Àmè Hɛ̃hlɛ̃ 20
20
Meribà be èsìa
(Tot 17.1-7)
1Lè wètri cucugbãa mèa, Izràɛlviwo be àmèha bliboa va ɖo Sin be zògbè a ji, eye dùkɔ̃a do àsàɖa ɖo Kadɛ̀s. Funu ye Mirìam ku lè, eye wo ɖì ì ɖo funua. 2Ekè èsì mu lè funua ò a, dùkɔ̃a va bɔ̀ pòxla Mosè ku Arɔ̀n. 3Dùkɔ̃a ɖè àjrè kpe na Mosè be: “Ne mi kè ku lè Tɔhonɔ̀ be ŋùmè, sìgbè lekè mia nɔ̀viawo ku nènea, e la kè nyɔ wu! 4Nukɛ ŋuti mì kplɔ̀ Tɔhonɔ̀ be àmèha a va zògbè kèa ji ɖo ò? Mu nyi ne mia ku miabe èlãhawo mia ku lè fikèa ŋuti ye à? 5Nukɛ ŋuti mì kplɔ̀ mi to lè Ejiptè, va tèpe bàɖà kèa ɖo ò? Mu nyi tèpe kè wo teŋu do ènu ɖo cã ò; èvòti, vɛ̃ka ku yòvobòɖà mu lè ò. Èsì cã mu lè, ne mia nù ò!”
6Mosè ku Arɔ̀n jo lè àmèha a gbɔ, va Ègòdodo be gòxɔa mɔnu. Wo sɔ ŋùmè cɔ̃ ànyi, eye Tɔhonɔ̀ be gogoa ze na wo. 7Tɔhonɔ̀ gblɔ̃ na Mosè be: 8“Sɔ àtikplɔ wòa, ne wò ku fòfo wò Arɔ̀n, mìa yɔ àmèha a bɔ̀; mì la pò nupo na àkpãa, lè woabe ŋùmè eye àkpãa la na èsì. Nène a ye wò la na èsì la to lè àkpãa mè, eye wò la na èsì àmèha a la nù, eye woabe èlãhawo cã la nù.” 9Sìgbè lekè Tɔhonɔ̀ ɖè ègbè na ɛ̀a nènea, Mosè yì sɔ àtikplɔa lè Tɔhonɔ̀ be ŋùmè. 10Mosè ku Arɔ̀n bɔ̀ àmèha a ɖo àkpãa be ŋùkɔ̀, eye wo gblɔ̃ na àmèha a be: “Mì, àglajètɔ kèawo, mì ɖo èto! Mi la teŋu na èsì la to lè àkpã kèa mè na mìa?”
11Mosè kɔ àlɔ̀ yì èji, sɔ yebe àtikplɔa pò àkpãa, zè èvè. Èsì to so àkpãa mè ku àdã, eye àmèha a kpɔ èsì nù, eye woabe èlãhaa cã nù. 12Tɔhonɔ̀ gblɔ̃ na Mosè ku Arɔ̀n be: “Ekè mì mu xɔ̀ ji nyè sè, ne mìa do bùbu àpe kɔ̀kɔ̀ɛ nyinyi ŋuti lè Izràɛlviwo be ŋùmè ò a, ekèa ŋutia, mu nyi mìawo ye la kplɔ̀ àmèha kèa yì ànyigbã kè mù sɔ na woa ji ò.” 13Ekèa ye nyi Meribà be èsìa. Meribà gɔ̃mè ye nyi 'àjrè'. Fikèa ye Izràɛlviwo wɔ̀ àjrè ku Tɔhonɔ̀ lè, eye Tɔhonɔ̀ ɖè yebe kɔ̀kɔ̀ɛ nyinyi fiɔ.
