Ɛ̍sɔ̍dɔ̍ɔ̄ 37

A̍ mɛ̄ɛ̍ nda̍ tōōsi̍a̍a̍ kɔ̍fū kpe̍ma̍ Mɛ̄lɛ̄ka̍a̍ yɛ̍ o̍kɔ̄ɔ̄

(Ɛ̍sɔ̍dɔ̍ɔ̄ 25:10-22)

1O̍ ko̍ŋ kɔ̍ɔ̍lī, mi̍ Bɛ̄sa̍lɛ̄ɛ̄ o̍ to̍o̍sīāā kɔ̍fu̍ kpe̍ma̍ Mɛ̄lɛ̄ka̍a̍ a̍ yɔ̄m āke̍e̍sīāā wo̍. Kɔ̍fōo̍ ho̍ō, ō wa̍ bāndēi̍ nɛ̄īyo̍ lē yāa̍ a̍ i̍ŋchi̍sīi̍la̍ŋ lā ŋɔ̄ma̍hīɔ̍ɔ̍lu̍, bu̍o̍o̍, nɛ̄īyo̍ lē dīi̍ŋ a̍ i̍ŋchi̍sīi̍la̍ŋ lā yāa̍, hēlɔ̄ɔ̍ nɛ̄īyo̍ lēdīi̍ŋ a̍ i̍ŋchi̍sīi̍la̍ŋ lā yāa̍. 2Kɔ̄fōo̍ ho̍ō, lēni᷄ŋ ni̍, a̍ o̍ kɔ̄ɔ̍, ō wa̍ ō kūmbāā kpo̍u̍ a̍ ko̍o̍līi̍ kɛ̍ndɛ̄ kɛ̍ndɛ̄i̍. O̍ ko̍ŋ kɔ̍ɔ̍lī, ma̍ hāndū ko̍o̍līi̍ye̍ o̍ kɔ̍fōo̍ ho̍ō bālɔ̄ɔ̍ chɛ̍ chɛ̍. 3Ndu̍yɛ̍, ma̍ tōōsīāā kēla᷄ŋ ŋ̄ hīɔ̍ɔ̍lu̍ a̍ ko̍o̍līi̍ye̍, ma̍ hāndū mu̍ŋ o̍ kɔ̍fōo̍ pēlūŋ ndɔ̄ŋ hi̍ɔ̍ɔ̍lo̍ŋ, ba̍ā ŋ̄mūu̍ŋ, ba̍ā ŋ̄mūu̍ŋ. 4Ndu̍yɛ̍, ma̍ tōōsīāā vɛ̄lɛ̄ yɔ̄mīī vīlɛ̄īye̍ a̍ yɔ̄m āke̍e̍sīāā wo̍, ma̍ kūmbū ndi̍ a̍ ko̍o̍līi̍ye̍ kpo̍u̍. 5Mɛ̄ɛ̍ nda̍ bɛ̄ɛ̄ndi̍a̍a̍ yɔ̄mīī vīlɛ̄īye̍ he̍ī, ma̍ wōū ndi̍ o̍ kēla᷄ŋ nda̍ ho᷄l o̍ kɔ̄fōo̍ ho̍ō wo̍ŋ le̍ kɔ̄la̍ŋ a̍ ndu̍. 6O̍ ko̍ŋ kɔ̍ɔ̍lī, ma̍ tōōsīāā kūmbōo̍ o̍ kɔ̍fōo̍ ho̍ō a̍ ko̍o̍līi̍ kɛ̍ndɛ̄ kɛ̍ndɛ̄i̍, o̍ cho̍ kpe̍ŋgbe̍i̍ īnyīɛ̍ɛ̍yo̍ wo̍. Kūmbū kɔ̍fōo̍ ho̍ō, ō wa᷄ bānde̍i̍ le̍ nɛ̄īyo̍ lē yāa̍, a̍ i̍ŋchi̍sīi̍la̍ŋ lā ŋɔ̄ma̍hīɔ̍ɔ̍lu̍, bu̍o̍o̍ nɛ̄īyo̍ lē dīi̍ŋ a̍ i̍ŋchi̍sīi̍la̍ŋ lā yāa̍. 7O̍ ko̍ŋ, ma̍ chūāū ko̍o̍līi̍ye̍ a̍ ha̍mɛ̄i̍yo̍, ma̍ tūūlā nyāā lākūmba᷅ŋnda̍ ā ŋīɔ̍ɔ̍ŋ, ma̍ hāndū nda̍ o̍ kūmbū kpe̍ŋgbe̍i̍ īnyīɛ̍ɛ̍ kōŋ vēllāa̍ vēllē. 8Ho̍ō wa᷄ o̍ kūmbōo̍ mɛ̄ɛ̄lu̍la̍ŋ bāa̍ ō pīlɔ̄ɔ̍, mi̍ ho̍ō wa̍ o̍ kūmbōo̍ mɛ̄ɛ̄lu̍la̍ŋ bāa̍ ō pīlɔ̄ɔ̍. Nyāā lākūmba᷅ŋnda̍ ha̍ā ā wa᷄ ā bīīla᷅ŋ a̍ kūmbū kɔ̍fū kpe̍ŋgbe̍i̍ īnyīɛ̍ɛ̍yo̍, mā wa̍ nyɛ̄ pīlɛ̍ kpe̍. 9Nyāā lākūmba᷅ŋāā ŋīɔ̍ɔ̍ŋnda̍ ha̍ā, ā wa᷄ o̍ kūmbū kɔ̍fū kpe̍ŋgbe̍i̍ īnyīɛ̍ɛ̍yo̍ vēllāa̍ vēllē, ho̍ō wa̍ o̍ kūmbū kōŋ mɛ̄ɛ̄lu̍la̍ŋ mātōū, mi̍ ō pīlɔ̍ɔ̍ wā o̍ kūmbōo̍ mɛ̄ɛ̄lu̍la̍ŋ mālūāŋ, ma̍ mūlu̍la᷅ŋ hɔ᷅lla̍ vēllāa̍ vēllē, mā bɔ̄ŋa̍ kūmba᷅ŋnda̍ŋ lā tīɔ̍ɔ̍ŋ o̍ kūmbū kɔ̍fōo̍ lēchōo̍.

