Ɛ̍sɔ̍dɔ̍ɔ̄ 12
12
A̍ bōōndi̍i̍ Ki̍i̍la̍nɔ̍ pīɔ̍mndo̍ hīōū I̍sɔ̄lūɛ̍i̍ya̍ chōo̍ ve̍ o̍kɔ̄ɔ̄
1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ su̍a̍ā vɛ̄lɛ̄ nāa̍ Mūu̍sē nda̍ E̍lɔ̄ŋ chūā, o̍ lɛ̄ŋndē I̍chi̍pīle̍ŋ ni᷄ŋ. 2Mbo̍ dīmī āā, “Chɔ̍ŋ ni᷅ŋ ha̍a̍a̍, mbō kūɛ̄ a̍ lāchī kɛ᷅, pāŋge̍i̍ he̍ī, ī chō māchūāā pāŋgi̍i̍ ta̍se̍ o̍ wɔ̄sīo̍o̍ ni᷄ŋ le̍ nya̍. 3Lā dīmu̍l wāŋnda̍ I̍sɔ̄lūɛ̄ī kpo̍u̍, māā o̍ mālɔ̄ tɔ̍ wa̍ŋ chōo̍ o̍ pāŋge̍i̍ he̍ī ni᷄ŋ, māā wānā o̍ wānā pɔ̍nɔ̍ cho̍ yu̍ŋgo̍o̍ bōlle̍ŋ, ō dīī sa̍ā fɔ̍ŋndɔ̍ɔ̍ ɔ̄ɔ̄ chūīŋ fɔ̍ŋndɔ̍ɔ̍ nda̍ yu̍ŋgu̍ ndɔ̄ɔ̍ mā dē. 4Kɛ̍, tē yu̍ŋgu̍ wāŋndo̍ ō ve̍ o̍ bɔ̍ɔ̍ le̍ chɔ̄lū pīlɛ̍ chīī dīo̍ le̍, mɛ̄ɛ̍ wānā ko̍ŋ ō sɔ̄ɔ̄ŋgu̍u̍ yu̍ŋgu̍ wāna̍ nda̍ chīɛ̄ɛ̄li̍āŋ chi̍ɛ̍īla̍ŋ ndo̍ chōo̍, mā bīī chɔ̄lōo̍ ō pīlɛ̍ mā dīī. Mā dīu̍ ndu̍ ku̍ndāla̍ŋ mā pīɔ̍u̍ ndu̍ mɛ̄ɛ̍ wānā o̍ wānā o̍ nɔ̄ wāŋnda̍ kpɛ̍ o̍ yu̍ŋgu̍ ndɔ̄ɔ̍ chōo̍ yɛ̍. Ndu̍yɛ̍, a̍ mɛ̄ɛ̍ kpɛ̍ wānā o̍ wānā o̍ nɔ̍lā mbō dē yɛ̍. 5Kɛ̍ sāā fɔ̍ŋndɔ̍ɔ̍, ɔ̄ɔ̄ chūīŋ fɔ̍ŋndɔ̍ nya̍ chō ko̍ŋ bi̍yɔ̄ɔ̄ wo̍, ō nɔ᷅ sɔ̄ŋ o̍ sɔ̄ŋ tē, ō nɔ̄ mbō wa̍ ō pīāāndōo̍. Ndu̍yɛ̍, mɛ̄ɛ̍ mbō chīŋa̍ wɔ̄sīo̍o̍ ō pīlɛ̍. 6Ndu̍yɛ̍, tē lā bīī chɔ̄lūa̍a̍ ha̍ā pɛ̍, lā kɛ̄si̍ nda̍ ha̍a̍a̍, mɛ̄ɛ̍ mī mālɔ̄ tɔ̍ a̍ le̍ hīɔ̍ɔ̍lu̍a̍ŋ o̍ pāŋge̍i̍ he̍ī ni᷄ŋ ma̍ fūūlu̍u̍. Tē mā fūūlu̍u̍ pɛ̍, pāa̍le̍ le̍ŋ a̍ pāa̍le̍ de̍lāāle̍ŋ, wāŋnda̍ I̍sɔ̄lūɛ̄ī kpo̍u̍ ā dīū dīu̍ chɔ̄lūāā kāŋ. 7Ndu̍yɛ̍, chīɛ̄ī o̍ chīɛ̄ī nda̍ dē vīsīŋ chɔ̄lūāā kāŋ lēni᷄ŋ pɛ̍, ā sūu̍ ko̍o̍ma̍ chɔ̄lūāā kāŋ o̍ kēe̍do᷄ŋ, a̍ o̍ da̍kpe̍nda̍ŋ vēllāa̍ vēllē. 8Ndu̍yɛ̍, īchɔ̄l kōŋ, wānā o̍ wānā nɔ̍ mbō tūɛ̄ī vīsīŋ mu᷅ŋ mā dē mu̍ŋ, a̍ lāmndā pēē lōlɛ̍i̍yo̍, lātūlu̍ a̍ bēe̍dīi̍ nda̍ do̍ū yi̍i̍sīi̍ le̍ wo̍. 9Ndu̍yɛ̍, wānā o̍ wānā di̍ā vīsīŋ mu᷅ŋ ŋ̄kīyɛ̍i̍, ɔ̄ɔ̄ ŋ̄yāūwāā le̍, mɛ̄ɛ̍ ŋ̄ tūɛ̄īya᷄ŋ. Bōlle̍ŋ ni̍, lɔ̄lūla̍ŋ ni̍, a̍ nyɛ̄ o̍ nyɛ̄ cho̍ chɔ̄lū kōŋ ni᷄ŋ mī wānā de᷅, lā tūɛ̄ī pɛ̍, lā dē. 10Ndu̍yɛ̍ vīsīŋ mu᷅ŋ ki̍nɛ̍i̍, īpīlɛ̍ bɛ̍ɛ̍ lā nɔ̍ mī lā lɔ̄li̍ mu̍ŋ ku̍ya̍ le̍. Kɛ̍ tē ŋ̄ lo̍ nya̍ o̍ bā pɛ̍ mī pāa̍le̍ŋ lē sɛ̄, mɛ̄ɛ̍ lā lo᷄m mu̍ŋ. 11Ndu̍yɛ̍ tē lā wa̍ mu̍ŋ dīo̍ pɛ̍, lā wōōnu̍ŋ nyɛ̄lā nyāla̍ŋ kpo̍u̍. Lā wōūnu̍ŋ kɔ̍vɛ̄i̍la̍ nyāla̍ŋ, mī lā chu̍a̍ tīnda̍la̍ nyāla̍ŋ, mī lā kēle̍ŋa̍ mu̍ŋ di̍o̍ chɔ̍ chɔ̍. Te̍le̍ŋndo̍ ho̍ō, ndu̍ cho̍ wā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̄ cho̍o̍ wo̍ o̍kɔ̄ɔ̄, le̍ ya̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ ni̍.
12“Īchɔ̄l ko̍ŋ ya̍ I̍ cho̍ bālɔ̄ɔ̄ o̍ lɛ̄ŋndē I̍chi̍pīle̍ŋ ni᷄ŋ ni̍, mī tōsa̍ mī po᷄ ta̍se̍ o̍ po᷄ ta̍se̍ wānā la̍nɔ̍ɔ̍ vēlū, chɔ̄lū o̍ chɔ̄lū pīāāndū tāse̍ chɔ̄lūa̍a̍ kōm ma̍ wā I̍chi̍pī, mā vī kpo̍u̍. Ndu̍yɛ̍, mī tūsi̍ mɛ̄lɛ̄ka̍ā ndāa̍ nyɛ̄ pālāa̍ chōo̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. 13Ko̍o̍ma̍ cho̍ ma̍ŋ wa᷅ mā sūūwāā o̍ kēe̍do᷄ŋ chōo̍ wa̍ŋ, ma̍ŋ ma̍ cho̍ wā tāāmāsi̍o̍o̍ le̍ ya̍ chɔ̄mndo̍ chīɛ̄īlā nya̍ chō wā lēni᷄ŋ nda̍ŋ ni̍. Tē I̍ che᷅ dɔ̍ɔ̍ ko̍o̍ma̍ ma̍ŋ pɛ̍, I̍ hi̍o̍ū nya̍ chōo̍. O̍ ko̍ŋ, kpūndɛ̍ pīɔ̍m ya̍ cho̍ wāŋnda̍ I̍chi̍pī tūsī chōo̍ wo̍, ō ko̍māl lɛ̍ nya̍ le̍. 14Le̍la̍ŋ, chɔ̍ŋ ni᷅ŋ ha̍a̍a̍ mbō kūɛ̄ a̍ pūlāle̍ nyāle̍ŋ kɛ᷅, lā wa̍ lo̍o̍nɔ᷄ŋndo̍ a̍ pāa̍le̍ŋ nde᷅ŋ le̍ fɛ̍ɛ̍ŋ a̍ fɛ̍ɛ̍ŋ. Īwɔ̄sī o̍ īwɔ̄sī, lā bīi̍ pāa̍le̍ŋ nde᷅ŋ māā pāa̍le̍ nya̍ kē ya̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ, le̍ nyɛ̄ ya̍ to̍sa̍l nya̍ wo̍. Ndu̍yɛ̍, he̍ī chō ni᷅ŋ wā māā sāwā le̍ nya̍, le̍ fɛ̍ɛ̍ŋ a̍ fɛ̍ɛ̍ŋ.”