Izràɛlviwo mu sù la to Edɔ̀m-nyigbã ji ò
14Wàlɛbɛ kè wo lè Kadɛ̀s nyigbã jia, Mosè dɔ̃ àmè ɖoɖa Edɔ̀m be èfìɔa, ne woa gblɔ̃ na ɛ̀ be: “Nɔ̀vi wò, Izràɛlviwo be: “Wò nya èfũ kèwo keŋu mi kpeawo. 15Ekè mia tɔgbewo yì Ejiptè, àfi kè mi nɔ̀ èpè sùgbɔa, àyà kpò ye Ejiptètɔwo do na mia ku mia tɔwo. 16Mi do àpa yɔ Tɔhonɔ̀, eye Tɔhonɔ̀ sè miabe àlenanawo. E dɔ̃ yebe àtikplɔtɔ ɖe ɖoɖa, ne bèa va kplɔ̀ mi jo lè Ejiptè. Fifìa, mi lè Kadɛ̀s, èdù kè lè àpo èdù be lipò jia mè. 17Tɔ̀ wò jɔ̀, ɖè èmɔ na mi, ne mia to àpo ànyigbã ji, va yì. Mi mu la zɔ̃ to àgblèwo mè, àlo, to vɛ̃-bɔwo mè ò. Mi mu la nù àpo vudowo mè be èsì cã ò. Ɖe kpò mi la to èmɔ gãa ji va yì, ekè mi mu la zɛ̃ to ɖùsi mè, àlo èmìɔ̃ mè ò, kaka na gà kè mè mi la to ànyigbã wòa ji va yìa.” 18Edɔ̀mviwo be èfìɔa ɖo e ŋuti na Mosè be: “Wò mu la to gbɔ nyè, va yì ò, ne mu nyi nène ò a, èwui ye mù la sɔ va dogò wò!”
19Izràɛlviwo gblɔ̃ na Edɔ̀m be èfìɔa be: “Èdù-mɔ gã ji kpò mi be mia to va yì jro. Ne e va va e mè be mia ku miabe èlãwo mi nù àpo èsìa, eŋuã, mi la tu èfɛ̃ ɖo e ta. Ènu ɖèka kè mi le biɔ wòa kpò ye nyi be wòa ɖè èmɔ na mi, ne mia zɔ̃ àfɔ̀ va yì.” 20Vɔ̀a, Edɔ̀m be èfìɔa ɖo e ŋuti be: “Mì mu la va yì ò!” Eye, Edɔ̀m be èfìɔa ɖè àmèha gã ɖe kè bla àkpà kplìnyàa to, la yì dogò Izràɛlviwo. 21Ekè Edɔ̀mtɔwo gbe be Izràɛlviwo mu la to yèwo be ànyigbã ji va yì ò a, Izràɛlviwo, trɔ yì to èmɔ bu, jo lè woa gbɔ.
Arɔ̀n ku
22Kè Izràɛlviwo jo lè Kadɛ̀s nyigbã jia, woabe àmèha bliboa yì ɖo Hɔr be ètoa ji. 23Lè Hɔr be ètoa ji, lè Edɔ̀m be ànyigbãa be lipò jia, Tɔhonɔ̀ gblɔ̃ na Mosè ku Arɔ̀n be: 24“Arɔ̀n la gble mì ɖɛ, la jo yì tɔgbeawo gbɔ, ɖoa, mu la yì ànyigbã kè mù sɔ na Izràɛlviwoa ji ò, ɖoa, mì mù wɔ̀ ɖo ègbè nyè ji, lè Meribà be èsìa gbɔ ò. 25Ekèa ŋutia, kplɔ̀ Arɔ̀n ku èvia Eleazàr, ne mìa lia Hɔr be ètoa ji. 26Wò la ɖè Arɔ̀n be àwùwo, sɔ do na èvia Eleazàr, eye Arɔ̀n la ku lè funu.” 27Mosè wɔ̀ ènu kè Tɔhonɔ̀ ɖo na ɛ̀a, eye, lè àmèha a kpata be ŋùmè a, wo lia Hɔr be ètoa ji. 28Mosè sɔ Arɔ̀n be àwùwo do na èvia Eleazàr. Ekèa yomè a, Arɔ̀n ku lè funua, lè ètoa tamè. E yomè a, Mosè ku Eleazàr ɖì so ètoa ji. 29Ekè àmèha bliboa kpɔ be Arɔ̀n kua, Izràɛlviwo kpata fã àvi ŋùkèkè ègbã.
Mina Bible © Bible Society of Togo, 2014.