Levìwo 16
16
Èvuɛ̃ sɔsɔkè be Ŋùkèkè Gãa
1Kè Arɔ̀n be ŋusùvi èvè ku, wàlɛbɛ kè wo va Tɔhonɔ̀ be ŋùkɔ̀ yomè a, Tɔhonɔ̀ pò nupo na Mosè. 2Tɔhonɔ̀ gblɔ̃ na Mosè be: “To na fòfo wò, Arɔ̀n be mu gbà nɔ ɖo kɔ̀kɔ̀ɛpe be kɔ̀kɔ̀ɛpea, gà ɖekpekpe gàmè kpò, lè èxɔ̀mèsòvɔa godo, kpãŋùkɔ̀ Zòɖùɖu-Ɖakà be nùvi kè lè e nua ò, ne mu gbà va ku, wàlɛbɛ kè mù la ze lè nùvia tamè, lè lili babla mè ò.
3Ne Arɔ̀n la ɖo kɔ̀kɔ̀ɛpe be kɔ̀kɔ̀ɛpea, e ɖo la kplɔ̀ ènyì-su ɖèka kè be la sɔ savɔ ɖo èvuɛ̃ taa ku àgbò ɖèka kè be la sɔ wɔ̀ ènumème vɔsaa ɖo àsi. 4E ɖo la do àlɛ̃ŋudà be àwùgã kɔ̀kɔ̀ɛa, la do àlɛ̃ŋudà be gode, la sɔ àlɛ̃ŋudà be ègojiblakà bla àlì ji, la sɔ àlɛ̃ŋudà be dukù bla èta. Àwù kɔ̀kɔ̀ɛ ye wo nyi. E la do wo, ne e lè èsì vɔ̀a. 5E la xɔ̀ ègbɔ-su èvè, na èvuɛ̃ sɔsɔkè be vɔsa ku àgbò ɖèka na ènumème vɔsa, lè Izràɛlviwo be àmèha a si.
6Arɔ̀n la sɔ ènyì-sua savɔ, ɖo ye ŋutɔ be èvuɛ̃ ta, eye be la wɔ̀ èvuɛ̃ sɔsɔkè be èkɔ̀nua ɖo ye ŋutɔ ku yebe àxuea ta. 7E la sɔ ègbɔ-su èvèawo, sɔ ɖo Tɔhonɔ̀ be ŋùkɔ̀, lè Ègòdodo be gòxɔa mɔnu. 8Arɔ̀n la do àkà, la sɔ cã kè la nyi “Tɔhonɔ̀ tɔ̀”, àlo, kè la nyi “Àzàzɛl tɔ̀”, lè ègbɔ-su èvèawo dòmèa. 9Arɔ̀n la sɔ ègbɔ-su kè ji àkàa kè nyi “Tɔhonɔ̀ tɔ̀” jè a ɖo Tɔhonɔ̀ be ŋùmè, eye be la sɔ savɔ ɖo èvuɛ̃ ta. 10E yomè a, wo la sɔ ègbɔ-su kè ji àkà kè nyi “Àzàzɛl tɔ̀” jè a ɖo Tɔhonɔ̀ be ŋùkɔ̀, àgbè àgbè, ne woa wɔ̀ èvuɛ̃ sɔsɔkè be èkɔ̀nua ɖo e ji, ne woa sɔ ɛ̀ ɖoɖa Àzàzɛl, lè zògbè ji.