A̍ mɛ̄ɛ̍ nda̍ tōōsi̍a̍a̍ ti̍bīi̍ nda̍ kɛ̄sī bēe̍dīi̍ wa᷅ yɔ̄ŋga᷄ŋ o̍ Mɛ̄lɛ̄ka̍ lo̍ wo̍ yɛ̍ o̍kɔ̄ɔ̄

(Ɛ̍sɔ̍dɔ̍ɔ̄ 25:23-30)

10O̍ ko̍ŋ kɔ̍ɔ̍lī, mi̍ Bɛ̄sa̍lɛ̄ɛ̄ o̍ to̍o̍sīāā vɛ̄lɛ̄ ti̍bīi̍yo̍ a̍ yɔ̄m āke̍e̍sīāā wo̍. Ti̍bīi̍yo̍ ho̍ō, ō wa᷄ bāndēi̍ nɛ̄īyo̍ lē yāa̍, bu̍o̍o̍, nɛ̄īyo̍ lēpīlɛ̍ a̍ i̍ŋchi̍sīi̍la̍ŋ lā ŋɔ᷄mpu᷅m, hēlɔ̄ɔ̍ nɛ̄īyo̍ lē dīi̍ŋ a̍ i̍ŋchi̍sīi̍la̍ŋ lā yāa̍. 11Ti̍bīi̍yo̍ ho̍ō bɛ̍ɛ̍, ma̍ kūmbū ndu̍ kpo̍u̍ a̍ ko̍o̍līi̍ kɛ̍ndɛ̄ kɛ̍ndɛ̄i̍. O̍ ko̍ŋ kɔ̍ɔ̍lī, ma̍ hōl ko̍o̍līi̍ye̍ o̍ ti̍bīi̍yo̍ ho̍ō kpēŋgo᷄ŋ vēllāa̍ vēllē. 12Ndu̍yɛ̍, ma̍ hāndū kāndū īko̍o̍līi̍yo̍ o̍ ti̍bīi̍yo̍ ho̍ō lēchōo̍ chɛ̍ chɛ̍, bu̍o̍o̍ i̍ŋchi̍sīi̍la̍ŋ lā yāa̍, ma̍ bālū ndu̍ a̍ ko̍o̍līi̍ye̍. 13O̍ ko̍ŋ kɔ̍ɔ̍lī, ma̍ tōōsīāā ko̍o̍līi̍ye̍ kēla᷄ŋ ŋ̄ hīɔ̍ɔ̍lu̍ o̍ pēlūŋ ti̍bīi̍yo̍ ho̍ō vēllāa̍ vēllē, kūmbūe̍i̍ he̍ī ŋ̄ mūu̍ŋ, kūmbūe̍i̍ he̍ī ŋ̄ mūu̍ŋ. 14Kēla᷄ŋ nda̍ tōōsi̍a̍a̍ mu᷅ŋ ndo̍ŋ, ma̍ hōl mu̍ŋ o̍ kāndū nda̍ hāndu̍ o̍ ti̍bīi̍yo̍ bālɔ̄ɔ̍ chɛ̍ chɛ̍ wo̍ŋ īkɛ̄i̍, le̍ yɔ̄mnde̍ wōūwo̍ lēni᷄ŋ le̍ kɔ̄la̍ŋ a̍ ti̍bīi̍yo̍ ho̍ō. 15Ndu̍yɛ̍, ma̍ tōōsīāā yɔ̄mīī vīlɛ̄īye̍ a̍ yɔ̄m āke̍e̍sīāā wo̍, le̍ kɔ̄la̍ŋ a̍ ti̍bīi̍yo̍ ho̍ō, ma̍ kūmbū ndi̍ a̍ ko̍o̍līi̍ye̍ kpo̍u̍. 16O̍ ko̍ŋ kɔ̍ɔ̍lī, ma̍ tōōsīāā nyɛ̄m lāāndo᷄ŋ a̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ le̍ wāa̍ o̍ ti̍bīi̍yo̍ ho̍ō chōo̍. Mu̍ŋ yɔ̍nūŋ ni̍, māā pēe̍tīi̍la̍ŋ, a̍ hɛ̄ŋgɛ̍i̍la̍ŋ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēni᷄ŋ, a̍ kpɛ̍ɛ̍nɔ̍ŋ, a̍ tāālāla̍ŋ le̍ mūɛ̄īmā mākīle̍pīi̍ma̍ wāŋnda̍ hūŋ māā lākē wa̍ŋ dɔ̄wɔ̄ɔ̍ lēni᷄ŋ.

