Yudìt 8
8
Betulìatɔwo lɔ̃ ɖo Yudìt be ènyà ji
1Lè ŋùkèkè ŋuawo mèa, ènyà kèa jè ètomè na Yudìt. E nyi èvi nyɔnù na Merarì, Ɔs be èvi, Yosɛ̀f be èvi, Ozìɛl be èvi, Helkìa be èvi, Ananìas be èvi, Gedèɔn be èvi, Rafaìn be èvi, Akitòb be èvi, Elìa be èvi, Kelkìas be èvi, Elìab be èvi, Natanàɛl be èvi, Salamìɛl be èvi, Sàrasadai be èvi, Izràɛl be èvi. 2Èsrɔ̃a nyi Manasè, kè kudo è so kɔ̀ta ɖèka ku xòmè ɖèka mè, e ku lè èlìku yàya be hùenu. 3Nyàwoa, e lena ŋùku ɖo àmè kèwo le bla ègbewo ŋuti lè gbàjà ji; dɔ̃ŋùkusu be zozo pò èta na ɛ̀; e jè kpòkpò ci àba ji eye be ku lè Betulìa, yebe èdùa mè. Wo ɖì ì ɖo yebe tɔgbewo gbɔ lè àgblè kè lè Dotaìn ku Balamɔ̀n be dòdòmè. 4Yudìt ci yebe àxomè xɔ̀ àhò èpè ètɔ̃ ku wètri ènɛ̀. 5E tù gòxɔ ɖe na ye ɖokoe ɖo èxɔ̀ta be gbàjà ji. E sɔ èfũlòvɔ trɔna do àlĩ eye e dona yebe àhò be àwùwo. 6E blana nu lè yebe àhòxɔ̀xɔ be ŋùkèkèwo kpata mè, tovò na jɛ̃gbɔ̃zãwo ku jɛ̃gbɔ̃zã be èzãdrɔ̃-gbèwo, wètri jèjiwo ku wètri jèjiwo be èzãdrɔ̃-gbèwo, àzã-gbèwo kudo Izràɛl be àxuea be jìjɔɛzãwo gbè. 7E jè tùgbɛ̀jɛ sìgbè àdɔ̀ nène eye be nya kpɔkpɔ ŋutɔ. Èsrɔ̃a Manasè gble sìka, klòsalò, sumɔviwo ŋusù ku nyɔnùwo, èlãhawo ku àgblèwo ɖɛ na ɛ̀ eye be nɔ̀nà yebe ènunɔ̀amèsiwo kpata dòmè. 8Àmè ɖekpe mu lè kè tona ènyà bàɖà ɖe sɔ so e ŋuti ò, ɖo e ɖo sisi gãaɖe na Mawu.
9Dùkɔ̃a be lìhuĩlìhuĩ lìli ɖo èdùmègãwo ŋutia be zĩzĩ yì jè ètomè na ɛ̀, lè ekèa mè be wo gbɔjɔ ɖo èsì mà nɔ̀ ànyia ŋuti. Yudìt gbà sè ènyà kèwo kpata Ozìas gblɔ̃ na wo, gà kè mè e tà ènu na wo be yèa sɔ èdùa do Àsirìatɔwo si lè ŋùkèkè àtɔ̃ yomèa. 10Kè be dɔ̃ yebe sumɔvi nyɔnù kè nyi yebe àdɔ̀kùnuwo kpata jikpɔtɔa, e na wo yì yɔ Ozìas, Kabrìs ku Karmìs, èdùa be àmègãwo va. 11Wo va e gbɔ eye e gblɔ̃ na wo be: «Mì ɖo èto mù, Betulìa be èdùmètɔ be ègawo, ɖo ènyà kè mì gblɔ̃ lè dùkɔ̃a be ŋùmè egbèa mu sɔ̀gbè ò, àleke mì sɔ àtãŋukãkã lè Mawu ku mìawo dòmè ye mì gblɔ̃ be yèwo la sɔ èdùa do