11Arɔ̀n la sɔ ènyì-sua savɔ, ɖo ye ŋutɔ be èvuɛ̃ ta, eye be la wɔ̀ èvuɛ̃ sɔsɔkè be èkɔ̀nua ɖo ye ŋutɔ ku yebe àxuea ta. Ne e sò èhlò na ènyì-su kèa, ɖo ye ŋutɔ be èvuɛ̃ ta vɔ̀a, 12e la kù èzò-ka lè vɔsakpe kè lè Tɔhonɔ̀ be ŋùkɔ̀a ji, sɔ ɖɔ lififiɔ̃nu, eye be la kù lifi èwɔ-èwɔ, àlɔ̀gògoe èvè, la sɔ wo yì èxɔ̀mèsòvɔa godo. 13E la kɔ̀ lifia ɖo èzòa mè, lè Tɔhonɔ̀ be ŋùkɔ̀, eye lifia be àzìzɔa la bla ɖo Zòɖùɖu-Ɖakà a be nùvia. Nène a ye be la wɔ̀, ne mu gbà ku ò. 14E la sɔ ènyì-sua be èhũ, la sɔ àlɔ̀vi wu ì ɖo Zòɖùɖu-Ɖakà nùvia be èwèɖoxɔ̀pe; e la gbà sɔ àlɔ̀vi wu ì ɖo Zòɖùɖu-Ɖakà a be ŋùkɔ̀, zè adrɛ̃. 15E la sò èhlò na èvuɛ̃ sɔsɔkè vɔsaa be àgbòa, la sɔ savɔ ɖo dùkɔ̃a be èvuɛ̃wo ta. E la sɔ èhũa yì èxɔ̀mèsòvɔa godo, la sɔ wɔ̀ ènu kè be sɔ ènyì-sua be èhũa wɔ̀a. E la wu ì ɖo Zòɖùɖu-Ɖakà a be nùvia ji ku nùvia be ŋùkɔ̀. 16E la wɔ̀ èvuɛ̃ sɔsɔkè be èkɔ̀nua ɖo Izràɛlviwo be màkɔ̀ màkɔ ku woabe àglajèje kèwo nyi woabe èvuɛ̃wo keŋuã ta, na kɔ̀kɔ̀ɛpea; e la gbà wɔ̀ ɛ̀ na Ègòdodo be gòxɔ kè lè woabe màkɔ̀màkɔwo dòmèa cã. 17Àmè ɖekpe mu la nɔ̀ Ègòdodo be gòxɔa mè, wàlɛbɛ kè Arɔ̀n la ɖo e mè, ne bèa yì wɔ̀ èvuɛ̃ sɔsɔkè be èkɔ̀nua lè kɔ̀kɔ̀ɛpea, kaka na gà kè mè be la gbà toa ò. E la wɔ̀ èkɔ̀nua na ye ɖokoe, na yebe àxuedoa, ku na Izràɛlviwo be àmèha a kpata. 18E la to, tùtà vɔsakpe kè lè Tɔhonɔ̀ be ŋùkɔ̀a gbɔ lɔ̀ge, eye be la wɔ̀ èvuɛ̃ sɔsɔkè be èkɔ̀nua ɖo e ji; e la kù lè ènyì-sua be èhũ ku lè ègbɔ-sua be èhũ ŋuti, la sɔ ɖo àzò kèwo trɔ do vɔsakpea ji. 19E la sɔ àlɔ̀vi wu èhũa, zè adrɛ̃, ɖo vɔsakpea ji, la sɔ lè vɔsakpea ɖì, so Izràɛlviwo be èvuɛ̃wo mè, e la wɔ̀ ekèa, la sɔ kɔ̀ vɔsakpea ŋuti.
20Ne Arɔ̀n wɔ̀ èvuɛ̃ sɔsɔkè be èkɔ̀nua na kɔ̀kɔ̀ɛpea, na Ègòdodo be gòxɔa ku vɔsakpea vɔ̀a, e la sɔ ègbɔ-sua ɖo Tɔhonɔ̀ be ŋùkɔ̀, àgbè àgbè. 21Arɔ̀n la sɔ àlɔ̀ èvèa ɖo ègbɔ-su àgbè àgbèa be èta ji: e la hũ Izràɛlviwo be èvuɛ̃wo keŋu mè ɖo e ji, e la hũ woabe àglajèjewo keŋu mè, e la hũ woabe ènuvuɛ̃wo keŋu mè ɖo ègbɔ-sua be èta ji, eye, e yomè a, e la ɖo ègbɔ-sua ɖoɖa zògbè a ji; ŋusù ɖe la sɔ̀gbè ɖɛ, kè la kplɔ̀ ègbɔ-sua yì zògbè a jia. 22Ègbɔ-sua la dro èvuɛ̃awo keŋu ɖo ye ɖokoe ji, jo tùtà zògbè-nyigbã pupu kè ji àmè ɖekpe mu teŋu yìnà ò a.
