Èlododowo 25
25
1Èfìɔ Salomɔ̀n be èlododo buwo ye nyi ekèawo. Yudà be èfìɔ Èzekìas be ènuŋlɔ̀tɔwo, lè yebe èfìɔsa mè, wo ye ŋlɔ̀ wo dàɖɛ.
Èlododo vòvòvòwo
2Mawu be gogo ye nyi be bèa wla ènu ɖewo do àmè. Eye èfìɔwo be gogo ye nyi be woa yì kè ɖo ènu kèwo Mawu wlaa ŋuti.
3Mi mu la teŋu nya jiŋùkusi be èji yìyi kaka la nya ànyigbã be ègũ wɔ̀wɔ ò. Nène a ke mi mu la teŋu nya ènu kèwo lè èfìɔwo be èjì mè ò.
4Ɖè èɖi kè lè klòsalò mèa jo ne gosìmitì bèa sɔ ɛ̀ wɔ̀ àcɔɖonu àdodoe na wò. 5Ɖè àmè nyrãkuwo jo lè èfìɔ be àgbàsa mè, ne bèa kplɔ̀ dùkɔ̃a lè jɔ̀jɔɛ sòso mè, eye nènea yebe ŋusɛ̃ la gbà likè kpe è.
6Mù gbà nɔ kɔ ɖokoe wò yì ji lè èfìɔ be ŋùkɔ̀ ò, eye mù gbà nɔ̀ àmègãwo be tèpe cã ò. 7E la nyɔ be woa gblɔ̃ na wò bòhũ be: “Va nɔ̀ ŋùkɔ̀”, sɔ wu be woa ɖiɖi wò lè èfìɔ be ŋùkɔ̀.
8Mù gbà ciji gblɔ̃ ènu kè wò nya lè kòjoɖope ò. Ɖo leke wò la wɔ̀ ne kɛ̃tɔ wòa teŋu ɖèfiɔ be wò le ɖàjè ò?
9Ne wò le hɛ̃ ènyà kudo àpo havia, mì jrà ènyàa ɖo lè mìa dòmè, vɔ̀a, mù gbà yì gbã ènyà kè àmè bu gblɔ̃ na wòa ò. 10Mu nyi nène òa, àmè kè wò le gblɔ̃ ènyà na a, teŋu zũ wò, eye wò mu la gbà teŋu nyi àdɔ̀mènyà wlatɔ ò.
11Ènyà kè wo gblɔ̃ ɖo àmèhùenua xɔ̀asì wu sìkanu kè wo sɔ klòsalò ɖo àcɔ na a.
12Ènunyatɔ be ŋùmèkãkã lè na àmè kè ɖona ètoa sìgbè àlɔ̀ga àlo èwlɔ sìka kè kɔ̀a tɔ̀ nène.
13Àtikplɔtɔ kè wɔ̀nà ànùkua nana ŋusɛ̃ àpetɔ kè dɔ̃ ɛ̀a. E lè sìgbè èjijàja kè nana fàfa lè zòzo blibo mèa nène.
14Àmè kè fìãnà àjɔ̀gbè vɔ̀ mu wɔ̀nà ɖo eji òa, lè sìgbè lilikpo kudo àya pòpo kèwo mu nana èjijàja ɖekpe òa nène.
15To àdòdò blibo hɛ̃hɛ̃ jia, wo la teŋu hɛ̃ kòjoɖotɔ be àyè va ènyà ɖe gbɔ. Eye wo la teŋu ɖè èmɔ̃xenuwo kpata jo to blɛ̀wù wɔ̀wɔ mè.
16Ne wò kè ɖo ànyisì ŋutia, ɖù àkpa kè jè na wòa kpò. Ne wò ɖù ì wunua, wò la tru. 17Mù gbà fɔ̃ nɔ yì èxlɔ̃ wò gbɔ tɛ̀gbɛ̀ ò, mu nyi nène òa, wò la va tì ì eye e cã la jo va crì ènyà wò gbɔ.
18Àmè kè le dohùɛ do nɔ̀via kunùtɔ̀a, lè sìgbè èkpò tìtri, èwui àlo àŋùti kè ènu ɖa na ŋutɔa nène.
19Woa do èjì ɖo àjèɖàtɔ ŋuti lè gbledo mèa, nyi bòmècici sìgbè àɖu gbegblenɔ̀ be nyìlã ɖùɖu àlo woa kù ɖo àfɔ̀ ŋɛ̃ŋɛ̃ ŋuti nène.
20Jìjɔɛ be èhà jìji na ènuwɔ̀donɔ̀a, lè sìgbè wo lè àma-àma lè fàfa hùenu, àlo wo kɔ̀ vɛ̃ gbegble ɖo àbì mè nène.
21Ne àdɔ̀ le wù àpo kɛ̃tɔa, na ɛ̀ ènu bèa ɖù; ne sìkɔ le tì ìa, na ɛ̀ èsì bèa nù. 22Ne wò le wɔ̀ ekèa, wò la nɔ do nupo na ɛ̀ sìgbè èzòka zòzo ye wò le bɔ̀ ɖo èta na ɛ̀ nène. Eye Tɔhonɔ̀ la ɖo e tèpe na wò.
23Àvego be àya pòpo hɛ̃nà èjijàja vana, àjèɖàɖawo nana àmèwo binajì.
24E nyɔ be woa yì nɔ̀ ètrè lè àzɔ̀ge wu be woa nɔ̀ èdu kudo nyɔ̃nù kè wɔ̀nà àjrèa.
25Àŋɛ̀nyuɛ̃ kè so àzɔ̀ge vaa, lè sìgbè èsì fàfa nène na àmè kè èsìkɔ le tìa.
26Àmè kè le wɔ̀ nyuɛ̃ vɔ̀ be le hũhũ lè àmè nyrãku ɖe be ŋùkɔ̀a, lè sìgbè èsìdo àlo vudo kè wo pòɖia nène.
27Mu nyɔ be woa nɔ nù ànyisì sùgbɔ àlo woa nɔ ji ègã nyinyi glo ò.
28Àmè kè mu teŋu ɖùnà yebe àdɔ̀mèze ji òa, lè sìgbè èdù kè lè nùvòa nène; èdù kè mu ɖo àgbògbò òa.
Mina Bible © Bible Society of Togo, 2014.