A̍ bɔ̄ŋa᷅ŋ be̍e̍dīi̍ nda̍ do̍ū yi̍i̍sīi̍ le̍ wo̍ o̍kɔ̄ɔ̄
15Mi̍ Mɛ̄lɛ̄ka̍ hi̍a̍ū lāchī a̍ sūɛ̍i̍ mbo̍ dīmī āā, “Tē la̍ bɔ̄ŋa᷅ŋndo̍ ho̍ō bīyɔ̄ɔ̍ pɛ̍, le̍ pālɛ̍i̍ ī ŋɔ᷄mmɛ̍ū lā di̍ā bēe̍dīi̍ nda̍ tōōsīāā a̍ yi̍i̍sīi̍yo̍ wo̍ le̍. Pāa̍le̍ tāse̍le̍ŋ o̍ pālɛ̍i̍ ŋɔ̍mmɛ̍ū kēŋ ni᷄ŋ, lā sōōlu̍u̍ yi̍i̍sīi̍yo̍ o̍ chīɛ̄īlā nyāla̍ŋ ni᷄ŋ pa̍ku̍, a̍ nyɛ̄ o̍ nyɛ̄ nɔ̍ yi̍i̍sīi̍yo̍ lēni᷄ŋ. Kāni̍ fo̍ndōle̍, wānā o̍ wānā nɔ̍ mbō dē nyɛ̄ o̍ nyɛ̄ nɔ̍ yi̍i̍sīi̍yo̍ lēni᷄ŋ te̍. Tē wānā o̍ wānā de᷅ pɛ̍, wānā ko̍ŋ ō nɔ̄ mbo̍ ō sōlīāā wānāā nīa̍a̍ tɛ̄ɛ̄ŋ, lā chu̍ā ndu̍ māā wāna̍ nī le̍. 16Ndu̍yɛ̍, pāa̍le̍ tāse̍le̍ŋ bɔ̄ŋa᷅ŋndo̍ ho̍ō ni̍, pāa̍le̍ ŋɔ᷄mmɛ̍ūle̍ŋ ni̍, lā to̍sā wa̍li̍ o̍ wa̍li̍ lēchōo̍ le̍. Mɛ̄ɛ̍ bɔ̄ɔ̄ŋi̍āŋndo̍ le̍ ya̍ Mɛ̄lɛ̄ka̍ sōōlūū wo̍, nyɛ̄ nya̍ nɔ̄ mī lā tōsā wo̍ su̍e̍e̍, mɛ̄ɛ̍ nyɛ̄ dīāā nyāa̍ tōōsīa̍a̍. Lā nɔ̄ mī lā ke̍ bɔ̄ŋa᷅ŋ dīāā bēe̍dīi̍ nɔ̍ ho̍ō yi̍i̍sīi̍ le̍ni᷄ŋ te̍ wo̍ bɛ̄ɛ̄le̍ŋ. Kāni̍, o̍ pāa̍le̍ŋ nde᷅ŋ chōo̍ kpe̍e̍kpe̍i̍ ya̍ I̍ so̍li̍ nya̍ a̍ yu̍ŋgu̍la̍ nyāla̍ŋ nya᷄ŋ I̍chi̍pī ni̍. 17Ndu̍yɛ̍, chɔ̍ŋ ni᷅ŋ ha̍a̍a̍, mbō kūɛ̄ a̍ lāchī kɛ᷅, lā wa̍ bɔ̍ŋa᷅ŋ dīāā bēe̍dīi̍yo̍ ho̍ō bīyɔ̄ɔ̍ o̍ pāa̍le̍ŋ le̍ŋ chōo̍ le̍ te̍le̍ŋ o̍ te̍le̍ŋ. Kāni̍ fo̍ndōle̍, o̍ pāa̍le̍ŋ nde᷅ŋ chōo̍ ya̍ I̍ so̍li̍ nya̍ I̍sɔ̄lūɛ̍i̍ya̍ kpo̍u̍ o̍ lɛ̄ŋndē I̍chi̍pīle̍ŋ ni᷄ŋ ni̍. 18Ndu̍yɛ̍, īwɔ̄sī o̍ īwɔ̄sī tē pāŋgi̍i̍ tāse̍ ī chɔ̄m pɛ̍, chɔ̄nɔ᷄ŋndo̍ o̍ mālɔ̄ tɔ̍ a̍ le̍ hīɔ̍ɔ̍lu̍a̍ŋ a̍ fīti̍līo̍o̍, mbō kūɛ̄ o̍ mālɔ̄ bi̍dīi̍ŋ a̍ le̍ pīli̍a̍ŋ a̍ fīti̍līo̍o̍, lā di̍ā bēe̍dīi̍ nda̍ tōōsīāā a̍ yi̍i̍sīi̍yo̍ wo̍ le̍, mɛ̄ɛ̍ o̍ nɔ̍ yi̍i̍sīi̍ le̍ wo̍. 19Le̍ pālɛ̍i̍ ī ŋɔ᷄mmɛ̍ū, lā kɛ̍sī yi̍i̍sīi̍ o̍ yi̍i̍sīi̍ o̍ chīɛ̄īlā nyāla̍ŋ ni᷄ŋ te̍. O̍ pālɛ̍i̍ ŋɔ᷄mmɛ̍ūve̍ he̍ī bɛ̄ŋgu̍ ki̍nɛ̍i̍, wānā o̍ wānā dē yi̍i̍sīi̍ o̍ yi̍i̍sīi̍ pɛ̍, wānā ko̍ŋ ō wa̍ pi̍la̍ chi̍e̍e̍, ō wa̍ mi̍a̍lāa̍ cho̍ nya̍ tɛ̍ɛ̄ŋ nda̍, wāna̍ ko̍ŋ, I̍ chu̍ē lɛ̍ ndu̍ māā wāna̍ nī le̍. 20Mī dīmu̍l nya̍ vɛ̄lɛ̄, o̍ pālɛ̍i̍ he̍ī bɛ̄ŋgu̍ ki̍nɛ̍i̍, bā o̍ bā nya̍ wa̍, lā di̍ā nyɛ̄ o̍ nyɛ̄ dīāā nda̍ tōōsīāā a̍ yi̍i̍sīi̍yo̍ wo̍ le̍.”
