Yudìt 10
10
Yudìt to lè Betulìa
1Ekè è tɔtè àle nana ɖoɖa Izràɛl be Mawua eye e wu ènyà kèawo kpata nu vɔ̀a, 2e sitè lè èklòa ji, yɔ yebe sumɔvi nyɔnùa ɖì yì àxue kè mè be nɔ̀nà lè jɛ̃gbɔ̃zã ku jìjɔɛzãwo gbè; 3e ɖè èfũlòvɔ kè mè be lèa, e ɖè àsi lè yebe àhòsì be àvɔwo ŋuti, e lè èsì, sɔ àmì hɔ̃hɔ̃ɛ xɔ̀asì ɖe sì; vũ yebe èɖàwo, sɔ àvɔnu ɖèɖe bla èta eye e do jìjɔɛzã be àwù kèwo be dona lè èsrɔ̃a Manasè be àgbè ŋùkèkè me; 4e sɔ còkòtawo do àfɔ̀, e do yebe èkɔ̀jònuwo, àlɔ̀gàviwo, àlɔ̀tinugawo, ètomègàviwo ku yebe àcɔɖonuwo kpata eye e jrà ye ɖokoe ɖo àcãtɔ̀ ŋutɔ àleke be bèa flù ŋùkuviwo na ŋusù kèwo la va kpɔ ɛ̀a. 5E sɔ vɛ̃ be èlãgbàzegò ɖèka kudo àmi be èze ɖèka do àsi na yebe sumɔvi nyɔnù; e ɖɔ àkpò ɖèka ku èlùvi be èwɔ, kusɛ̃sɛ̃ pupuwo be klàko ɖèka, kpɔ̃nɔwo ku nyìnɔsi babla; e sã àgbã kèawo kpata eye be dro wo na yebe sumɔvi nyɔnùa. 6Wo to ɖota Betulìa be àgboa nu eye funua wo kè ɖo Ozìas ku èdùa be àmègãwo Kabrìs ku Karmìs ŋuti, wo lètè lè funua. 7Kè wo kpɔ yebe ŋùmè trɔ nɔ̀nɔmè gbàkudo yebe àwù kè be ɖɔ̀lìa, wo kã yà ɖo yebe nyɔnyɔ ŋuti eye wo gblɔ̃ na ɛ̀ be: 8«Mia tɔgbewo be Mawu ne kɔ̀ àdɔ̀mè ɖo ŋuti wò! Ne wɔ̀ ne wòa kpɔ èta na àpo èdɔ sɔsɔwo ɖo Izràɛl be gòyiyi ku Yeruzàlɛm be kɔ̀kɔ ɖoji ŋuti!»
9E dota gũ, sɛ̃ Mawu eye e gblɔ̃ na wo be: «Mì ɖègbè be wo ne hũ èdù be àgboa na mù eye mù la to yì wɔ̀ ènu kè be nupo mì pò kudo mùa; wo ɖègbè na ɖèkajɛwo be woa hũì na ɛ̀ sìgbɛ̀ àleke be gblɔ̃a nène. 10Wo wɔ̀ nènea eye Yudìt to kudo yebe sumɔvi nyɔnùa. Èdùa be ŋusùawo le ŋùku ɖo e ŋuti be ɖì lè ètoa ji kaka yì to gbàjà ji, e yomèa, wo mu gbà kpɔ ɛ̀ ò.
11Wo zɔ̃ tututu lè gbàjà ji eye Àsirìa be àhùakɔ̃a be ɖiatɔwo va dogò wo. 12Wo le Yudìt eye wo biɔ ɛ̀ ènyà sè be: «Àkpa kɛ ji tɔ wò nyi ò? Fikɛ wò so ò? Fikɛ wò le yì ò?» E ɖo e ŋti be: «Hebrùvi nyɔnù mù nyi eye mù si jo lè woa gbɔ ɖoa e gbãnà be wo la sɔ wo do àsi na mì sɔ̀sɔɛɖe kèa. 13Lè go nyè mèa, mù va la kpɔ Hòlofernɔ̀ mìabe àhùakɔ̃ be àhùaga gãa ne ma kã ɖo ènu ɖewo ji na ɛ̀ eye ma gblɔ̃ èdùa be kopekope be èmɔwo na àleke be lè ànyigbã kpata be hàhla mèa, mu gbà bu yebe ŋusù ɖèka ŋutɔ cã ò.»
