Mikà 4
4
Dùkɔ̃wo kpata si va Yèruzàlɛm
1Ɛ̃ɛ, e la va e mè be èto kè ji mawuxɔa lèa,
la yì ji kaka to ètokɔ̃ɛwo kpata ŋuti.
Eye dùkɔ̃wo kpata la pu dù yì èto kèa gbɔ.
2Dùkɔ̃ pòpuwo la ɖota funu, nɔ gblɔ̃ lè èmɔ̃ ji be:
“Mì so mi jo yì Tɔhonɔ̀ be ètoa ji,
yì Yakɔb be Mawu a be àxomè.
E la gblɔ̃ ènu kè e le ji so mia gbɔa, na mi.
Mi la zɔ̃ lè èmɔ̃ kè e la fiɔ mia ji.”
Nyàwoa, so Ziɔ̀n ye Tɔhonɔ̀ be ènufiɔfiɔa la so.
Yebe ènyàa, la so Yèruzàlɛm na mi.
3E la ɖo kòjo na dùkɔ̃ sùgbɔ.
E la nyi ènyàsòtɔ na dùkɔ̃ pòpu kèwo
ɖo ŋusɛ̃wo eye wo lè àzɔ̀gea cã.
Wo la sɔ woabe èwuiwo wɔ̀ kòjoewo.
Eye wo la sɔ woabe èhuãwo wɔ̀ àgɔ̃wo.
Dùkɔ̃ ɖe mu la gbà sitè ɖo dùkɔ̃ bu ŋuti ò.
Eye àmè ɖekpe mu la gbà kpla àhùa wɔ̀wɔ ò.
4Àmè sia àmè la dè ye ŋutɔ be vɛ̃-gble
àlo vòtigblè lè ŋuti fàfa mè
eye àmè ɖekpe mu la do vɔ̃vɔ̃ na ɛ̀ ò.
Ɖo Tɔhonɔ̀ ŋutɔ ye gblɔ̃ ɛ̀.
5Dùkɔ̃wo le wɔ̀ ènu ne woa jè
woabe ènu sɛ̃sɛ̃wo be ŋùmè.
Miawo ya, mi le zɔ̃ ɖo Tɔhonɔ̀
miabe Mawu be ɖoɖowo ji tɛ̀gbɛ̀ɛ.
Tɔhonɔ̀ ye nyi Yèruzàlɛm be Èfìɔ
6Tɔhonɔ̀ ɖo èkpe ji gblɔ̃ be: “Èŋù ɖe la kè,
kè ji ye mù la bla àbì na àmè kèwo xɔ̀ àbìa.
Mù la kplɔ̀ àmè kèwo ci ègbeawo gbɔ̀.
Àmè kèwo mù dɔ̃to na sãawo.
7Mù la sɔ àmè kèwo xɔ̀ àbìawo wɔ̀ àmè ciànyiwo.
Àmè kèwo ci ègbewo, la trɔ zũ dùkɔ̃ sɛ̃ŋu.
Eye so kaka Ziɔ̀n be ètoa ji ke, ènyè Tɔhonɔ̀
mù la nyi woabe kplɔ̀tɔ tɛ̀gbɛ̀ɛ kaka sɔyì.
8Eye èwò Yèruzàlɛm be ètokɔ̃ɛ yì ji
kè le kpɔ dùkɔ̃ wòa ji
sìgbè èmɔ̃ji-kpɔxɔ nènea.
Zãɖe kèa, wò la gɛ̃ ɖo hɔ̃hlɔ̃ kè wò ɖo sãa mè.
Nène a, Yeruzàlɛm la trɔ nyi èfìɔdua be èdùgãa.”
Yèruzàlɛm to èfũ mè gɛ̃ ɖo èkàtutu mè
9Fifìa nukɛ ŋuti ye wò le do àpa ɖo ò?
Nukɛ ŋuti ye mì le ŋɛ̃ sìgbè nyɔ̃nù
kè le le èkua nène ò?
Èfìɔ mu gbà lè mìa sia?
Mìabe ètopòɖotɔwo jo ku ye à?
10Mì sè vève kaka mìa ŋɛ̃.
Mì do àpa sìgbè nyɔ̃nù
kè le jì èvia nène.
Ɖo fifìa, mì la to jo lè èdùa mè.
Mì la to àgblèwo mè
kaka yì kɔ̀ ɖo Babɛ̀l.
Fikè wo la hlùɛ̃ mì lè.
Tɔhonɔ̀ la ɖè mì jo lè
mìabe kɛ̃tɔwo be ŋusɛ̃ gɔ̃mè.
11So fifì ye dùkɔ̃ pòpuwo
le bla èse ɖo mìa ŋuti.
Wo le gblɔ̃ be: “Wo la ɖì ègbɔ woabe èdùa.
Eye mi la kpɔ jìjɔɛ so
Yèruzàlɛm be gbãgbã ŋuti!”
12Ɛ̃ɛ, àmè kèawo mu nya Tɔhonɔ̀ be ɖoɖowo ò.
Wo mu ŋɔnajè yebe susu mè ò.
Tɔhonɔ̀ jro la bɔ̀ wo sìgbè èlù nène
ɖo tèpe kè wo la fu wo lèa.
13“Mì sitè ne mìa pò èlùa,
mìa Yèruzàlɛm be tùgbɛ̀jɛviwo!
Mù la na mì la ɖo ŋusɛ̃ sìgbè ènyì
kèwo ɖo gàkpo be àzò
ku gàjɛ̃ be àfɔ̀tiwo nène.
Eye mì la crɔ̃ dùkɔ̃ sùgbɔ.
Àmɔnyɔnu kè mì la xɔ̀ lè woa sia,
la trɔ zũ ènyè Tɔhonɔ̀,
ànyigbã kpata be àpetɔa tɔ̀.”
14Vɔ̀ fifìa, mìa Yèruzàlɛmviwo,
mì sì mìa ɖokoe sɔ ɖè mìabe èfũlòlo fiɔ;
mìa àmè kèwo le bɔ̀ àhùakɔ̃a.
Wo sɔ àhùa ɖo mia ŋuti eye
wo le do èkpò na Izràɛl be kòjoɖotɔa.
Mina Bible © Bible Society of Togo, 2014.