Ki̍i̍la̍nɔ̍ pīɔ̍mndo̍ ba̍lu̍ I̍chi̍pī
21O̍ ko̍ŋ kɔ̍ɔ̍lī, mi̍ Mūu̍sē ve̍e̍lū lāŋgba̍ā kālla̍ I̍sɔ̄lūɛ̄ī kpo̍u̍ mbo̍ dīmūl nda̍ āā, “Yu̍ŋgu̍ o̍ yu̍ŋgu̍ ō bīi̍ sāa̍ mbō dīī ndu̍, le̍ bɔ̄ŋa᷅ŋ lōōna᷄ŋ hīōūwɔ̄ɔ̄ chōo̍ wo̍ bīyɔ̄ɔ̍. 22Tē lā dīī pɛ̍, lā bīī ko̍o̍ma̍ ma᷅ŋ, lā dɔ̄ū o̍ hɛ̄ŋgɛ̍i̍yo̍ ni᷄ŋ. Lā chūa̍ lɛ̄ūwūŋ yɔ̄m ha̍sɔ̍pī wo̍, lā yīŋ mu̍ŋ o̍ ko̍o̍ma̍ ma̍ŋ ni᷄ŋ lā sūu̍ o̍ kēe̍do᷄ŋ chōo̍ a̍ o̍ dīōlā nyāla̍ŋ kpēŋgo᷄ŋ vēllāa̍ vēllē. Ndu̍yɛ̍, tē lā sūu̍ pɛ̍, wānā o̍ wānā lā fūlā lɛ̄ o̍ bɛ̍ɛ̄ le̍, ha̍a̍a̍ mɛ̄ɛ̍ īdīi̍yo̍. 23Mɛ̄lɛ̄ka̍ Ya̍a̍wɛ̄ɛ̄ cho̍ hūnɔ̄ɔ̄ bālɔ̄ɔ̄ o̍ lɛ̄ŋndē I̍chi̍pīle̍ŋ ni᷄ŋ, mbō dīu̍ wāŋnda̍ I̍chi̍pī. A̍ te̍le̍ŋ ko̍ŋ, tē ō chē kōo̍wa̍ŋ mā sūūwāā o̍ kēe̍do᷄ŋ chōo̍ o̍ dīōlā chīɛ̄īlā nyāla̍ŋ pɛ̍, ō kēi̍ nya̍ chōo̍ ō hīōū. O̍ ko̍ŋ, ō chɛ᷅l lɛ̍ mī ki̍i̍la̍nɔ̍ pīɔ̍mndo̍ lūɛ̄ī chīɛ̄īlā nyāla̍ŋ ni᷄ŋ mbo̍ dīu̍ nya̍ le̍. 24He̍ī, ī wa̍ māā ka̍ā nya̍. Nya̍ ni̍, chūāūwāā nyāā ni̍, lā wa̍ ndi̍ tōsāa̍ le̍ fɛ̍ɛ̍ŋ a̍ fɛ̍ɛ̍ŋ. 25Tē lā hu᷄ŋ kɔ᷅ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ chūe̍l nya̍ būŋgɛ̄i̍ le̍ŋ ni᷄ŋ pɛ̍, lā hīōū la̍chi̍ a̍ ka̍ā ho̍ō tōsāa̍. 26Tē chūāūwāā nyāa̍ ā hu᷄ŋ nyu̍nā nya̍ pɛ̍, āā, ‘Le̍ sa̍bū yɛ̄ɛ̍nɛ̍ nya̍ tōsa̍ yɛ̍ ka̍ā ho̍ō.’ 27Lā mūlu̍l nda̍ āā, ‘Le̍ sa̍bū na̍a̍ ŋ̄ chō o̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ wo̍ cho̍ ni̍, bōōndi̍i̍ Mɛ̄lɛ̄ka̍ bālu̍ I̍chi̍pī mbo̍ dīū wāŋnda̍ I̍chi̍pī ve̍, chīɛ̄īlā wāŋnda̍ I̍sɔ̄lūɛ̄ī ki̍nɛ̍i̍ mbo̍ kēēkū lāŋ chōo̍ mbo̍ hīāū. Mbo̍ bāŋā yōōmūlā wāŋnda̍ I̍sɔ̄lūɛ̄ī. I̍sɔ̄lūɛ̍i̍nɔ̍ɔ̍ ō pīlɛ̍ bɛ̍ɛ̍ ō yɔ̄nu᷄ŋ nyɛ̍ le̍.’ ”
Mɛ̄ɛ̍ wāŋnda̍ tūēī nyɛ̄ Mūu̍sē di̍mu̍l nda̍ wo̍, mā tūndūŋ ma̍ sōōlūū Mɛ̄lɛ̄ka̍. 28O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l Mūu̍sē nda̍ E̍lɔ̄ŋ mī wāŋnda̍ I̍sɔ̄lūɛ̄ī ku̍ā ma̍ kɔ̍ to̍sā le̍nde̍.
A̍ mɛ̄ɛ̍ chūāūwāā pīāāndūāā tāsi̍a̍a̍ a̍ sɔ̄la̍ pīɔ̍mnda̍ŋ I̍chi̍pī yɛ̍ o̍kɔ̄ɔ̄
29Ā dītɛ̍ɛ̄ŋndo̍, mi̍ Mɛ̄lɛ̄ka̍ Ya̍a̍wɛ̄ɛ̄ di̍ū chūāūwāā pīāāndūāā tāsi̍a̍a̍ ve̍lu᷄ŋ I̍chi̍pī wa̍ kpo̍u̍. Chɔ̍ŋ a̍ māsā bɛ̍ndōo̍ I̍chi̍pī o̍ wa̍ o̍ sūllo̍ chōo̍ wo̍ po̍ ndɔ̍ tāso̍o̍, mbo̍ kūā a̍ wāna̍ wa̍ o̍ bīyɔ̄ɔ̍ ni᷄ŋ o̍ chīɛ̄ī mānyūmndo̍ ni᷄ŋ ndo̍ po̍ ndɔ̍ tāso̍o̍, nda̍ kpo̍u̍ ma̍ wū. Chɔ̄lūa̍a̍ bɛ̍ɛ̍, ā pīāāndūāā tāsi̍a̍a̍ chɔ̄lūāā ā kōm nda̍ kpe̍nde̍ ma̍ wū. 30Īchɔ̄l kōŋ, māsāa̍ I̍chi̍pī ni̍, lāŋgba̍ā ndūāā ka᷅lla̍ ni̍, wāŋnda̍ I̍chi̍pī kpo̍u̍ ni̍, ma̍ tīāndū, mi̍ cha᷄ŋnda̍ŋ lā tīū I̍chi̍pī kpo̍u̍. Kāni̍, I̍chi̍pī kpo̍u̍, chīɛ̄ī o̍ chīɛ̄ī ve̍ mī wānā vi̍lɛ̍i̍yo̍ ndu̍ o̍o̍ kɛ̄ɛ̍ wa̍ lo̍ŋ te̍. 31Īchɔ̄l ko̍ŋ, mi̍ māsā bɛ̍ndōo̍ yōōŋgū Mūu̍sē nda̍ E̍lɔ̄ŋ mbo̍ dīmūl nda̍ āā, “Chu̍a̍ wānāā nūmnda̍ I̍sɔ̄lūɛ̄ī mi̍ lā kūɛ̄, lā fūla̍ wānāā nīa̍a̍ tɛ̍ɛ̄ŋ. La̍ kɔ̍ mī lā kɔ̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ dīmi̍ yɛ̍. 32Chɔ̄lūāā nyāa̍ bɛ̍ɛ̍, sāā ni̍, chūīŋ ni̍, a̍ nāūwāā nyāa̍ kpe̍nde̍ lā chūa̍ mī lā kūɛ̄ a̍ nda̍. Ndu̍yɛ̍, mā pīɛ̍i̍ vɛ̄lɛ̄ Mɛ̄lɛ̄ka̍ le̍ mbō dɔ̄ū ya̍ sa̍lā.”
33A̍ te̍le̍ŋ ko̍ŋ, mi̍ wāŋnda̍ I̍chi̍pī nyɔ̍ɔ̍lū wāŋnda̍ I̍sɔ̄lūɛ̄ī āā, “Lā yāndi̍i̍ lā ma᷄l ni᷅ŋ lɛ̄ŋndēŋ nde᷅ŋ mī lā kūɛ̄. Tē ō cho̍ ko̍ŋ te̍, na̍a̍ kpo̍u̍ ŋ̄ chō chūū kpo̍u̍.” 34O̍ ko̍ŋ, mi̍ wāŋnda̍ I̍sɔ̄lūɛ̄ī a̍ chu̍ā hɛ̄ŋgɛ̍i̍la̍ nda̍ līndā ko̍lo̍ bēe̍ndīi̍yo̍ lēni᷄ŋ nda̍ŋ, ma̍ chūā dɛ̄ɛ̄ li̍ndāa̍ nda̍ lūām bēe̍dīi̍yo̍ wo̍, kɛ̍, ā dōu̍ yi̍i̍sīi̍ le̍ni᷄ŋ te̍. Ma̍ dōvī dōvī o̍ hɛ̄ŋgɛ̍i̍la̍ la̍ŋ ni᷄ŋ ma̍ mɔ̄ndɔ̄ mɔ̄ndīāā hɛ̄ŋgɛ̍i̍la̍ la̍ŋ o̍ kōlāla̍ŋ ni᷄ŋ, ma̍ bīī o̍ lā chōŋgu̍ ma̍ kūānu᷄ŋ. 35Ndu̍yɛ̍, nyɛ̄ o̍ nyɛ̄ Mūu̍sē ndu̍ o̍o̍ di̍mu̍l wāŋnda̍ I̍sɔ̄lūɛ̄ī pāāndū, ndāa̍ chi̍i̍ ndu̍ ni᷅ŋ tōsā. Nda̍ a̍a̍ nyūnā ni᷅ŋ wāŋnda̍ I̍chi̍pī le̍ ko̍o̍līi̍yo̍ŋ, a̍ nyɛ̄m kɛ̄ndɛ̄ŋ nda̍ tōōsīāā a̍ ka̍ni᷄ŋ hu̍mbo̍ŋ ndo̍ŋ, a̍ nyɛ̄lā chūɛ̄ɛ̄na᷄ŋ nda̍ŋ. 36Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ wāŋnda̍ I̍chi̍pī a̍ cha᷅ wāŋnda̍ I̍sɔ̄lūɛ̄ī nyīnā ta̍u̍. Nyɛ̄ o̍ nyɛ̄ wāŋnda̍ I̍sɔ̄lūɛ̄ī nda̍ a̍a̍ nyu̍na̍ pāāndū le̍ ndu̍ nda̍ a̍a̍ chi̍i̍ ni᷅ŋ sɔ̄lā. Mɛ̄ɛ̍ nu̍a̍ā wāŋnda̍ I̍sɔ̄lūɛ̄ī lo̍o̍ku̍ lākɔ̄ a̍ sūlta̍ŋ I̍chi̍pī ni̍.
