Yosùa 5

Yosùa sò èvo na Izràɛlviwo lè Gilgàl be èdùa mè

1Ekè ye Àmorì be èfìɔ kèwo kpata lè Yɔrdàn godo, lè èwèɖoxɔ̀pe ku Kanàn be èfìɔ kèwo jèŋùkɔ̀ àpùa, wo sè be nène ye Tɔhonɔ̀ pu Yɔrdàn be èsìawo lè Izràɛlviwo be ŋùkɔ̀ kaka ye mia kpata mi sò ètɔ̀a, woabe jìdoa bu eye àgbɔ̃ ciji na wo lè Izràɛlviwo be ŋùkɔ̀. 2Gà ŋua mèa, Tɔhonɔ̀ gblɔ̃ na Yosùa be: “Sɔ Silɛ̀s-kpe sɔ wɔ̀ èwui ne wòa gbà sò èvo na Izràɛl be ŋusùviwo kpata.” 3Yosùa sɔ Silɛ̀s-kpe sɔ wɔ̀ èwui eye e sò èvo na Izràɛl be ŋusùviwo lè èvo-yu #5.3 Èvo-yu be èkpo: E nyi ètokɔ̃ɛ àlo èkpo kè ji ye Yosùa wɔ̀ èvo sòso be kɔ̀nu kè Tɔhonɔ̀ ɖo ànyi so tɔgbea Abràham ji be èkpoa ji. 4Kpoɖa ènu kè ŋuti ye Yosùa sò èvo na woa ye kè: Dùkɔ̃ kè jo lè Ejiptè-nyigbã jia be ŋusùwo, àmè kèwo kpata la teŋu wɔ̀ àhùa, woa kpata ye ku lè zògbèa ji, lè woabe èmɔ̃ zɔ̃zɔ̃ mè wàlɛbɛ kè ye wo to jo lè Ejiptè a. 5Dùkɔ̃ kè to jo lè Ejiptè a be ŋusùwo kpata sò èvo, vɔ̀ àmè kèwo kpata wo va jì lè èmɔ̃a ji, lè zògbèa jia ya wo mu sò èvo ò. 6Ɖo Izràɛlviwo zɔ̃ lè zògbèa ji èpè èkà kaka ne àhùasukawo kpata woa crɔ̃, ɖo wo mu sètonu na Tɔhonɔ̀ kè fìã be wo mu la kpɔ èdù kè be àjɔ̀gbè yè fìã na woa tɔgbewo be yèa sɔ na mi, èdù kè mè nyìnɔsi ku ànyisì srànà lèa. 7Woabe èviwo ye be sɔ ɖo woa tèpe; ɖèviawo ye Yosùa sò èvo na, ɖo wo mu sò èvo na wo sã lè èmɔ̃a ji ò. 8Vɔ̀, wàlɛbɛ kè ye wo sò èvoa na wo vɔ̀a, wo ci tèpe ɖèka lè kɔpe kè Yosùa sòa mè kaka na èvobia be kuku. 9Eye Tɔhonɔ̀ gblɔ̃ na Yosùa be: “Egbèa, mù ɖè ŋùkpɛ̃ kè mì xɔ̀ so Ejiptè a lè mìa ŋuti.” Eye wo yɔ tèpe kèa be Gilgàl #5.9 Gilgàl: Tèpe kè ye Tɔhonɔ̀ na ye Yosùa sò èvo na Izràɛlviwo lè wàlɛbɛ kè ye wo sò Yɔrdàn be ètɔ̀a vɔ̀a. Yeŋuti wo yɔ èdùa be Gilgàl, kè nyi àfi kè Tɔhonɔ̀ klo Ejiptè be èɖi kè lè Izràɛlviwo ŋuti lèa kaka va na egbè.

Toŋutivayì be àzã cucugbã lè Kanàn nyigbã ji

10Izràɛlviwo sò kɔpe ɖo Gilgàl eye lè Yerikò be gbàjàjia, wo ɖù toŋutivayì be àzã lè wètria be ŋùkèkè woènèa gbè lè wètrɔ mè. 11Kè èŋù kèa, wo ɖù ànyigbã a ji be nukuwo, kpɔ̃nɔ àkpiti ku èlù mème. 12Eye manà be gɛ̃gɛ̃a tɔtè èŋù kè gbè, kè wo gbe ɖù ànyigbã a be nukuwo kpòa. Izràɛlvi kèwo ɖù Kanàn nyigbãa be nukuwo lè èpè ŋua mèa, wo mu gbà kpɔ manà xɔ̀ gbèɖe ò.

Tɔhonɔ̀ be àhùaga be wɔ̀na

13Gbè ɖèka kè ye Yosùa gbà kpɔ̀tɔ̀ lè àzɔ̀ge na Yerikòa, e kɔ ŋùmè yì ji eye kpɔɖa: ŋusù ɖe kè ɖè yebe èwui ɖo àsia, nɔ̀tè lè ŋùkɔ̀ na ɛ̀. Yosùa tètè gogo è, biɔ ɛ̀ sè be: “Wò lè mia ji loo, àlo miabe kɛ̃tɔ ye wò nyia?” 14E ɖo e ŋuti be: “Aò, ɖo mù nyi Tɔhonɔ̀ be àhùaga. Fifìa mù va ɖo.” Eye Yosùa sɔ ŋùmè cɔ̃ ànyi, blìbɔ̀ na ɛ̀, eye e gblɔ̃ na ɛ̀ be: “Nukɛ ye àpe Tɔhonɔ̀ jro la gblɔ̃ na yebe sumɔ̃via ò?” 15Tɔhonɔ̀ be àhùagaa gblɔ̃ na Yosùa be: “Ɖè àfɔ̀kpa lè àpo àfɔ̀wo, ɖo tèpe kè wò lèa nyi tèpe kɔ̀kɔ̀ɛ.” Eye Yosùa wɔ̀ ɖo e ji.

Currently Selected:

Yosùa 5: GEN

Highlight

Copy

Compare