Àmè Hɛ̃hlɛ̃ 5
5
Àmè kèwo mu kɔ̀ ò a
1Tɔhonɔ̀ gblɔ̃ na Mosè be: 2“Ɖè ègbè na Izràɛlviwo be wo ne ɖè àmè ɖekpekpe àmè kè jè èkpò, àlo àmè ɖekpekpe kè ŋuti èsì ɖe, àlo èhũ le kɔ̀ lèa, àlo kè tɔ àsi ènu kuku ŋutia to lè àsàɖaa mè. 3Mì la ɖè leke be ŋusù, àlo leke be nyɔ̃nùa to lè àsàɖaa#5.3 Woa kpɔ Lev 13:46 mè, ne wo mu gbà ba èdɔ̀ na Izràɛlviwo be àsàɖa mètɔ kèwo dòmè mù lèa ò.” 4Izràɛlviwo zɔ̃ ɖo ègbè kèa ji, eye wo ɖè àmè kèwo ŋuti mu kɔ̀ ò a to lè àsàɖaa mè, sɔ zɔ̃ ɖo ègbè kè Tɔhonɔ̀ do àsi na Mosè a ji.
Àjɔ̀ ɖo àgɔ̀jèje ta
5Tɔhonɔ̀ gblɔ̃ na Mosè be: 6“Gblɔ̃ na Izràɛlviwo be: ne ŋusù ɖe, àlo nyɔ̃nù ɖe, wɔ̀ èvuɛ̃, eye mu wɔ̀ ànùkua na yebe èhavi òa, Tɔhonɔ̀ ye mu wɔ̀ ànùkua na ò. E jè àgɔ̀. 7Àmè kèa la hũ èvuɛ̃ kè be wɔ̀a mè, la trɔ ènu kè be àgɔ̀ be jè a, keŋu-keŋu na yebe èhavia, eye be la sɔ ènu kè be àgɔ̀ be jè a be mamã àtɔ̃gɔ̃a, àlo, ènua be àsìxɔ̀xɔ be mamã àtɔ̃gɔ̃a kpe è, na àmè kè ji be jè àgɔ̀ lèa. 8Ne àmè kè wo wɔ̀ èvuɛ̃ do a mu ɖo xòmètɔ ɖe kè wo la trɔ yebe ènua na ò a, wo la trɔ ènu kèa na Tɔhonɔ̀, eye hũbonɔa la sɔ ɛ̀ bɔ̀ ɖo àgbò kè wo la sɔ wɔ̀ àvũlele be vɔsaa ŋuti, na àgɔ̀jètɔa. 9Ènu nana kèwo kpata Izràɛlviwo la ɖè va, ku ènu kɔ̀kɔ̀ɛ kèwo kpata wo la hɛ̃ va na hũbonɔa la nyi hũbonɔa tɔ̀. 10Ènu nana kɔ̀kɔ̀ɛ kè àmè sia àmè la na Tɔhonɔ̀a, e la sɔ do àsi na hũbonɔa, eye ènu sia ènu kè hũbonɔa la xɔ̀a, nyi hũbonɔa tɔ̀.”
Èse ɖo ŋuhuã ŋuti
11Tɔhonɔ̀ gblɔ̃ na Mosè be: 12“Pònupo na Izràɛlviwo, ne wòa gblɔ̃ na wo be: E teŋu va jɔ̀ be ŋusù ɖe be èsrɔ̃ la ɖè àfɔ̀ vuɛ̃, eye mu la wɔ̀ ànùkua na èsrɔ̃a ò, 13eye ŋusù bu la dɔ̃ nyɔ̃nùa gbɔ, lè bèbe mèa. Nène a, nyɔ̃nùa la pòɖi ye ɖokoe, lè èsrɔ̃a be mà-nyã mè, wàlɛbɛ kè ɖàsèfo ɖekpe mu lè, la kpɔ ɛ̀, ne woa le è ò a. 14Ne ŋuhuã be gbɔ̃gbɔ̃ na be ènua le to ŋusùa ji, wàlɛbɛ kè nyɔ̃nùa pòɖi ye ɖokoe nyàwo a, àlo, ŋuhuã be gbɔ̃gbɔ̃ na be ŋusùa le susu ènu ŋua, wàlɛbɛ kè nyɔ̃nùa mu pòɖi ye ɖokoe ò a, 15ŋusùa la kplɔ̀ èsrɔ̃a va hũbonɔa gbɔ. E la hɛ̃ ènu nana kè hiã ɖo nyɔ̃nùa taa va: èlù jijenu be mamã èwogɔ̃a ɖèka. Mu la kɔ̀ àmì ɖo e ji ò, eye mu la sɔ lifi ɖo e ji ò, ɖoa, ŋuhuã be ènu nana kè ŋuti be le sitè ɖoa ye be nyi. 16Hũbonɔa la na nyɔ̃nùa la dɔ̃ va, nɔ̀tè ɖo Tɔhonɔ̀ be ŋùmè. 17Hũbonɔa la kù èsì kɔ̀kɔ̀ɛ ɖo èkɔgbã mè; e la kù èkɔ lè ànyigbã, lè Nɔ̀pe Kɔ̀kɔ̀ɛ, sɔ kɔ̀ ɖo èsìa mè. 18Hũbonɔa la na nyɔ̃nùa la nɔ̀tè ɖo Tɔhonɔ̀ be ŋùmè, eye be la kãkã èɖà ɖo èta na ɛ̀. Nyɔ̃nùa la kè àlɔ̀wo ɖɛ, eye hũbonɔa la sɔ ènu nana kè ŋusùa sɔ le sitè ɖo èvuɛ̃ ŋuti, ekè le nyi ŋuhuã be ènu nana a do àlɔ̀wo mè na nyɔ̃nùa. Hũbonɔa ŋutɔ la le vevesèse be èsì kè mè kpɛ̃sɛ̃ lèa ɖo àsi. 19Hũbonɔa la na nyɔ̃nùa la kã àtãŋu; e la gblɔ̃ na ɛ̀ be: 'Ne mu nyi nyàwo be ŋusù ɖe dɔ̃ gbɔ wò, eye wò mu do àfɔ̀ ègbe, sɔ pòɖi ɖokoe wò, sɔ flù èsrɔ̃ wò ò a, eŋuã, kpɛ̃sɛ̃ kè èsì kèa hɛ̃a ne to ŋuti wò va yì. 20Vɔ̀a, ne e va jɔ̀ be wò do àfɔ̀ ègbe, wò pòɖi ɖokoe wò, eye ŋusù kè mu nyi èsrɔ̃ wò ò a, dɔ̃ gbɔ wòa,' 21Hũbonɔa la sɛ̃kpɛ̃ na nyɔ̃nùa be#5.21 Lè ŋɔ̀ŋlɔ̃ ɖewo mèa, wo la kpɔ: “Hũbonɔa la kã kpɛ̃sɛ̃ be àtãŋu ɖo nyɔ̃nùa ŋuti be: Tɔhonɔ̀ ne sɔ wò wɔ̀ kpɔwɔɛ na kpɛ̃sɛ̃ be àtãŋu kè wo kãnaa, lè dùkɔ̃ wòa dòmè”: 'Tɔhonɔ̀ ne na kpɛ̃sɛ̃ ne ɖì ŋuti wò, ne wòa trɔ ènunyɔŋu lè dùkɔ̃ wò dòmè; èkò la pu àlì mè na wò, eye àpo pòdo la tɛ̃. 22Èsì kèa kè hɛ̃nà kpɛ̃sɛ̃ vaa la ɖo àdɔ̀mè na wò; e la na pòdo la tɛ̃ na wò, eye èkò la pu àpo àdɔ̀mè.' E yomè a, nyɔ̃nùa la ɖo e ŋuti be: 'Àmèn, Àmèn!'
23Hũbonɔa la ŋlɔ̀ kpɛ̃sɛ̃-nyà kèawo, eye be la na wo la srè ɖo vevesèse be èsìa mè. 24Hũbonɔa la na nyɔ̃nùa la nù vevesèse be èsì kè hɛ̃nà kpɛ̃sɛ̃ vaa. Èsì kèa kè hɛ̃nà kpɛ̃sɛ̃ vaa, la ve kpàa, wàlɛbɛ kè be le ɖo àdɔ̀mè na nyɔ̃nùa. 25Hũbonɔa la xɔ̀ ŋuhuã be vɔsaa lè nyɔ̃nùa si, e la sɔ ɛ̀ ɖo Tɔhonɔ̀ be ŋùmè, eye be la sɔ ɛ̀ va vɔsakpea ji. 26Hũbonɔa la kù àlɔ̀ ɖèka lè èwɔa ŋuti, e la nyi ŋùkuɖojinu ɖe kè be la tɔzò lè vɔsakpea ji. E yomè a, e la na nyɔ̃nùa la nù èsìa. 27Ne e na nyɔ̃nùa nù èsìa, ènu kè la jɔ̀ a ye nyi be: Ne nyɔ̃nùa pòɖi ye ɖokoe, eye be do àfɔ̀ ègbea, èsì kè hɛ̃nà kpɛ̃sɛ̃ vaa, la ve kpàa, wàlɛbɛ kè be le ɖo nyɔ̃nùa be pòdo mèa, nyɔ̃nùa be pòdo la tɛ̃, eye yebe ànɔwo la yrɔ̀. Nyɔ̃nù kèa la nyi kpɛ̃sɛ̃ be nyɔ̃nù lè yebe dùkɔ̃a dòmè. 28Vɔ̀a, ne nyɔ̃nù kèa mu pòɖi ye ɖokoe ò, eye yebe ŋuti kɔ̀a, e la xɔ̀ àlìlɔ, eye be la jì èvi.
29Ekèa ye nyi ŋuhuã be èse, ne nyɔ̃nù ɖe mu wɔ̀ ànùkua na èsrɔ̃a ò, eye be do àfɔ̀ ègbe, sɔ pòɖi ye ɖokoea, 30àlo, ne ŋuhuã be gbɔ̃gbɔ̃ ɖo ŋusù ɖe mè, eye be le ɖè susu be yè srɔ̃ do àfɔ̀ ègbea, ŋusùa la na, èsrɔ̃a la va Tɔhonɔ̀ be ŋùkɔ̀, eye hũbonɔa la sɔ èse kèa kplɔ̀ nyɔ̃nùa. 31Wo mu la sɔ àgɔ̀jèje ɖekpe na ŋusùa ò, vɔ̀ ne nyɔ̃nùa jè àgɔ̀a, nyɔ̃nùa la nɔ̀ yebe àgɔ̀jèjea nu.
Mina Bible © Bible Society of Togo, 2014.