I̍sɔ̄lūɛ̍i̍ya̍ fūla̍ o̍ lɛ̄ŋndē I̍chi̍pīle̍ŋ ni᷄ŋ
37O̍ ko̍ŋ, mi̍ wāŋnda̍ I̍sɔ̄lūɛ̄ī ma᷅l Lu̍a̍mɛ̍sī, le̍ kɔ̄la̍ŋ Su̍kɔ̍tī chi̍e̍e̍. I̍sɔ̄lūɛ̍i̍ya̍ a̍ ma̍l pāa̍le̍ le̍ŋ le̍ kɔ̄la̍ŋ nda̍ a̍ wa̍ wāa̍la̍ŋ kɛ̄mɔ̄ɔ̍ lē ŋɔ᷄mpu᷅m (600,000). Wāŋ lāāndūa̍a̍ ni̍, chūāūwāā ndāa̍ ni̍, nda̍ ve̍ o̍ chɔ̄mndo̍ ho̍ō chōo̍ le̍. 38Ndu̍yɛ̍ mɛ̄ɛ̍ nda̍ wa̍ kɔ̄la̍ŋ, mi̍ wānāā ka̍ ka̍ che̍le̍ŋ, a̍ ve̍ bɛ̍ɛ̍ lā chu̍ū le̍ wa̍ ma̍ tūāl nda̍ kɔ̍ɔ̍lī. Ndu̍yɛ̍, mi̍ I̍sɔ̄lūɛ̍i̍ya̍ ā kūā vɛ̄lɛ̄ a̍ chɔ̄lūāā ka̍ ka̍ a̍ che̍le̍ŋ, sāā ni̍, chūīŋ ni̍, a̍ nāūwa̍ kpo̍u̍ mā kūā a̍ nda̍ o̍ bā. 39Mi̍ wāŋnda̍ I̍chi̍pī a̍ to̍sā mi̍ I̍sɔ̄lūɛ̍i̍ya̍ ā kēlēŋā mālɔ̄ɔ̄ chɔ̍ chɔ̍. Le̍ he̍ī, ā sɔ̄la̍ lɛ̍ fo̍ndāŋ o̍ fo̍ndāŋ mā tōōsi̍a̍a̍ nyɛ̄ o̍ nyɛ̄ dīāā le̍, mɛ̄ɛ̍ kōlo̍ bēe̍ndīi̍ li̍ndāā nda̍ do̍u̍ ko̍ŋ yi̍i̍sīi̍ le̍ wo̍. O̍ ko̍ŋ, ma̍ tōōsīāā bēe̍ndīi̍ nda̍ do̍ū yi̍i̍sīi̍ le̍ wo̍ a̍ kōlō ko̍ŋ.
40Wāŋnda̍ I̍sɔ̄lūɛ̄ī ā chīi̍ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ya̍a̍ (430) I̍chi̍pī. 41Pāa̍le̍ pa̍āle̍ wɔ̄sīlā kɛ̄mɛ̄ le̍ hīɔ̍ɔ̍lu̍ a̍ be̍le̍-ya̍a̍ le̍ŋ lā chīŋa̍ le̍ŋ, pāa̍le̍ le̍ŋ kpe̍e̍kpe̍i̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ ha̍ā, ā fūla̍ o̍ lɛ̄ŋndē I̍chi̍pīle̍ŋ ni᷄ŋ ni̍. 42Nyūmmā māŋ Mɛ̄lɛ̄ka̍ Ya̍a̍wɛ̄ɛ̄ wa̍ wānāā ndūa̍a̍ hɔ̄lte̍ŋ chōo̍ ni̍, yɔ̄ŋi̍ nyɛ̄ yɔ̄nu᷄ŋ nda̍. Ndu̍yɛ̍, mbo̍ sōlī nda̍ o̍ lɛ̄ŋndē I̍chi̍pīle̍ŋ ni᷄ŋ. Le̍la̍ŋ, nyūmnda̍ŋ ma᷅ŋ wāŋnda̍ I̍sɔ̄lūɛ̄ī a̍ hɛ̍li̍, le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ īwɔ̄sī o̍ īwɔ̄sī ni̍. Ndu̍yɛ̍, chɔ̍ŋ ni᷅ŋ ha̍a̍a̍ mbō kūɛ̄ lāchī kɛ᷅, nyūmnda̍ŋ ma᷅ŋ wāŋnda̍ I̍sɔ̄lūɛ̄ī kpo̍u̍ a̍ chūa̍ ni̍ māā nyūmmā kpe̍e̍kpe̍i̍ le̍ nyɛ̄ Mɛ̄lɛ̄ka̍ tōsa̍l nda̍ wo̍.
Sāwāla̍ŋ le̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄
43O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē nda̍ E̍lɔ̄ŋ āā, “Sāwāla̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄, la̍ŋ la̍ cho̍ la̍ŋ ni̍. Lā chɛ᷅l mī wāna̍ lēkāa̍ o̍ cho̍ I̍sɔ̄lūɛ̍i̍nɔ̍ le̍ wo̍, mbō dē nyɛ̄ dīāā bɔ̄ŋa᷅ŋ lōōna᷄ŋndo̍ ho̍ō le̍. 44Kɛ̍, chɛ̄ o̍ chɛ̄ nya̍ pēndū pɛ̍, ō dīā nyɛ̄ dīāā bɔ̄ŋa᷅ŋndo̍ ho̍ō, tē ō wa̍ pɛ̍ mī lā hīvi̍ chɛ̄ ko̍ŋ o̍ chīɛ̄ī kɔ̄ɔ̄lī. 45Ndu̍yɛ̍, lā chɛ᷅l mī mīāl o̍ mīāl hīāūna᷄ŋ, kɛ̄lɛ̄ŋgāā wāna̍ nda̍ chu̍a̍ le̍ wa̍llo̍ wo̍, ō dē nyɛ̄ dīāā bɔ̄ŋa᷅ŋndo̍ ho̍ō le̍. 46Ndu̍yɛ̍, nyɛ̄ dīāā bɔ̄ŋa᷅ŋndo̍ ho̍ō kpo̍u̍, chīɛ̄ī ni᷄ŋ nya̍ dīo̍ ndu̍ ni̍. Lā fu̍lā a̍ ndu̍ o̍ bɛ̍ɛ̄ le̍. Ndu̍yɛ̍, pāa̍ bɛ̍ɛ̍, wānā pe᷅l te̍. 47Ndu̍yɛ̍, bɔ̄ŋa᷅ŋndo̍ ho̍ō yɛ̍, wāŋnda̍ I̍sɔ̄lūɛ̄ī kpo̍u̍ a̍ nɔ̍ ni̍ mā bīī ndu̍. 48Ndu̍yɛ̍, lā chɛ᷅l mī wānā o̍ wānā cho̍ o̍ hīvīāā o̍ chīɛ̄ī kɔ̄ɔ̄lī le̍ mbō dē nyɛ̄ dīāā bɔ̄ŋa᷅ŋndo̍ ho̍ō le̍. Tē mīāllo̍ hīŋ le̍ nya̍ cha᷄lle̍ tɛ̍ɛ̄ŋ pɛ̍, ndu̍yɛ̍ mbō yēēma̍ le̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ bīyɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ pɛ̍, wānā pɔ̍nɔ̍ o̍ wānā pɔ̍nɔ̍ cho̍ o̍ mīāl ko̍ŋ ndo̍ chi̍ɛ̍ī ni᷄ŋ, lā hīvi̍ ndu̍ fɛ̍lɛ̍ŋ o̍ chīɛ̄ī kɔ̄ɔ̄lī. O̍ ko̍ŋ, mī lā chūa̍ ndu̍ māā pi̍la̍ chi̍e̍e̍ ma̍lāŋ nya̍ chɛ̄l ndu̍ le̍ bɔ̄ŋa᷅ŋ kōŋ bīyɔ̄ɔ̍ a̍ nya̍. 49Sāwāa̍ ho̍ō, nya̍ pi̍la̍chi̍e̍e̍ya̍ I̍sɔ̄lūɛ̍i̍ ni̍, mīālāa̍ hi᷅ŋ le̍ nya̍ cha᷄lle̍ tɛ̄ɛ̄ŋ nda̍ ni̍, le̍ nya̍ kpo̍u̍ o̍ cho̍ ni̍.” 50O̍ ko̍ŋ kɔ̍ɔ̍lī, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l Mūu̍sē nda̍ E̍lɔ̄ŋ, wāŋnda̍ I̍sɔ̄lūɛ̄ī kpo̍u̍ ma̍ tōsā ndu̍. 51Ndu̍yɛ̍, o̍ pāa̍le̍le̍ŋ chōo̍ kpe̍e̍kpe̍i̍, Mɛ̄lɛ̄ka̍ Ya̍a̍wɛ̄ɛ̄ to̍sa̍ ni̍, mi̍ wāŋnda̍ I̍sɔ̄lūɛ̄ī kpo̍u̍ a̍ fu̍lā I̍chi̍pī, a̍ yu̍ŋgu̍la̍ ndāla̍ŋ kpɛ̍ kpɛ̍.
