Fìlipìtɔwo 2
2
Yesù Kristò ye nyi Àpetɔ
1Ye ŋutia, ne àmè yɔyɔ ɖe lè Kristò mèa, ne ètùjèanyi ɖe lè lɔ̃lɔ̃ mèa, ne Gbɔ̃gbɔ̃ a be èdunɔ̀nɔ ɖe lèa, ne àmènuveve ku ŋuzĩzĩkuku ɖe lèa, 2mì na ma kpɔ jìjɔɛ be mù lè àgbè lè gbèkpli mè, lè lɔ̃lɔ̃ ɖèka ku èjì ɖèka mè, kudo nɔ̀vi wɔ̀wɔ ɖèka, ne mìa nɔ̀ èdu ku èjì ɖèka, kudo ènu gɔ̃mè sèse ɖèka. 3Mì mu gbà wɔ̀ ènu ɖekpe lè àmè ɖokoe tɔ̀ jiji, be yèa ze mè, àlo jajra mè ò, vɔ̀ lè ɖokoe bɔ̀bɔ mè. Àmè sia àmè ne kpɔ yebe èhavi be e wu yè. 4Mìa dòmètɔ ɖekpe mu gbà ji ènu kè la ɖè àlè na ye ɖokoe kpò ò, vɔ̀a, ne bù àmè buwo cã tɔ̀. 5Mìabe wɔ̀nawo, lè mìa nɔ̀nɔwo dòmè ne nɔ̀ sìgbè lekè be jè be ne nɔ̀ lè Kristò Yesù mèa nène:
6e ye kè so Mawu mèa,
mu kpɔ be yèa kù gligã
ɖo ɖèka nyinyi ku Mawu ŋuti ò.
7Vɔ̀a, e ɖè yebe bùbu ɖɛ,
eye be sɔ ye ɖokoe wɔ̀
sumɔ̃vi. Nène a, e jɔ̀ lè àgbètɔwo be nɔ̀nɔmè mè,
eye wo jì ì sìgbè àgbètɔ nène.
8E bɔ̀bɔ̀ ye ɖokoe,
e sè ètonu kaka yì èku mè, àtisòga be èku mè.
9Đo ekèa ŋutia, Mawu cã kɔ ɛ̀ yìji wu ènuwo keŋu,
eye be na ɛ̀ Nyikɔ kè wu nyikɔwo keŋuã,
10àleke be, lè Yesù be nyikɔ mèa,
àmè kèwo lè jiŋùkusi, lè ànyigbã ji, àlo
lè ànyigbã gɔ̃mèawo keŋu be èklòwo ne jè ègũ.
11Eye àmè sia àmè ne hũ e mè be: “Yesù Kristò ye nyi Tɔhonɔ̀ na Mawu Àta be gogo!”
Kristòtɔ̀wo be èdɔ do àsi
12Ye ŋutia èxlɔ̃ nyèwo, sìgbè àlekè ye mì sènà àpe ègbè, wàlɛbɛ kè mù nɔ̀ mìa gbɔa nènea, e le veve ɖe be wàlɛbɛ kè nyè mu lè mìa dòmè cã òa, mìa ɖo èto mù wu. Mì wɔ̀ mìabe hlùɛ̃gã be èdɔ lè vɔ̃vɔ̃ kudo bùbu mè. 13Đo, Mawu ye le sɔ èjro kudo èdɔwɔ̀wɔ do mìa mè, ne mìa sɔ nɔ wɔ̀ ènu kè nyɔ na ɛ̀a.
14Mì wɔ̀ ènuwo keŋu, lihũi mà lì kudo ènyà mà dɔ̃. 15Ne mìa nyi àmè kèwo ŋuti ènyà ɖe mu lè ò. Ekèwo kɔ̀. Mìa nyi Mawu be èvi kèwo mu ɖo àgɔ̀ ɖe ò, lè àmè mà wɔ̀ ànùkua kudo àmè vuɛ̃ kèwo lè xixe kèa mèwo dòmè. Mì ɖo la klɛ̃ lè woa dòmè sìgbè wètriviwo lè jiŋùkusi nène. 16Ne mìa le àgbènyàa ɖo àsi. Ne mì le wɔ̀ ekèa, mù la kpɔ èmɔ la go lè Kristò be tɔtrɔ va be àzã gbè. Ekèa la ɖè è fiɔ be àpe èdɔ kudo àgbàgba jèje mu nyi gbalo ò.
