Mikà 7
7
Mawu be gblɔ̃ɖɛtɔa le làmɔɛ̃ ɖo dùkɔ̃a ta
1Oò, bàɖà kɛ ye zɛ̃ àxue na mù leke ò!
Mù lè sìgbè àmè kè to wàlɛbɛ
kè wo yà ènukuwo vɔ̀a nène.
Sìgbè àmè kè to yì le ji vɛ̃ kusɛ̃sɛ̃
wàlɛbɛ kè kusɛ̃sɛ̃ ɖìɖi
ɖekpe mu lè òa nène.
Nyè mu kpɔ vɛ̃ be èkpò ɖèka tètè,
kaka la kpɔ vòti kusɛ̃sɛ̃ yeye
kè jɔ̀nàjì na mù ŋutɔ cã ò!
2Mawu be àmèwo bu lè èdùa mè.
Àmè wɔ̀ ànùkua ɖekpe mu gbà lè ò.
Àmè sia àmè le ji èmɔ̃nu ne bèa do àmè èku.
Eye àmè sia àmè le tre èmɔ̃ na nɔ̀via.
3Wo wɔ̀nà ènu drã mà kpɔ ŋùgbe.
Woabe ègawo biɔna èfɛ̃tu ne woabe èdɔwo.
Kòjoɖotɔwo biɔna àjɔ̀.
Dùmèmègãwo gblɔ̃nà ènu kè wo la sɔ na woa zè ɖèka.
Wo ɖona ègbè èdu sɔ wɔ̀nà woabe ènu dakàwo.
4Àmè kè kã ɖo e mè lè woa dòmèa
lè sìgbè àŋùja kè wo bɔ̀a nène,
gbà nyrã wu àklãŋùti be àve ŋutɔ cã.
Kpɔɖa, mìabe ètodɔ̃ be ŋùkèkèa va ɖo.
Mìabe ŋùkɔ̀nɔ̀tɔwo kudo gblɔ̃ɖɛtɔwo gblɔ̃ ɛ̀ va yì.
Eye fifìa mì ci jojojoe, le vɔ̃.
5Mì mu gbà kã ɖo mìa xlɔ̃ ɖe ji ò.
Mì kpɔ nyuɛ̃ ɖe! Mì mu gbà pò nupo
kaka la pò lè mìa srɔ̃ ŋutɔ cã gbɔ ò.
6Ɖo èvi ŋusù le zũ ètɔa,
èvi nyɔ̃nù le sitè ɖo ènɔa ŋuti.
Lɔ̃xoyɔvi nyɔ̃nù le sitè ɖo lɔ̃xoa ŋuti.
Àmè ŋutɔ be àxuedo le nyi yebe kɛ̃tɔ.
7Vɔ̀ ènyè ya, mù trɔ ɖoɖa Tɔhonɔ̀ gbɔ.
Mù tɔtè le kpɔ Mawu kè la hlùɛ̃ mù a.
Mawu nyè la ɖo èto mù.
Izràɛl be dùkɔ̃a kã ɖo yebe Mawu ji
8Mì, miabe kɛ̃tɔwo, mì mu gbà
kpɔ jìjɔɛ so ènu kè le wɔ̀ mia ŋuti ò.
Ne mi jè ànyi a, mi la fɔ̃, sitè.
Ne mi lè vìvìti mèa,
Tɔhonɔ̀ ye la nyi miabe kɔ̀kɔ̀ɛ!
9Mi ɖo la dojì sɛ̃sɛ̃ɖe lè Tɔhonɔ̀
be àdɔ̀mèzea nu, ɖo mi wɔ̀ èvuɛ̃ do è.
Vɔ̀, èŋù ɖe la kè, ye e la xɔ̀ ènyà
ɖo mia ta eye e la sò jɔ̀jɔɛ na mi.
E la kplɔ̀ mi va kɔ̀kɔ̀ɛa nu
eye e la ɖɔ mi kudo yebe àdɔ̀kùnuwo.
