Āīsa̍yā 2
2
A̍ kɔ̄l nyūlū fɛ̍ɛ̍ŋ a̍ fɛ̍ɛ̍ŋ wa᷅ ni̍ŋ ndo̍ o̍kɔ̄ɔ̄
(Ma̍kāl 4:1-3)
1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kē vɛ̄lɛ̄ Āīsa̍yā, po̍ E̍mɔ̍ɔ̍sī wo̍ yōōŋgōo̍ le̍ Chu̍dā a̍ Chūlu̍sɛ̄lɛ̄m.
2Mi̍ Āīsa̍yā di̍mī māā, te̍le̍ŋ cho̍ fūūlūū, tē pālɛ̍i̍ mɛ̍ɛ̍lɛ̄i̍ le̍ chi̍e̍ēŋndo̍ ho̍ō ī fūūlu̍u̍ pɛ̍,
pēmbīī chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō ō tāŋgūlāā lē chōo̍ ve̍,
ī bāndū ni̍ŋ mī ī hīōū pēmbūŋ bɛ̄ndo᷄ŋ kpo̍u̍. Pēmbūŋ pɔ̄mbɔ᷄ŋ kpo̍u̍ ŋ̄ wā ni̍ŋ lɛ᷅ŋ pɔ̍ pɔ̍.
Wāŋnda̍ o̍ lɛ̄ŋnde̍ ni᷄ŋ kpo̍u̍ ā wā ni̍ŋ kɔ᷅la̍ŋ ndo̍ŋ i̍kpɔ̍lɔ̄ kpɔ̄lūɛ̍i̍.
3Wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ ni̍ŋ, ā wā ni̍ŋ di᷅mu̍la᷅ŋndo̍ āā,
“Lā ŋ̄ kɔ̄ŋnu᷅ŋ o̍ pēmbīī Mɛ̄lɛ̄ka̍ Ya̍a̍wɛ̄ɛ̄ ve̍ chōo̍,
ŋ̄ kɔ̄ŋnu᷅ŋ o̍ chīɛ̍i̍ Mɛ̄lɛ̄ka̍ Che̍kɔ̍pū wo̍.
Ō chō lākɔ̄ na̍a̍ pɛ̄ɛ̄kū nyɛ̄ o̍ ye̍e̍ma̍ na̍a̍ mī ŋ̄ tōsa̍ wo̍,
mī ŋ̄ wa̍ o̍ nɛ̄i̍ ndɔ̄ɔ̍ chōo̍.
Kāni̍ fo̍ndōle̍, Sa̍a̍yɔ̄ŋ chi̍e̍e̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ wa᷅ŋnda̍ sāwāla̍ ndɔ̄la̍ŋ pɛ̄ɛ̄kōo̍ ni̍.
Chūlu̍sɛ̄lɛ̄m chi̍e̍e̍ o̍ wa᷅ ni̍ŋ su̍ɛ̍i̍ nāa̍ wāŋnda̍ chūā ni̍.”
4Ō dīmī ni̍ŋ sɔ̍ɔ̍ŋ lɛ̄ŋnde̍ tɛ̄ɛ̄ŋ mbō chīi̍ sɔ̍ŋgɔ̄la̍ wa᷅ ni̍ŋ lɛ̍ŋīī bɔ̄ɔ̍ bɔ̍ɔ̍ tɛ̍ɛ̄ŋ nda̍ŋ.
Wāŋnda̍ hūŋ ni̍ŋ mā hu᷄ŋ chɔ̍ū mɔ̄ɔ̄ŋ ndāa̍ŋ fāŋndo̍ŋ dɛ̍ndɛ̄lā wāāla̍ŋ,
ndu̍yɛ̍ mā tōōsi̍a̍a̍ ba̍lta̍ ndāla̍ŋ mɔ̄ɔ̄ŋ nda̍ bɛ̄ɛ̄ndīāā tɔ̍lɔ̄ɔ̄la̍ŋ ndo̍ŋ.
