Levìwo 26
26
1Mì mu gbà ɖo vòdu ɖekpe na mìa ɖokoewo ò, mì mu gbà li legba, àlo, kpèli ɖekpe na mìa ɖokoewo ò, mì mu gbà wɔ̀ èkpetata kè be ŋùkɔ̀ mì la nɔ jè èklò ɖoa ò; ɖoa, ènyè ye nyi Tɔhonɔ̀, mìabe Mawu.
2Mì nɔ zɔ̃ ɖo jɛ̃gbɔ̃zã nyèwo ji, eye mìa nɔ do bùbu kɔ̀kɔ̀ɛpe nyèa ŋuti.
Sìtuwo
3“Ne mì zɔ̃ ɖo èse nyèwo jia, ne mì le ɖoɖo nyèwo ɖo àsi, eye mì le zɔ̃ ɖo woa jia, 4mù la na èji la nɔ jà na mì, lè yebe hùenu; ànyigbã la na yebe nukuwo, eye àgblèji be àtiwo la sɛ̃ woabe èkusɛ̃sɛ̃wo; 5lè mìabe ànyigbã jia, èlù pòpo la nɔ dìdì, kaka la nɔ ɖo vɛ̃ku kɛ̃kɛ̃ hùenu, vɛ̃ku kɛ̃kɛ̃ la nɔ dìdì kaka la nɔ ɖo ènudodo hùenu; mì la nɔ ɖù mìa ŋutɔ mìabe ènu ɖùɖu, la nɔ ɖɔpò, eye mì la nɔ̀ mìabe ànyigbã ji, lè ètomè fàfa mè#26.5 Hɛ̃hlɛ̃ 3-5: Kpɔ Gbì 11.13-15. 6Mù la na ŋuti fàfa lè ànyigbãa ji; mì la mlɔ̃ ànyi, la dɔ̃ àlɔ̃, kè ènu ɖekpe mu la do ŋùklɛ̃ na mì ò a. Mù la dè ègbemè-lã vuɛ̃wo jo lè mìabe ànyigbãa ji, eye èwui mu la gbà to mìabe ànyigbãa ji ò. 7Mì la nyà mìabe kɛ̃tɔwo ɖo èdù nu, eye wo la ci mìabe èwuiwo nu. 8Mìa dòmètɔ àtɔ̃ la nyà kɛ̃tɔ èkà èvè takpo ɖo èdù nu, eye mìa dòmètɔ èkà èvè takpo la nyà hotu àtɔ̃ ɖo èdù nu, eye, kɛ̃tɔwo la ci mìabe èwuiwo nu. 9Mù la trɔ jè ŋùkɔ̀ mì, mù la na mì la jì fuu ɖo e ji, eye, mù la le èzò kè mù ɖù ku mìa ɖo àsi. 10Mìabe nukuyàya la nɔ sùgbɔ àleke be, ekèwo mì bɔ̀ ɖɛ xoxoawo ye mì la nɔ ɖù. Mì la nɔ̀ ɖè xoxoawo to, la nɔ bɔ̀ yeyeawo ɖo woa tèpe. 11Mù la ɖo nɔ̀pe nyè ɖo mìa dòmè, eye nyè mu la gble mì ɖɛ ò. 12Mù la nɔ zɔ̃ lè mìa dòmè; mù la nyi Mawu na mì, eye mìawo yaa, mì la nyi dùkɔ̃ nyè#26.12 Kpɔ 2Kòr 6.16; Àvì 21.3. 13Ènyè ye nyi Tɔhonɔ̀, mìabe Mawu kè kplɔ̀ mì to lè Ejiptè-nyigbã ji, àleke be mì mu gbà nyi woabe kluviwo ke ò. Ènyè ye ŋɛ̃ mìabe èkɔ̀kùtiwo, eye mù na, mì kɔ èta yì ji, sɔ le zɔ̃.”
Kpɛ̃sɛ̃wo
14“Ne mì mu le ɖo èto mù, ne mìa wɔ̀ ɖo ɖoɖo kèawo ji ò a, 15ne mì gbe be yèwo mu la wɔ̀ ɖo èse nyèwo ji ò a, ne mì crì èkɔ̀do nyèwo, kaka gbe be yèwo mu la zɔ̃ ɖo ɖoɖo nyèwo ji ò, sɔ gbã zòɖùɖu nyèa, 16eŋuã, ènu kè nyè ya, mù la wɔ̀ ku mìa ye nyi ekèa:
17Mù la ɖè ŋùkuvi tɔ mì, eye, ne mì kpe àhùa ku mìabe kɛ̃tɔwoa, wo la ɖù mìa ji; àmè kèwo crì mìawo ye la kpàcɛ̀ na mì, eye àmè ɖe mu la nyà mì ɖo èdùnu, gbɔ̀xue mì la si ò.
