Kòjoɖotɔwo 15
15
Samsɔ̀n biɔhlɔ̃ Filistìtɔwo
1Àzã ɖewo yomè, lè èlù ɖèɖe be hùenua, Samsɔ̀n yì ji èsrɔ̃a kpɔ. E hɛ̃ ègbɔnɔvi ɖèka ɖo àsi eye kè be ɖo funua, e gblɔ̃ be: “Mù ji la yì kpɔ èsrɔ̃ nyèa lè yebe èxɔ̀ mè”. Vɔ̀a èsrɔ̃a be ètɔ mu lɔ̃ be ne yì ò, 2eye e gblɔ̃ na ɛ̀ be: “Nyàwoa, mù susu be wò mu la sɔ ènu kè be wɔ̀a sɔ kè è gbèɖe ò, eye mù sɔ ɛ̀ sɔ na àmè kèwo nɔ̀ ŋuti woawo dòmètɔ ɖèka. Vɔ̀a ɖe, e yomètɔ̀a mu nya kpɔkpɔ wu ìa? Sɔ e ya sɔ ɖè ɖo dàdaa tèpe.” 3Samsɔ̀n gblɔ̃ na wo be: “Fifì ya ènu ɖekpe mu la gbà teŋu xe èmɔ̃ na mù be nyè mu gbà wɔ̀ ènu bàɖà kudo Filistìtɔwo ò.”
4Eye Samsɔ̀n jo yì le wɛ̀tɛ̀klɛ̀ àlɔ̀ ètɔ̃ (300). E le woabe àsikewo èvè-èvè sɔ bla ɖo èzòti ŋuti. 5E yomè a, e tɔzò èzòtiawo eye be tàsi wɛ̀tɛ̀klɛ̀awo ɖo Filistìtɔwo be àgblèwo mè. Nène a ye Samsɔ̀n wɔ̀ sɔ fiɔ̃ Filistìtɔwo be èlù babla kudo kèwo lè àti ŋuti kaka jè àmìti kudo vɛ̃-gblewo ŋutɔ cã ji. 6Filistìtɔwo biɔ sè be: “Àmè kɛ ye wɔ̀ ènu kèa ò?” Eye wo ɖo e ŋuti na wo be: “Samsɔ̀n kè nyi Timnà be ŋusù ɖe be ètoyɔvia ye, ɖo ètoa sɔ èsrɔ̃a sɔ na ɖèkajɛvi kèwo nɔ̀ e ŋuti lè nyɔ̃nù kpɔ̀kplɔ be gàmèa be dòmètɔ ɖèka.” Nène a, Filistìtɔwo yì tɔzò nyɔ̃nùa kudo ètɔa kpata. 7Eye Samsɔ̀n gblɔ̃ na wo be: “Kè e tɔ̀ be nène ye mì wɔ̀a, nyè cã mù la sɔ yebe èsìa sɔ pò mì gbɔ̀xue la gbɔ̃jɛ̃.” 8E kpe àhùa kudo wo eye e pò àmè gbogbo ɖewo wù. E yomè a, e yì ci Etàm be àkpãdo ɖe mè.
Samsɔ̀n wù àmè ku èsɔ-àkɛtɛ be àglã
9Filistìtɔwo va yì dotò ɖo Yudà be ànyigbã ji eye so funua, wo le kãkã ɖo Lehì be àgowo ji. 10Yudà be ŋusùtiwo biɔ wo sè be: “Nukɛ ŋuti mì va xa mi ɖo ò?” Wo ɖo e ŋuti be: “Mi va be mia le Samsɔ̀n ne mia wɔ̀ kudo è sìgbè àlekè be wɔ̀ kudo mia tɔ̀woa nène.” 11Yudà ŋusù àkpe ètɔ̃ (300) yì Etàm be àkpãdoa mè eye wo gblɔ̃ na Samsɔ̀n be: “Jɔ̀gbèvuɛ̃ kɛ ye wò ja hɛ̃ va mia ji leke ò! Wò mu nya be Filistì gɔ̃mè ye mi lèa?” E ɖo e ŋuti na wo be: “Ènu kè wo wɔ̀ kudo mù a be tèpe kpò ye mù ɖo na wo.” 12Wo gblɔ̃ na ɛ̀ be: “Mi va be mia kplɔ̀ wò yì do àsi na Filistìtɔwo.” Samsɔ̀n gblɔ̃ na wo be: “Mì fìã na mù be mìa ŋutɔ mì mu la wù mù ò.” 13Wo ɖo e ŋuti be: “Aò! Mi ji kpò la le wò yì do àsi na Filistìtɔwo. Mi mu ɖo susu be mia wù wò ò.” E na ye wo bla ɛ̀ kudo èkà yeye èvè eye wo kplɔ̀ ɛ̀ to lè àkpãdoa mè. 14Wàlɛbɛ kè wo va ɖo Lehìa, Filistìtɔwo va dogò wo kudo jìjɔɛ. Tɔhonɔ̀ be gbɔ̃gbɔ̃a ɖɔ Samsɔ̀n; èkà kè wo sɔ bla àbɔ kudo àlɔ̀wo na ɛ̀a sò sìgbè àlekè èzò fìɔ̃na nìlɔ̃ be èkàa nène. 15Samsɔ̀n kpɔ èsɔ-àkɛtɛ ɖe kè wo wù mu dìdì òa be àglã lè funu. Eye kè be sɔ àglãa, e wù àmè àkpe ɖèka (1000) kudo è. 16Eye Samsɔ̀n do àpa gblɔ̃ be:
“Kudo èlã-glã ɖèkaa, mù crɔ̃ àmè fuu.
Kudo àglã ɖèkaa, mù wù àmè àkpe ɖèka.
17Kè be gblɔ̃ ènyà kèa vɔ̀a, e dà èlã-glã ŋùgbe ɖo àzɔ̀ge boo. Ènu kèa ŋuti ye wo yɔna funua be Ramàt-Lehì. 18Eye kè sìkɔ le tì ì kakaa, e fã yɔ Tɔhonɔ̀ gblɔ̃ be: “Oò Mawu, èwò ye na sumɔ̃vi wòa ɖùji leke. Fifìa, wò la na sìkɔ la tì mù kaka ye mù la jè èvo mà-sòtɔ kèawo si mèa?” 19Mawu fɛ̃ àkpãdo kè lè Lehìa eye èsì to na Samsɔ̀n be nù gbà kpɔ ŋusɛ̃. Wo ɖo nyikɔ na èsìdo ŋua be “Eìn-Hakorè àlo Korè be sìdo”. E lè Lehì kaka na egbè.
20Samsɔ̀n kplɔ̀ Izràɛlviwo lè Filistìtɔwo be hùenu èpè èwì sɔ̃ŋu.
Currently Selected:
Kòjoɖotɔwo 15: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