A̍ te̍le̍ŋ ko̍ŋ, lēlɛ̄ŋ o̍ lēlɛ̄ŋ lē me̍lnūŋ ndɛ̍ mī lē kɔ̍ sa̍ā lɛ̄ŋndē chēle̍ŋ a̍ sɔ̍ŋgɔ̄ɔ̍ le̍.
Lēlɛ̄ŋ o̍ lēlɛ̄ŋ lē bɛ̍ɛ̍ndīāŋ ndɛ̍ le̍ lākɔ̄ o̍ chɔ̄ū le̍.
5Le̍la̍ŋ nya̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍, lā ŋ̄ tōsa᷅ŋ wa̍llo̍ o̍ nyɛ̄ wa̍wo̍ŋ Mɛ̄lɛ̄ka̍ Ya̍a̍wɛ̄ɛ̄ wo̍ ni̍ŋ.
A̍ mɛ̄ɛ̍ wānāā yōŋgāa̍ ā wā ni̍ŋ a̍ tɛ̍ɛ̍mbāā yɛ̍ o̍kɔ̄ɔ̄
6Mɛ̄lɛ̄ka̍, le̍ nyɛ̄ wānāā nūmnda̍ ā tōsa̍ wo̍, nda̍ yɔ̍nūŋ ni̍ māā yu̍ŋgu̍ Che̍kɔ̍pū wo̍, ma̍ lō o̍ ko̍ŋ ma̍ kɛ̄ɛ̄ nda̍ ma̍ māl nda̍ o̍ bā ndāa̍ chōo̍. Ka̍ā vīāmāā lāyāwa̍ cho̍ o̍ lɛ̄ŋnde̍ cho̍ bā pāa̍le̍ŋ lē chāŋndo̍ le̍ŋ ni᷄ŋ ndo̍, ka̍ā kōŋ wānāā nūmnda̍ ha̍ā ā chūa̍ ni̍, ma̍ tōsā mbo̍ tīū o̍ lɛ̄ŋnde̍ŋ nde᷅ŋ ni᷄ŋ kpo̍u̍. Nda̍ bɛ̍ɛ̍ ma̍ sīmnu᷄ŋ ni᷅ŋ wānāā vīāmāā lāyāwā māā wāŋnda̍ Fīli̍i̍tīāā, o̍ ko̍ŋ kɔ̍ɔ̍lī, ma̍ tūāl ka̍ā wānāā lēkāa̍wa̍ kɔ̄ɔ̄lī, mā sōōlūū Mɛ̍lɛ̄ka̍ā chēle̍ŋnda̍ nda̍ nda̍ā lātūlu̍. 7Ndu̍yɛ̍ ō cho̍ fu̍u̍ le̍ he̍ī yɔ̄nu̍ŋ te̍, lɛ̄ŋndē I̍sɔ̄lūɛ̍i̍le̍ŋ lē bīī mi̍ lē sūl sūllo̍ pīla̍ a̍ ka̍ni̍ŋ hu̍mbo᷄ŋ, ndu̍yɛ̍ a̍ ko̍o̍līi̍yo̍ŋ. Nyɛ̄m sūla᷄ŋ cho̍ I̍sɔ̄lūɛ̄ī yo̍ŋ ŋ̄ chō ŋ̄ bɔ̄ɔ̍. Su̍a̍a̍ ā chō ā pīāā o̍ lɛ̄ŋnde̍ŋ ni᷄ŋ cha̍, o̍ ko̍ŋ kɔ̍ɔ̍lī, mi̍ nyɛ̄m nyāāna᷄ŋ su̍a̍ā ā nāŋ ndo̍ŋ mu̍ŋ wa̍nu᷄ŋ ta̍u̍ ta̍u̍. 8Mɛ̄lɛ̄ka̍a̍ yɛ̍ yi̍a̍a̍ wāŋnda̍ sōōlūū wa̍, ā chō ā tīūwāā lɛ̄ŋnde̍ŋ kpo̍u̍. Nyɛ̄m nda̍ pi̍la̍ tōōsi̍a̍a̍ a̍ bālā ndāla̍ŋ ndo̍ŋ, mu̍ŋ nda̍ sōōlūū ni̍ māā mɛ̄lɛ̄ka̍ā nda̍.
