Zakarìa 4
4
Àvìmènu àtɔ̃gɔ̃a: Kãligbɛ̃ti kudo àmìtiwo
1Àtikplɔtɔ kè le pò nupo na mù a, va fɔ̃ mù sìgbè mù kè le dɔ̃ àlɔ̃ sã nène. 2E biɔ mù be: “Nukɛ wò le kpɔ ò?” Mù ɖo e ŋuti be: “Mù le kpɔ sìka kãligbɛ̃ti. E ɖo àmìgo lè èji. E ɖo kãligbɛ̃ adrɛ̃ eye kãligbɛ̃ sia kãligbɛ̃ ɖo èzò be àɖe (adrɛ̃). 3Àmìti èvè lè àmìgoa gbɔ, ɖèka lè àmìgoa be ɖùsi mè eye èvègɔ̃a lè yebe èmìɔ̃ mè.” 4Mù biɔ àtikplɔtɔ kè le pò nupo na mù a be: “Àpetɔ, gɔ̃mèsèse kɛ ye lè ènu kèa si ò?” 5E ɖo e ŋuti be: “Wò mu nya ɛ̀a?” Mù gblɔ̃ na ɛ̀ be: “Ào!” 6aNène a, e le ɖè e gɔ̃mè na mù be:
10b“Kãligbɛ̃ adrɛ̃awo le ɖɔ̀lì Tɔhonɔ̀ be ŋùkuviwo. Wo le ɖia ànyigbã kplògòdòa kpata.” 11Mù gbà biɔ be: “Àmìti èvè kèwo ye lè ɖùsi ku èmìɔ̃ mè na àmìgoa ya be gɔ̃mèsèse ɖe?” 12Mù gbà biɔ ke be: “Àmìti be àlɔ̀zɛ̃ èvè kèwo mè ye àmì kè lè sìgbè sìka nènea le to yì sìka-ti kèwo mè èmɔ̃ toawo ya be gɔ̃mèsèse ɖe?” 13E ɖo e ŋuti na mù be: “Wò mu nya ènu kèa?” Mù ɖo e ŋuti na ɛ̀ be: “Ào! Àpetɔ nyè.” 14Nène a, e le ɖè e mè na mù be: “Wo le nyi ŋusù èvè kèwo ye wo do àmì èta na a, ne Tɔhonɔ̀ be èdɔa, lè ànyigbã kpata ji.”
Tɔhonɔ̀ fìã àjɔ̀gbè so Zòrobabɛ̀l ŋuti
6bÀtikplɔtɔa sɔ ènyà kèa na mù be ma gblɔ̃ na Zòrobabɛ̀l be: Tɔhonɔ̀ ŋusɛ̃kpatatɔa be àŋɛ̀a ye nyi ekèa:
“Mu nyi to kãlìnuwɔ̀wɔ
kudo ènu drã mè ye
wò la wɔ̀ ènu kè wò la wɔ̀a ò,
vɔ̀ to àpe Gbɔ̃gbɔ̃ ji kpò.”
7E gblɔ̃ kpe è be:
“Èto gã kèa la teŋu nyi èmɔ̃xenua?
Zòrobabɛ̀l la gbã ɛ̀ sɔ wɔ̀ ànyigbã gbàjà.
Mawuxɔa be koŋùjikpea la to so e mè.
Eye àmèwo kpata la do àpa be:
“E nyɔ! E nyɔ na ɛ̀!”
8Tɔhonɔ̀ gbà do àŋɛ̀ bu kèa na mù be:
9“Zòrobabɛ̀l ye ɖo mawuxɔa be dodoewo.
E ye ke ye la gbà wu èdɔa nu.”
Wàlɛbɛ kè ènu kèa la va e mèa, mì la nya ɛ̀ be Tɔhonɔ̀ ŋusɛ̃kpatatɔa ye dɔ̃ mù ɖoɖa mìa gbɔ.
10aWo mu ɖo la ɖèkɔ̀ lè
gɔ̃mèjèje be àgbàgba jèjewo ŋuti ò.
Bòhũa, wo ɖo la kpɔ jìjɔɛ ne wo kpɔ Zòrobabɛ̀l
jè mawuxɔa tùtu be èdɔwo gɔ̃mè
Mina Bible © Bible Society of Togo, 2014.