŋndā chīe̍e̍ya̍ kpo̍u̍, a̍ chu̍ā ndu̍ māā ō chō wāna̍ kpāāyā, kāni̍ fo̍ndōle̍ a̍ nyɛ̄ o̍ to̍sa̍ wo̍ a̍ dīōmndā o̍ di̍mi̍ la̍ŋ. 20Kɛ̍ ndu̍yɛ̍ mi̍ wānāā bɛ̄ndūāā sōlīāā lāsa̍lāa̍, a̍ wānāā nāā bɛ̍ndūa̍a̍, ā māl ndu̍ Pa̍i̍lē o̍ bā le̍ mī Pa̍i̍lē ndu̍ o̍o̍ kēlū yāmɛ̍i̍ le̍ ndu̍ dīyɔ̄ɔ̍. Ndu̍yɛ̍ o̍ ko̍ŋ kɔ̍ɔ̍lī, ma̍ bāŋ ndu̍ o̍ yɔ̄m sīŋgāfīlāa̍ chōo̍ ma̍ dīī ndu̍. 21Kɛ̍, na̍a̍ ŋ̄ wa̍ lēhɔ̄l o̍ nɛ̄ī le̍ ndu̍ māā ndu̍ cho̍ wāna̍ ndu̍ o̍o̍ nɔ̍ le̍ wāŋnda̍ I̍sɔ̄lūɛ̄ī bāŋāa̍ wo̍ ni̍. Ō fūla̍ wɔ̍ bɛ̍ɛ̍ o̍ ko̍ŋ kɔ̍ɔ̍lī, ō chō ni᷅ŋ hāū pa̍lɛ̍i̍ ī yāa̍, chɔ̍ŋ a̍ bōōndi̍i̍ sūɛ̍i̍ he̍ī yɔ̄nu̍ŋ pɛ̍i̍ ye̍. 22O̍ ko̍ŋ kɔ̍ɔ̍lī, mi̍ wāŋ lāāndūa̍a̍ ā pūm na̍a̍ tɛ̄ɛ̄ŋ a̍ to̍sā mi̍ ŋ̄ dūāūnu᷄ŋ kɔ̄ndɔ̄fi̍li̍. Ma̍ kūā o̍ sɛ̄īyo̍ ha̍ū i̍di̍i̍ pu̍u̍ŋ. 23Kɛ̍, ā sēēlu̍ŋ di̍a̍llūŋ ndɔ᷄ŋ te̍. Ma̍ hu᷄ŋ di̍mūl na̍a̍ māā ma̍ chā ki̍i̍la̍a̍ Mɛ̄lɛ̄ka̍a̍ ā ŋīɔ̍ɔ̍ŋ o̍ yi̍lāŋndo̍ ni᷄ŋ. Ma̍ dīmī māā mi̍ ki̍i̍la̍a̍ Mɛ̄lɛ̄ka̍a̍ ha̍ā dīmūl nda̍ māā Chi̍i̍sū cho̍ yōōmū. 24Mi̍ chāāŋāā nāa̍ ā ti᷄ŋ kūā o̍ sɛ̄īyo̍. Mɛ̄ɛ̍ nda̍ kūɛ̄, ma̍ sāālu᷄ŋ mɛ̄ɛ̍ wāŋ lāāndūa̍a̍ dīmi̍ yɛ̍. Kɛ̍, Chi̍i̍sū ndu̍, ā chi̍ ndu̍ le̍.”