Currently Selected:
Ɛ̍sɔ̍dɔ̍ɔ̄ 12: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
Ɛ̍sɔ̍dɔ̍ɔ̄ 12
12
A̍ bōōndi̍i̍ Ki̍i̍la̍nɔ̍ pīɔ̍mndo̍ hīōū I̍sɔ̄lūɛ̍i̍ya̍ chōo̍ ve̍ o̍kɔ̄ɔ̄
1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ su̍a̍ā vɛ̄lɛ̄ nāa̍ Mūu̍sē nda̍ E̍lɔ̄ŋ chūā, o̍ lɛ̄ŋndē I̍chi̍pīle̍ŋ ni᷄ŋ. 2Mbo̍ dīmī āā, “Chɔ̍ŋ ni᷅ŋ ha̍a̍a̍, mbō kūɛ̄ a̍ lāchī kɛ᷅, pāŋge̍i̍ he̍ī, ī chō māchūāā pāŋgi̍i̍ ta̍se̍ o̍ wɔ̄sīo̍o̍ ni᷄ŋ le̍ nya̍. 3Lā dīmu̍l wāŋnda̍ I̍sɔ̄lūɛ̄ī kpo̍u̍, māā o̍ mālɔ̄ tɔ̍ wa̍ŋ chōo̍ o̍ pāŋge̍i̍ he̍ī ni᷄ŋ, māā wānā o̍ wānā pɔ̍nɔ̍ cho̍ yu̍ŋgo̍o̍ bōlle̍ŋ, ō dīī sa̍ā fɔ̍ŋndɔ̍ɔ̍ ɔ̄ɔ̄ chūīŋ fɔ̍ŋndɔ̍ɔ̍ nda̍ yu̍ŋgu̍ ndɔ̄ɔ̍ mā dē. 4Kɛ̍, tē yu̍ŋgu̍ wāŋndo̍ ō ve̍ o̍ bɔ̍ɔ̍ le̍ chɔ̄lū pīlɛ̍ chīī dīo̍ le̍, mɛ̄ɛ̍ wānā ko̍ŋ ō sɔ̄ɔ̄ŋgu̍u̍ yu̍ŋgu̍ wāna̍ nda̍ chīɛ̄ɛ̄li̍āŋ chi̍ɛ̍īla̍ŋ ndo̍ chōo̍, mā bīī chɔ̄lōo̍ ō pīlɛ̍ mā dīī. Mā dīu̍ ndu̍ ku̍ndāla̍ŋ mā pīɔ̍u̍ ndu̍ mɛ̄ɛ̍ wānā o̍ wānā o̍ nɔ̄ wāŋnda̍ kpɛ̍ o̍ yu̍ŋgu̍ ndɔ̄ɔ̍ chōo̍ yɛ̍. Ndu̍yɛ̍, a̍ mɛ̄ɛ̍ kpɛ̍ wānā o̍ wānā o̍ nɔ̍lā mbō dē yɛ̍. 5Kɛ̍ sāā fɔ̍ŋndɔ̍ɔ̍, ɔ̄ɔ̄ chūīŋ fɔ̍ŋndɔ̍ nya̍ chō ko̍ŋ bi̍yɔ̄ɔ̄ wo̍, ō nɔ᷅ sɔ̄ŋ o̍ sɔ̄ŋ tē, ō nɔ̄ mbō wa̍ ō pīāāndōo̍. Ndu̍yɛ̍, mɛ̄ɛ̍ mbō chīŋa̍ wɔ̄sīo̍o̍ ō pīlɛ̍. 6Ndu̍yɛ̍, tē lā bīī chɔ̄lūa̍a̍ ha̍ā pɛ̍, lā kɛ̄si̍ nda̍ ha̍a̍a̍, mɛ̄ɛ̍ mī mālɔ̄ tɔ̍ a̍ le̍ hīɔ̍ɔ̍lu̍a̍ŋ o̍ pāŋge̍i̍ he̍ī ni᷄ŋ ma̍ fūūlu̍u̍. Tē mā fūūlu̍u̍ pɛ̍, pāa̍le̍ le̍ŋ a̍ pāa̍le̍ de̍lāāle̍ŋ, wāŋnda̍ I̍sɔ̄lūɛ̄ī kpo̍u̍ ā dīū dīu̍ chɔ̄lūāā kāŋ. 7Ndu̍yɛ̍, chīɛ̄ī o̍ chīɛ̄ī nda̍ dē vīsīŋ chɔ̄lūāā kāŋ lēni᷄ŋ pɛ̍, ā sūu̍ ko̍o̍ma̍ chɔ̄lūāā kāŋ o̍ kēe̍do᷄ŋ, a̍ o̍ da̍kpe̍nda̍ŋ vēllāa̍ vēllē. 8Ndu̍yɛ̍, īchɔ̄l kōŋ, wānā o̍ wānā nɔ̍ mbō tūɛ̄ī vīsīŋ mu᷅ŋ mā dē mu̍ŋ, a̍ lāmndā pēē lōlɛ̍i̍yo̍, lātūlu̍ a̍ bēe̍dīi̍ nda̍ do̍ū yi̍i̍sīi̍ le̍ wo̍. 9Ndu̍yɛ̍, wānā o̍ wānā di̍ā vīsīŋ mu᷅ŋ ŋ̄kīyɛ̍i̍, ɔ̄ɔ̄ ŋ̄yāūwāā le̍, mɛ̄ɛ̍ ŋ̄ tūɛ̄īya᷄ŋ. Bōlle̍ŋ ni̍, lɔ̄lūla̍ŋ ni̍, a̍ nyɛ̄ o̍ nyɛ̄ cho̍ chɔ̄lū kōŋ ni᷄ŋ mī wānā de᷅, lā tūɛ̄ī pɛ̍, lā dē. 10Ndu̍yɛ̍ vīsīŋ mu᷅ŋ ki̍nɛ̍i̍, īpīlɛ̍ bɛ̍ɛ̍ lā nɔ̍ mī lā lɔ̄li̍ mu̍ŋ ku̍ya̍ le̍. Kɛ̍ tē ŋ̄ lo̍ nya̍ o̍ bā pɛ̍ mī pāa̍le̍ŋ lē sɛ̄, mɛ̄ɛ̍ lā lo᷄m mu̍ŋ. 11Ndu̍yɛ̍ tē lā wa̍ mu̍ŋ dīo̍ pɛ̍, lā wōōnu̍ŋ nyɛ̄lā nyāla̍ŋ kpo̍u̍. Lā wōūnu̍ŋ kɔ̍vɛ̄i̍la̍ nyāla̍ŋ, mī lā chu̍a̍ tīnda̍la̍ nyāla̍ŋ, mī lā kēle̍ŋa̍ mu̍ŋ di̍o̍ chɔ̍ chɔ̍. Te̍le̍ŋndo̍ ho̍ō, ndu̍ cho̍ wā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̄ cho̍o̍ wo̍ o̍kɔ̄ɔ̄, le̍ ya̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ ni̍.
12“Īchɔ̄l ko̍ŋ ya̍ I̍ cho̍ bālɔ̄ɔ̄ o̍ lɛ̄ŋndē I̍chi̍pīle̍ŋ ni᷄ŋ ni̍, mī tōsa̍ mī po᷄ ta̍se̍ o̍ po᷄ ta̍se̍ wānā la̍nɔ̍ɔ̍ vēlū, chɔ̄lū o̍ chɔ̄lū pīāāndū tāse̍ chɔ̄lūa̍a̍ kōm ma̍ wā I̍chi̍pī, mā vī kpo̍u̍. Ndu̍yɛ̍, mī tūsi̍ mɛ̄lɛ̄ka̍ā ndāa̍ nyɛ̄ pālāa̍ chōo̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. 13Ko̍o̍ma̍ cho̍ ma̍ŋ wa᷅ mā sūūwāā o̍ kēe̍do᷄ŋ chōo̍ wa̍ŋ, ma̍ŋ ma̍ cho̍ wā tāāmāsi̍o̍o̍ le̍ ya̍ chɔ̄mndo̍ chīɛ̄īlā nya̍ chō wā lēni᷄ŋ nda̍ŋ ni̍. Tē I̍ che᷅ dɔ̍ɔ̍ ko̍o̍ma̍ ma̍ŋ pɛ̍, I̍ hi̍o̍ū nya̍ chōo̍. O̍ ko̍ŋ, kpūndɛ̍ pīɔ̍m ya̍ cho̍ wāŋnda̍ I̍chi̍pī tūsī chōo̍ wo̍, ō ko̍māl lɛ̍ nya̍ le̍. 14Le̍la̍ŋ, chɔ̍ŋ ni᷅ŋ ha̍a̍a̍ mbō kūɛ̄ a̍ pūlāle̍ nyāle̍ŋ kɛ᷅, lā wa̍ lo̍o̍nɔ᷄ŋndo̍ a̍ pāa̍le̍ŋ nde᷅ŋ le̍ fɛ̍ɛ̍ŋ a̍ fɛ̍ɛ̍ŋ. Īwɔ̄sī o̍ īwɔ̄sī, lā bīi̍ pāa̍le̍ŋ nde᷅ŋ māā pāa̍le̍ nya̍ kē ya̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ, le̍ nyɛ̄ ya̍ to̍sa̍l nya̍ wo̍. Ndu̍yɛ̍, he̍ī chō ni᷅ŋ wā māā sāwā le̍ nya̍, le̍ fɛ̍ɛ̍ŋ a̍ fɛ̍ɛ̍ŋ.”
