Ɛ̄si̍tā 7
7
1O̍ ko̍ŋ, Māsāa̍ Bɛ̍ndōo̍ Sɛ̍sɛ̄ɛ̄ ni̍, Ha̍māŋ ni̍, ma̍ kūā le̍ nyɛ̄ dīāā lēbɛ̄ɛ̄ Ɛ̄si̍tā o̍ bɛ̍ɛ̍ndi̍a̍a̍ le̍ nda̍ wo̍. 2Mɛ̄ɛ̍ nda̍ cha᷄l vɛ̄lɛ̄ kōlɔ̄ɔ̍ pāa̍le̍ di̍i̍ŋ ndɔ̄lē lēŋ, mi̍ māsāa̍ nyūnā Ɛ̄si̍tā āā, “Chɔ̍m ya̍ ni̍ko̍ nyɛ᷅ ŋ̄ yēēma̍ wo̍ Māsāa̍ Ɛ̄si̍tā. Nyɛ̄ o̍ nyɛ̄ ŋ̄ yēēma̍ pɛ̍, di̍mu̍l la̍, I̍ nɔ̍lā mī to̍sa̍l nu̍m. Ā yɔ᷄ŋ bɛ̍ɛ̍ āā māsāle̍ nīle̍ŋ pīɔ̄ūwo̍ tɛ̄ɛ̄ŋ ŋ̄ yēēma̍ ni̍, I̍ nɔ̍lā mī ke̍ nu̍m.”
3Mi̍ Ɛ̄si̍tā lo᷅ o̍ ko̍ŋ mbo̍ dīmūl ndu̍ āā, “O̍o̍ Māsā Bɛ̍ndōo̍, tē a̍ hi̍ni̍ kɔ̄l a̍ ya̍ pɛ̍ nyɛ᷅ kɛ̄ndɛ̄ kɛ̍ndɛ̄, ndu̍yɛ̍ ma̍ nāŋ kɔ̄l le̍ mā to̍sa̍l la̍ nyɛ̄ ya̍ I̍ ye̍e̍ma̍ wo̍ pɛ̍, mɛ̄ɛ̍ yāndi̍i̍ māsāa̍, chi̍i̍ndi̍a̍a̍ yo̍o̍mū nūu̍, a̍ yōōmūlā wānāā nīa̍a̍. 4Ya̍ ni̍, wānāā nīa̍a̍ ni̍, yōōmūlā nāāla̍ŋ lā chō ni᷅ŋ lā pīsīāā chi̍. Tē ndu̍ o̍o̍ wa̍ pɛ̍ māā kɛ̄ɛ̄sīāā ko̍ni̍ nda̍ a̍a̍ kɛ̍ɛ̍si̍a̍a̍ le̍ na̍a̍ pīsi̍ o̍ lēchɛ̄ ni᷄ŋ, wānā pɔ̍nɔ̍ ni̍, wānā la̍nɔ̍ ni̍, I̍ ve̍ bɛ̍ɛ̍ nu̍m dīmūl a̍ ndi̍ o̍kɔ̄ɔ̄ le̍, ō cho̍ bɛ̍ɛ̍ sūɛ̍i̍ wānā a̍a̍ yɛ̍i̍ ma̍sā īkɔ̄ɔ̄ le̍ wa̍ ke̍ŋ te̍. Kɛ̍, ā kɛ̄ɛ̄sīāā le̍ mā dīu̍ na̍a̍ mā bāsu̍ na̍a̍ tɛ̍ɛ̍.”
5O̍ ko̍ŋ, mi̍ Māsāa̍ Sɛ̍sɛ̄ɛ̄ nyūnā Ɛ̄si̍tā āā, “Ō nɛ̄ɛ̍nɛ̍ kɛ̍ɛ̍si̍a̍a̍ yɛ̄ kɛ̄ɛ̄sīāā kōŋ? Ɔ̍ɔ̄ wāna̍ tu̍u̍ tūū kōŋ ndo̍? Ō nɛ̄ɛ̍nɛ̍ nɔ̍lā yɛ̍ mbō tōsā ke̍ŋ?”
