Àmè Hɛ̃hlɛ̃ 26
26
1Tɔhonɔ̀ gblɔ̃ na Mosè ku hũbonɔ Eleazàr, Arɔ̀n be èvia be: 2“Mì hlɛ̃ Izràɛlviwo be àmèha bliboa be xòmètɔ kèwo ɖo èpè èwì ku e jivɔwo, ekèwo lè Izràɛlviwo be àhùakɔ̃a mèa.” 3Mosè ku hũbonɔ Eleazàr pò nupo na wo lè Mòab be ànyigbã gbàjàa ji, lè Yɔrdàn be ètɔ̀a to, lè Yerikò gbɔ. Wo gblɔ̃ be: 4“Wo la hlɛ̃ ŋusù kèwo ɖo èpè èwì ku e jivɔwo, ɖo ègbè kè Tɔhonɔ̀ do àsi na Mosè a ji.”
Kɔ̀ta kèwo hũ so Ejiptè vaawo ye nyi ekèawo:
5Rubɛ̀n ye nyi Izràɛl be èvi àmègãxoa. Rubɛ̀n be jìjimèviwo ye nyi: Hanɔ̀k kè jì Hanɔ̀kviwo be hɛ̃nua, Palù kè jì Palùviwo be hɛ̃nua; 6Hɛsrɔ̀n kè jì Hɛsrɔ̀nviwo be hɛ̃nua; Karmì kè jì Karmìviwo be hɛ̃nua; 7Àmè kèawo ye nyi Rubɛ̀n be jìjimèviwo be hɛ̃nuwo. Woa kpata, wo lè ŋusù hotu èwì vɔ ɖèka àlɔ̀ woeadrɛ̃ takpo ci èwo (43730).
8Palù be èvi ye nyi Eliav 9Eliav be èviwo ye nyi: Nemùɛl, Datàn ku Abiràm. Datàn ku Abiràm kèawo ye nyi àmèha a be àmèdɔ̃dɔ̃ kèwo ye jè àgla ɖo Mosè ku Arɔ̀n ŋutia. Wo nɔ̀ Korà be èhasòsoa ŋuti wàlɛbɛ kè e jè àgla ɖo Tɔhonɔ̀ ŋutia. 10Ànyigbã a kè ènu, eye be mì wo ku Korà kpata, wàlɛbɛ kè Korà be èhasòsoa crɔ̃, eye èzò vũvũ àgbètɔ àlɔ̀ èvè èkà ci èwoa (250). Àmè kèawo nyi kpɔwɔɛ. 11Wàlɛbɛ ŋua, Korà be èviwo ya mu ku ò.
12Simeɔ̀n be jìjimèviwo, ɖo woabe hɛ̃nuwo nu: Nemùɛl jì Nemùɛlviwo be hɛ̃nu; Yamìn jì Yamìnviwo be hɛ̃nu, Yakìn jì Yakìnviwo be hɛ̃nu; 13Zerà jì Zeràviwo be hɛ̃nu; Saolò jì Saolòviwo be hɛ̃nu. 14Àmè ŋuawo ye nyi Simeɔ̀n be jìjimèviwo be hɛ̃nuwo. Woa kpata wo lè ŋusù hotu woeɖèka àlɔ̀ èvè (22200).
15Gad be jìjimèviwo, ɖo woabe hɛ̃nuwo nu; Sefɔ̀n jì Sefɔ̀nviwo be hɛ̃nu; Hagì jì Hagìviwo be hɛ̃nu; Sunì jì Sunìviwo be Hɛ̃nu. 16Oznì jì Oznìviwo be Hɛ̃nu; Erì jì Erìviwo be hɛ̃nu; 17Arɔ̀d jì Arɔ̀dviwo be hɛ̃nu, Arelì jì Arelìviwo be hɛ̃nu, 18Àmè kèawo ye nyi Gad be jìjimèviwo be hɛ̃nuwo. Woa kpata wo lè ŋusù hotu èwì àlɔ̀ àtɔ̃ (40500).
