Romàtɔwo 12
12
Àgbè yeye
1Ye ŋutia, nɔ̀viwo, mù le pòfiɔ mì, to Mawu be ŋuzĩzĩ kuku na àmè ji veve ɖe be, mìa sɔ mìa ɖokoewo na Mawu, sìgbè vɔsa àgbè-àgbè, kè be ŋuti kɔ̀ keŋu, ekè jè ŋùmè na Mawu a nène. Ekèa ye nyi lekè mì ɖo la sɛ̃ Mawu àdodoe ɖo, lè mìa ɖokoewo mè. 2Mì mu gbà nɔ̀ àgbè sìgbè lekè xixe kèa mè tɔwo nɔ̀nà ɛ̀a nène ò. Vɔ̀a mì na Mawu ne trɔ mìabe susuwo, ne woa zũ yeye, àleke be mìabe nɔ̀nɔmè bèa trɔ keŋu-keŋu. Eŋuã, mì la teŋu jèsi Mawu be èjro, ku ènu kè nyɔ, kè sɔ̀gbè eye be jènà ŋùmè na ɛ̀a.
3Đo, mù le gblɔ̃ na àmè sia àmè, lè mìa dòmè, to màje kè wo na mùa ji be, mì mu gbà ɖo susu gã ɖe wu ekè jè a ò, vɔ̀a ne mìa ɖo susu bɔ̀bɔɛ, sìgbè àlekè Mawu jije xɔ̀sè be jijenu na àmè sia àmèa nène. 4Đo, sìgbè leke mi ɖo ŋutinu sùgbɔ lè ŋutilã ɖèka mè, eye ŋutinu kèawo keŋu mu wɔ̀nà èdɔ ɖèka ŋùmè ò nènea, 5nènea ke ye, ekè mi nyi àmè vòvòvòwo cã nènea, àmèti ɖèka kpò mi nyi lè ɖèka wɔ̀wɔ mè ku Kristò. Eye lè mia dòmèa, mi nyi ŋutinu na mia nɔ̀nɔwo. 6Ekè ènu nana kèwo lè mia siawo tovò lè woa nɔ̀nɔwo ŋuti, sɔ zɔ̃ ɖo màje kè Mawu na mia jia; àmè kè xɔ̀ nyàgblɔ̃ɖɛ be ènu nana a, ne gblɔ̃ ènyà ɖɛ, sɔ zɔ̃ ɖo xɔ̀sè kè e ɖoa ji. 7Àmè kè xɔ̀ sumɔ̃vi-dɔ be ènu nana a, ne wɔ̀ yebe sumɔ̃vi-dɔa. Àmè kè xɔ̀ ènufiɔfiɔ be ènu nana a, ne fiɔ ènu. 8Àmè kè xɔ̀ pòpòfiɔ be ènu nana a, ne pòfiɔ. Àmè kè xɔ̀ ènu na àmè be ènu nana a, ne na ènu fàa. Àmè kè xɔ̀ àmènunɔ̀nɔ be ènu nana a, ne wɔ̀ ɛ̀ ku veve do ènu. Àmè kè xɔ̀ ŋuzĩzĩkuku be ènu nana a ne ku ŋuzĩzĩ.
9Mì lɔ̃ mìa nɔ̀nɔwo, so èjì mè. Mì crì èvuɛ̃, eye mìa le ènu kè nyɔa be wɔ̀wɔ ɖo àsi. 10Mì lɔ̃ mìa nɔ̀nɔwo sìgbè lekè nɔ̀viwo lɔ̃nà woa nɔ̀nɔwoa nène. Mì jè àgbàgba ne mia nɔ do bùbu mìa nɔ̀nɔwo ŋuti. 11Èzò ne nɔ̀ mìabe èdɔwɔ̀wɔ mè. Mì mu gbà gbɔjɔ ò; mì sɛ̃ Tɔhonɔ̀ kudo èjì mè kɔ̀kɔ̀ɛ. 12Mì nɔ jɔ̀jì lè ŋùɖo mè. Mì nɔ gbɔ̃jìɖɛ lè àyàɖùɖu mè. Mì nɔ fãkue kudo veve do ènu. 13Mì do àlɔ̀ àɖèsã kèwo lè èhiã mèawo, eye mì do vivi àmèjro xɔ̀xɔ ŋuti.
14Mì biɔ Mawu ne bèa tusì na àmè kèwo lè tĩ mìa yomè awo. Mì biɔ *sìtu na wo, mì mu gbà biɔ kpɛ̃sɛ̃ ò. 15Mì jɔ̀jì kudo àmè kèwo le kpɔ jìjɔ̀ɛ a, eye mì fã àvi ku àmè kèwo le fã àvia. 16Mì nɔ̀ gbèkpli-gbèkpli mè ku mìa nɔ̀nɔwo. Mì mu gbà yigò ò, vɔ̀ bòhũ a, mì bɔ̀bɔ mìa ɖokoewo. Mì mu gbà kpɔ mìa ɖokoewo be yèwo nyã ènu ŋutɔ ò.
17Mù gbà ɖo èvuɛ̃, èvuɛ̃ tèpe na àmè ɖekpekpe ò. Mì nɔ wɔ̀ ènunyuɛ̃ na àmè sia àmè gà sia gàmè. 18Ne e la teŋu nya wɔ̀, eye mìawo ŋuti kpò be la kù ɖoa, eŋuã mì nɔ̀ fàfa mè kudo àmèwo keŋu. 19Àmè ɖèvewo, mì mu gbà biɔ èhlɔ̃ na mìa ɖokoewo gbèɖe ò. Vɔ̀ bòhũa, mì na Mawu ŋutɔ ne biɔ ɛ̀ na mì. Đo wo ŋlɔ̀ ɖo mawunya xoma mè be, Tɔhonɔ̀ gblɔ̃ be: “Ènyè ye la biɔ èhlɔ̃. Ènyè ye la ɖo ye tèpe.” 20Ye ŋutia “Ne àdɔ̀ le wù kɛ̃tɔ wòa, na ɛ̀ ènu bèa ɖù, ne sìkɔ le tì ìa, na ɛ̀ èsì bèa nù, ɖo ne wò wɔ̀ ekèa, e lè sìgbè wò bɔ̀ èzòka ɖo èta ji na ɛ̀ nène.” 21Mù gbà na ènuvuɛ̃ ne ɖù ji wò ò, vɔ̀ bòhũa, sɔ ènunyuɛ̃ ɖù ènuvuɛ̃ ji.
Mina Bible © Bible Society of Togo, 2014.