Ezayà 20
20
Ezayà gblɔ̃ ènyà so Ejiptè kudo Ètiopìa ŋuti
1Èpè kè mè ye Aràm be èfìɔ Sargɔ̀n, dɔ̃ yebe àhùaga ɖoɖa Filistì nyigbã ji eye be yì xa Asdɔ̀d be èdùa; e ɖù e ji eye be xɔ̀ èdùa.
2Èpè ètɔ̃ jè ŋùkɔ̀a, Tɔhonɔ̀ gblɔ̃ na Amɔ̀t be vi Ezayà be: “Ɖè èfũlòvɔ kè lè àlì na wòa ɖɛ eye wòa ɖè àfɔ̀kpa wòawo cã.” Ezayà wɔ̀ ɖo ègbè do àsia ji eye be ɖìsà lè èdùa mè àma-àma kudo àfɔ̀ gbalo.
Èpè kè mè ye Asdɔ̀d ci àsia, 3Tɔhonɔ̀ gblɔ̃ to Ezayà ji be: “Èpè ètɔ̃ sɔ̃ŋu ye nyi ekèa ye àpe sumɔ̃vi Ezayà le ɖìsà àma-àma kudo àfɔ̀ gbalo. E le nyi jèsìdo kudo ètoklã na Ejiptè kudo Ètiopìa. 4Aràm be èfìɔa la kplɔ̀ Ejiptètɔwo àhùale eye e la kplɔ̀ Ètiopìatɔwo yì àmèjro nyigbã ji. E la kplɔ̀ ɖèkajɛ kudo àmè sĩsĩwo àma-àma, kàmègoe tètè mà do eye wo la nɔ̀ àfɔ̀ gbalo. E la nyi ŋùkpɛ̃nu ɖe na Ejiptètɔwo! 5Àmè kèwo donajì ɖo Ètiopìa ŋuti àlo kèwo sɔna Ejiptè sɔ kona ànyaa, la hũhũ eye wo la ɖɔ kudo ŋùkpɛ̃!”
6Gà ŋua mèa, àmè kèwo lè dòdòmè be àpùa ŋuti tɔwo kpata la gblɔ̃ be: “Mì kpɔ ènu kè jɔ̀ ɖo àmè kèwo ŋuti mi donajì ɖo sãa jia ɖa! Mi ji la si yì woa gbɔ, yì ji àlɔ̀do eye mia kpɔ vòvo lè Àsirìa be èfìɔa si. Eŋuã, leke mi la wɔ̀ fifì sɔ kpɔ vòvo ò?”
Mina Bible © Bible Society of Togo, 2014.