17Ne e gbà nyi àpe èhũ ye wo la sɔ savɔ ɖo mìabe xɔ̀sèa be sùmɔ̀ sumɔ taa, e la jɔ̀jì na mù, eye mù la sò àyo kudo mìa kpata. 18Mìawo cã, nènea kea, mì jɔ̀jì eye mì sò àyo kudo mù.
Wo dɔ̃ Timòteo ku Epafroditò
19Mù le susu be ne Tɔhonɔ̀ Yesù la ɖè èmɔa, mù la ɖo Timòteo ɖoɖa mì sɔ̀sɔɛɖe, ne nyè cã ma kpɔ jìdo ɖo ènyà nyuɛ̃ kèwo be la hɛ̃ so mìa gbɔ va na mùa ŋuti. 20Ye ɖèka kpò ye nyi àmè kè teŋu sɔ èɖe lè àpe ènyàwo mè, eye kè gbà kãmana na mì lè nyàwo toto mè. 21Àmèwo keŋu be susuwo lè ènu kèwo kù ɖo woa ŋutɔwo be ènuwo jiji ŋuti; wo mu le gblɔ̃ Kristò tɔ̀ ò. 22Mìa ŋutɔwo mì nya àlekè Timòteo ɖè yebe vevedonu fiɔ ɖo. Ènyè ku ì, sìgbè èvi nɔ̀ ètɔa ŋuti nènea, mi wɔ̀ èdɔ ɖodu lè àŋɛ̀nyuɛ̃ a kãkã mè. 23Ye ŋuti mù le ɖoŋù ɖo, be ma ɖo è ɖoɖa mì kaba, ne mù gbe nya ènu ɖe so lekè be la nyi na mù ɖo ŋuti kpòa. 24Ènyè ŋutɔ cã mù kã ɖo e ji be Tɔhonɔ̀ ŋutɔ la ɖè èmɔ na mù be ma va kpɔ mì sɔ̀sɔɛ ɖe.
25Mù bù be e lè veve ɖe be ma ɖo mia nɔ̀vi Epafroditò, àpe èhadɔwɔ̀tɔ kudo àvũwɔ̀tɔ ɖoɖa mì. Àmè kèa ye mì dɔ̃ ɖoɖa, ne bèa hɛ̃ ènu kèwo mù hiãa va na mù. 26E jro be yèa kpɔ mì veve ɖe, ɖo e wɔ̀ ɛ̀ bàɖà be mì sè be yè jè èdɔ̀. 27E jè èdɔ̀ nyàwo, kaka e ku kloe. Vɔ̀a, Mawu ku ŋuzĩzĩ na ɛ̀; mu nyi na ye ɖèka kpò ò, vɔ̀a na nyè cã, ne àpe siayi cici mu gbà yì ŋùkɔ̀ ò. 28Eŋuã ŋuti nyè ŋutɔ cã, mù kpɔ be mù la ɖo è ɖoɖa mì, ne mìa gbà kpɔ ɛ̀, ne èjì ne jɔ̀ mì, ne àpe siayi cicia ne vɔ̀. 29Nène a, mì xɔ̀ ɛ̀ kudo jìjɔɛ blibo, sìgbè nɔ̀vi nène, lè Tɔhonɔ̀ mè, mì ɖo la ɖo bùbu na àmè kèwo lè sìgbè e ye nènea. 30Đo a, na Kristò be èdɔa, e ku kloe, e sɔ yebe àgbè a na be èdɔ kè ye mìa ŋutɔwo mì mu teŋu wɔ̀ òa, e wɔ̀ ɛ̀ na mù.
Mina Bible © Bible Society of Togo, 2014.