Kòjoɖotɔwo 8
8
1Wàlɛbɛ kè Efràyim be ŋusùtiawo va ɖo Gideɔ̀n gbɔa, wo gblɔ̃ na ɛ̀ be: “Nukɛ ŋuti wò wɔ̀ kudo mi nène ò? Nukɛ ŋuti wò mu yɔ mi wàlɛbɛ kè wò le ja yì wɔ̀ àhùa kudo Madìan-tɔwo ɖo ò?” Eye wo hɛ̃ ènyà kudo è ŋutɔ. 2Vɔ̀ Gideɔ̀n ɖo e ŋuti na wo be: “Wo ma teŋu sɔ ènu kèwo mù wɔ̀a sɔ sɔ̀ kudo mìa tɔ̀ ò. Ɖo mìa Efràyim ŋusùwo, vitukui kè mì wɔ̀ lè àhùa kèa mèa wu gã jiɖùɖuwo kpata kè Abiezɛr be hɛ̃nua kpɔa. 3Nyè mu teŋu wɔ̀ ènu àdodoe kè mì wɔ̀ ò ɖo mìawo ye Mawu ɖè Madìan be àhùaga Obɛd kudo Zɛb do àsi na.” Gideɔ̀n be ènyà ɖoŋuti kèa na be Efràyim-tɔwo be àdɔ̀mèzea vɔ̀.
Gideɔ̀n be àhùawɔ̀wɔ lè Yɔrdàn godo
4Gideɔ̀n kudo àmè àlɔ̀ ètɔ̃ kèwo kplɔ̀ ɛ̀ doawo va ɖo Yɔrdàn-tɔ̀ to eye wo sò ètɔ̀a, jè àgo èvègɔ̃a ji. Ènu tìkɔ̀ na wo co, vɔ̀ wo kpɔ̀tɔ̀ tĩ woabe kɛ̃tɔwo yo mè. 5Kè wo ɖo Sukɔ̀t nyigbã jia, Gideɔ̀n gblɔ̃ na èdùa mètɔwo be: “Mì na kpɔ̃nɔvi àmè kèwo kplɔ̀ mù do a, ɖo wo gbɔjɔ keŋu-keŋu. Eye mi le nyà Madìan be èfìɔ Zebà kudo Salmunà la le.” 6Vɔ̀ Sukɔ̀t be èdù mègãwo ɖo e ŋuti be: “Nukɛ ŋuti ye mi la na ènuɖùɖu àpo àhùakɔ̃a ɖo ò? Wò ɖo àsi Zebà kudo Salmunà wo ji vɔ̀a?” 7Gideɔ̀n gblɔ̃ na wo be: “E nyɔ! Ne Mawu ɖè Zebà kudo Salmunà do àsi na mù a, mù la trɔ va pò mì kudo àve mè be àŋùjatiwo.” 8So funua, Gideɔ̀n yì Penùɛl nyigbã ji eye e biɔ so Penùɛl-tɔwo cã si be woa na kpɔ̃nɔvi yèbe àhùakɔ̃a, wo ɖo e ŋuti na ɛ̀ sìgbè Sukɔ̀t be gawo ke nène. 9Gideɔ̀n gblɔ̃ na wo cã be: “Ne mù yì ɖù àhùa ji vɔ̀a, mù la va gbã mìabe èdùa be èmɔ̃jikpɔxɔa.” 