9Kɛ̍ ndu̍yɛ̍ yōŋga̍ ndāa̍ chō hūnɔ̄ɔ̄ mɛ̄ɛ̄lū. Si̍ɔ̍mbu̍la̍ bɛ̍ndūla̍ŋ lā chō nda̍ hūnɔ̄ɔ̄ bīyɔ̄ɔ̄. Mɛ̄lɛ̄ka̍ Ya̍a̍wɛ̄ɛ̄, ma᷅l nda̍ le̍ nyɛ̄ nda̍ tōsa̍ wo̍ le̍.
10Wāŋnda̍ I̍sɔ̄lūɛ̄ī, sīōōŋnde̍ bīi̍ nya̍ pɔ̍ɔ̍ le̍ tu̍mbe̍ bɛ̍ndū Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni̍ŋ a̍ nya̍ wo̍, ndu̍yɛ̍ a̍ le̍ kpāāya̍ ndɔ̍ kɔ̄ndɔ̄fi̍li̍ bɛ̄ndōo̍, mī lā kɔ̍ vi̍ŋi᷄ŋ o̍ pēmbo᷄ŋ chōo̍ o̍ pōūta̍ŋ tɛ̄ɛ̄ŋ. Lā to̍ū so̍o̍ŋnda̍ŋ mī lā vīŋi̍ŋ le̍ni̍ŋ. 11Te̍le̍ŋ cho̍ fūūlūū mī yōŋga̍ wāŋndā chīe̍e̍ya̍ ā dɔ̄ɔ̄nu᷄ŋ ndo̍ ō hu᷄ŋ mɛ̍ɛ̍lū. Hɔ̍lāā wāna̍ chi̍o̍o̍ ō hēēlu̍ chōo̍ wa̍, ō chō nda̍ hūnɔ̄ɔ̄ tūsī lɛ̄ŋ. A̍ te̍le̍ŋ ko̍ŋ, Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ sɔ̍lā ni̍ŋ he̍e̍lōo̍ ni̍. 12Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍ ō kɛ̄ɛ̄si̍a̍a̍ pāa̍le̍ŋ, pāa̍le̍ o̍ tu̍sī ni̍ŋ wa̍nāā kpāāyāā bɛ̄ndūa̍a̍, a̍ wānāā yōŋgāa̍ tōōlō le̍ŋ, a̍ wānāa̍ chu̍a̍nu̍ŋ nda̍ pi̍la̍ ā bɛ̄ndū ma̍ hēēlū nda̍ pi̍la̍ wa̍. 13Yɔ̄mīī si̍dāā ī vīlɛ̄īye̍ Le̍ba̍nɔ̄ŋ kpo̍u̍, a̍ yɔ̄mīī ɔ̍kū ve̍ Ba̍sīāŋ, ndi̍ kpo̍u̍ ō chō ndi̍ hūnɔ̄ɔ̄ mīŋgī lɛ̄ŋ. 14Lūāŋūŋ bɛ̄ndo᷄ŋ kpo̍u̍ a̍ pēmbūŋ vīlɛ̄īyo̍ŋ, ō chō mu̍ŋ hūnɔ̄ɔ̄ mīŋgī lɛ̄ŋ mɛ̍ mɛ̍. 15Fo̍ndāŋndā vīlɛ̄īlā kālā ka̍lā la̍ŋ kpo̍u̍, a̍ sāāsāla̍ ka̍lā ka̍lālā bɛ̄ndūla̍ŋ, ō chō la̍ŋ hūnɔ̄ɔ̄ pēsī mbō mīŋgi̍ la̍ŋ lɛ̄ŋ mɛ̍ mɛ̍. 16Dɛ̄ndɛ̄la̍ bɛ̍ndūlā lēyākōla̍ ku̍ā o̍ mɛ̄ŋnda̍ŋ chōo̍ la̍ŋ ni̍, a̍ dɛ̄ndɛ̄la̍ kɛ̍ndɛ̄ kɛ̍ndɛ̄lā chēle̍ŋnda̍ ku̍ā o̍ mɛ̄ŋnda̍ŋ chōo̍ la̍ŋ kpo̍u̍, ō chō tōsā mī lā hu᷄ŋ mɔ̍ɔ̍wā o̍ mɛ̄ŋnda̍ŋ bɛ̄ŋgu̍. 17Yōŋgā bɛ̍ndū wāŋndā chīe̍e̍ya̍ ā dɔ̄ɔ̄nu᷄ŋ ndo̍ ō chō hūnɔ̄ɔ̄ mɛ̄ɛ̄lū. Hɔ̄lāā wāna̍ chi̍o̍o̍ ō hēēlu̍ chōo̍ wa̍, ō chō nda̍ hūnɔ̄ɔ̄ tūsī lɛ̄ŋ. Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ sɔ̍lā ni̍ŋ he̍e̍lōo̍ ni̍. 18Nyɛ̄m chēle̍ŋ wāŋnda̍ sōōlūū māā mɛ̄lɛ̄ka̍ā ndā wo̍ŋ kpo̍u̍, ŋ̄ chō hūnɔ̄ɔ̄ lō.
