Mikà 2
2
Àmètafutɔwo
1Ŋuzĩzĩme, mì àmè kèwo susuna ènu bàɖà,
eye mì jina mìa haviwo be gbledo
lè mìabe dɔ̃bawo jia!
Eye ne mì kpɔ yebe mɔnu lè ŋùkèkè mèa
mì wɔ̀nà ènu kè mì susua,
ɖo mì ɖo yebe hɔ̃hlɔ̃.
2Ne àmèwo be àgblè ye mì jia, mì xɔ̀nà ɛ̀.
Ne mì ɖè ŋùku tɔ àxue ɖe a, e trɔna mìa tɔ̀.
Mì sɔna àxuetɔwo kudo woabe àxuewo sɔ wɔ̀nà mìa tɔ̀,
àmèwo kudo woabe àdɔ̀kùnuwo.
3Ènu kèa ŋuti ye Tɔhonɔ̀ gblɔ̃ be:
“Mù le jrà gbledo ɖe ɖɛ na mì
àmè kèawo hati; mì mu la teŋu to lè e mè ò.
Mì mu la teŋu zɔ̃, la kɔ èta yì ji ò
ɖo gbledo be gàmè ye gbãnà.”
4Gbè ŋua gbèa, wo la to èhà lelele
eye wo la jì ŋuzĩzĩ be èhà gblɔ̃ be:
“Wo lɔ miabe ènu nɔ̀amèsiwo kpata,
wo xɔ̀ miabe èdùa be ànyigbãwo
eye wo ma wo lè miabe kɛ̃tɔwo dòmè.
Nukɛ ŋuti wo le ɖo mi àgba ɖo ò?”
5Mìa dòmètɔ ɖekpe mu la kpɔ ànyigbã kè
Tɔhonɔ̀ be dùkɔ̃a la ma be àkpa ɖe tètè la xɔ̀ ò.
Wo sitè ɖo gblɔ̃ɖɛtɔa be ènyà ŋuti
6Àmè ɖewo hɛ̃ ènyà kèa kudo mù be:
“Nɔ̀tè ènyà kpòtoe kèawo gbɔ̃gblɔ̃,
ɖo mu sɔ̀gbè ne wòa gblɔ̃ be àmè ɖe
mu teŋu si lè gbledo kè gbãnà nu ò.
7Wo sɛ̃kpɛ̃ na Izràɛl be dùkɔ̃a ye à?
Tɔhonɔ̀ be àdòdò hɛ̃hɛ̃a jo bu ye à?
Mu wɔ̀nà nène ò ɖe!”
Lè gbɔ nyèa, mù ɖo ènyà àdodoewo
na àmè kèwo ye zɔ̃nà lè jɔ̀jɔɛ wɔ̀wɔ mèa.
8Vɔ̀, wo gblɔ̃ be: “Mì le sitè ɖo dùkɔ̃ nyèa ŋuti.
Mì le ɖè àwùgã lè ŋusùti kèwo
ye gbɔ̀ so àhùa lè jìjɔɛ mèawo ŋuti.
9Mì nyà nyɔ̃nùwo to lè àxue
kèwo jɔ̀nàjì na woa mè.
Eye mì ɖè jìjɔɛ kè mù do woabe
sumɔ̃viwo mèa jo keŋu-keŋu.
10Mì sitè ne mìa jo, ɖo mìabe vòvoa sɛ̃tè ɖo fikèa!
Mìabe mà-kɔ̀ mà-kɔ̀ a hɛ̃ vève kaɖi kaɖi ɖe
gbãnà na mì.”
11Eye e hiã be wo sɔ ènyà mà-ɖo kɔpe
kudo àjè ɖèɖe va mìa gbɔ gblɔ̃ be:
“Àhà sɛ̃sɛ̃wo kudo vɛ̃ àdodoea!
Mì la kpɔ sùsuiɖe!”
Nène a ye wo la nyi dùkɔ̃a be gblɔ̃ɖɛtɔ.
Tɔhonɔ̀ la bɔ̀ àhùalewo ɖodu
12“Mù la bɔ̀ Yakɔb be àxuedo a ɖodu.
Mù la na Izràɛl be àmè kpɔ̀tɛawo la cã bɔ̀.”
Tɔhonɔ̀ ye gblɔ̃ ɛ̀!
E yì e ji gblɔ̃ be: “Mù la bɔ̀ mì ɖodu
sìgbè àlekè wo bɔ̀nà àlɛ̃wo do èkpaa nène,
mì la sùgbɔ fuu sìgbè àlɛ̃ha, lè ègbeɖùpe nène.
Eye àgbè la nɔ̀ mìa mè.”
13Eye àmè kè la hũ èmɔ̃a,
la xɔ̀ ŋùkɔ̀ na mì. Mì vò fifì.
Mì ji èmɔ̃ kè mì la toa, ne mìa jo.
Tɔhonɔ̀ mìabe èfìɔa ye xɔ̀ na mì, le kplɔ̀ mì.
Mina Bible © Bible Society of Togo, 2014.