TOBÌ 4
4
Tobì be ètopòɖowo
1Gbè ŋua gbèa, Tobì ɖoŋù ègà kè be sɔ ɖo Gabàɛl gbɔ lè Ragùɛs lè Medìa, 2eye e gblɔ̃ lè ye ɖokoe mè be: «Èku ye mù biɔ ya! E la nyɔ be ma yɔ èvi nyè Tobìa ne ma ɖè ègà kèa be ènyà na ɛ̀ gbɔ̀xue ma va ku.» 3E yɔ èvia Tobìa va ye ɖokoe gbɔ, gblɔ̃ na ɛ̀ be: «Ne mù va kua, wò la ɖì mù sìgbè lekè e jèa nène. Bù ènɔ̀ wò. Mù gbà ɖè èkɔ̀ lè e ŋuti lè yebe àgbè ŋùkèke ɖèka tètè mè ò. Wɔ̀ ènu kè jɔ̀nà jì na ɛ̀a. Mù gbà do àdɔ̀mèze na yebe èkla lè ènu ɖekpekpe mè ò. 4Èvi nyè, ɖoŋùku àfɔ̀ku kèwo kpata be kpe ɖo ŋuti wòa gà kè mè ne wò lè yebe pòdo mèa. Eye ne e va kua, ɖì ì ɖo gbɔ nyè lè èyɔ̀do ɖèka mè.
5Lè àpo àgbèzãwo kpata mèa, èvi nyè, ɖoŋùku Tɔhonɔ̀ ji eye mù gbà lɔ̃ ɖo nuvuɛ̃wɔ̀wɔ ku yebe èsedodowo be gbegble ji ò. Wɔ̀ jɔ̀jɔɛ be èdɔwo lè àpo àgbè ŋùkèkewo kpata mè eye mù gbà kplɔ̀ màjɔ̀ màjɔ do ò. 6Ɖo àmè kèwo wɔ̀nà ɖo nyàwo jia, la kpɔ sìtu lè woabe èdɔwo mè. 7Kɔ̀ àdɔ̀mè ɖo àmè kèwo kpata wɔ̀nà ànùkua ŋuti. Mù gbà trɔ ŋùmè do wɔ̀amènɔ̀ ò eye Mawu cã mu la trɔ ŋùmè do wò cã ò. 8Na ènu àmè sɔ zɔ̃ ɖo ènu kè lè àsi wòa ji: ne wò ɖo sùgbɔa, na sùsuiɖe; ne wò ɖo viɖea na viɖe. Vɔ̀ mù gbà crì ènu nana àmè ò. 9Nènea ye wò la wla àdɔ̀kùnu àdodoe ɖɛ na èhiã be ŋùkèkewo. 10Ɛ̃ɛ, ènu na àmè hlùɛ̃nà àmè lè èku si, e ɖènà àmè lè vìvìti be èmɔwo ji. 11Àmè ɖekpekpe kè le na ènu àmè fàa, le wɔ̀ ènunana kè jènà ŋùmè na Mawu èjihũitɔa.
12Èvi nyè, zɛ̃ na gbòlòwɔ̀wɔ ɖekpekpe jè ŋùkɔ̀ eye ɖè nyɔnù lè ètɔ wòwo be kɔ̀ta mè. Mù gbà ɖè àmèjro nyɔnù ò, ɖo gblɔ̃ɖɛtɔwo be jìjimèviwo mi nyi. Ɖoŋù Nɔà, Abràham, Izak ku Yakɔb, ku mia tɔwo so gɔ̃mèjèje. Woa kpata ye ɖè nyɔnù lè woabe kɔ̀ta mè, eye wo tusì na woabe jìjimèviwo; wo la nyi ànyigbãa be crɔ̃ɖùtɔwo. 13Eŋua, èvi nyè, cã nɔ̀vi wòwo sɔ wu; mù gbà nɔ jra ɖo woa ji ò, ŋusù loo àlo nyɔnù. Mù gbà gbe àsì kpɔkpɔ lè woa dòmè ò. Ɖo jajra crɔ̃na àmè eye wo buna. Nènea ke, kuviɔ̃ ɖona àmè wɔ̀amènɔ̀ eye wo nɔ̀nà èhiã jiŋɔ ɖe mè. Ekèa jìnà èkuɖìɖi. 14Mù gbà le èdɔwɔ̀tɔ be èfɛ̃tu ɖɛ kaka èŋù ne kè ɖo ji ò, vɔ̀a tu ì na ɛ̀ trolo, eye ne wò sumɔ Mawua, wò la xɔ̀ àjɔ̀ ɖo e tèpe. Nɔ̀ ŋùzɔ̃ èvi nyè, lè èdɔ wòwo kpata mè eye wòa le ŋùku ɖo àpo wɔ̀nawo ŋuti. 15Ènu kè wò mu lɔ̃nà òa, mù gbà wɔ ɛ̀ na àmè ɖe ò. Mù gbà nù àhà kaka ne wòa mu ò, eye àhàmumu mu gbà nyi àpo èmɔ zɔ̃xlɔ̃ ò.
16Ma àpo ènuɖùɖu ku àmè kè àdɔ̀ le wùa, eye tà àvɔ na àmè kè lè àmamaa. Sɔ lè sùgbɔ kè lè àsi wòa mè na àmè fàa. Mu gbà ve wò ne wò na ènu àmè e yomè ò. 17Na àpo ènuɖùɖu lè àmè jɔ̀jɔɛ be cɔxɔmè, vɔ̀a mù gbà na ɖo nuvuɛ̃wɔ̀tɔ ta ò.
18Xɔ̀ susu so ènunyatɔ ɖekpekpe si eye mù gbà crì ètopòɖo nyuɛ̃ ɖekpe ò. 19Pòɖɛ̀ na Tɔhonɔ̀ àpo Mawu wè sia wè. Biɔ ɛ̀ ne bèa jɔ̀ àpo èmɔwo na wò eye bèa na wòa kpɔ èta na àpo èdɔ ku ɖoɖowo, ɖo dùkɔ̃ ɖekpe mu ɖo ènunyanya ò, vɔ̀a Tɔhonɔ̀ ŋutɔ ye nana ɖàgbèwo, e ɖiɖina àmè kè be jroa kaka yì èkuwode ɖaa.
«Eye fifìa, èvi nyè, le pòpòfiɔ kèawo ɖo àsi eye mu gbà bu lè susu mè na wò gbèɖe ò!
20«Fifìa, èvi nyè, mù lena wòa nya be mù sɔ klòsalòga talɛ̃tò èwo ɖo Gabàɛl, Gabrì be èvia gbɔ lè Ragùɛs lè Medìa. 21Èvi nyè, mù gbà vɔ̃ be mi va trɔ wɔ̀amènɔ̀ ò; wò ɖo àdɔ̀kù gãɖe ne wò ɖo sisi na Mawu, ne wò zɛ̃nà na nuvuɛ̃ ɖe sia ɖe eye wò wɔ̀nà ènu kè jènà ŋùkumè na Tɔhonɔ̀ àpo Mawua.»
Mina Bible © Bible Society of Togo, 2014.