19Yudà be èviwo ye nyi Ɛr ku Onàn. Ɛr ku Onàn wo ku lè Kanàn-nyigbã ji. 20Yudà be jìjimèviwo ye nyi ekèawo, ɖo woabe hɛ̃nuwo nu. Yebe jìjimèvi Selà jì Selàviwo be hɛ̃nu; Perɛ̀s jì Perɛ̀sviwo be hɛ̃nu; Zerà jì Zeràviwo be hɛ̃nu. 21Perɛ̀s be jìjimèviwo ye nyi ekèawo: Hɛsrɔ̀n jì Hɛsrɔ̀nviwo be hɛ̃nu; Hamul jì Hamulviwo be hɛ̃nu. 22Àmè ŋuawo ye nyi Yudà be jìjimèviwo be hɛ̃nuwo; woa kpata, wo lè ŋusù hotu ègbã vɔ ènyi àlɔ̀ àtɔ̃ (76500).
23Isakàr be jìjimèviwo ɖo woabe hɛ̃nuwo nu ye nyi ekèa: Tolà jì Tolàviwo be hɛ̃nu; Pu a jì Puaviwo be hɛ̃nu; 24Yàsuv jì Yàsuv be jìjimèviwo be hɛ̃nu; Simrɔ̀n jì Simrɔ̀nviwo be hɛ̃nu. 25Àmè ŋuawo ye nyi Isakàr be jìjimèviwo be hɛ̃nuwo. Woa kpata, wo lè ŋusù hotu ègbã vɔ èvè àlɔ̀ ètɔ̃ (64300).
26Zabulɔ̀n be jìjimèviwo ɖo woabe hɛ̃nuwo nu ye nyi ekèa: Serɛ̀d jì Serɛ̀dviwo be hɛ̃nu; Elɔ̀n jì Elɔ̀nviwo be hɛ̃nu; Yahlɛ̀l jì Yahlɛ̀lviwo be hɛ̃nu. 27Àmè ŋuawo ye nyi Zabulɔ̀nviwo be hɛ̃nuwo; woa kpata, wo lè ŋusù hotu ègbã àlɔ̀ àtɔ̃ (60500).
28Yosɛ̀f be èviwo ɖo woabe hɛ̃nuwo nu ye nyi ekèa: Manasè ku Efràyim. 29Manasè be jìjimèviwo: Makìr jì Makìrviwo be hɛ̃nu; Makìr jì Gilead; Gilead jì Gìleadviwo be hɛ̃nu. 30Gilead be jìjimèviwo ye nyi ekèawo; Iezɛ̀r jì Iezɛ̀rviwo be hɛ̃nu; Helɛ̀k jì Helɛ̀kviwo be hɛ̃nu; 31Asrìɛl jì Asriɛ̀lviwo be hɛ̃nu; Sɛkɛ̀m jì Sɛkɛ̀mviwo be hɛ̃nu; 32Semidà jì Semidàviwo be hɛ̃nu; Hefɛ̀r jì Hefɛ̀rviwo be hɛ̃nu; 33Selofehàd kè nyi Hefɛ̀r be èvia mu jì ŋusùvi ò; nyɔ̃nùviwo kpò be jì. Selofehàd be nyɔ̃nùviwo be nyikɔwo ye nyi: Mahlà, Nɔa, Hoglà, Milkà ku Tirsà. 34Àmè ŋuawo ye nyi Manasè be hɛ̃nuwo; woa kpata, wo lè ŋusù hotu èwì vɔ àdɛ̃ àlɔ̀ adrɛ̃ (52700).
35Efràyim be jìjimèviwo, ɖo woabe hɛ̃nuwo nu ye nyi ekèa: Sutɛlà jì Sutɛlàviwo be hɛ̃nu; Bekɛ̀r jì Bekɛ̀rviwo be hɛ̃nu; Tahàn jì Tahànviwo be hɛ̃nu; 36Sutɛlà be jìjimèviwo ye nyi ekèa: Eràn jì Erànviwo be hɛ̃nu. 37Àmè ŋuawo ye nyi Efràyim be hɛ̃nuwo. Woa kpata, wo lè ŋusù hotu woeàdɛ̃ àlɔ̀ àtɔ̃ (32500). Woawo ye nyi Yosɛ̀f be jìjimèviwo, ekè wo hlɛ̃ wo ɖo woabe hɛ̃nuwo nua.