Ne wo gbe ɖo ègbɔ-sua ɖoɖa zògbè a ji kpòa, 23Arɔ̀n la gbìgbɔ̀ ɖo Ègòdodo be gòxɔa mè, la ɖè àlɛ̃ŋudà be àwù kèwo be do, sɔ ɖo kɔ̀kɔ̀ɛpea, eye be la dà wo ɖo funua. 24E la lè èsì, lè Tèpe Kɔ̀kɔ̀ɛ ɖe, eye be la trɔ do àwù. E la to, la wɔ̀ yebe ènumème vɔsa ku dùkɔ̃a tɔ̀a. E la wɔ̀ èvuɛ̃ sɔsɔkè be èkɔ̀nua na ye ŋutɔ ɖokoe, ku dùkɔ̃a. 25E yomè a, e la sɔ èlã kèwo be sɔ savɔ ɖo èvuɛ̃ taa be tèpe kèwo do àmìa ɖo èzòa nu, lè vɔsakpea ji.
26Àmè kè kplɔ̀ Àzàzɛl be ègbɔ-sua yì zògbè jia la nyà yebe àwùwo, eye be la lè èsì; e yomè a, e la trɔ gbɔ̀ va àsàɖaa mè. 27Wo la kɔkɔ ènyì-su ku ègbɔ-su kèwo wo sɔ savɔ ɖo èvuɛ̃ ta, eye wo sɔ woabe èhũ, sɔ wɔ̀ èvuɛ̃ sɔsɔkè be èkɔ̀nu lè kɔ̀kɔ̀ɛpea, to lè àsàɖaa mè, ne woa tɔ wo èzò#16.27 Kpɔ Heb 13.11. Wo la tɔzò woabe èlãa, woabe àgbàzea ku woabe èmiwo keŋu. 28Àmè kè tɔzò woa la nyà yebe àwùwo, ye ŋutɔ la lè èsì; e yomè a, e la trɔ gbɔ̀ va àsàɖaa mè.
29Èse kòkòɖàbì be nyi na mì be, wètri adrɛ̃gɔ̃ a mèa, wètria be ŋùkèkè èwogɔ̃a gbèa, mì la blanu, eye mì mu la wɔ̀ èdɔ ɖekpe, mìa ŋutɔwo ku àmèjro kè lè mìa dòmè cã a ò. 30Gbè ŋua gbè ye wo la wɔ̀ èvuɛ̃ sɔsɔkè be èkɔ̀nu kè la kɔ̀ mìa ŋutia na mì. Mìa ŋuti la kɔ̀, lè Tɔhonɔ̀ be ŋùmè, so èvuɛ̃wo keŋu mè. 31Gbè ŋua gbè la nyi jɛ̃gbɔ̃zã gbè na mì; mì la gbɔ̃jɛ̃, eye mì la blanu. Èse kòkòɖàbì be nyi.
32Hũbonɔ kè wo do àmì èta na, kè wo ɖo, ne bèa wɔ̀ vɔsadɔa, ɖo ètɔa yomè a ye la wɔ̀ èvuɛ̃ sɔsɔkè be èkɔ̀nu kèa. E la do àlɛ̃ŋudà be àwù kɔ̀kɔ̀ɛ. 33E la wɔ̀ èvuɛ̃ sɔsɔkè be èkɔ̀nua na kɔ̀kɔ̀ɛpe kè ŋuti wo kɔ̀a, na Ègòdodo be gòxɔa, ku vɔsakpea. E la gbà wɔ̀ ɛ̀ ɖo hũbonɔawo ku dùkɔ̃ blibo kè va bɔ̀a ji.
34Èse kòkòɖàbì be nyi na mì be mìa nɔ wɔ̀ èvuɛ̃ sɔsɔkè be èkɔ̀nua, ɖo Izràɛlviwo be èvuɛ̃wo keŋu ta, zè ɖèka lè èpè mè.”
Arɔ̀n wɔ̀ ɖo ɖoɖo kèwo Tɔhonɔ̀ sɔ do àsi na Mosè a kpata ji.
Mina Bible © Bible Society of Togo, 2014.