18Ne mì gbe be yèwo mu la sè ètonu na mù ò kpò ye à, ètodɔ̃ kè mù la na mì ɖo mìabe èvuɛ̃wo ŋutia la sɛ̃ŋu, zè adrɛ̃ wu ekè jè a. 19Mù la gbã mìabe ŋusɛ̃ kè le nyi jajra na mìa, mù la na jiŋùkusi la sɛ̃ŋu sìgbè gàyìbɔ nène, àleke be èji mu la gbà jà na mì ò, eye mìabe ànyigbã la lìa sìgbè gàjɛ̃ nène; 20mì la hlɔ̃, la wɔ̀ èdɔ co, gãkea, ànyigbã mu la gbà na yebe nukuwo ò, eye yebe àtiwo mu la gbà sɛ̃ èku ò.
21Ne mìabe àzɔ̃lì sitè ɖo ŋuti nyè kòkòkò, eye mì gbe be yèwo mu la ɖo èto mù ò kpò ye à, mù la gbà kɔ mìabe ètodɔ̃wo yì ji, ɖo mìabe èvuɛ̃wo nu, zè adrɛ̃ kpe è. 22Mù la na èlã wɔ̀adãwo la va ɖo mìa dòmè; wo la vũvũ mìabe èviwo, la crɔ̃ mìabe èlãhawo. Wo la ɖè mìabe gbɔsùsua kpɔ̀tɔ̀, àleke be mìabe èmɔwo ji la pò àya.
23Ne ètodɔ̃ kèawo mu sù la jɔ̀ mìabe àfɔ̀ɖèɖe ò, eye mì gbà le sitè ɖo ŋuti nyè kpò ye à, 24eŋuã nyè cã a, mù la sitè ɖo mìa ŋuti, nyè cã a, mù la gbà dɔ̃ èto na mì, ɖo mìabe èvuɛ̃wo ta, zè adrɛ̃ kpe è. 25Mù la na èwui la va biɔ èhlɔ̃ ɖo èzò kè mù ɖù ku mìa ta, eye mì la bɔ̀ ɖo mìabe èdùwo mè. Mù la dɔ̃ èdɔ̀vuɛ̃ ɖo mìa dòmè, eye mì la ci kɛ̃tɔa si. 26Ne mù tè mì ènu ɖùɖua, nyɔ̃nù èwo la mè mìabe kpɔ̃nɔ lè èkpo ɖèka pɛ mè. Wo la hlɛ̃ kpɔ̃nɔa ɖo àdɔ̀mè na mì, eye mì la ɖùnu, èpò màɖɔ.
27Ne ènu kèawo keŋu mu sù la na be mìa sè ètonu na mù ò, eye mì sitè ɖo ŋuti nyè kpò ye à, 28mù la sɔ àdã, sɔ sitè ɖo mìa ŋuti, nyè ŋutɔ, mù la dɔ̃ èto na mì zè adrɛ̃ wu, ɖo mìabe èvuɛ̃wo ta. 29Mì la va ɖù mìa ŋutɔwo mìabe ŋusùviwo ku mìabe nyɔ̃nùviwo be èlã. 30Mù la gbã mìabe vòdu sɛ̃pe kèwo ye lè èto jiawo, mù la kãkã mìabe lifi vɔsakpewo; mù la bɔ̀ mìabe àmèkpòtiwo ɖo mìabe legbawo be gbãgbãwo ji, eye mù la tru mì kɔ̃ŋùgbe. 31Mù la gbã mìabe èdùwo, wo la trɔ zũ èglìkpowo; mù la na mìabe kɔ̀kɔ̀ɛpewo la ci gbalo, eye mù la gbe, nyè mu la gbà nɔ sè mìabe ènumème vɔ̀sawo be hɔ̃hɔ̃ɛwo ò. 32Nyè ŋutɔ ye la crɔ̃ mìabe èdùa, eye be la dãŋù do mìabe kɛ̃tɔ kèwo ye la va ci mìabe ànyigbã jia. 33Vɔ̀a, mìawo yaa, mù la kã mì hlɛ̃ ɖo vòdusɛ̃tɔwo be dùkɔ̃wo dòmè, eye mù la ɖè èwui ɖo mìa dòmè; mìabe ànyigbãa la ci gbalo, mìabe èdùwo la trɔ zũ èglìkpowo.
34Eye, ànyigbãa la gbɔ̃jɛ̃, wàlɛbɛ kè kpata ànyigbãa la ci gbaloa, wàlɛbɛ kè mìawo ŋutɔ, mì la nɔ̀ mìabe kɛ̃tɔwo be ànyigbã jia, ànyigbãa la wɔ̀ yebe jɛ̃gbɔ̃zã ɖo jɛ̃gbɔ̃zã kèwo kpata ŋuti mì mu do bùbu ò a nu. 35Àzã kèawo kpata gbè kè ànyigbãa la ci gbaloa, e la gbɔ̃jɛ̃ ɖo jɛ̃gbɔ̃zã kèwo gbè mu tɛnu gbɔ̃jɛ̃ va yì ò, wàlɛbɛ kè mì lè e jia nu.