25Mɛ̄ɛ̍ Ki̍lo̍pāā so̍ō dīōmnda̍ŋ nda̍ŋ, o̍ ko̍ŋ kɔ̍ɔ̍lī, mi̍ Chi̍i̍sū dīmūl nda̍ āā, “Lā kēndū pɛ̄ɛ̄kū fāŋgā. Kɔ̄ltā nyāla̍ŋ lā kēndū le̍ lāāla᷄ŋndo̍ a̍ nyɛ̄ o̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ wo̍ kpa᷅. 26Lā si̍nā nu̍a̍ā māā sɔ̄ɔ̍ŋ ŋ̄mɔ̍nɔ̍ŋ mu᷅ŋ ŋ̄ nɔ̄ mī ŋ̄ yɔ̄nu̍ŋ a̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍? Ndu̍yɛ̍, lā si̍nā māā tē ŋ̄ yɔ̄nu̍ŋ ndu̍ pɛ̍, o̍ ko̍ŋ kɔ̍ɔ̍lī ō hu᷄ŋ lu̍ɛ̍ī o̍ nāŋɔ̄ɔ̄ ndɔ̄ɔ̍ ni᷄ŋ te̍?” 27O̍ ko̍ŋ kɔ̍ɔ̍lī, mi̍ Chi̍i̍sū tɛ̍ɛ̍sīāl ni᷅ŋ nda̍ nyɛ̍ cho̍ ō pōōnyīāā o̍ Yāu̍ Mɛ̄lɛ̄ka̍a̍ ni᷄ŋ a̍ ndu̍ pi̍la̍ o̍kɔ̄ɔ̄ wo̍. Mɛ̄ɛ̍ o̍ ka̍ndu̍ a̍ mɛ̄ɛ̍ i̍ cho̍ ī pōōnyīāā o̍ Yāu̍la̍ Mūu̍sē la̍ŋ ni᷄ŋ yɛ̍, mbo̍ kūā a̍ yāu̍la̍ wānāa̍ su̍a̍ā le̍ Mɛ̄lɛ̄ka̍ wa̍ kpo̍u̍ a̍ po̍o̍nyi̍a̍a̍ la̍ŋ.
28Ā lo̍ kɔ̄la̍ŋ, nda̍ nda̍ā ma̍ fūūlūū o̍ chi̍e̍e̍ nda̍ wa̍ kɔ̄la̍ŋ ndo̍ īkɛ̄i̍. Mɛ̄ɛ̍ nda̍ fūūlu̍u̍, mi̍ Chi̍i̍sū ka̍ndū tōsāa̍ mɛ̄ɛ̍ wānā wa᷅ hi̍o̍u̍nɔ᷄ŋ la̍chi̍. 29O̍ ko̍ŋ, ma̍ nyɔ̄ɔ̄lū ndu̍ nyɔ̄ɔ̄lōo̍ pi̍la̍ āā, “Ŋ̄ lɔ̄lnu᷅ŋ na̍nu᷄ŋ. Kāni̍ pāa̍le̍ŋ lē chō ni᷅ŋ lē chūwɔ̄ɔ̍. Nyūmnda̍ŋ mā chō ni᷅ŋ tōlɔ̄ɔ̍.” Mbo̍ kūā nda̍ nda̍ā o̍ nda̍ lo̍ chīɛ̄īyo̍. 30Mɛ̄ɛ̍ nda̍ wa̍ nyɛ̄ dīa̍a̍ dīo̍o̍ nda̍ nda̍ā, mi̍ Chi̍i̍sū chu̍ā bēe̍dīi̍yo̍. Mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī, mbo̍ kē nda̍. 31Mɛ̄ɛ̍ o̍ ke̍ nda̍ bēe̍dīi̍yo̍, ma̍ chā ni᷅ŋ kpe̍e̍kpe̍i̍, ndu̍yɛ̍ o̍ ko̍ŋ kɔ̍ɔ̍lī, ma̍ sīnā māā ndu̍ ni̍. Sīnāa̍ māā ndu̍ ni̍, mbo̍ lō nda̍ o̍ hɔ̄l lē pīlɛ̍ kpe̍. 32O̍ ko̍ŋ kɔ̍ɔ̍lī, ma̍ sa̍āŋ di᷅mu̍la᷅ŋndo̍ āā, “Mɛ̄ɛ̍ o̍ wa̍ sūɛ̍i̍ nāa̍ na̍a̍ chūā o̍ nɛ̄ī, ndu̍yɛ̍ mbo̍ wā na̍a̍ sūɛ̍i̍ Mɛ̄lɛ̄kɛ̍i̍ tɛ̄ɛ̄sīāllo̍, mi̍ kɔ̄lta̍ŋ lā yɔ̄nu᷄ŋ na̍a̍ nyɛ̄ kɛ̄ndɛ̄ wu̍ye̍ wu̍ye̍.”
33O̍ ko̍ŋ kɔ̍ɔ̍lī, ma̍ cha᷄ŋ le̍ pi᷅lɛ̍ kpe̍ ma̍ mīīŋgū Chūlu̍sɛ̄lɛ̄m. Mɛ̄ɛ̍ nda̍ mīīŋgu̍, ma̍ kōmāl bu̍ɛ̍i̍yāā tɔ̍ a̍ ā pīli̍a̍a̍ lo̍ŋ. Ā wa̍ ku̍ndā nda̍ wānāā lāāla᷄ŋnda̍ ā pīli̍a̍a̍. 34Mi̍ pūa̍a̍ ŋi̍ɔ̍ɔ̍ŋnda̍ ha̍ā dīmūl nda̍ āā, “Ī chō tōnya̍ māā Māsānɔ̄ɔ̍ mīīŋgu̍ yōōmū. Kāni̍ fo̍ndōle̍, ō chɔ̄mnu̍ŋ nāa̍ Sa̍i̍mɔ̄ŋ chu̍a̍.”