A̍ bɔ̄ŋa᷅ŋ be̍e̍dīi̍ nda̍ do̍ū yi̍i̍sīi̍ le̍ wo̍ o̍kɔ̄ɔ̄
15Mi̍ Mɛ̄lɛ̄ka̍ hi̍a̍ū lāchī a̍ sūɛ̍i̍ mbo̍ dīmī āā, “Tē la̍ bɔ̄ŋa᷅ŋndo̍ ho̍ō bīyɔ̄ɔ̍ pɛ̍, le̍ pālɛ̍i̍ ī ŋɔ᷄mmɛ̍ū lā di̍ā bēe̍dīi̍ nda̍ tōōsīāā a̍ yi̍i̍sīi̍yo̍ wo̍ le̍. Pāa̍le̍ tāse̍le̍ŋ o̍ pālɛ̍i̍ ŋɔ̍mmɛ̍ū kēŋ ni᷄ŋ, lā sōōlu̍u̍ yi̍i̍sīi̍yo̍ o̍ chīɛ̄īlā nyāla̍ŋ ni᷄ŋ pa̍ku̍, a̍ nyɛ̄ o̍ nyɛ̄ nɔ̍ yi̍i̍sīi̍yo̍ lēni᷄ŋ. Kāni̍ fo̍ndōle̍, wānā o̍ wānā nɔ̍ mbō dē nyɛ̄ o̍ nyɛ̄ nɔ̍ yi̍i̍sīi̍yo̍ lēni᷄ŋ te̍. Tē wānā o̍ wānā de᷅ pɛ̍, wānā ko̍ŋ ō nɔ̄ mbo̍ ō sōlīāā wānāā nīa̍a̍ tɛ̄ɛ̄ŋ, lā chu̍ā ndu̍ māā wāna̍ nī le̍. 16Ndu̍yɛ̍, pāa̍le̍ tāse̍le̍ŋ bɔ̄ŋa᷅ŋndo̍ ho̍ō ni̍, pāa̍le̍ ŋɔ᷄mmɛ̍ūle̍ŋ ni̍, lā to̍sā wa̍li̍ o̍ wa̍li̍ lēchōo̍ le̍. Mɛ̄ɛ̍ bɔ̄ɔ̄ŋi̍āŋndo̍ le̍ ya̍ Mɛ̄lɛ̄ka̍ sōōlūū wo̍, nyɛ̄ nya̍ nɔ̄ mī lā tōsā wo̍ su̍e̍e̍, mɛ̄ɛ̍ nyɛ̄ dīāā nyāa̍ tōōsīa̍a̍. Lā nɔ̄ mī lā ke̍ bɔ̄ŋa᷅ŋ dīāā bēe̍dīi̍ nɔ̍ ho̍ō yi̍i̍sīi̍ le̍ni᷄ŋ te̍ wo̍ bɛ̄ɛ̄le̍ŋ. Kāni̍, o̍ pāa̍le̍ŋ nde᷅ŋ chōo̍ kpe̍e̍kpe̍i̍ ya̍ I̍ so̍li̍ nya̍ a̍ yu̍ŋgu̍la̍ nyāla̍ŋ nya᷄ŋ I̍chi̍pī ni̍. 17Ndu̍yɛ̍, chɔ̍ŋ ni᷅ŋ ha̍a̍a̍, mbō kūɛ̄ a̍ lāchī kɛ᷅, lā wa̍ bɔ̍ŋa᷅ŋ dīāā bēe̍dīi̍yo̍ ho̍ō bīyɔ̄ɔ̍ o̍ pāa̍le̍ŋ le̍ŋ chōo̍ le̍ te̍le̍ŋ o̍ te̍le̍ŋ. Kāni̍ fo̍ndōle̍, o̍ pāa̍le̍ŋ nde᷅ŋ chōo̍ ya̍ I̍ so̍li̍ nya̍ I̍sɔ̄lūɛ̍i̍ya̍ kpo̍u̍ o̍ lɛ̄ŋndē I̍chi̍pīle̍ŋ ni᷄ŋ ni̍. 18Ndu̍yɛ̍, īwɔ̄sī o̍ īwɔ̄sī tē pāŋgi̍i̍ tāse̍ ī chɔ̄m pɛ̍, chɔ̄nɔ᷄ŋndo̍ o̍ mālɔ̄ tɔ̍ a̍ le̍ hīɔ̍ɔ̍lu̍a̍ŋ a̍ fīti̍līo̍o̍, mbō kūɛ̄ o̍ mālɔ̄ bi̍dīi̍ŋ a̍ le̍ pīli̍a̍ŋ a̍ fīti̍līo̍o̍, lā di̍ā bēe̍dīi̍ nda̍ tōōsīāā a̍ yi̍i̍sīi̍yo̍ wo̍ le̍, mɛ̄ɛ̍ o̍ nɔ̍ yi̍i̍sīi̍ le̍ wo̍. 19Le̍ pālɛ̍i̍ ī ŋɔ᷄mmɛ̍ū, lā kɛ̍sī yi̍i̍sīi̍ o̍ yi̍i̍sīi̍ o̍ chīɛ̄īlā nyāla̍ŋ ni᷄ŋ te̍. O̍ pālɛ̍i̍ ŋɔ᷄mmɛ̍ūve̍ he̍ī bɛ̄ŋgu̍ ki̍nɛ̍i̍, wānā o̍ wānā dē yi̍i̍sīi̍ o̍ yi̍i̍sīi̍ pɛ̍, wānā ko̍ŋ ō wa̍ pi̍la̍ chi̍e̍e̍, ō wa̍ mi̍a̍lāa̍ cho̍ nya̍ tɛ̍ɛ̄ŋ nda̍, wāna̍ ko̍ŋ, I̍ chu̍ē lɛ̍ ndu̍ māā wāna̍ nī le̍. 20Mī dīmu̍l nya̍ vɛ̄lɛ̄, o̍ pālɛ̍i̍ he̍ī bɛ̄ŋgu̍ ki̍nɛ̍i̍, bā o̍ bā nya̍ wa̍, lā di̍ā nyɛ̄ o̍ nyɛ̄ dīāā nda̍ tōōsīāā a̍ yi̍i̍sīi̍yo̍ wo̍ le̍.”