àsi na miabe kɛ̃tɔwo ne Tɔhonɔ̀ mu na yèwo àlɔ̀do lè ŋùkèkè àtɔ̃ kèawo mè ò. 12Eye fifìa àmè kɛ mì nyi la tè Mawu kpɔ egbè eye mì la ji la nɔ̀ e tèpe lè àgbètɔwo be èviwo be ŋùmè ò? 13Fifìa mì le tè Tɔhonɔ̀ ŋusɛ̃kpatatɔa kpɔ, vɔ̀a mì mu la nya ènu ɖekpe so e ŋuti gbèɖe gbèɖe ò. 14Ɖo mì mu la nya àgbètɔ be èjìmè be gũwo kak la ŋɔjè woabe susuwo mè ò. Ne e lè nènea, àleke mì la wɔ̀ la sè Mawu, kè wɔ̀ ènu kèwo kpata lèa, be gɔ̃mè ò? Mì la teŋu nya ènu kè be le bù kpɔ àlo yebe ɖoɖoa? Nɔ̀viwo, mì mu gbà do àdɔ̀mèze na Tɔhonɔ̀ miabe Mawua ò. 15Ɖoa ne mu ɖo susu be yè la hɛ̃ àlɔ̀ kpe mi lè ŋùkèkè àtɔ̃awo mè òa, e sù teŋu xɔ̀ na mi lè àzã kè jro èa àlo teŋu crɔ̃ mi lè miabe kɛ̃tɔwo be ŋùmè jro. 16Vɔ̀a mì mu gbà sɔ ènu do àwòba ɖo Tɔhonɔ̀ miabe Mawua be ɖoɖowo ŋuti ò, ɖo Mawu mu nyi àgbètɔ ne woa do ŋùklɛ̃ na ɛ̀ ò àlo àgbètɔ be èvi ne woa zĩ e ji ò. 17Ye ŋutia, kè mi le nɔ̀tè kpɔ yebe àmè hlùɛ̃gã, mia kpɔ̀tɔ̀ nɔ fã yɔ ɛ̀ ne bèa do mi àlɔ̀ eye e la sè miabe ègbè ne e jè ŋùmè na ɛ̀a. 18Ɖo ènu kè ŋutia, mu jɔ̀ kpɔ gbèɖe lè miabe jìjimèwo mè àlo lè egbè egbè lè mia dòmèa, be kɔ̀ta ɖe, àlo xòmè ɖe àlo hɛ̃nu ɖe àlo èdù ɖe dona èta gũ na vòdu kèwo ye àgbètɔ be àlɔ̀ wɔ̀a sìgbè àlekè be jɔ̀ lè gbèɖegbè va yìa nène ò. 19Ekèa ŋuti ye mia tɔgbewo ci èwui nu, woabe kɛ̃tɔwo hlà woabe ènu eye wo ɖù woa ji lè hùenu sùgbɔ mè va yì. 20Vɔ̀a mia ya, mi mu jèsi vòdu buwo tovò lè Tɔhonɔ̀ ŋuti ò. Ènu ŋua ŋuti ye mi dona jì be mu la crì mi ò eye mu la ɖe yebe ŋuzĩzĩkukua ku àmèhlùɛ̃gã jo lè miabe kɔ̀ta ji ò. 21Ɖo ne wo le mia, wo la le Yudeà kpata cã la ci àsi, wo la hlà kɔ̀kɔɛpea eye Mawu la biɔ yebe gbãgbãa be hlɔ̃ lè èhũ mè. 22E la sɔ mia nɔ̀viwo be wùwu, èdùa be hàhla ku miabe ànyigbã be cɔ̃crɔ̃, wo dà ɖo miabe èta ji. Mi la nyi dùkɔ̃ buwo be kluvi eye mi la ɖì kòkoe na dùkɔ̃ kèwo dòmè mi la yì sò cia. Wo la nɔ zũ mi. 23Ɖo miabe kluvi nyinyi mu la fɔ̃ àmè ɖekpe be àdɔ̀mènyuɛ̃ ò. Bòhũa