Ezayà 22
22
Ènyàgblɔ̃ɖɛ so Yèruzàlɛm ŋuti
1Ènyà so ŋùtègã be bàlì mè ŋuti.
Yèruzàlɛmtɔwo, nukɛ ŋuti
mìa kpata mì yì lia èxɔ̀wo ta ɖo ò?
2Nukɛ ŋuti ye hũnyà-hũnyà lè èdùa mè
eye àmè sia àmè ci jàjàjà sìgbè
èdù kè le ɖù àzã nène ò?
Àpo àmè kèwo kua, mu yì ku ci àhùagbe ji ò,
wo mu ku lè àvũwɔ̀wɔ mè ò.
3Àpo àhùaŋùkɔ̀nɔ̀tɔwo si ɖo èdu.
Àŋùtidàtɔwo le wo àhùale.
Kɛ̃tɔwo le àmè kèwo keŋu wo kpɔa àhùale.
Àmè kèwo sia cã.
4Ekèa ŋuti mù le gblɔ̃ na mì be:
“Mì mu gbà kè ènu do e mè na mù ò.
Mì tàsi mù ne ma fã àvi kudo hèhèdodo.
Wo crɔ̃ dùkɔ̃ nyèa,
vɔ̀ mì mu gbà ɖo àsi àkɔ na mù ò.
5Nyàwo egbèa, Mawu ŋusɛ̃ kpatatɔ,
Tɔhonɔ̀ sɔ hũnyà-hũnyà,
àmè jiɖùɖu kudo vɔ̃vɔ̃ sɔ do mia dòmè.”
Lè ŋùtègã be bàlìa mèa, èglì gã ɖe mù,
àbòbo sɔ ji àlɔ̀dowo ɖì lelele yì ètowo ji.
6Elàm be àhùakɔ̃wo hɛ̃ àŋùti kudo àŋùdàtiwo.
Àhùakɔ̃ kèwo nɔ̀nà àhùakèkeviwo mè,
àhùakɔ̃ do èsɔwo cã lè.
Kirò be àhùawɔ̀tɔwo jrà woabe àkpoxɔ̀nuwo ɖo.
7Yèruzàlɛm, àpo bàlì nyuɛ̃wo ɖɔ kudo àhùakèkeviwo,
eye àhùa-sɔdotɔwo sɔ̀gbè lè àgbowo ji.
8Yudà be fìɔdua mu gbà ɖo xɔ̀namètɔ ò.
Gbè ŋua gbèa, mì trɔ ŋùku kpɔ
àhùawɔ̀nu kèwo lè àve-xɔa mèa.
9Eye mì kpɔ David be èdùa
be èkpa ŋɔŋɔwo kpata trɔ do.
Mì kù èsì dà ɖɛ zãŋù sɔ wla.
10Mì yì hlɛ̃ Yèruzàlɛm be àxuewo,
mì gbã èɖewo ne àgbògbòa bèa teŋu ɖo ŋusɛ̃.
11Mì ɖè èsìdo ɖo èglìkpo èvèawo
dòmè na èsìdo xoxoa be èsìa.
Vɔ̀ mì mu trɔ kpɔ àmè kè
ɖo ŋusɛ̃ ɖo ènu kèawo kpata ji ò,
mì mu kpɔ àmè kè le
jrà ènu kèawo ɖo so xoxo ò.
12Tɔhonɔ̀ Mawu ŋusɛ̃ kpatatɔ le biɔ
so mìa si be mìa fã àvi gbè ŋua gbè,
mìa do àpa, mìa plɔ èta
eye mìa do èfũlòvɔwo.
13Co àmèwo le kpɔ jìjɔɛ ku àyosòso.
Wo wù ènyìwo, wo wù ègbɔwo,
wo le ɖù èlã gbà le nù vɛ̃ fàa.
Mì gblɔ̃ be: “Mì na mia ɖù,
mia nù ɖo èsɔ̀a, mi la va ku.”
14Vɔ̀ Tɔhonɔ̀ ŋusɛ̃ kpatatɔa na mù sè ènyà kèa be:
“Gbèɖe! Wo mu la sɔ àgɔ̀jèje kèa sɔ kè mì kpɔ ò.”
Tɔhonɔ̀, Mawu ŋusɛ̃ kpatatɔa ye gblɔ̃ ɛ̀.
So cãmì ɖìnyi ɖe ŋuti
15Tɔhonɔ̀ Mawu ŋusɛ̃ kpatatɔa do ègbè kèa àsi na mù be:
“So ne wòa yì dùjikpɔtɔ Sɛbnà kè le kpɔ èfìɔsa jia gbɔ,
eye gblɔ̃ na ɛ̀ be:
16Wò na wo ɖè èyɔ̀do na wò ɖo fikè,
wo kù ì kaka va èji ke,
wò ɖè jɛ̃gbɔ̃pe ɖo àkpã mè na ɖokoe wò.
Vɔ̀a, nukɛ ye nyi tɔ̀ wò lè fikèa ò?
Fi yè tɔ ye wò nyia?
17Wò susu be yè ɖo ŋusɛ̃.
Nyàwo Mawu la bla wò sɔ dàŋùgbe ɖo àzɔ̀ge boo,
18eye wò la mlì lè funu sìgbè
ènu mìmli nène lè èdù gã ɖe mè.
Funu ye wò la ku lè, lè àhùakèkevi
kèwo ɖènà gogo wò fiɔ co gbà
ɖènà èfìɔ be ŋùkpɛ̃ fiɔa dòmè.
19Tɔhonɔ̀ gblɔ̃ be:
Mù la nyà wò jo lè tèpe wòa,
mù la xɔ̀ funua lè àsi wò.
20Eye gbè ŋua gbèa,
mù la yɔ sumɔ̃vi nyè Èliakim,
Hilkìa be èvia va.
21Mù la sɔ àpo àwùwo do na ɛ̀,
mù la bla ègoji na ɛ̀ kudo àpo ègojiblanu,
eye mù la sɔ àpo ŋusɛ̃a sɔ na ɛ̀.
E la nyi ètɔ na Yèruzàlɛm
kudo Yudà be fìɔdua kpata.
22Mù la sɔ David be àxuea be sãfe do àsi na ɛ̀.
Ne e hũ ìa, àmè ɖe mu la teŋu tu ì ò.
Eye ne e tu ìa, àmè ɖe mu la teŋu hũ ì ò.
23Mù la ɖì ì sìgbè àti ènu piɖoe nène ɖo tèpe tɔ̀hɛ.
E la ɖè ètɔa be àxuedo a be gogo fiɔ.”
24Yebe xòmètɔwo, kèwo lè àzɔ̀ge kudo kpòepeawo la bɔ̀ ɖo e ŋuti, sìgbè lekè wo klɔna àgbã sɔ kùnà èso kɔ̀a nène, so àgbã viwo ji kaka kɔ̀ ɖo gãwo ji. Wo la kpɛ̃ ŋutɔ! 25Gbè ŋua gbèa, Tɔhonɔ̀ ŋusɛ̃ kpatatɔa ye gblɔ̃ ɛ̀ be: àti ènu piɖoea la ŋɛ̃. To e gbɔ be wo ɖì ì ɖo tèpe tɔ̀hɛ coa, e la ŋɛ̃ eye e la mù. Eŋuã àgbã kè lè e ŋutia cã la crɔ̃.” Tɔhonɔ̀ ye gblɔ̃ ɛ̀.
Mina Bible © Bible Society of Togo, 2014.