A̍ mɛ̄ɛ̍ nda̍ tōōsi̍a̍a̍ nyɛ̄ kɛ̄sīāā lāla̍mbūi̍yo̍ yɛ̍ o̍kɔ̄ɔ̄

(Ɛ̍sɔ̍dɔ̍ɔ̄ 25:31-40)

17O̍ ko̍ŋ kɔ̍ɔ̍lī, mi̍ Bɛ̄sa̍lɛ̄ɛ̄ to̍o̍sīāā vɛ̄lɛ̄ nyɛ̄ kɛ̄sīāā la̍mbūi̍yo̍ a̍ ko̍o̍līi̍ kɛ̍ndɛ̄ kɛ̍ndɛ̄i̍. Nyɛ̄ kɛ̄sīāā lāla̍mbūi̍yo̍ ho̍ō, tūmndo̍ ni̍, lɔ̄ɔ̍ ni̍, mbo̍ tōōsīāā ndu̍ a̍ ko̍o̍līi̍ nda̍ chɔ̄ū a̍ ha̍mɛ̄i̍yo̍ ve̍. Ndu̍yɛ̍ tāālāla̍ wa̍ lā tūūlīāā o̍ nyɛ̄ kɛ̄sīāā lāla̍mbūi̍yo̍ ho̍ō la̍ŋ ni̍, nyɛ̄la̍ wa̍ o̍ bōlle̍ lā kūmbīa̍ŋ nda̍ŋ ni̍, a̍ pe̍e̍ŋge̍la̍ wa̍ lā tūūlīāā lo̍ŋ nda̍ŋ, lā wa̍ lā bīīla᷅ŋ na̍a̍ pi᷅lɛ̍ kpe̍. 18Nyɛ̄ kɛ̄sīāā lāla̍mbūi̍yo̍ ho̍ō, ndu̍ o̍o̍ nɔ̍ lɛ̄ūwo̍ŋ ŋ̄ ŋɔ᷄mpu᷅m, kpēŋgēi̍ he̍ī ŋ̄ ŋgāa̍, kpēŋgēi̍ he̍ī ŋ̄gāa̍. 19Lɛ̄ūwūŋ ŋɔ᷄mpu᷅mndo̍ŋ mu᷅ŋ, ī kɛ᷅ o̍ kɛ᷅, ndi̍ i̍i̍ nɔ̍ nyɛ̄la̍ŋ lā yāa̍, māā ŋ̄bōōndu̍, mɛ̄ɛ̍ pe̍e̍ŋge̍la̍ ku̍u̍mīāāla̍ŋ lā wā nu̍a̍ā a̍ pēi̍ ī bālāā yɛ̍. 20Nyɛ̄ kɛ̄sīāā lāla̍mbūi̍yo̍ ho̍ō lɛ̄ūwūŋ ndɔ̄ɔ̍ŋ, ī kɛ᷅ o̍ kɛ᷅ o̍ bōlle̍ŋ ndi̍ i̍i̍ nɔ̍ nyɛ̄la̍ŋ lā hīɔ̍ɔ̍lu̍, mɛ̄ɛ̍ pe̍e̍ŋge̍la̍ ku̍u̍mīāāla̍ŋ lā wā nu̍a̍ā a̍ pēi̍ ī bālāā yɛ̍. 