6Mi̍ Ɛ̄si̍tā di̍mūl māsāa̍ āā, “Ha̍māŋ, fi̍nyā kɔ̄l vēsɛ̍i̍ bɛ̍ndōo̍ ho̍ō, ya̍a̍mɔ̍ɔ̍ nāā bɛ̄ndōo̍.” O̍ ko̍ŋ, mi̍ Ha̍māŋ o̍ si᷅m ni̍ko̍ ma̍sāa̍ a̍ Ɛ̄si̍tā o̍ hɔ̄l a̍ sīōōŋīī bɛ̄ndūe̍i̍. 7O̍ ko̍ŋ, mi̍ māsā bɛ̍ndōo̍ māl nyɛ̄ dīāā nda̍ wa̍ dīo̍o̍ wo̍, mbo̍ kūā o̍ kpe̍le̍ wa̍ o̍ chīɛ̄ī lēmāsāa̍ wo̍ a̍ hɔ̄lla̍ ndu̍ ā tūū kpɛ̍i̍. O̍ ko̍ŋ, mi̍ Ha̍māŋ si̍nā māā dɛ̍nɛ̍ pa̍lāā bɛ̄ndōo̍ ō hīŋ ndu̍ tōlɔ̄ɔ̄ chōo̍. Le̍ he̍ī, mbo̍ lō chīɛ̄ī ni̍ŋ Ɛ̄si̍tā nyɔ̄ɔ̄lōo̍, le̍ mbō chīīndi̍a̍a̍ yōōmū ndɔ̄ɔ̍. 8Mɛ̄ɛ̍ Māsāa̍ Sɛ̍sɛ̄ɛ̄ o̍ mi̍i̍ŋgu̍ chīɛ̄ī ni᷄ŋ, ō kōma̍l Ha̍māŋ cho̍ Ɛ̄si̍tā dēlī dēlīo̍o̍ o̍ lābɛ̄ŋgu̍ ni᷄ŋ nāa̍ Ɛ̄si̍tā wa̍ īchāli̍ wa̍. O̍ ko̍ŋ, mi̍ Māsāa̍ Sɛ̍sɛ̄ɛ̄ di̍mī āā, “Mɛ̄ɛ̍ pōo̍ ho̍ō ō yēēma̍ ni̍ko̍ mbō kpūwa̍ la̍a̍ nūu̍ ya̍ o̍ hɔ̄l, o̍ ya̍lo̍ chi̍ɛ̍ī ni᷄ŋ na̍nu᷄ŋ?”
Māsā bɛ̍ndōo̍ ō chīi̍ bɛ̍ɛ̍ so̍ndō mēī le̍, mi̍ bu̍ɛ̍i̍yāa̍ wa̍ ndu̍ kɔ̄ɔ̄lī wa̍, ā hu᷄ŋ si̍mbū Ha̍māŋ mɔ̍ndɔ̍ mɔ̍ndɔ̍, ma̍ yīī ndu̍ nyɔ̄ɔ̍ o̍ hɔ̄l. 9Mi̍ māsāa̍ bu̍ɛ̍i̍yāā ndūa̍a̍ ō pīlɔ̍ɔ̍, dīōla̍ŋ āā Hāābo̍nā, mbo̍ dīmūl māsāa̍ āā, “Fāllo̍, Ha̍māŋ o̍ chi̍i̍ ni᷅ŋ bāndi̍i̍ vi̍lɛ̄ī bɛ̄ndūe̍i̍, i̍ cho̍ hēlɔ̄ɔ̍ le̍ nɛ̄īyo̍ be̍le̍-ŋɔ̍mmɛ̍ū a̍ le̍ ŋūɛ̍ɛ̍nu̍ ve̍ tāŋgūl o̍ ndu̍ lo̍ dīō kpe̍e̍kpe̍i̍, le̍ Mɔ̍di̍kāī lāndɔ̄ɔ̍ lo̍ŋ. Ndu̍yɛ̍, Mɔ̍di̍kāī ko̍ŋ ndu̍ chi̍i̍ndi̍a̍a̍ yōōmū nūmndo̍ ni̍, ndu̍ to̍sa̍ ni̍ ā dīi̍ nu̍m te̍.”
10Mi̍ Māsā bɛ̍ndōo̍ lo᷅ o̍ ko̍ŋ mbo̍ dīmī āā,
“Lā kɔ̍ la̍ndū ndu̍ o̍ bāndi̍i̍ ndu̍ pīla̍ o̍ ta̍ŋgu̍l ke̍ŋ nde̍ chōo̍.” O̍ ko̍ŋ, ma̍ kɔ̍ la̍ndū Ha̍māŋ o̍ bāndi̍i̍ o̍ ta̍ŋgu̍l le̍ Mɔ̍di̍kāī lāndɔ̄ɔ̍ lēchōo̍ ve̍ chōo̍. O̍ ko̍ŋ, mi̍ tu̍mbe̍ māsā bɛ̍ndōo̍ ndu̍ o̍o̍ dɔ̍ɔ̍nu᷄ŋ ndo̍ ō pɔ̄lūl.
Kisi Bible © Bible Society in Liberia, 2015.