19Tē Mɛ̄lɛ̄ka̍ Ya̍a̍wɛ̄ɛ̄, o̍ hi᷅ŋ le̍ chi̍e̍ēŋndo̍ ho̍ō hīīlūūwo̍ pɛ̍, wāŋndā chīe̍e̍ya̍ ā hēl ni̍ŋ o̍ pēmbo᷄ŋ chōo̍, mā kɔ̍ vi̍ŋi᷄ŋ o̍ pōūta̍ŋ tɛ̄ɛ̄ŋ, mī ha̍ā tōū so̍o̍ŋnda̍ŋ mā vīŋi̍ŋ le̍ni̍ŋ, fo̍ndōle̍, sīōōŋīī bɛ̄ndūe̍i̍ ī wā ni̍ŋ nda̍ le̍ tu̍mbe̍ bɛ̍ndū Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni̍ŋ a̍ nda̍ wo̍, ndu̍yɛ̍ a̍ le̍ kpāāya̍ ndɔ̄ɔ̍, a̍ le̍ nāŋɔ̄ɔ̄ ndɔ̄ bɛ̄ndōo̍. 20Tē te̍le̍ŋ ko̍ŋ ō fūūlu̍u̍ pɛ̍, nyɛ̄m wāŋnda̍ ā tōōsi̍a̍a̍ a̍ ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ mā sōōlūū mu̍ŋ māā mɛ̄lɛ̄ka̍ā ndā wo̍ŋ, ā chō mu̍ŋ hūnɔ̄ɔ̄ chūā mā vīōū mu̍ŋ. Ā chō mu̍ŋ mɛ̄lī lɛ̄ŋ mī ŋ̄ wa̍ le̍ vīsīāā yōndūa̍a̍, a̍ lɛ̄fɛ̄ŋnda̍. 21Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ hu᷅ŋ ni̍ŋ le̍ chi̍e̍ēŋndo̍ ho̍ō hīīlūūwo̍ ve̍, wāŋnda̍ vīŋīŋ ni̍ŋ o̍ būūlūla̍ŋ ni᷄ŋ, a̍ o̍ pōūta̍ŋ tɛ̄ɛ̄ŋ o̍ pēmbo᷄ŋ chōo̍, fo̍ndōle̍, sīōōŋīī bɛ̄ndūe̍i̍ ī wā ni̍ŋ nda̍ le̍ tu̍mbe̍ Mɛ̄lɛ̄ka̍ Ya̍a̍wɛ̄ɛ̄ dūāūnūŋ ni̍ŋ a̍ nda̍ wo̍, ndu̍yɛ̍ a̍ le̍ kpāāya̍ ndɔ̄ɔ̍, a̍ le̍ nāŋɔ̄ɔ̄ ndɔ̄ bɛ̄ndōo̍.
22Lā du̍a̍ū tīīnda᷄ŋ nyāa̍ o̍ wāna̍ chi̍o̍o̍ ni᷄ŋ le̍ nya̍ mālā le̍, fo̍ndōle̍ wāna̍ chi̍o̍o̍ ō nɔ̍lā mbō māla̍ nya̍ le̍.
Kisi Bible © Bible Society in Liberia, 2015.