Àmè Hɛ̃hlɛ̃ 1
1
Ɖoɖo na Izràɛlviwo lè Sinai-Toa gbɔ
1–10
Àmèwo hɛ̃hlɛ̃ lè Sinaì be zògbè a ji
1Tɔhonɔ̀ pò nupo na Mosè lè Ègòdodo be Gòxɔa mè, lè Sinaì be zògbè a ji, lè wètri èvègɔ̃a be ŋùkèkè cucugbãa gbè, Izràɛlviwo be toto so Ejiptè-nyigbã ji be èpè èvègɔ̃a yomè. E gblɔ̃ be: 2“Mì hlɛ̃ Izràɛlviwo be àmèha a mètɔwo keŋu ɖèka ɖèka, ɖo kɔ̀ta vòvòvò ku xòmè vòvòvòwo nu. Mì la ŋlɔ̀ àmèwo be nyikɔ ɖèka ɖèka. 3Èwò ku Arɔ̀n, mì la ŋlɔ̀ ŋusù ɖe sia ɖe kè ɖo èpè èwì ku kèwo to e ŋutiawo be nyikɔ, àmè kèwo keŋu lè Izràɛl be àhùakɔ̃wo mèa, mì la ŋlɔ̀ woabe nyikɔwo ɖo àhùakɔ̃awo be ɖoɖo nu. 4Kɔ̀ta ɖe sia ɖe be ŋusù ɖèka, ŋusù kè la nyi xòmègaa la nɔ̀ mìa ŋuti. 5Ŋusù kèwo la kpe ɖo mìa ŋutia be nyikɔwo ye nyi ekèawo:
Elisùr, kè nyi Sedùr be ŋusùvia la nɔ̀ Rubɛ̀n be kɔ̀ta be ŋùkɔ̀;
6Selumìɛl kè nyi Kurishadai be ŋusùvia, la nɔ̀ Simeɔ̀n be kɔ̀taa be ŋùkɔ̀;
7Nasɔ̀n kè nyi Aminadàb be ŋusùvia, la nɔ̀ Yudà be kɔ̀taa be ŋùkɔ̀;
8Nètanaɛl kè nyi Cuar be ŋusùvia la nɔ̀ Isakàr be kɔ̀taa be ŋùkɔ̀;
9Eliab kè nyi Helɔ̀n be ŋusùvia, la nɔ̀ Zabulɔ̀n be kɔ̀taa be ŋùkɔ̀;
10Lè Yosɛ̀f be èviwo mèa, Amihùd be èvi kè nyi Elishamàa la nɔ̀ Efràyim be kɔ̀taa be ŋùkɔ̀;
Gamelìɛl kè nyi Pedahsùr be èvia la nɔ̀ Manasè be kɔ̀taa be ŋùkɔ̀;
11Avidàn kè nyi Gideɔ̀n be èvia, la nɔ̀ Bɛnyamìn be kɔ̀taa be ŋùkɔ̀;
12Ahiezɛr kè nyi Amisadaì be èvia la nɔ̀ Dàn be kɔ̀taa be ŋùkɔ̀;
13Raguiɛl kè nyi Okràn be èvia la nɔ̀ Àsɛr be kɔ̀taa be ŋùkɔ̀;
14Elizaf kè nyi Dehuɛl be èvia la nɔ̀ Gad be kɔ̀taa be ŋùkɔ̀;
15Ehira kè nyi Einàn be èvia la nɔ̀ Neftalì be kɔ̀taa be ŋùkɔ̀.”
16Àmè kèawo ye nyi Izràɛlviwo be àmèha be àmèdɔ̃dɔ̃wo, woa tɔwo be kɔ̀ta vòvòvòwo be ŋùkɔ̀nɔ̀tɔwo: wo nyi àmè èkà wìvɔàtɔ̃wo be ŋùkɔ̀nɔ̀tɔwo na Izràɛl. 17Mosè ku Arɔ̀n sɔ àmè cãcã kèawo wɔ̀ woabe àlɔ̀dotɔwo. 18Wètri èvègɔ̃a be ŋùkèkè cucugbãa jia, Mosè ku Arɔ̀n bɔ̀ dùkɔ̃a kpata, eye Izràɛlviwo ɖo woabe hɛ̃nu ku xòmèwo nu, eye wo ŋlɔ̀ ŋusù kèwo ɖo èpè èwì to e ŋutiawo, ɖèka ɖèka. 19Mosè hlɛ̃ wo keŋu lè Sinaì be zògbèa ji, sìgbè lekè Tɔhonɔ̀ ɖo è na ɛ̀a nène.