35O̍ ko̍ŋ kɔ̍ɔ̍lī, mi̍ pūa̍a̍ ŋi̍ɔ̍ɔ̍ŋnda̍ chɔ̄m nda̍ nyɛ̍ yɔ̍nu̍ŋ o̍ nɛ̄ī yo̍. Ma̍ chɔ̄m nda̍ māā yīmī o̍ yi̍mi̍ bēe̍dīi̍yo̍ wo̍, o̍ ko̍ŋ nda̍ sīna̍ ni᷅ŋ ni̍ māā ndu̍ Chi̍i̍sū ni̍.
Chi̍i̍sū chɔ̍mnu̍ŋ bu̍ɛ̍i̍yāā ndūa̍a̍
(Māa̍ti̍u̍ 28:16-20; Ma̍kī 16:14-18; Chɔ᷄ŋ 20:19-23; Wa̍lta̍ Wānāa̍ Chi̍i̍sūa̍a̍ 1:6-8)
36Pūa̍a̍ ha̍ā lo̍ sūɛ̍i̍ a̍ ndi̍ o̍kɔ̄ɔ̄, mā chā Chi̍i̍su̍ īsīsi̍ nda̍ tɛ̄ɛ̄ŋ. Mbo̍ yīl nda̍ āā, “Lā wa̍ a̍ kɔ̄ltā nyūlū.”
37Mɛ̄ɛ̍ nda̍ chē ndu̍, ma̍ wōōlū. Ndu̍yɛ̍ mi̍ sīōōŋnde̍ bīī nda̍. Kāni̍ fo̍ndōle̍, ā wa̍ ko̍ kɔ̍l māā wānā vi̍lɛ̍i̍yo̍ fu̍la̍ nda̍ o̍ hɔ̄l ni̍. 38Mbo̍ nyūnā nda̍ āā, “Sīōōŋīī yɛ̄ɛ̍nɛ̍ nya̍ chō yɛ̄? Lā vɛ᷅ kīīsa᷄ŋndo̍?” 39Mbo̍ dīmī āā, “Lā tōfa̍ ya̍ fōōfōla̍ŋ o̍ bāla̍ŋ a̍ pēlo᷄ŋ. Ya̍ kpe̍e̍kpe̍i̍ cho̍ ho̍ō ni̍. Lā pīla̍ŋ ya̍ mī lā chē. I̍ nɔ̍ dīāllo̍ŋ a̍ pāāla̍ŋ lēni᷄ŋ. Wānā vi̍lɛ̍i̍ fu̍lā ho̍ō wa̍nā o̍ hɔ̄llo̍, ndu̍ cho̍ le̍nde̍ le̍. Nyā pi̍la̍ lā chō chɔ̄ɔ̍.”
40Mɛ̄ɛ̍ o̍ di̍mi̍ dīōmnda̍ŋ nda᷅ŋ, mbo̍ chɔ̄m nda̍ bāla̍ŋ a̍ pēlo᷄ŋ. 41Mi̍ ī bīī nda̍ kɔ̄ndɔ̄fi̍li̍. Kɔ̄l kɛ̄ndɔ̄ɔ̍ wa̍ nda̍ ha̍a̍a̍ nda̍ a̍a̍ cha᷅ ko̍ni̍ māā lɔ̄mā sɔ̄lāā. Kɛ̍ o̍ ko̍ŋ ni̍ŋ kpo̍u̍, ā lāāla̍ŋ māā ndu̍ le̍. O̍ ko̍ŋ, mbo̍ nyūnā nda̍ āā, “Lā nɔ̄ pa̍ nyɛ̍ dīāā na̍nu᷄ŋ?” 42O̍ ko̍ŋ kɔ̍ɔ̍lī, ma̍ kē ndu̍ sūū yāūwāa̍. 43Mbo̍ bīī sūūwo̍ ho̍ō, mbo̍ dīā nda̍ kpe̍de̍ o̍ hɔ̄l.