21Lɛ̄ūwu᷄ŋ wa̍ mu᷅ŋ o̍ nyɛ̄ kɛ̄sīāā lāla̍mbūi̍yo̍ ho̍ō, ŋ̄ ŋgāa̍ ve̍llāa̍ vēllē wo̍ŋ, mu̍ŋ nɔ̍ bōōndo̍ŋ māā pe̍e̍ŋge̍la̍ ku̍u̍mīāā, nāa̍ ŋ̍ bɔ̍ɔ̍ŋi̍āŋ o̍ lɔ̄ɔ̍ wa̍. 22Nyɛ̄ kɛ̄sīāā lāla̍mbūi̍yo̍ ho̍ō, lɔ̄ɔ̍ ndɔ̄ɔ̍ ni̍, lɛ̄ūwūŋ ndɔ̄ɔ̍ŋ ni̍, a̍ nyɛ̄la̍ wa̍ la̍ŋ māā pe̍e̍ŋge̍la̍ ku̍u̍mīāā la̍ŋ, lā wa᷄ nyɔ̄ɔ̍ pīlɛ̍ kpe̍, lā tōōsīāā a̍ ko̍o̍līi̍ kɛ̍ndɛ̄ kɛ̍ndɛ̄ī nda̍ chɔ̄ū a̍ ha̍mɛ̄i̍yo̍ ve̍. 23O̍ ko̍ŋ kɔ̍ɔ̍lī, mbo̍ tōōsīāā vɛ̄lɛ̄ la̍mbūi̍la̍ŋ lā ŋɔ᷄mmɛ̍ū le̍ kɛ̄sīo̍o̍ o̍ nyɛ̄ kɛ̄sīāā lāla̍mbūi̍yo̍ ni᷄ŋ. Ndu̍yɛ̍, mbo̍ tōōsīāā kpānya̍la̍ŋ, a̍ hɛ̄ŋgɛ̍i̍la̍ kpa̍yāŋnda̍ŋ le̍ la̍mbūi̍la̍ŋ nda᷅ŋ. Ndu̍yɛ̍ nyɛ̄la̍ŋ nda᷅ŋ bɛ̍ɛ̍, a̍ ko̍o̍līi̍ŋ kɛ̍ndɛ̄ kɛ̍ndɛ̄i̍ o̍ to̍o̍si̍a̍a̍ la̍ŋ ni̍. 24Nyɛ̄ kɛ̄sīāā lāla̍mbūi̍yo̍ ho̍ō a̍ wōlɔ̄ɔ̄lā ndɔ̄la̍ŋ kpo̍u̍, a̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ o̍ to̍o̍si̍a̍a̍ la̍ŋ ni̍. Ndu̍yɛ̍, ko̍o̍līi̍ŋ o̍ to̍o̍si̍a̍a̍ nyɛ̄ kɛ̄sīāā lāla̍mbūi̍yo̍ ho̍ō a̍ wōlɔ̄ɔ̄lā ndɔ̄la̍ŋ ndo̍ŋ, ŋ̄ wa̍ pa᷅ŋnda̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍.

A̍ ma̍āŋ nda̍ tōōsi̍a̍a̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēchōo̍ wo̍ o̍kɔ̄ɔ̄

(Ɛ̍sɔ̍dɔ̍ɔ̄ 30:1-5)