Ki̍i̍la̍nɔ̍ pīɔ̍mndo̍ ba̍lu̍ I̍chi̍pī
21O̍ ko̍ŋ kɔ̍ɔ̍lī, mi̍ Mūu̍sē ve̍e̍lū lāŋgba̍ā kālla̍ I̍sɔ̄lūɛ̄ī kpo̍u̍ mbo̍ dīmūl nda̍ āā, “Yu̍ŋgu̍ o̍ yu̍ŋgu̍ ō bīi̍ sāa̍ mbō dīī ndu̍, le̍ bɔ̄ŋa᷅ŋ lōōna᷄ŋ hīōūwɔ̄ɔ̄ chōo̍ wo̍ bīyɔ̄ɔ̍. 22Tē lā dīī pɛ̍, lā bīī ko̍o̍ma̍ ma᷅ŋ, lā dɔ̄ū o̍ hɛ̄ŋgɛ̍i̍yo̍ ni᷄ŋ. Lā chūa̍ lɛ̄ūwūŋ yɔ̄m ha̍sɔ̍pī wo̍, lā yīŋ mu̍ŋ o̍ ko̍o̍ma̍ ma̍ŋ ni᷄ŋ lā sūu̍ o̍ kēe̍do᷄ŋ chōo̍ a̍ o̍ dīōlā nyāla̍ŋ kpēŋgo᷄ŋ vēllāa̍ vēllē. Ndu̍yɛ̍, tē lā sūu̍ pɛ̍, wānā o̍ wānā lā fūlā lɛ̄ o̍ bɛ̍ɛ̄ le̍, ha̍a̍a̍ mɛ̄ɛ̍ īdīi̍yo̍. 23Mɛ̄lɛ̄ka̍ Ya̍a̍wɛ̄ɛ̄ cho̍ hūnɔ̄ɔ̄ bālɔ̄ɔ̄ o̍ lɛ̄ŋndē I̍chi̍pīle̍ŋ ni᷄ŋ, mbō dīu̍ wāŋnda̍ I̍chi̍pī. A̍ te̍le̍ŋ ko̍ŋ, tē ō chē kōo̍wa̍ŋ mā sūūwāā o̍ kēe̍do᷄ŋ chōo̍ o̍ dīōlā chīɛ̄īlā nyāla̍ŋ pɛ̍, ō kēi̍ nya̍ chōo̍ ō hīōū. O̍ ko̍ŋ, ō chɛ᷅l lɛ̍ mī ki̍i̍la̍nɔ̍ pīɔ̍mndo̍ lūɛ̄ī chīɛ̄īlā nyāla̍ŋ ni᷄ŋ mbo̍ dīu̍ nya̍ le̍. 24He̍ī, ī wa̍ māā ka̍ā nya̍. Nya̍ ni̍, chūāūwāā nyāā ni̍, lā wa̍ ndi̍ tōsāa̍ le̍ fɛ̍ɛ̍ŋ a̍ fɛ̍ɛ̍ŋ. 25Tē lā hu᷄ŋ kɔ᷅ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ chūe̍l nya̍ būŋgɛ̄i̍ le̍ŋ ni᷄ŋ pɛ̍, lā hīōū la̍chi̍ a̍ ka̍ā ho̍ō tōsāa̍. 26Tē chūāūwāā nyāa̍ ā hu᷄ŋ nyu̍nā nya̍ pɛ̍, āā, ‘Le̍ sa̍bū yɛ̄ɛ̍nɛ̍ nya̍ tōsa̍ yɛ̍ ka̍ā ho̍ō.’ 27Lā mūlu̍l nda̍ āā, ‘Le̍ sa̍bū na̍a̍ ŋ̄ chō o̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ wo̍ cho̍ ni̍, bōōndi̍i̍ Mɛ̄lɛ̄ka̍ bālu̍ I̍chi̍pī mbo̍ dīū wāŋnda̍ I̍chi̍pī ve̍, chīɛ̄īlā wāŋnda̍ I̍sɔ̄lūɛ̄ī ki̍nɛ̍i̍ mbo̍ kēēkū lāŋ chōo̍ mbo̍ hīāū. Mbo̍ bāŋā yōōmūlā wāŋnda̍ I̍sɔ̄lūɛ̄ī. I̍sɔ̄lūɛ̍i̍nɔ̍ɔ̍ ō pīlɛ̍ bɛ̍ɛ̍ ō yɔ̄nu᷄ŋ nyɛ̍ le̍.’ ”
Mɛ̄ɛ̍ wāŋnda̍ tūēī nyɛ̄ Mūu̍sē di̍mu̍l nda̍ wo̍, mā tūndūŋ ma̍ sōōlūū Mɛ̄lɛ̄ka̍. 28O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l Mūu̍sē nda̍ E̍lɔ̄ŋ mī wāŋnda̍ I̍sɔ̄lūɛ̄ī ku̍ā ma̍ kɔ̍ to̍sā le̍nde̍.
A̍ mɛ̄ɛ̍ chūāūwāā pīāāndūāā tāsi̍a̍a̍ a̍ sɔ̄la̍ pīɔ̍mnda̍ŋ I̍chi̍pī yɛ̍ o̍kɔ̄ɔ̄
29Ā dītɛ̍ɛ̄ŋndo̍, mi̍ Mɛ̄lɛ̄ka̍ Ya̍a̍wɛ̄ɛ̄ di̍ū chūāūwāā pīāāndūāā tāsi̍a̍a̍ ve̍lu᷄ŋ I̍chi̍pī wa̍ kpo̍u̍. Chɔ̍ŋ a̍ māsā bɛ̍ndōo̍ I̍chi̍pī o̍ wa̍ o̍ sūllo̍ chōo̍ wo̍ po̍ ndɔ̍ tāso̍o̍, mbo̍ kūā a̍ wāna̍ wa̍ o̍ bīyɔ̄ɔ̍ ni᷄ŋ o̍ chīɛ̄ī mānyūmndo̍ ni᷄ŋ ndo̍ po̍ ndɔ̍ tāso̍o̍, nda̍ kpo̍u̍ ma̍ wū. Chɔ̄lūa̍a̍ bɛ̍ɛ̍, ā pīāāndūāā tāsi̍a̍a̍ chɔ̄lūāā ā kōm nda̍ kpe̍nde̍ ma̍ wū. 30Īchɔ̄l kōŋ, māsāa̍ I̍chi̍pī ni̍, lāŋgba̍ā ndūāā ka᷅lla̍ ni̍, wāŋnda̍ I̍chi̍pī kpo̍u̍ ni̍, ma̍ tīāndū, mi̍ cha᷄ŋnda̍ŋ lā tīū I̍chi̍pī kpo̍u̍. Kāni̍, I̍chi̍pī kpo̍u̍, chīɛ̄ī o̍ chīɛ̄ī ve̍ mī wānā vi̍lɛ̍i̍yo̍ ndu̍ o̍o̍ kɛ̄ɛ̍ wa̍ lo̍ŋ te̍. 31Īchɔ̄l ko̍ŋ, mi̍ māsā bɛ̍ndōo̍ yōōŋgū Mūu̍sē nda̍ E̍lɔ̄ŋ mbo̍ dīmūl nda̍ āā, “Chu̍a̍ wānāā nūmnda̍ I̍sɔ̄lūɛ̄ī mi̍ lā kūɛ̄, lā fūla̍ wānāā nīa̍a̍ tɛ̍ɛ̄ŋ. La̍ kɔ̍ mī lā kɔ̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ dīmi̍ yɛ̍. 32Chɔ̄lūāā nyāa̍ bɛ̍ɛ̍, sāā ni̍, chūīŋ ni̍, a̍ nāūwāā nyāa̍ kpe̍nde̍ lā chūa̍ mī lā kūɛ̄ a̍ nda̍. Ndu̍yɛ̍, mā pīɛ̍i̍ vɛ̄lɛ̄ Mɛ̄lɛ̄ka̍ le̍ mbō dɔ̄ū ya̍ sa̍lā.”
33A̍ te̍le̍ŋ ko̍ŋ, mi̍ wāŋnda̍ I̍chi̍pī nyɔ̍ɔ̍lū wāŋnda̍ I̍sɔ̄lūɛ̄ī āā, “Lā yāndi̍i̍ lā ma᷄l ni᷅ŋ lɛ̄ŋndēŋ nde᷅ŋ mī lā kūɛ̄. Tē ō cho̍ ko̍ŋ te̍, na̍a̍ kpo̍u̍ ŋ̄ chō chūū kpo̍u̍.” 34O̍ ko̍ŋ, mi̍ wāŋnda̍ I̍sɔ̄lūɛ̄ī a̍ chu̍ā hɛ̄ŋgɛ̍i̍la̍ nda̍ līndā ko̍lo̍ bēe̍ndīi̍yo̍ lēni᷄ŋ nda̍ŋ, ma̍ chūā dɛ̄ɛ̄ li̍ndāa̍ nda̍ lūām bēe̍dīi̍yo̍ wo̍, kɛ̍, ā dōu̍ yi̍i̍sīi̍ le̍ni᷄ŋ te̍. Ma̍ dōvī dōvī o̍ hɛ̄ŋgɛ̍i̍la̍ la̍ŋ ni᷄ŋ ma̍ mɔ̄ndɔ̄ mɔ̄ndīāā hɛ̄ŋgɛ̍i̍la̍ la̍ŋ o̍ kōlāla̍ŋ ni᷄ŋ, ma̍ bīī o̍ lā chōŋgu̍ ma̍ kūānu᷄ŋ. 35Ndu̍yɛ̍, nyɛ̄ o̍ nyɛ̄ Mūu̍sē ndu̍ o̍o̍ di̍mu̍l wāŋnda̍ I̍sɔ̄lūɛ̄ī pāāndū, ndāa̍ chi̍i̍ ndu̍ ni᷅ŋ tōsā. Nda̍ a̍a̍ nyūnā ni᷅ŋ wāŋnda̍ I̍chi̍pī le̍ ko̍o̍līi̍yo̍ŋ, a̍ nyɛ̄m kɛ̄ndɛ̄ŋ nda̍ tōōsīāā a̍ ka̍ni᷄ŋ hu̍mbo̍ŋ ndo̍ŋ, a̍ nyɛ̄lā chūɛ̄ɛ̄na᷄ŋ nda̍ŋ. 36Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ wāŋnda̍ I̍chi̍pī a̍ cha᷅ wāŋnda̍ I̍sɔ̄lūɛ̄ī nyīnā ta̍u̍. Nyɛ̄ o̍ nyɛ̄ wāŋnda̍ I̍sɔ̄lūɛ̄ī nda̍ a̍a̍ nyu̍na̍ pāāndū le̍ ndu̍ nda̍ a̍a̍ chi̍i̍ ni᷅ŋ sɔ̄lā. Mɛ̄ɛ̍ nu̍a̍ā wāŋnda̍ I̍sɔ̄lūɛ̄ī lo̍o̍ku̍ lākɔ̄ a̍ sūlta̍ŋ I̍chi̍pī ni̍.
