Òzeà 2
2
Yizrɛ̀l be ŋùkèkè gãa
1Co sɔ̀sɔɛɖea, Izràɛlviwo la sùgbɔ
sìgbè àpùtakɔwo nène.
Wo mu la teŋu nya woabe hɛ̃hlɛ̃ mè ò.
Mawu mu la to na wo be:
“Mì mu nyi àpe dùkɔ̃ ke ò.”
Lè funua, e la to na wo be:
“Mawu àgbèagbea be viwo.”
2Yudàviwo ku Izràɛlviwo la bɔ̀ ɖodu
sɔ cã ŋùkɔ̀nɔ̀tɔ yeye na woa ɖokoe.
Wo la trɔ ɖo ŋusɛ̃ ɖo èdùa ji,
ekèa la nyi ŋùkèkè gã ɖe na Yizrɛ̀l.
3Mì gblɔ̃ na mìa nɔ̀vi ŋusùwo be 'Dùkɔ̃ nyè',
eye na mìa nɔ̀vi nyɔ̃nùwo be 'Lɔ̃lɔ̃tɔ nyuɛ̃'.
Izràɛl, èsrɔ̃tɔ mà-nɔ̀gbèji
4Tɔhonɔ̀ gblɔ̃ be:
“Mì hɛ̃ ènyà kudo mìa nɔ̀,
ɛ̃ɛ mì ɖo kòjo na ɛ̀.
Nyàwo, mu gbà nyi èsrɔ̃ nyè ò,
eye nyè mu gbà nyi yebe àsu cã ò.
Ne tutu àhasìwɔ̀nuwo lè yebe ŋùkumè!
Ne ɖè àhasìtɔ be jèsìdoa lè yebe ànɔwo be dòdòmè!
5Mu nyi nène òa, mù la ɖè è ɖo àma,
sìgbè àlekè ènɔa jìa nène.
Mù la na Izràɛl be ànyigbã la trɔ zũ zògbè
mù la trɔ ɛ̀ wɔ̀ ànyigbã pupui.
Mù la na èsìkɔ la tì ì.
6Nyè mu la kpɔ ɖo e mè na wo ò
ɖo wo nyi àhasìviwo.
7Woa nɔ̀ wɔ̀nà àhasì,
àmè kè jì woa ɖɔ kudo ŋùkpɛ̃.
Ɛ̃ɛ e gblɔ̃nà be:
“Mù la zrò kpla àzìãvi nyè
kèwo ye nana mù nuɖùɖu ku èsìa.
Wo mu nana àwù zɛ̃nà lè ŋuti nyè ò,
àmì ku vɛ̃ mu dɛ̃ mù kpɔ ò.”
8Yè ŋuti kpɔɖa, mù la tu yebe èmɔ̃wo kudo àŋùjawo,
mù la tɔ̃kpa ɖo ji sɔ xe èmɔ̃ na ɛ̀.
9E kplɔ̀ yebe àzìãviwo do,
vɔ̀ mu la teŋu xe wo ò.
E la ji wo vɔ̀ mu la kè ɖo woa ŋuti ò.
Eye e la gblɔ̃ lè yeɖokoe mè be:
“Mù la trɔ yì èsrɔ̃ nyè cucugbã tɔ̀a gbɔ,
ɖo mù vò sãa, sɔ wu fifì.”
10“Mu nya ɛ̀ be ènyè ye nana
èlù, vɛ̃ kudo àmì ò;
be ènyè ye nana sìka ku klòsalò
kèwo be zã sɔ sumɔ vòdu Baal va yìa.
11Ekèa ŋuti ye, mù la trɔ xɔ̀ èlù nyèa lè yebe hùenu
vɛ̃ nyèa lè vɛ̃fiɔ̃fiɔ̃ be gàmè.
Mù la trɔ xɔ̀ àvɔ ku àwù kèwo be sɔ wla yebe àmaa,
mù la xɔ̀ wo kpata lè e si.
12Ɛ̃ɛ, mù la ɖè è ɖo àma
lè yebe àzìãviawo be ŋùkumè,
eye àmè ɖekpe mu lè la xɔ̀ na ɛ̀ ò.