36Mù la do vɔ̃vɔ̃ èjì mè na, mìa dòmètɔ kèwo la kpɔ̀tɔ̀ nɔ̀ àgbè, lè mìabe kɛ̃tɔwo be èdù mèawo. Àmàkpa kè àya le hũhũa be ɖìɖi gbalo la nyà wo ɖo èdù nu, eye wo la nɔ̀ èdù ji, sìgbè àmè kèwo le si lè èwui nuawo nène. Wo la pu dù kaka la jè ànyi, ekè àmè ɖekpe mu la kplɔ̀ wo do ò a. 37Wo la klì woa nɔ̀nɔwo, la jè ànyi, sìgbè àmè kèwo le si lè èwui nuawo nène, to e gbɔ be àmè ɖekpekpe mu le kplɔ̀ wo do gbɔ̀xue ò. Wo mu la teŋu nɔ̀tè, la kpe àkɔ ku woabe kɛ̃tɔwo ò. 38Mì la crɔ̃ lè vòdusɛ̃tɔwo be dùkɔ̃wo dòmè, eye mìabe kɛ̃tɔwo be ànyigbã la crɔ̃ mì. 39Mìa dòmètɔ kèwo ye la ci àgbèawo la bù ètamè, kaka la ɖìkù, ɖo mìabe èvuɛ̃wo ta, lè mìabe kɛ̃tɔwo be èdù mè; sɔ kpe woabe èvuɛ̃woa, wo la ɖìkù ɖo woa tɔgbewo be èvuɛ̃wo cã ta.”
Mawu la ɖoŋù yebe zòɖùɖua
40“Gãkea, àmè kèwo la ci àgbèawo la hũ woabe ènuvuɛ̃wo mè, eye wo la hũ woa tɔgbewo be ènuvuɛ̃wo mè, eye wo la gblɔ̃ be yèwo wɔ̀ bùsunu ɖo ŋuti nyè, eye yèwo sitè ŋutɔ cã ɖo ŋuti nyè, 41ekèa na be mù sitè ɖo yèwo ŋuti, eye mù kplɔ̀ yèwo va yèwo be kɛ̃tɔwo be ànyigbã ji. Eye ne gbè ɖèkaa, woabe àtɔ̀tɔ̀nɔ̀ be èjìa jèsi woabe ènuvuɛ̃wo, be yèwo mu wɔ̀ ànùkua na mù ò a, wo la bɔ̀bɔ̀ woa ɖokoewo, eye wo la xɔ̀ woabe ètodɔ̃. 42Mù la ɖoŋù èzò kè mù ɖù ku Yakɔb, Izàk ku Abràham, woa tɔgbewoa ji. Mù la gbà ɖoŋù àjɔ̀gbè kè mù fìã na woabe ànyigbãa#26.42 Kpɔ Gɔ̃m 12.7; 17.7-8; 26.2-4; 28.13-14.. 43Nène a, ne wo gble woabe ànyigbãa ɖɛ gbaloa, ne ànyigbã to yebe jɛ̃gbɔ̃zãwo mè, wàlɛbɛ kè be la ci gbalo, ɖɛa, ne wo xɔ̀ woabe ètodɔ̃, ɖo èse nyè ku ɖoɖo nyè kèwo wo gbeawo taa, 44wàlɛbɛ ŋua, ne wo lè woabe kɛ̃tɔwo be ànyigbã ji, ŋutɔ cã a, nyè mu la gbe wo, àlo, la ɖè èkɔ̀ lè woa ŋuti, kaka be ma crɔ̃ wo, ne ma gũ zòɖùɖu nyèa ku wo ò, ɖoa, ènyè ye nyi Tɔhonɔ̀, woabe Mawu. 45Mù la ɖoŋù èzò kè mù ɖù ku woa tɔgbe kèwo mù kplɔ̀ to lè Ejiptè-nyigbã ji, lè dùkɔ̃wo keŋu be ŋùmè a, àleke be, ènyè kè nyi Tɔhonɔ̀a, mù la nyi Mawu na wo, ne ma wɔ̀ ènyuɛ̃ na wo.”
46Ekèawo keŋu ye nyi ɖoɖo, èkɔ̀do ku èse kèwo Tɔhonɔ̀ to Mosè ji, sɔ ɖo ye ŋutɔ ɖokoe ku Izràɛlviwo dòmè, lè Sinaì be ètoa jiawo.
Mina Bible © Bible Society of Togo, 2014.