10Lè gà ŋua mèa, Zebà kudo Salmunà wo lè Karkɔ̀r nyigbã ji kudo woabe àhùakɔ̃wo. Àmè kèwo kpɔ̀tɔ̀ lè àhùakɔ̃a mèa, le nyi àmè hotu adrɛ̃ èkà èwìvɔàtɔ̃, ɖo wo wù àmè hotu èkà takpo lè woa dòmè. 11Gideɔ̀n to èmɔ̃ kè èsɔ èkpotɔnɔ̀wo tona lè èwèzɛ̃pe na Nɔbà kudo Yogbohà, yì kɔ̀ ɖo kɛ̃tɔawo ji wàlɛbɛ kè wo susu be yèwo lè ètocɔ̃anyipea, eye e yì xa wo. 12Zebà kudo Salmunà kèwo nyi Madìan be èfìɔwo si co Gideɔ̀n kplɔ̀ wo do yì le wo eye be na tìtɔ̀titɔ gãaɖe jè Madìan be àhùakɔ̃ kpɔ̀tɛa dòmè. 13Kè Gideɔ̀n ɖù àhùa ji vɔ̀ trɔ gbãnà, e sɔ èmɔ̃a to Herɛ̀s be tamè. 14E yì le Sukɔ̀t be ɖèkajɛvi, biɔ ɛ̀ ènyà so dù mè mègãwo ŋuti. Eye ɖèkajɛvia ŋlɔ̀ ègawo kudo dùmèmègãwo kpata be nyikɔ na ɛ̀. Wo le nyi àmè èkà takpo ci woeadrɛ̃. 15E yomè a, Gideɔ̀n yì Sukɔ̀t be èdùa mè gblɔ̃ na àmèwo be: “Mù kplɔ̀ Zebà kudo Salmunà va na mì. Mì ɖo ŋùku ènyà kè mì gblɔ̃ na mù va yìa be: “Nukɛ ŋuti mi la na mì ènuɖùɖu ɖo ò? Wò ɖo àsi Zebà kudo Salmunà ji vɔ̀a? Fifìa, woawo ye kè!” 16Eye Gideɔ̀n sɔ àve mè be àŋùjati sɔ pò dùmèmègãwo kudo ègawo nyuɛ̃ ɖe lè Sukɔ̀t. 17E yì gbã Penùɛl be èmɔ̃jikpɔxɔa cã gbà wù èdùa mètɔwo. 18E yomè a Gideɔ̀n biɔ Zebà kudo Salmunà, Madìan be èfìɔwo be: “Leke àmè kèwo mì wù lè Tabɔ̀r be ètoa jia wo lè ɖo ò?” Wo ɖo e ŋuti be: “Wo lè sìgbè èwò ke nène ɖo wo ɖo èfìɔvi be nɔ̀nɔmè.” 19E gblɔ̃ na wo be: “Nɔ̀vi nyèwo ye wo nyi! Ènɔ̀ nyè be vi jìjiwo. Lè Tɔhonɔ̀ àgbèagbèa be nyikɔ mèa, ne mì mu kè wù wo òa, nyè cã nyè mu la wù mì ò.” 20Eye e na ègbè èvia ŋusùvi àmègãxotɔa gblɔ̃ be: “Sitè ne wòa wù wo!” Vɔ̀ ɖèkajɛvia mu teŋu lìɔ yebe èwuia lè àkua mè ò, ɖo ɖèvi kpò be gbà kpɔ̀tɔ̀ nyi eye e le vɔ̃. 21Madìan be èfìɔ Zebà kudo Salmunà wo gblɔ̃ na Gideɔ̀n be: “Sitè ne wò ŋutɔ wòa wù mi ɖo mu nyi ɖèvi be ènyà ò!”
Eye Gideɔ̀n wù Madìan be èfìɔ èvèawo. E ɖè sìkanu kèwo lè èkɔ̀ na woabe èsɔ-kpotɔnɔ̀wo.