13Mù la ɖè yebe jìjɔɛ donuwo kpata jo,
yebe èmɔ̃zɔ̃zɔ̃ kudo àzãɖùɖuwo
yebe jɛ̃gbɔ̃zã kudo àzã buwo kpata.
14Mù la kãkã yebe vɛ̃-gble kudo vòti,
kèwo ŋuti be gblɔ̃nà so be:
“Wo nyi fɛ̃tu kè àzìãvi nyèwo na mù a.”
Mù la sɔ wo wɔ̀ ègbemè ɖèɖe
àfi kè ègbemèlãwo la kpɔ nuɖùɖu lèa.
15Mù la dɔ̃to na ɛ̀ sɔ kù ɖo
ŋùkèkè kè be zã sɔ sumɔ Baal kudo nɔ̀viawo.
E wɔ̀nà vɔsa na wo.
E dona yebe àlɔ̀gàvi kudo èwlɔwo sɔ yìnà yebe àzìãviwo gbɔ.
Ènyè ya, e ŋlɔ̀be mù,
Tɔhonɔ̀ ye gblɔ̃ ɛ̀.
16Eŋuã ŋutia, kpɔɖa, mù la blè è ɖo ŋuti
la kplɔ̀ ɛ̀ yì zògbè ji eye mù la pò nupo na yebe èjì.
17Lè funua, mù la trɔ sɔ yebe vɛ̃-gblewo na ɛ̀;
mù la trɔ Akɔ̀r be bàlì kè nyi gbledo be bàlìa
sɔ wɔ̀ ŋùɖo be àgbo na ɛ̀.
Eye e la kplɔ̀ mù do sìgbè lè yebe tùgbɛ̀jɛ mè nène,
sìgbè wàlɛbɛ kè wo to lè Ejiptè a nène.”
Àvũlele be ŋùkèkè
18Tɔhonɔ̀ gblɔ̃ gbè ŋua gbè be:
“E la yɔ mù be “Àsu nyè” àlo “èsrɔ̃ nyè”
eye mu gbà nyi “vòdu nyè” àlo “Àpetɔ nyè” ò.
19Mù la ɖè vòdu Baal be nyikɔ jo lè ènugbɔ na ɛ̀
kudo vòdu kpɔ̀tɛawo kpata,
wo mu la gbà yɔ èɖe be nyikɔ ke ò.
20Nène a ye mù la ɖùzò tɔ̀xɛ kudo dùkɔ̃ nyèa
ku ègbemèlãwo, àyamè xèviwo
kudo èlãklìviwo lè ànyigbã ji.
Mù la gbã, gbà ŋɛ̃ àŋùti ku èwi kudo èlãnuwo
kpata kɔ̀ ɖo èdùa godo,
eye mù la na jɛ̃gbɔ̃ fɛ̀ɖɛ̀ dùkɔ̃ nyèa.
21Eye mù la sɔ wò àgɔ̀ kaka sɔyì.
Mù la nyi àpo àgɔ̀sɔ to jɔ̀jɔɛ sòso,
màje kudo ŋuzĩzĩkuku mè.
22Ɛ̃ɛ, mù la sɔ wò àgɔ̀ lè nyàwo toto mè
eye wò la nya Tɔhonɔ̀.
23Gbè ŋua gbèa, Tɔhonɔ̀ ye gblɔ̃ ɛ̀!
Mù la ɖo jiŋùkusi be biɔbiɔwo ŋuti
eye e cã la na ɖoŋuti ànyigbã tɔ̀awo.
24Ànyigbã cã la na ɖoŋuti èlù,
vɛ̃ kudo àmì yeye;
eye ekèa kpata la na ɖoŋuti
Yìzrɛl be kuefãa.
25Mù la do Yìzrɛl na ɖokoe nyè lè èdùa mè
eye mù la kpɔɖomè na 'Lɔ̃lɔ̃ mà-sù',
mù la gblɔ̃ na Àmèjro-dùa be:
'Dùkɔ̃ nyè' wò nyi,
eye e la ɖo e ŋuti be: 'Mawu nyè'”
Mina Bible © Bible Society of Togo, 2014.