20Ekèa na be, Rubɛ̀n kè nyi Izràɛl be ŋùkɔ̀gbevia, be kɔ̀ta mèvi ŋusù kèwo ɖo èpè èwì to e ŋutiawo be hɛ̃hlɛ̃ mè ɖèka-ɖèka lè àhùakɔ̃a mèa nyi: kè wo ŋlɔ̀ woabe nyikɔwo ɖo hɛ̃nu ku xòmèwo nua, 21wo sù àgbètɔ hotu èwì vɔ ètɔ̃ àlɔ̀ àtɔ̃ (46500), na Rubɛ̀n be kɔ̀taa. 22Lè Simeɔ̀n be jìjimèviwo be gomèa, ekè wo ŋlɔ̀ ŋusù kèwo wo hlɛ̃awo be nyikɔwo ɖèka-ɖèkaa, ŋusù kèwo keŋu ɖo èpè èwì ku e jivɔwoa, ekèwo lè àhùakɔ̃a mè, ɖo jìjimè, hɛ̃nu, kɔ̀ta ku xòmèwo nua, 23wo sù àgbètɔ hotu èwì vɔ àsiɖèkɛ àlɔ̀ woètɔ̃ (59300), lè Simeɔ̀n be kɔ̀taa mè. 24Lè Gad be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, kèwo ye lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 25wo sù àgbètɔ hotu wìvɔ-vè àlɔ̀ woeàdɛ̃ èkàci-wo (45650), lè Gad be kɔ̀taa mè. 26Lè Yudà be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 27wo sù àgbètɔ hotu ègbãvɔadrɛ̃ àlɔ̀ àdɛ̃ (74600), lè Yudà be kɔ̀taa mè. 28Lè Isakàr be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mèa, ɖo woabe jìjimè, hɛ̃nu, kɔ̀ta ku xòmèwo nua, 29wo sù àgbètɔ hotu wìvɔadrɛ̃ àlɔ̀ ènè (54400), lè Isakàr be kɔ̀taa mè. 30Lè Zabulɔ̀n be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 31wo sù àgbètɔ hotu èwì vɔ ènyi àlɔ̀ woènè (57400), lè Zabulɔ̀n be kɔ̀taa mè. 32Lè Yosɛ̀f be jìjimèviwo gomèa, àmè kèwo nyi Efràyim be hɛ̃nu mèviwoa, ekè wo ŋlɔ̀ àmè kèwo ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 33wo sù àgbètɔ hotu èwì àlɔ̀ àtɔ̃ (40500), lè Efràyim be kɔ̀taa mè. 34Lè Manasè be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 35wo sù àgbètɔ hotu woeàdɛ̃ àlɔ̀ èvè (32200), lè Manasè be kɔ̀taa mè. 36Lè Bɛnyamìn be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 37wo sù àgbètɔ hotu woeadrɛ̃ àlɔ̀ woènè (35400), lè Bɛnyamìn be kɔ̀taa mè. 38Lè Dàn be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 39wo sù àgbètɔ hotu gbãvɔɖèka àlɔ̀ adrɛ̃ (62700), lè Dàn be kɔ̀taa mè. 40Lè Àsɛr be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 41wo sù àgbètɔ hotu èwì àlɔ̀ woeàtɔ̃ (41500), lè Àsɛr be kɔ̀taa mè. 42Lè Neftalì be jìjimèviwo gomèa, ekè wo ŋlɔ̀ àmè kèwo keŋu ɖo èpè èwì ku e jivɔwo, eye wo lè àhùakɔ̃a mè, ɖo woabe jìjimè, hɛ̃nu, kɔ̀ta ku xòmèwo nua, 43wo sù àgbètɔ hotu èwì vɔ àdɛ̃ àlɔ̀ woènè (53400), lè Neftalì be kɔ̀taa mè.
44Ekèawo ye nyi àmè kèwo be nyikɔwo Mosè, Arɔ̀n ku Izràɛlviwo be ŋùkɔ̀nɔ̀tɔ woèvèawo ŋlɔ̀a be hɛ̃hlɛ̃mè. Kɔ̀ta ɖe sia ɖe ɖo àmè ɖèka. 45Izràɛlviwo kèwo kpata wo hlɛ̃ lè xòmè ɖe sia ɖe mèa, àmè kèwo ɖo èpè èwì ku e jivɔwo, eye wo lè Izràɛl be àhùakɔ̃a mèa, 46woa kpata wo sù àgbètɔ hotu àlɔ̀ ètɔ̃ vɔ ɖèka àlɔ̀ woeàtɔ̃ èkà ci èwo (603550).
Levìwo be èdɔ tɔ̀xɛ
47Vɔ̀a, wo mu hlɛ̃ Levì kèwo ye nyi àmègãsĩsĩ, àlo tɔgbewo be kɔ̀tawo ya ò.
Àsàɖaa be ɖoɖo
48Tɔhonɔ̀ gblɔ̃ na Mosè be: 49“Lè Izràɛlviwo kpata dòmèa, Levì be kɔ̀taa kpò ye wò mu la hlɛ̃ ò. 50Wò la sɔ Zòɖùɖu-Ɖakà a be nɔ̀pea ku yebe ŋutinuwo kudo yebe èdɔwɔ̀nuwo kpata do àsi na Levìwo. Wo la nɔ kɔkɔ ɛ̀ ku yebe ŋutinuwo keŋu; wo la nɔ wɔ̀ e ŋuti-dɔ, eye wo la do woabe àsàɖa trɔ do è. 51Ne nɔ̀pea le hɔ̃ joa, Levìwo ye la kãkã nɔ̀pea. Ne nɔ̀pea la nɔ̀tèa, Levìwo ye la gbìgbɔ̀ tu ì. Vɔ̀, ne àmè bu ɖe gogo èa, wo la wù ì. 52Izràɛlvi ɖe sia ɖe la ɖo àsàɖa ɖo yebe nɔ̀pe, àmè sia àmè lè yebe àhùakɔ̃wo be èha mè. 53Levìwo yaa, wo la tù àsàɖa trɔ do Zòɖuɖu-Ɖakà a be nɔ̀pea, ekèa la na be Tɔhonɔ̀ mu la do àdɔ̀mèze ɖo Izràɛlviwo be dùkɔ̃a ŋuti ò. 54Izràɛlviwo wɔ̀ ɖo ènyà kè Tɔhonɔ̀ sɔ do àsi na Mosè a ji pɛpɛpɛ.
Mina Bible © Bible Society of Togo, 2014.