Àlenanawo 2
2
Tɔhonɔ̀, Yèruzàlɛm be kɛ̃tɔ
1Aò! Leke wɔ̀ ò!
Tɔhonɔ̀ bijì kaka sɔ àdɔ̀mèze be àzìzɔ yìbɔa
do àwù na Ziɔ̀n nyɔ̃nùvia!
So jiŋùkusia, e sɔ Izràɛl be àcɔɖoɖo xla ɖo ànyi.
Lè yebe àdɔ̀mèze dodo gbèa,
Tɔhonɔ̀ mu ɖoŋù yebe àfɔ̀ɖojinua ò.
2Tɔhonɔ̀ gbã Yakɔb be èlãnyìpewo keŋu, ŋùgbe mà kpɔ.
Lè yebe àdãwɔ̀wɔ mèa,
e gbìdì Yudà nyɔ̃nùvia be àgbògbò
kèwo xɔ̀nà na Yudà-nyigbãa.
E pò èfìɔdua ku yebe kplɔ̀tɔwo pu ànyi,
sɔ ɖìgbɔ wo.
3Lè yebe àdɔ̀mèze hɛli-hɛli mèa,
Tɔhonɔ̀ ŋɛ̃ àzòwo na Izràɛl dùkɔ̃a.
E ɖè yebe ɖùsi-lɔ sɛ̃sɛ̃a jo,
wàlɛbɛ kè kɛ̃tɔa zɔ̃ ɖo Izràɛl jia,
e bì sìgbè èzò nène, lè Yakɔb be dùkɔ̃a mè,
eye be fiɔ̃ ènu sia ènu trɔ do è.
4Sìgbè kɛ̃tɔ nènea,
e dɔ̃ èkà mè na yebe àŋùdàtia.
Sìgbè kɛ̃tɔ nènea,
e jɔ̀ yebe ɖùsi-lɔ a,
eye be crɔ̃ ènu kèwo keŋu nya kpɔkpɔawo,
eye be kɔ̀ yebe àdɔ̀mèze be èzò
ɖo Ziɔ̀n nyɔ̃nùvia be gòxɔa ji.
5Tɔhonɔ̀ le wɔ̀ sìgbè kɛ̃tɔ nène.
E crɔ̃ Izràɛl dùkɔ̃a,
e crɔ̃ yebe èfìɔsawo,
e crɔ̃ yebe àgbògbòwo,
eye be jì vevesèse ɖo àlenana ji
na Yudà nyɔ̃nùvia.
6E kãkã yebe dɔ̃pe,
Sìgbè leke wo gbãnà èkpa lè àbɔ ŋuti nène.
E kãkã yebe bɔ̀bɔ̀pe,
Tɔhonɔ̀ na wo ŋlɔ̀be bɔ̀bɔzã ku jɛ̃gbɔ̃zã,
lè Ziɔ̀n be ànyigbã ji.
Lè yebe àdɔ̀mèze gãa mèa,
e ɖìgbɔ èfìɔ ku hũbonɔa.
7Tɔhonɔ̀ gbe yebe vɔsakpea,
e ɖìgbɔ yebe kɔ̀kɔ̀ɛpea,
e sɔ èdùa be èfìɔsawo ku yebe èglìwo
do àsi na kɛ̃tɔa.
Wo kpà àbòbo lè Tɔhonɔ̀ be àxuea mè,
sìgbè lè àzãɖùgbè nène.
8Tɔhonɔ̀ ɖo è be yè la gbã èglì
kè trɔ do Ziɔ̀n nyɔ̃nùvia kpò ye.
E tè èflì, sɔ jije è.
Mu la ɖè àlɔ̀ jo ò,
kaka na hùe kè nu be la gble ènu ò.
E ɖo èfũlòlo na àmèwo,
lè èglì ku èglìkpawo mè
9Èdùa be àgbowo mù gblò,
Tɔhonɔ̀ ŋɛ̃ woabe lɔkèwo.
Yebe èfìɔa ku yebe cãmìwo trɔ zũ gàmènɔ̀tɔ lè dùkɔ̃ kpɔ̀tɛawo mè.
Eye àmè ɖekpe mu gbà lè la na Tɔhonɔ̀ be nufiɔfiɔ ò.
Gblɔ̃ɖɛtɔawo ŋutɔ cã mu gbà le xɔ̀ ènyà sɔ Tɔhonɔ̀ gbɔ ò.
10Ziɔ̀n be èdùa be ètopòɖotɔwo
nɔ̀ ànyi ɖo ànyigbã, wo mu le kè fĩ ò.
Wo lɔ hũhũ kɔ̀ ɖo ètamè,
wo do èfũlòlo be àwùwo.
Yèruzàlɛm be tùgbɛ̀jɛviwo
do èta ègũ sɛ̀ɛ.
*
11Ènu tìkɔ̀ na ŋùkuvi nyè kèwo le fã àvia,
kaka àyè nyè gbãdo,
èjì nyè mu la gbà teŋu dojì
lè gbledo gã kè jè dùkɔ̃ nyèa jia nu ò.
Nyàwoa, ŋusɛ̃ vɔ̀nà na ɖèvi vifɛ̃wo
kaba lè èdù gbowo nu.