10Wàlɛbɛ kè miabe kɛ̃tɔwo la kpɔ ekèa,
wo la ɖɔ ku ŋùkpɛ̃.
Woawo kè biɔna mi sã be:
“Nukɛ Tɔhonɔ̀ mìabe Mawu a, le wɔ̀ ò?”
Mi la fìnyà wo sìgbè àlekè
wo fìnyànà bàba lè èmɔ̃dodo jia nène.
Eye mia ŋutɔ, mi la kpɔ e tèpe.
11Ŋùkèkè kè gbãnàa ye
wo la trɔ tù mìabe èdùa.
Gbè ŋua gbèa, mìabe ànyigbã a
la kèkè ɖo ji kpe è.
12Nène a, mìa nɔ̀viwo la trɔ gbɔ̀ va mìa dòmè.
Wo la so Ejiptè kudo Àsirìa, so kaka Ejiptè
be ètɔ̀ sàsra gãa kudo Efratà be ètɔ̀a to,
so kaka àpùwo to kudo èto-nyigbãwo ji.
13Ànyigbã be àkpa kpɔ̀tɛa, la trɔ zũ zògbè pupui
ɖo woabe ènu drã wɔ̀wɔwo ŋuti.
14Tɔhonɔ̀, kplɔ̀ àpo dùkɔ̃a kudo àpo àlɛ̃kplɔ̀kpoa.
Dùkɔ̃ kèa ɖèka pɛɛ kpò ye lè
ànyigbã pupu kpakpla ɖe be dòdòmè
eye àtikusɛ̃sɛ̃wo trɔ do è.
Kplɔ̀ ɛ̀ sìgbè àlekè wò wɔ̀ ɛ̀ lè Bàcam
be ègbeɖùpewo kudo Gilead nyigbã jia nène.
15Sìgbè wàlɛbɛ kè wò ɖè mi to lè Ejiptè a,
gbà ɖè àpo ŋusɛ̃-bɔ a fiɔ mi ɖè.
16Dùkɔ̃wo la kpɔ wo eye wo la ɖɔ kudo ŋùkpɛ̃,
togbɔ be wo nyi ŋusɛ̃tɔwo ŋutɔ cã a.
Ènu la ku na wo eye wo mu la jro, la sè ènyà ɖekpe ò.
17Wo la ɖiɖɔ hũhũ sìgbè èdã nène.
Sìgbè èlã kè zɔ̃nà lè pòdo jia nènea,
wo la to lè woabe àgbògbòawo mè jojojoe
va gbɔ wò Tɔhonɔ̀, miabe Mawu.
Àpo ŋusɛ̃a la ɖo vɔ̃vɔ̃ na wo ŋutɔ;
18Mawu ɖe lè sɔ̀ kudo wòa?
Èwò kè klɔna àmè be àgɔ̀jèjea
eye wò sɔna èvuɛ̃ kènà a.
Ɖo wò kpɔ̀tɔ̀ ɖo lɔ̃lɔ̃ na àpo dùkɔ̃mèviwo.
Àpo àdɔ̀mèzea mu nɔ̀nà ànyi kaka yì ò
eye àpo àdɔ̀mè nyuɛ̃a lè tɛ̀gbɛ̀ɛ.
19Wò sɔ̀gbè la gbà kpɔ ɖo e mè na mi,
wò la gùdù miabe èvuɛ̃wo
eye wò la na miabe àgɔ̀jèjewo kpata
la yì ɖì ɖo àpù be ègũ cicria mè.
20Eye Yakɔb be àxuedo a la kpɔ àpo ègbèji nɔ̀nɔ.
Abràham be xòmèa la kpɔ àpo lɔ̃lɔ̃ a
sìgbè àlekè wò fìã àjɔ̀gbè na mia tɔgbewo va yìa nène.
Mina Bible © Bible Society of Togo, 2014.