38Bɛnyamìn be jìjimèviwo ɖo woabe hɛ̃nuwo nu ye nyi ekèa: Belà jì Belàviwo be hɛ̃nu; Asbɛ̀l jì Asbɛ̀lviwo be hɛ̃nu; Ahiràm jì Ahiràmviwo be hɛ̃nu; 39Sefufàm jì Sefufàmviwo be hɛ̃nu; Hufàm jì Hufàmviwo be hɛ̃nu. 40Belà be èviwo ye nyi: Ardè ku Namàn. Ardè jì Ardèviwo be hɛ̃nu eye Namàn jì Namànviwo be hɛ̃nu. 41Àmè kèawo ye nyi Bɛnyamìn be jìjimèviwo, ekè wo hlɛ̃ wo ɖo woabe hɛ̃nuwo nua; woa kpata, wo lè ŋusù hotu èwì vɔ èvè àlɔ̀ woeàdɛ̃ (45600).
42Dàn be jìjimèviwo ɖo woabe hɛ̃nuwo nu ye nyi ekèa: Suhàm jì Suhàmviwo. Ekèawo ye nyi Dàn be hɛ̃nuwo, ekè wo hlɛ̃ wo ɖo woabe hɛ̃nuwo nua. 43Suhàmviwo be hɛ̃nuwo mètɔwo kpata lè ŋusù hotu ègbã vɔ èvè àlɔ̀ ènè (64400).
44Àsɛr be jìjimèviwo ɖo woabe hɛ̃nuwo nu ye nyi ekèa: Yimnà jì Yimnàviwo be hɛ̃nu; Yisvì jì Yisvìviwo be hɛ̃nu; Berìa jì Berìaviwo be hɛ̃nu. 45So Berìa be hɛ̃nu mèa, hɛ̃nu èvè buwo gbà to; woawo ye nyi: Hebɛ̀rviwo be hɛ̃nu ku Malkìɛlviwo be hɛ̃nu. 46Wo yɔna Àsɛr be nyɔ̃nùvi be Sarà. 47Àmè ŋuawo ye nyi Àsɛr be jìjimèviwo be hɛ̃nuwo. Woa kpata, wo lè àgbètɔ hotu èwì vɔ àdɛ̃ àlɔ̀ woènè (53400).
48Neftalì be jìjimèviwo, ɖo woabe hɛ̃nuwo nu ye nyi ekèa: Yahsɛ̀l jì Yahsɛ̀lviwo be hɛ̃nu; Gumì jì Gumìviwo be hɛ̃nu; 49Yesɛ̀r jì Yesɛ̀rviwo be hɛ̃nu; Silɛ̀m jì Silɛ̀mviwo be hɛ̃nu. 50Àmè kèawo ye lè hɛ̃nu kèwo so Neftalì be jìjimè, ekè wo hlɛ̃ wo ɖo hɛ̃nuwo nua; woa kpata, wo lè àmè hotu èwì vɔ èvè àlɔ̀ woènè (45400).
51Ekèa na be Izràɛlviwo kpata be hɛ̃hlɛ̃ mè lè ŋusù hotu àlɔ̀ ètɔ̃ ci àkpe ɖèka àlɔ̀ adrɛ̃ takpo ci èwo (601730).
