Yudìt 6
6
Hòlofernɔ̀ pò nupo
1Ekè zigìdia ɖoɖa lè ŋusù kèwo trɔ do àɖàŋùɖèha vɔ̀a, Hòlofernɔ̀, Àsirìa be àhùaga gã gblɔ̃ na Akìɔr lè àmèjro dùkɔ̃ bliboa ku Mòabviwo kpata be ŋùkumè be: 2«Àmè kɛwo mì nyi, èwò Akìɔr ku mì, sà mìa ɖokoewo na Efrayìm, la va ɖù gblɔ̃ɖɛtɔwo lè mia nu sìgbè egbè nène eye mì le gblɔ̃ na mi be mi mu gbà sɔ àhùa ɖo Izràɛl ŋuti ò, ɖo woabe Mawu la kpɔ woa ji ŋuti ɖo ò? Àmè kɛ nyi tɔhonɔ̀ tovò na Nèbùkàdnɛzà ò? E ya ye la ɖo yebe hɔ̃hlɔ̃ eye e la hlà wo jo lè ànyigbã be ŋùkumè eye woabe Mawua mu la hlùɛ̃ wo gã ò. 3Vɔ̀a mi nyi yebe sumɔviwo, mi la tùkù wo zè ɖèka eye wo mu la teŋu kpe miabe èsɔwo be ŋusɛ̃ ji ò. 4Ɖoa mi la tɔ wo èzò màgble ɖe ɖɛ. Woabe ètowo la nù woabe èhũ la mu eye woabe gbàjà jiwo la ɖɔ ku woabe àmèkukuwo. Wo mu la teŋu nɔ̀tè lè ŋùkɔ̀ na mi ò, vɔ̀a wo la crɔ̃, nène èfìɔ Nèbùkàdnɛzà, ànyigbã bliboa be tɔhonɔ̀a, gblɔ̃a yeŋu; ɖo e pò nupo eye yebe ènyàwo mu nyina ènyà gbalo ò. 5Eye èwò, Akìɔr, kè sà ye ɖokoe na Amɔ̀n, èwò kè pò nupo kèawo lè àpo tèsisi be àzã gbèa, wò mu la gbà kpɔ àpe ŋùkumè kaka na gà kè mè mù biɔhlɔ̃ so kɔ̀ta kèa, kè si to jo lè Ejiptèa si ò. 6Eŋua, àhùakɔ̃ nyèwo be èwui ku àpe sumɔviwo be àkplɔ̀ la ŋɔ àhàda mè na wò eye wò la jè ànyi lè àmè kèwo jè àfɔ̀kuawo dòmè, gà kè mè mù la trɔ gbɔ̀ va. 7Sumɔvi nyèwo la dɔ̃ wò yì èto nyigbã be ènutomè eye wo la sɔ wò ɖo yebe èdù ɖe be àbùɖiɖiwo mè. 8Wò mu la ku gbɔ̀xue la crɔ̃ ku Izràɛlviwo lè funu ò. 9Ekè wò le ɖoŋù lè àpo èjì mè be wo mu la va le wo òa, mù gbà ɖɔ̀ ŋùmè ò. Mù pò nupo vɔ̀, eye ènyà nyèwo be kui ɖèka mu la gɛ̃ ò.»
10Hòlofernɔ̀ ɖègbè na yebe sumɔvi kèwo lè yebe gòxɔa mè be woa jè Akìɔr ji, woa kplɔ̀ ɛ̀ yì Betulìa eye woa do è àsi na Izràɛlviwo. 11Yebe sumɔviawo le è, kplɔ̀ ɛ̀ to lè àsàɖa mè yì gbàjà ji; wo jo so baliwo mè tùtà èto nyigbã be ènutomè gbɔ eye wo va ɖo èsìjɔ̀pe kèwo lè Betulìa gɔ̃mè. 12Kè wo kpɔ woa, ŋusù kèwo lè èdù kè lè ètoa tamèa jè woabe àhùawɔ̀nuwo ji eye wo to lè èdùa mè; ku woabe èkpedànuwo (rɔbàtuwo) lè àlɔ̀ mè, ŋusùwo xe èmɔ na wo ne wo mu gbà lia ètoa ò eye wo le dà èkpewo ɖoɖa wo. 13Àmèawo ɖiɖi yì ètoa gɔ̃mè, wo bla Akìɔr ɖo funua be le ŋɛ̀ eye wo trɔ yì woabe àpetɔa gbɔ. 14Vɔ̀a Izràɛlviwo ɖiɖi so woabe èdùa mè, va kè ɖo Akìɔr ŋuti: kè wo tu èkà na ɛ̀a, wo kplɔ̀ ɛ̀ yì Betulìa eye wo sɔ ɛ̀ yì fiɔ èdùa mè be ègawo. 15Woawo ye nyi: Ozìas, Mikà be èvia, so Simèɔn be kɔ̀ta mè ku Kabrìs, Ɔtnìɛl be èvia kudo Karmì, Mɛlkìɛl be èvia. 16Wo yɔ èdùa be àmègãwo kpata bɔ̀. Ɖèkajɛwo ku nyɔnùwo sidù va hòo. Wo sɔ Akìɔr ɖo dùkɔ̃ bliboa dòmè eye Ozìas biɔ ɛ̀ ènu kè jɔ̀a sè. 17Lè yebe ɖoŋutia mèa, e kã Hòlofernɔ̀ be àɖàŋùɖoha be ènyàwo ta na wo, ku ènyà kèwo kpata ye ŋutɔ gblɔ̃ lè Àsirìaviwo be kplɔ̀tɔwo be àgũ dòmè kudo Hòlofernɔ̀ be gãglo be nupowo ɖo Izràɛl be àxuedoa ŋuti. 18Kè wo do ènugũ vɔ̀a, dùkɔ̃a sɛ̃ Mawu eye e kɔ ègbè yì ji be: 19«Tɔhonɔ̀, jiŋùkusi be Mawu, kè ŋùku ɖo woabe jàjrawo ŋuti eye kpɔ ɖo e mè na miabe kɔ̀ta kè wo do ŋùkpɛ̃a eye egbèa, ɖè èkɔ̀ kpɔ àmè kèwo wò ɖè ɖovòa.»
20Wo fa àkɔ na Akìɔr eye wo do è ŋusɛ̃ veveɖe. 21Ozìas kplɔ̀ ɛ̀ so àgũa dòmè yì yebe àxomè eye e ɖo àzãɖùkplɔ̃ na àmègãwo. Wo fã yɔ Izràɛl be Mawua sɔ biɔ ɛ̀ àlɔ̀do lè èzã bliboa mè.
Currently Selected:
Yudìt 6: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.