Gideɔ̀n be àgbèa be vɔ̀vɔnu
22Lè ekèa yomè a, Izràɛlviwo gblɔ̃ na Gideɔ̀n be: “Trɔzũ miabe kplɔ̀tɔ ne èvi wòwo kudo tɔgbe-tɔ̀gbè yɔvi wòwo, woa sɔ ɖù crɔ̃, ɖo èwò ye hlùɛ̃ mi gã lè Madìan-tɔwo si.” 23E ɖo e ŋuti na wo be: “Aò nyè mu la nyi mìabe kplɔ̀tɔ kaka la va jè èvi nyèwo ji ò, ɖo Tɔhonɔ̀ ye nyi mìabe kplɔ̀tɔ!” 24Eye Gideɔ̀n gbà gblɔ̃ na wo be: “Mù ji la biɔ mì ènu ɖèka. Àmè sia àmè ne na mù sìka àlɔ̀ gàvi ɖèka lè yebe àmɔ̀nyɔ̀nuwo mè.” Nyàwo, Madìan-tɔwo dona àlɔ̀ gàvi sìgbè zògbè ji be èmɔ̃zɔ̃tɔwo nène. 25Wo ɖo e ŋuti be: “Ɛ̃ɛ mi lɔ̃ fàa be mia na wò ènu kè wò biɔa.” Wo ɖo àwù gã vlàyà ɖèka ɖo ànyigbã eye woa dòmètɔ ɖe sia ɖe sɔ sìka lɔ̀gàvi ɖèka do e mè. 26Sìka lɔ̀gàvi kè wo lɔ na ɛ̀a be kpɛ̃kpɛ̃ mè lè kìlo èwì. E gbà xɔ̀ sìkanu buwo kudo èto mè gàviwo gbàkudo Madìan be àwù jɛ̃ biɖi-biɖi kè woabe èfìɔwo dona sɔ kpe ɖo sìkanu kèwo lè èkɔ̀ na èfìɔawo be èsɔ èkpovènɔ̀wo ŋuti. 27Gideɔ̀n sɔ sìkanu kèawo kpata sɔ wɔ̀ ènu jɔ̀jɔ ɖo Ɔfrà, yebe kɔpe mè. Eye Izràɛlviwo yì wɔ̀nà sɛ̃sɛ̃ lè ènu jɔ̀jɔ sìkatɔ̀ kèa be ŋùkɔ̀. Ekèa nyi àfɔ̀klɛ̃nu na Gideɔ̀n kudo yebe xòmèa. 28Nène a ye Mawu gbɔjɔ Madìan-tɔwo eye wo mu gbà ɖo ŋusɛ̃ ɖo Izràɛlviwo ji ke ò. Dùkɔ̃a nɔ̀ ŋuti fàfa mè xɔ̀ èpè èkà sɔ̃ŋu lè Gideɔ̀n be àgbè zã kpata mè. 29Yòas be vi Gideɔ̀n kè wo ɖo na be Yèrubaal trɔ yì nɔ̀ yebe àxo mè. 30Gideɔ̀n ɖè nyɔ̃nù sùgbɔ eye wo jì èvi èkà takpo ci èwo na ɛ̀. 31Àzìãvi kè Gideɔ̀n ɖo lè Sikɛ̀m be èdùa mèa, jì ŋusùvi ɖèka na ɛ̀, ye e ɖo nyikɔ na ɛ̀ be Abimèlɛk. 32Eye Gideɔ̀n sĩ nyuɛ̃ ɖe gbɔ̀xue va ku eye wo yì ɖì ì ɖo ètɔa Yòas be yɔ̀do mè lè Ɔfrà kè nyi Abiezɛr be hɛ̃nua be ànyigbã ji. 33Lè Gideɔ̀n be èku yomè a, Izràɛlviwo gbà trɔ yì le sɛ̃ vòduwo. Wo sɔ Baal-Berì sɔ wɔ̀ woabe vòdu. 34Eye Izràɛlviwo mu gbà ɖonaŋù Tɔhonɔ̀ woabe Mawu be ènu jɔ̀ àsu kèwo be wɔ̀ na wo lè woabe kɛ̃tɔwo be ŋùkɔ̀ ò. 35Wo mu gbà ɖo sìsi ɖekpe na Gideɔ̀n-Yèrubaal be xòmèa cã ò, togbɔ be Gideɔ̀n hlùɛ̃ wo lè Madìan-tɔwo si ŋutɔ cã a.
Currently Selected:
Kòjoɖotɔwo 8: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