12Ɖèviawo biɔna woa nɔ̀wo sè be:
“Ènu ɖe lè mia ɖù a, ènu ɖe lè mia nùa?”
Wàlɛbɛ ŋua ke ye wo jènà ànyi sìgbè
àmè kèwo jè àfɔ̀ku nène lè èdù gbowo nu
eye wo kuna ci woa nɔ̀wo be àlɔ̀ mè.
*
13Yèruzàlɛm, nyè mu gbà nya ènyà kè mù la gblɔ̃ na wò ò.
Àpo àgbènɔ̀nɔ mu ɖì àmè ɖekpe tɔ̀ ò!
Kpɔwɔɛ kɛ ye mù la gbà na wò ò, èwò Ziɔ̀n be èdù nyuɛ̃?
Gbledo wòa kèkè sìgbè àpù nène.
Àmè kɛ ye la teŋu dà èdɔ̀ na wò ò?
14Àpo gblɔ̃ɖɛtɔwo mu kpɔ ènu bu na wò
sɔ wu àjè be ènyà ku ènu mà-ɖo ètù ò.
Wo mu kè ɖo àpo ènu kpòtoea ŋuti ò,
ènu kè la na wò la trɔ àgbè nɔ̀nɔa ò.
Wo yì kpà àjè ku àmè blèble be ènyàwo na wò.
15Àmè kèwo le to àhàdamè va le yìa, Yèruzàlɛm,
wo le pò àsikpe ɖo wo crɔ̃ wò.
Wo le sò hũ, le hũhũ èta gblɔ̃ be:
“Èdù kè wo yɔna be 'tùgbɛ̀jɛ àgbòjãjã'
kudo 'ànyigbã kpata be jìjɔɛ donua' ye ŋua?”
16Àpo kɛ̃tɔwo kpata le gblɔ̃ ènyà so ŋuti wò.
Ku àdɔ̀mèze ye wo le ji wò ɖɛ, gblɔ̃ be:
“Kpɔɖa mi le ji ì xoxo. Miabe àlɔ̀ sù e ji!
Yebe àzãa sù fifì vɔ̀!”
17Tɔhonɔ̀ le wɔ̀ ɖo yebe ɖoɖo ji;
e le wɔ̀ ɖo ègbè kè be ɖoa ji,
ègbè kè be ɖè, so kaka blèmà mè kea ji;
e le gbã ènu, ŋuzĩzĩ màku.
E sɔ àpo jɔ̀gbèvuɛ̃ le do jìjɔɛ na àpo èkɛ̃tɔ;
e le na ŋusɛ̃ kɛ̃tɔ wòwo kpe è.
*
18Woabe èjì le fã yɔ Tɔhonɔ̀.
Ziɔ̀n kè nya kpɔkpɔa be èglìkpa,
èzã ku kedèa,
na ne àpo àɖàsì ne kɔ̀ lè àpo ŋùmè,
sìgbè ètɔ̀ wɔ̀adã nène;
mù gbà gbɔ̃jɛ̃ ò;
àpo ŋùkuvi ji mu gbà pu ò.
19Fɔ̃ èzã-èzã, fã yɔ Tɔhonɔ̀,
èjì wò ne fã, lè èzãɖia hùenu ɖe sia ɖe,
èjì wò ne srà sìgbè èsì nène,
lè Tɔhonɔ̀ be ŋùmè.
Kɔ àlɔ̀wo yì èji ɖoɖa e gbɔ,
ɖo èvi wòwo ta,
èvi wò kèwo àdɔ̀ le wù kaka be woa ku,
lè èkpa ɖe sia ɖe dòmèa ta.
*
20Tɔhonɔ̀ kpɔɖa!
Kpɔ àmè kè wò le wɔ̀ ènu kèa kudoa ɖa!
Ne nyɔ̃nùwo le ɖù woawo ŋutɔ be àdɔ̀mè viwo,
ɖèvi kèwo ye wo jì nyuɛ̃ ɖe lekea!
Woa jo nɔ wù hũbonɔ ku gblɔ̃ɖɛtɔwo,
lè Tɔhonɔ̀ be kɔ̀kɔ̀ɛpea lekea kpòa?
21Tɔgbewo ku ɖèviwo mlɔ̃ ànyigbã lè èmɔ̃ dòmè;
tùgbèjɛ, ɖèkajɛ ku àmè sĩsĩ nyèwo,
tùgbɛ̀jɛ ku ɖèkajɛ nyèwo ku ci èwui nu.
Wò crɔ̃na àmè lè àpo àdɔ̀mèze zãa gbè;
wò sònà èhlò na àmè ŋuzĩzĩ màku.
22Sìgbè na àzã ɖùɖu nènea,
wò kpe ènu kèwo keŋu trɔ do mù,
eye wo dona na mù a;
eye lè Tɔhonɔ̀ be àdɔ̀mèze zã gbèa,
àmè ɖekpe mu tona lè e mè,
kaka woa kpɔ àmè kè wo la hlùɛ̃gãa ò.
Àmè kèwo mù lɔ̃, eye mù hɛ̃awoa,
èkɛ̃tɔ nyèa crɔ̃ wo keŋu.
Mina Bible © Bible Society of Togo, 2014.