Zakarìa 2
2
Àvìmènu èvègɔ̃a: Àzò èwo kudo èzògbɛ̀dɛwo
1Mù kɔ ŋùmè yì ji eye mù kpɔ àzò ènè. 2Mù biɔ àtikplɔtɔ kè le pò nupo na mù a be: “Gɔ̃mèsèse kɛ ye lè àzò ènè kèawo si ò?” E ɖo e ŋuti na mù be: “Wo lè èdù sɛ̃ŋu kèwo nyà Yudà, Izràɛl kudo Yèruzàlɛm be dùkɔ̃wo so àkpawo kpataa be tèpe.”
3E yomè a, Tɔhonɔ̀ ɖè èzògbɛ̀dɛ ènè fiɔ mù. 4Mù biɔ sè be: “Nukɛ ye wo va la wɔ̀ ò?” E ɖo e ŋuti na mù be: “Wo va la do vɔ̃vɔ̃ji gbà crɔ̃ èdù sɛ̃ŋu kèwo xa Yudà be èdùa. Wo nyà Yudàtɔwo to àkpawo keŋu, eye àmè ɖekpe mu teŋu nɔ̀tè lè woa nu ò.”
Àvìmènu ètɔ̃gɔ̃a: Jijekà
5Ènyè Zakarìa, mù kɔ ŋùmè yì ji eye mù kpɔ ŋusù ɖe kè le èkà kè wo sɔ jijena ènua ɖo àsi. 6Mù biɔ ɛ̀ be: “Fikɛ ye wò le yì ò?” E ɖo e ŋuti be: “Mù le ja jije Yèruzàlɛm sɔ nya yebe dìdi kudo kèke mè.”
7Àtikplɔtɔ kè le pò nupo na mù a zɔ̃ va ŋùkɔ̀ viɖe eye àtikplɔtɔ bu zɔ̃ va dogò è. 8Eye àtikplɔtɔ kè le pò nupo na mù a gblɔ̃ na ɛ̀ be: “Ɖèbla yì gblɔ̃ na ŋusù ɖèkajɛvi kè le jijekaa be: “Yèruzàlɛm ɖo la nyi èdù kè lè nùvòa, eye èglì ɖekpe mu la nyi àkpoxɔ̀nu na ɛ̀ ò. Nyàwo àgbètɔ kudo èlã kèwo kpata lè e mèawo la jì ɖo ji drì.” 9Kpɔɖa ènyà kè Tɔhonɔ̀ gblɔ̃a ye nyi be: “Nyè ŋutɔ mù la nyi èzò be èglìkpa trɔ do èdùa, eye mù la ɖè gogo nyèa fiɔ lè woabe dòdò mè.”
Tɔhonɔ̀ yɔ àmè si àhùaawo, be woa gbɔ̀
10Tɔhonɔ̀ gblɔ̃ be:
“Mì àmè kèwo mù nyà to àkpawo kpata,
so èvègo kudo àpùgo,
so èwèzɛ̃pe kudo èwèɖoxɔ̀pea,
mì si fifì,
mì jo lè èvègo nyigbã kè nyi
Babɛ̀l be èfìɔdua mè.
11Mì yì! Yèruzàlɛmviwo,
mì àmè kèwo yì sò ci Babɛ̀l nyigbã jia,
mì jo kaba!”
12Tɔhonɔ̀ ŋusɛ̃kpatatɔa sɔ ènyà veve ɖe do àsi na mù.
Kpɔɖa ènyà kè be gblɔ̃ so dùkɔ̃ kèwo hlà mì ɖù a ŋutia ye nyi be:
“Àmè kè va xa mìa, xa àpe àdɔ̀kùnu vevetɔ.
13Ɛ̃ɛ, mù la tùnu kudo dùkɔ̃ kpɔ̀tɛawo.
Nène a, àmè kèwo nyi woabe kluviwo sã, la va hlà wo.”
Wàlɛbɛ kè ènu kèa la va e mèa, mì la nya be Tɔhonɔ̀ ŋusɛ̃kpatatɔa ye dɔ̃ mù ɖoɖa.
14Tɔhonɔ̀ gbà gblɔ̃ be:
“Do jìjɔɛ be àpa, kpɔ jìjɔɛ, Yèruzàlɛm.
Kpɔɖa mù gbãnà.
Mù la va sò àxue ɖo dòdò mè na wò.
15Gbè ŋua gbèa, dùkɔ̃ sùgbɔ
la trɔ va ènyè Tɔhonɔ̀ gbɔ.
Wo la trɔ zũ àpe dùkɔ̃.
Vɔ̀ àpo dòdò mè ye mù la sò àxue ɖo.”
Wàlɛbɛ kè e la jɔ̀ a, mì la nya ɛ̀ be Tɔhonɔ̀ Ŋusɛ̃kpatatɔa ye dɔ̃ mù ɖoɖa mìa gbɔ.
16Yudà la trɔ nyi Tɔhonɔ̀ tɔ̀
lè ànyigbã kè nyi e tɔ̀a ji.
Eye Yèruzàlɛm la trɔ nyi
èdù kè be cã na ɛ̀a.
17Ènu sia ènu ne bɔ̀nu lè Tɔhonɔ̀ be ŋùkɔ̀!
Ɛ̃ɛ, e fɔ̃ eye e to lè
yebe Nɔ̀pe Kɔ̀kɔ̀ɛ.
Mina Bible © Bible Society of Togo, 2014.