Mawu fiɔ lekè wo la mã ànyigbãa ɖoa
52Tɔhonɔ̀ gblɔ̃ na Mosè be: 53“Hɛ̃nu ŋuawo nu ye wo la ma ànyigbãa ɖo: ènu kè hɛ̃nu ɖe sia ɖe la xɔ̀a, la nɔ sɔ̀ do àmè nenè kè lè hɛ̃nua mèa nu. 54Wò la mã ènu sùgbɔ ɖo hɛ̃nu kè mè àmè sùgbɔ lèa nu, eye wò la ma ènu kè hùea ɖo hɛ̃nu kè mè àmè hùe lèa nu. Hɛ̃nu ɖe sia ɖe la xɔ̀ ènu kè sɔ̀ ku àmè nenè kè lè e mèa. 55Àkɔ̀ kpò ye wo la dà, la sɔ ma ànyigbãa. Ènu kè hɛ̃nuawo la xɔ̀a, la nɔ̀ àmè nenè kè lè woa tɔwo be hɛ̃nu ɖe sia ɖe mèa nu. 56Àkɔ̀ dàda ye la na àkpa kè hɛ̃nu ɖe sia ɖe la xɔ̀, ne wo mã ènu ɖo hɛ̃nu kèwo mètɔwo sùgbɔ ku kèwo mètɔwo mu sùgbɔ ò a nua#26.56 Woa kpɔ Hɛ̃h 33.54; 34.13; Yos 14.1-12.”
Levìwo be hɛ̃hlɛ̃ èvègɔ̃a
57Levìwo be hɛ̃hlɛ̃ mè ye nyi ekèa, wàlɛbɛ kè wo hlɛ̃ àmèwo ɖo hɛ̃nuwo nua: Gɛrsɔ̀n jì Gɛrsɔ̀nviwo; Kehàt jì Kehàtviwo; Merarì jì Merarìviwo. 58Levì be hɛ̃nuwo ye nyi ekèawo: Livnìviwo be hɛ̃nu, Hebrɔ̀nviwo be hɛ̃nu, Mahlìviwo be hɛ̃nu, Musìviwo be hɛ̃nu, Koràviwo be hɛ̃nu. Kehàt ya jì Amràm. 59Amràm be èsrɔ̃ be nyikɔ ye nyi Yokɛvɛ̀d kè nyi Levì be èvi kè èsrɔ̃a jì na ɛ̀, lè Ejiptè a. Nyɔ̃nùa gbà jì Arɔ̀n, Mosè ku Mirìam kè nyi woa dàdaa na Amràm. 60Arɔ̀n ya jì Nadàv, Abihù, Eleazàr ku Itamàr. 61Nadàv ku Abihù wo ku, wàlɛbɛ kè wo sɔ èzò kè ŋuti mu kɔ̀ ò a va Tɔhonɔ̀ be ŋùmè a. 62Ne wo hlɛ̃ Levì kèwo keŋu nyi ŋusù, so èpè ɖèka jia, woa kpata wo lè àgbètɔ hotu woeɖèka èkà èwì vɔ àtɔ̃ (23000). Wo mu hlɛ̃ àmè kèawo ku Izràɛlvi kpɔ̀tɛawo ò, ɖoa, wo mu ɖo ènu ɖekpe la xɔ̀ lè ànyigbã kè wo le mã na Izràɛlviwoa mè ò.
Àmè Hɛ̃hlɛ̃ be ènuwunyàwo
63Àmè ŋuawo ye nyi àmè kèwo Mosè ku hũbonɔ Eleazàr hlɛ̃, wàlɛbɛ kè wo hlɛ̃ Izràɛlviwo lè Mòab be ànyigbã gbàjàa ji, lè Yɔrdàn be ètɔ̃a to, jè ŋùkɔ̀ Yerikò be èdùa. 64Àmè kèawo dòmètɔ ɖekpe mu gbà kpɔ̀tɔ̀, lè àmè kèwo Mosè ku hũbonɔ Eleazàr hlɛ̃ lè Izràɛlviwo dòmè, lè Sinaì be zògbè a ji ò. 65Ɖoa, Tɔhonɔ̀ gblɔ̃ na wo be wo la ku lè zògbè a ji; ekèa na be woa dòmètɔ ɖekpe mu gbà kpɔ̀tɔ̀ ci àgbè, tovò na Kàlɛb, Yefunè be èvia ku Yosùa, Nun be èvia ò.
Mina Bible © Bible Society of Togo, 2014.