I̍sɔ̄lūɛ̍i̍ya̍ fūla̍ o̍ lɛ̄ŋndē I̍chi̍pīle̍ŋ ni᷄ŋ
37O̍ ko̍ŋ, mi̍ wāŋnda̍ I̍sɔ̄lūɛ̄ī ma᷅l Lu̍a̍mɛ̍sī, le̍ kɔ̄la̍ŋ Su̍kɔ̍tī chi̍e̍e̍. I̍sɔ̄lūɛ̍i̍ya̍ a̍ ma̍l pāa̍le̍ le̍ŋ le̍ kɔ̄la̍ŋ nda̍ a̍ wa̍ wāa̍la̍ŋ kɛ̄mɔ̄ɔ̍ lē ŋɔ᷄mpu᷅m (600,000). Wāŋ lāāndūa̍a̍ ni̍, chūāūwāā ndāa̍ ni̍, nda̍ ve̍ o̍ chɔ̄mndo̍ ho̍ō chōo̍ le̍. 38Ndu̍yɛ̍ mɛ̄ɛ̍ nda̍ wa̍ kɔ̄la̍ŋ, mi̍ wānāā ka̍ ka̍ che̍le̍ŋ, a̍ ve̍ bɛ̍ɛ̍ lā chu̍ū le̍ wa̍ ma̍ tūāl nda̍ kɔ̍ɔ̍lī. Ndu̍yɛ̍, mi̍ I̍sɔ̄lūɛ̍i̍ya̍ ā kūā vɛ̄lɛ̄ a̍ chɔ̄lūāā ka̍ ka̍ a̍ che̍le̍ŋ, sāā ni̍, chūīŋ ni̍, a̍ nāūwa̍ kpo̍u̍ mā kūā a̍ nda̍ o̍ bā. 39Mi̍ wāŋnda̍ I̍chi̍pī a̍ to̍sā mi̍ I̍sɔ̄lūɛ̍i̍ya̍ ā kēlēŋā mālɔ̄ɔ̄ chɔ̍ chɔ̍. Le̍ he̍ī, ā sɔ̄la̍ lɛ̍ fo̍ndāŋ o̍ fo̍ndāŋ mā tōōsi̍a̍a̍ nyɛ̄ o̍ nyɛ̄ dīāā le̍, mɛ̄ɛ̍ kōlo̍ bēe̍ndīi̍ li̍ndāā nda̍ do̍u̍ ko̍ŋ yi̍i̍sīi̍ le̍ wo̍. O̍ ko̍ŋ, ma̍ tōōsīāā bēe̍ndīi̍ nda̍ do̍ū yi̍i̍sīi̍ le̍ wo̍ a̍ kōlō ko̍ŋ.
40Wāŋnda̍ I̍sɔ̄lūɛ̄ī ā chīi̍ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ya̍a̍ (430) I̍chi̍pī. 41Pāa̍le̍ pa̍āle̍ wɔ̄sīlā kɛ̄mɛ̄ le̍ hīɔ̍ɔ̍lu̍ a̍ be̍le̍-ya̍a̍ le̍ŋ lā chīŋa̍ le̍ŋ, pāa̍le̍ le̍ŋ kpe̍e̍kpe̍i̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ ha̍ā, ā fūla̍ o̍ lɛ̄ŋndē I̍chi̍pīle̍ŋ ni᷄ŋ ni̍. 42Nyūmmā māŋ Mɛ̄lɛ̄ka̍ Ya̍a̍wɛ̄ɛ̄ wa̍ wānāā ndūa̍a̍ hɔ̄lte̍ŋ chōo̍ ni̍, yɔ̄ŋi̍ nyɛ̄ yɔ̄nu᷄ŋ nda̍. Ndu̍yɛ̍, mbo̍ sōlī nda̍ o̍ lɛ̄ŋndē I̍chi̍pīle̍ŋ ni᷄ŋ. Le̍la̍ŋ, nyūmnda̍ŋ ma᷅ŋ wāŋnda̍ I̍sɔ̄lūɛ̄ī a̍ hɛ̍li̍, le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ īwɔ̄sī o̍ īwɔ̄sī ni̍. Ndu̍yɛ̍, chɔ̍ŋ ni᷅ŋ ha̍a̍a̍ mbō kūɛ̄ lāchī kɛ᷅, nyūmnda̍ŋ ma᷅ŋ wāŋnda̍ I̍sɔ̄lūɛ̄ī kpo̍u̍ a̍ chūa̍ ni̍ māā nyūmmā kpe̍e̍kpe̍i̍ le̍ nyɛ̄ Mɛ̄lɛ̄ka̍ tōsa̍l nda̍ wo̍.
Sāwāla̍ŋ le̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄
43O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē nda̍ E̍lɔ̄ŋ āā, “Sāwāla̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄, la̍ŋ la̍ cho̍ la̍ŋ ni̍. Lā chɛ᷅l mī wāna̍ lēkāa̍ o̍ cho̍ I̍sɔ̄lūɛ̍i̍nɔ̍ le̍ wo̍, mbō dē nyɛ̄ dīāā bɔ̄ŋa᷅ŋ lōōna᷄ŋndo̍ ho̍ō le̍. 44Kɛ̍, chɛ̄ o̍ chɛ̄ nya̍ pēndū pɛ̍, ō dīā nyɛ̄ dīāā bɔ̄ŋa᷅ŋndo̍ ho̍ō, tē ō wa̍ pɛ̍ mī lā hīvi̍ chɛ̄ ko̍ŋ o̍ chīɛ̄ī kɔ̄ɔ̄lī. 45Ndu̍yɛ̍, lā chɛ᷅l mī mīāl o̍ mīāl hīāūna᷄ŋ, kɛ̄lɛ̄ŋgāā wāna̍ nda̍ chu̍a̍ le̍ wa̍llo̍ wo̍, ō dē nyɛ̄ dīāā bɔ̄ŋa᷅ŋndo̍ ho̍ō le̍. 46Ndu̍yɛ̍, nyɛ̄ dīāā bɔ̄ŋa᷅ŋndo̍ ho̍ō kpo̍u̍, chīɛ̄ī ni᷄ŋ nya̍ dīo̍ ndu̍ ni̍. Lā fu̍lā a̍ ndu̍ o̍ bɛ̍ɛ̄ le̍. Ndu̍yɛ̍, pāa̍ bɛ̍ɛ̍, wānā pe᷅l te̍. 47Ndu̍yɛ̍, bɔ̄ŋa᷅ŋndo̍ ho̍ō yɛ̍, wāŋnda̍ I̍sɔ̄lūɛ̄ī kpo̍u̍ a̍ nɔ̍ ni̍ mā bīī ndu̍. 48Ndu̍yɛ̍, lā chɛ᷅l mī wānā o̍ wānā cho̍ o̍ hīvīāā o̍ chīɛ̄ī kɔ̄ɔ̄lī le̍ mbō dē nyɛ̄ dīāā bɔ̄ŋa᷅ŋndo̍ ho̍ō le̍. Tē mīāllo̍ hīŋ le̍ nya̍ cha᷄lle̍ tɛ̍ɛ̄ŋ pɛ̍, ndu̍yɛ̍ mbō yēēma̍ le̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ bīyɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ pɛ̍, wānā pɔ̍nɔ̍ o̍ wānā pɔ̍nɔ̍ cho̍ o̍ mīāl ko̍ŋ ndo̍ chi̍ɛ̍ī ni᷄ŋ, lā hīvi̍ ndu̍ fɛ̍lɛ̍ŋ o̍ chīɛ̄ī kɔ̄ɔ̄lī. O̍ ko̍ŋ, mī lā chūa̍ ndu̍ māā pi̍la̍ chi̍e̍e̍ ma̍lāŋ nya̍ chɛ̄l ndu̍ le̍ bɔ̄ŋa᷅ŋ kōŋ bīyɔ̄ɔ̍ a̍ nya̍. 49Sāwāa̍ ho̍ō, nya̍ pi̍la̍chi̍e̍e̍ya̍ I̍sɔ̄lūɛ̍i̍ ni̍, mīālāa̍ hi᷅ŋ le̍ nya̍ cha᷄lle̍ tɛ̄ɛ̄ŋ nda̍ ni̍, le̍ nya̍ kpo̍u̍ o̍ cho̍ ni̍.” 50O̍ ko̍ŋ kɔ̍ɔ̍lī, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l Mūu̍sē nda̍ E̍lɔ̄ŋ, wāŋnda̍ I̍sɔ̄lūɛ̄ī kpo̍u̍ ma̍ tōsā ndu̍. 51Ndu̍yɛ̍, o̍ pāa̍le̍le̍ŋ chōo̍ kpe̍e̍kpe̍i̍, Mɛ̄lɛ̄ka̍ Ya̍a̍wɛ̄ɛ̄ to̍sa̍ ni̍, mi̍ wāŋnda̍ I̍sɔ̄lūɛ̄ī kpo̍u̍ a̍ fu̍lā I̍chi̍pī, a̍ yu̍ŋgu̍la̍ ndāla̍ŋ kpɛ̍ kpɛ̍.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.