25O̍ ko̍ŋ kɔ̍ɔ̍lī, mi̍ Bɛ̄sa̍lɛ̄ɛ̄ ta̍ŋgūl vɛ̄lɛ̄ ma̍āŋndo̍ a̍ yɔ̄m āke̍e̍sīāā wo̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēchōo̍. Ma̍āŋndo̍ ho̍ō, bāndēi̍ ni̍, bu̍o̍o̍ ni̍, nyɛ̄ pīlɛ̍ kpe̍ o̍ wa̍ ni̍. Bānde̍i̍, nɛ̄īyo̍ lē pīlɛ̍, a̍ i̍ŋchi̍sīi̍la̍ŋ lā ŋɔ᷄mpu᷅m, bu̍o̍o̍ nɛ̄īyo̍ lē pīlɛ̍ a̍ i̍ŋchi̍sīi̍la̍ŋ lā ŋɔ᷄mpu᷅m, hēlɔ̄ɔ̍, nɛ̄īyo̍ le̍ yāa̍. Ma̍āŋndo̍ ho̍ō, sɔ̍ŋgi̍la̍ ndɔ̄la̍ hi̍ɔ̍ɔ̍lu̍la̍ŋ lēchōo̍, o̍ sɔ̍ŋgi̍ o̍ sɔ̍ŋgi̍ mbo̍ sōlī nyɔ̄ɔ̍ lo̍ŋ māā lēē. Ndu̍yɛ̍ nyɔ̄ɔ̍ŋ mu᷅ŋ kpo̍u̍, ŋ̄ wa̍ ŋ̄ bīīla᷅ŋ na̍a̍ pi᷅lɛ̍ kpe̍. 26Ma̍āŋndo̍ ho̍ō lēchōo̍ ni̍, nyɛ̄la̍ wa̍ la̍ŋ la̍ tu̍u̍līāā māā lālēē o̍ sɔ̍ŋgi̍la̍ŋ nda̍ŋ ni̍, a̍ kpēŋgu᷄ŋ ndɔ̄ɔ̍ŋ hi̍ɔ̍ɔ̍lo̍ŋ vēlāa̍ vēllē, mbo̍ kūmbū ndu̍ kpo̍u̍ a̍ ko̍o̍līi̍ kɛ̍ndɛ̄ kɛ̍ndɛ̄i̍. O̍ ko̍ŋ kɔ̍ɔ̍lī, mbo̍ hōl vɛ̄lɛ̄ kāndū īko̍o̍līi̍yo̍ o̍ sōndōla̍ŋ bālɔ̄ɔ̍ chɛ̍ chɛ̍. 27Ndu̍yɛ̍, mbo̍ tōōsīāā kēla᷄ŋ ŋ̄ko̍o̍līi̍yo̍ŋ ŋ̄ mūu̍ŋ, mbo̍ hōl mu̍ŋ o̍ ma̍āŋndo̍ kpēŋgo᷄ŋ mūu̍ŋ ndo̍ŋ vēllāa̍ vēllē, o̍ kāndū o̍ ho̍l ko̍ŋ ndo̍ bɛ̄ŋgu̍, le̍ yɔ̄mīī vīlɛ̄īye̍ wōūwo̍ lēni᷄ŋ le̍ kɔ̄la̍ŋ a̍ ma̍āŋndo̍ ho̍ō. 28O̍ ko̍ŋ kɔ̍ɔ̍lī, mbo̍ tōōsīāā yɔ̄mīī vīlɛ̄īye̍ ī ŋīi̍ŋ a̍ yɔ̄m āke̍e̍sīāāwo̍, mbo̍ kūmbu̍ ndi̍ kpo̍u̍ a̍ ko̍o̍līi̍ye̍ le̍ kɔ̄la̍ŋ a̍ ma̍āŋndo̍ ho̍ō.

A̍ mɛ̄ɛ̍ nda̍ tōōsīāā chu̍ɛ̍i̍mā nda̍ tālā wa᷅ŋnda̍ o̍ lēbōl le̍ nda̍ hɛ̄līo̍o̍ le̍ kpe̍ku̍ Mɛ̄lɛ̄ka̍a̍ yɛ̍ wa̍ŋ o̍kɔ̄ɔ̄

(Ɛ̍sɔ̍dɔ̍ɔ̄ 30:22-38)

29O̍ ko̍ŋ kɔ̍ɔ̍lī, mi̍ Bāsa̍lɛ̄ɛ̄ o̍ to̍o̍sīāā chūɛ̄īmā kāsīa̍ŋ le̍ hɛ̄līo̍o̍. Ndu̍yɛ̍ mbo̍ mūūli̍āŋ nyɛ᷅m chūŋ kɛ̄ndɛ̄ŋ yɛ̍ yi̍ɔ̍ɔ̍ŋ le̍ lɔ̄mɔ̄ɔ̍. Ndu̍yɛ̍ mbo̍ tōōsīāā mu̍ŋ mɛ̄ɛ̍ wānāā tōōsīāā māsi̍ɛ̍ndīi̍ya̍ ā tōōsīāā nu̍a̍ā si̍ɛ̍ndīi̍ya̍ŋ yɛ̍.

Currently Selected:

Ɛ̍sɔ̍dɔ̍ɔ̄ 37: YM

Highlight

Copy