14Kè wo sè yebe ènyàwo eye wo glò yebe ŋùmè kpɔ-nyàwoa e nya kpɔkpɔ ŋutɔ, ekèa wɔ̀ ŋùdã na wo, ŋusùawo gblɔ̃ na ɛ̀ be: 15«Wò hlùɛ̃ àpo àgbèa gã, ɖo wò ɖèbla ɖì va sɔ ɖokoe wò fiɔ miabe àpetɔa. Fifìa, va yebe gòxɔa to; mia dòmètɔ ɖewo la kplɔ̀ wò kaka yì e gbɔ. 16Ne wò va ɖo lè tènu lè ŋùkɔ na ɛ̀a, àdìka mu gbà sò wò ò, vɔ̀a trɔ gblɔ̃ ènyà wòawo na ɛ̀ eye e la wɔ̀ ɖàgbè na wò.
17Lè woa mèa, wo cã ŋusù àmè èkà èvè takpo (100) kèwo ye bɔ̀ ɖo eya ku yebe sumɔvi nyɔnùa ŋuti eye wo kplɔ̀ ɛ̀ yì ɖo Hòlofernɔ̀ be gòxɔa to; 18hũnyàhũnyà gɛ̃ ɖo àhùkɔ̃ bliboa be àsàɖa mè; ɖo wo ɖogà so yebe vava ŋuti lè gòxɔawo dòmè; wo va dotò trɔ do è wàlɛbɛ kè e lè tènu lè Hòlofernɔ̀ be gòxɔa be xixenu gbɔ̀xue wo yì sìa ɛ̀ na ɛ̀. 19Wo ku àvò ɖo yebe nyɔnyɔa ŋuti eye àvò gbà pò wo ɖo Izràɛlvi kè be nyia ŋuti, eye wo gblɔ̃ na woa nɔ̀nɔwo ɖèka ɖèka be: «Àmè kɛ mu la crì dùkɔ̃ kèa kè mè nyɔnù kèa hati lèa ò? Mu nyɔ ne woa gble Izràɛlvi ɖèka tètè ɖo àgbè ò. Ɖo àmè kèwo la ci àgbèa teŋu va blè ànyigbã kpata!»
20Àmè kèwo kpɔna àmè ta lè Hòlofernɔ̀ gbɔ ku yebe àhùakplɔ̀tɔwo kpata gblɔ̃ nèneake, eye wo kplɔ̀ Yudìt yì yebe gòxɔa mè. 21Hòlofernɔ̀ lè ànyimɔmlɔ̃ lè yebe àbàti ji, lè èmudɔ kè wo wɔ̀ ku àvɔ jɛ̃, sìka, zòkakpexɔ̀asì kudo èkpexɔ̀ci kèwo wo sɔ ɖo àcɔ naa gɔ̃mè. 22Wo sìa ɛ̀ eye e va yebe gòxɔa mɔnu, klòsalò be èzòti hɛ̃tɔwo lè ŋùkɔ̀ na ɛ̀. 23Kè Yudìt zɔ̃ va Hòlofernɔ̀ ku yebe àhùakplɔ̀tɔwo be ŋùkɔ̀a, àmèwo kpata ku àvò ɖo yebe ŋùkumè be nyɔnyɔa ŋuti. E jè ànyi cɔ̃ ŋùmè ànyi eye e blìbɔ̀ na ɛ̀ eye e ya be sumɔviawo fɔ̃ ɛ̀ ɖotè.
Currently Selected:
Yudìt 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.