Tɔhonɔ̀ la sɔ ɛ̀ wɔ̀ ègbɔ ɖìamè ku ŋukpɛ̃ be ènu. 24Ye ŋuti fifìa, nɔ̀viwo, mì na mia ɖè fiɔ mia nɔ̀viwo be woabe àgbèa kù ɖo miawo ŋuti, eye kɔ̀kɔɛpea, Mawu be àxuea ku vɔsakpea lè mia simè. 25Bɔ̀ ɖo ekèa ŋutia, mì na mia do àkpe na Tɔhonɔ̀ miabe Mawu kè le do mi kpɔ sìgbè mia tɔgbewo nène. 26Mì ɖoŋù ènu ɖekpekpe kè be wɔ̀ na Abràham, kudo nène kè be do Izàk kpɔ gbàkudo ènu kè kpata jɔ̀ ɖo Yakɔb ji lè Mèzòpòtamìa Sirìa-tɔ̀, wàlɛbɛ kè be kplɔ̀nà nyìnɛa Labàn be àlɛ̃woa. 27Ɖo sìgbe àleke be klɔ wo lè èzò mè sɔ jrò woabe èjìmè kpɔa, nèneake mu biɔ mi èhlɔ̃ ò. Vɔ̀a, sɔ na ètoklã ŋuti ye Mawu pònà àmè kèwo ye le gogo èa.» 28Ozìas gblɔ̃ na ɛ̀ be: «Lè ènu kèwo kpata wò gblɔ̃a mèa, wò pònu ku èjì ɖɔ̀huĩ eye àmè ɖekpe mu la sitè ɖo ŋuti wò ò. 29Ɖo mu nyi so egbèa ye àpo ènunya le ze ò; vɔ̀a so àgbè wòa be jitɔtɔa dùkɔ̃ bliboa jèsi àpo ènunyanya ku àpo èjìmè be àsìxɔ̀xɔ. 30Vɔ̀a sìkɔ tì dùkɔ̃a veveɖe ŋutɔ eye wo zĩ mia ji be mia wɔ̀ ɖo ènu kè mi gblɔ̃ na woa ji to àtãŋu kãkã mè. Fifìa e zĩ mia ji be mia wɔ̀ ɖo e ji pɛpɛpɛ. 31Ye ŋuti fifìa, fãkue ɖo mia ta, ɖo wò ya nyɔnù sumɔtɔ ye wò nyi; Tɔhonɔ̀ la na èjisi la ja ɖɔ miabe èsìɖopewo eye mi mu la gbà pò blibɛ blibɛ ò.» 32Yudìt gblɔ̃ na wo be: «Mì ɖoto mù; mù la wɔ̀ ènu ɖe kè la sùtè miabe kɔ̀tamè viwo gbɔ so àkɔ ɖe na àkɔ bu. 33Mìa ya, mì nɔ̀ èdùa be àgboa nu èzã kèa mè. Nyè ya mù la to ku àpe sumɔvi nyɔnùa eye, jè ŋùkɔ̀ na àzã kè gbè mì gblɔ̃ be yèwo la sɔ èdùa do àsi na miabe kɛ̃tɔwoa, Tɔhonɔ̀ la va ji Izràɛl kpɔ. 34Gãkea mìa ya, mì mu gbà ji be yèwo nya ènu kè mù le ji la wɔ̀a ò, ɖo nyè mu la gblɔ̃ ènyà ɖekpe na mì gbɔ̀xue ènu kè mù la wɔ̀a la wu e nu ò.» 35Ozìas ku ègawo gblɔ̃ na ɛ̀ be: «Yì lè ŋutifafa mè eye Tɔhonɔ̀ ne nɔ̀ ŋùkɔ̀ na wò ne wòa biɔhlɔ̃ miabe kɛ̃tɔwo.» 36Eye kè wo to lè Yudìt be bègloea mèa, wo yì woabe nɔ̀pewo.
Currently Selected:
Yudìt 8: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.