44Mbo̍ lō o̍ ko̍ŋ mbo̍ dīmūl nda̍ āā, “Bōōndi̍i̍ ya̍ wa̍ nya̍ tɛ̄ɛ̄ŋ nde̍ mi̍ di̍mūl nya̍ māā nyɛ̄ o̍ nyɛ̍ di̍mi̍ŋ a̍ ya̍ o̍kɔ̄ɔ̄ ō chō yɔ̄nɔ᷄ŋ. Ko̍ŋ cho̍ ni̍, nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ a̍ ya̍ o̍kɔ̄ɔ̄ wo̍, a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ dīmi̍ wo̍, a̍ nyɛ̄ Yāū Sa᷅m dīmi̍ wo̍.”
45O̍ ko̍ŋ, mi̍ Chi̍i̍sū to̍sā ma̍ sīnā nyɛ̄ sūɛ̍i̍ Mɛ̄lɛ̄kɛ̍i̍ dīmi̍ wo̍ pɛ̄ŋgu̍. 46Mbo̍ dīmūl nda̍ āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ māā Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, chō mɔ̍nɛ̍i̍ bīyɔ̄ɔ̄ mbō vī. O̍ ko̍ŋ kɔ̍ɔ̍lī, mbō mīīŋgu̍ yōōmū o̍ pālɛ̍i̍ ya̍a̍ ndɔ̄ɔ̍. 47Ndu̍yɛ̍, lā dīmūl ni̍ŋ wa᷅ŋnda̍ o̍ lɛ̄ŋnde̍ ni᷄ŋ fa̍ū o̍ chi̍e̍ēŋndo̍ chōo̍, māā ā ma᷄l yɔ᷅ŋndā ndāla̍ wɔ̍ɔ̍ŋnda̍ŋ. Mɛ̄lɛ̄ka̍ nɔ̄lā mbō ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ o̍ sa̍bū ndɔ̄ɔ̍ ni᷄ŋ.” Mbo̍ dīmūl nda̍ āā, “Chūlu̍sɛ̄lɛ̄m nya̍ nɔ̄ le̍ kāndɔ̄ɔ̍ ni̍. 48Nya̍ nɔ̍ ni̍ mī lā dīmu̍l wāŋnda̍ sɔ̄ɔ̍ŋ nya̍ chē mu᷅ŋ o̍ yɔ̄nɔ᷄ŋndo̍ wo̍ŋ. 49Ndu̍yɛ̍, I̍ cho̍ tōsā mī Nyi̍na̍ Mɛ̄lɛ̄ka̍a̍ tōl nya̍ kɔ̄ɔ̄lī mɛ̄ɛ̍ Fi̍nyā nūu̍ chūe̍l nya̍ būŋgɛ̄i̍ yɛ̍. Lā nɔ̄ le̍ chūmndo̍ Chūlu̍sɛ̄lɛ̄m, ha̍a̍a̍ mbō lo̍ o̍ ko̍ŋ mī lā sɔ̄la̍ kpāāya̍ cho̍ chɔ̄nɔ᷄ŋ cho̍o̍ cho̍o̍ wo̍.”
Chi̍i̍sū he̍l o̍ fo̍nda᷄ŋ Mɛ̄lɛ̄ka̍a̍
(Ma̍kī 16:19-20; Wa̍lta̍ Wānāa̍ Chi̍i̍sūa̍a̍ 1:9-11)
50O̍ ko̍ŋ kɔ̍ɔ̍lī, mbo̍ fāŋa᷄ŋ a̍ nda̍ Chūlu̍sɛ̄lɛ̄m. Mbo̍ kūā a̍ nda̍ ba᷅ Bɛ̍ta̍nī wo̍ pɔ̍. Mɛ̄ɛ̍ nda̍ fūūlu̍u̍, mbo̍ hēēlū bāla̍ŋ chōo̍. Mbo̍ dūāū nda̍ sa̍lā. 51Ō lo̍ nda̍ sa̍lāa̍ dɔ̄wɔ̄ɔ̍, mbo̍ hēlnu᷄ŋ o̍ ɛ̄chɛ̍nɛ̄ mbo̍ mɛ̄ī nda̍. 52O̍ ko̍ŋ kɔ̍ɔ̍lī, ma̍ sāŋgālā ndu̍. Ma̍ mīīŋgū Chūlu̍sɛ̄lɛ̄m a̍ kɔ̄l kɛ̄ndɛ̄ bɛ̄ndōo̍. 53Mɛ̄ɛ̍ nda̍ mīīŋgu̍, ma̍ hīāū lāchī a̍ Mɛ̄lɛ̄ka̍ sāŋgālāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ, le̍ lɔ̍ɔ̍ lɔ̍ɔ̍.
Currently Selected:
Lu̍kū 24: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.