Ezayà 53
53
1Àmè kɛ ye xɔ̀ ènu kè wo gblɔ̃ na mia ji sè ò?
Àmè kɛ ye do jèsi Tɔhonɔ̀ be ŋusɛ̃a ò?
2Tɔhonɔ̀ be sumɔ̃via le sĩ lè ŋùkɔ̀ na ɛ̀
sìgbè àti vi kè le mìɔ̃ gbãnàa,
sìgbè èkè kè le ɖè ènu to lè
ànyigbã pupui mèa nène.
Mu nya kpɔkpɔ kaka la va jro àmè cã ò.
Mu jè ɖèkajɛ ne mia le ŋùku ɖo e ŋuti ò.
3Àmè sia àmè crì yebe ènyàgbɔ kaka ɖè è ɖovò.
Vevesèse sɔ̃ŋu ye ɖɔ ɛ̀ eye àyàɖùɖu ma do è.
Àmè ɖekpe mu jrona la kpɔ ŋùkumè na ɛ̀ ò.
Mi crì ì eye mi mu kpɔna ɛ̀ ɖo ènu ɖekpe ji ò.
4E dro miabe èdɔ̀lelewo be àgbã,
e le dojì lè miabe àyàɖùɖuwo gɔ̃mè.
Eye mi susu be:
Mawu ŋutɔ ye le dɔ̃to na ɛ̀ nène;
Mawu ŋutɔ ye le pò è, gbà le do è ŋùkpɛ̃.
5Vɔ̀a, miabe àgɔ̀jèjewo ye do àbì e ŋuti,
miabe èvuɛ̃wo ye le tùkù ì.
Ètodɔ̃dɔ̃ kè la na mi ŋuti fàfaa, trɔ jè e ji.
Eye mi kpɔ gãgã to yebe àbì xɔ̀xɔwo mè.
6Mi nɔ̀ sìgbè ègbɔ bubuwo nène sã
eye àmè sia àmè sɔ yebe èmɔ̃ màsɔ èɖe lè emè na nɔ̀via.
Eye Tɔhonɔ̀ dro mia kpata be àgbã na ye ɖèka.
7Wo do àyà na ɛ̀, vɔ̀a, e bɔ̀bɔ̀ ye ɖokoe.
Mu kè ènu ò. E bɔ̀ ènu kpoo
sìgbè àlɛ̃ kè wo kplɔ̀ le yì wùwùgbea nène,
sìgbè ègbɔ kè wo le kpà èfuwo na a nène.
E bɔ̀ ènu eye mu kè fĩ ò.
8Wo le è, ɖokòjo na ɛ̀ eye wo wù ì.
Vɔ̀a àmè kɛ kãma na ènu kè jɔ̀ ɖo e jia ò?
Ɛ̃ɛ, woa ɖè e jo lè àgbèagbeawo dòmè.
Yebe dùkɔ̃a be àgɔ̀jèjewo ŋuti ye wo pò è wù ɖo.
9Wo yì wù ì ɖo àmè bàɖàwo dòmè,
yebe èyɔ̀do nɔ̀ ècitɔwo be èyɔ̀dowo dòmè.
Co mu wɔ̀ ènu drã ɖe, eye mu blè àmè ɖe cã ò.
10E jè ŋùmè na Tɔhonɔ̀ be yèa sɔ àyàɖùɖu sɔ pò è.
E sɔ yebe àgbè sɔ savɔ ɖo èvuɛ̃ ta,
ne bèa kpɔ jìjimèviwo eye bèa nɔ̀ àgbè dìdì.
Nène a ye Tɔhonɔ̀ be ɖoɖo a la zɔ̃ sùa yeŋu.
11Kè e sɔ ye ɖokoe sɔ tu èfɛ̃ lè àyàɖùɖuwo mèa,
e la kpɔ àgbèa be kɔ̀kɔ̀ɛ eye ènu sia ènu la sù e si.
Àpe sumɔ̃vi kè lè jɔ̀jɔɛa, la na àmè sùgbɔ la nɔ̀ jɔ̀jɔɛ
ɖo e dro woabe èvuɛ̃ be àgbãwo.
12Ekèa ŋuti mù la na ɛ̀ tèpe lè àmègãwo dòmè.
E la ma àmɔ̀nyɔ̀nuwo kudo ŋusɛ̃tɔwo.
Nyàwo, e lɔ̃ ɖiɖi ye ɖokoe yì èku mè ke
eye wo hlɛ̃ ɛ̀ ɖo èvuɛ̃wɔ̀tɔwo dòmè.
Ɖo e dro àmè fuwo be vuɛ̃wo be àgbã
eye e lɔ̃ sɔ ye ɖokoe na ɖo àgɔ̀jètɔwo tèpe.
Mina Bible © Bible Society of Togo, 2014.