Toto jo 2
2
Mosè be jìji ku yebe ɖèvi mè nɔ̀nɔ
1Ŋusù ɖe kè so Levì be kɔ̀ta mèa, ɖè nyɔ̃nù kè so kɔ̀ta ŋua ke mè. 2Nyɔ̃nùa fɔ èfu eye be jì ŋusùvi; e kpɔ be ɖèvia jè ɖèkajɛ ŋutɔ, eye be wla ɛ̀, wètri ètɔ̃. 3Kè mu la gbà teŋu wla ɛ̀, dìdiɖe kpe ò a, nyɔ̃nùa sɔ àjàfi kè wo sɔ keti lɔ̃a, sì àmì do è, eye be tre è ku àŋɔ̀. E sɔ ɖèvia mlɔ̃ e mè, kɔ ɛ̀, yì dà ɖo keti kèwo mìɔ̃ ɖo ètɔ̀gãa toawo mè. 4Ɖèvia be dàda va yì nɔ̀ àzɔ̀ge, ne bèa kpɔ ènu kè la va jɔ̀ ɖo ɖèvia jia. 5E va jɔ̀ be Ejiptè be èfìɔ, Faraɔ̀n be nyɔ̃nùvi va èsì lè gbe lè ètɔ̀a to. Wàlɛbɛ kè ye ku yebe nyɔ̃nù ŋutimèawo le ɖìsà lè ètɔ̀a toa, Faraɔ̀n be èvia kpɔ àjàfia lè ketiawo dòmè. E dɔ̃ yebe sumɔ̃vi nyɔ̃nùawo dòmètɔ ɖèka, be yì sɔ ɛ̀ va. 6E hũ àjàfia, eye be kpɔ ŋusùvi vifɛ̃ ɖe lè fã àvi, lè e mè. E wɔ̀ ŋuzĩzĩ na ɛ̀, eye be gblɔ̃ be: “Izràɛlviwo be èvi ye be nyi.” 7Ɖèvia be dàdaa biɔ Faraɔ̀n be èvia sè be: “Wò ji be ma yì yɔ èvijikpɔtɔ ɖe so Izràɛl be nyɔ̃nùwo dòmè vaa? E la teŋu nɔ na ànɔ ɖèvia na wò.” 8Faraɔ̀n be èvia ɖo e ŋuti be: “Yì!” Nyɔ̃nùvia yì yɔ ɖèvia be ènɔ̀ va. 9Faraɔ̀n be nyɔ̃nùvia gblɔ̃ na ɛ̀ be: “Xɔ̀ ɖèvi kèa yì, ne wòa nɔ na ɛ̀ ànɔ na mù. Nyè yaa, mù la nɔ tu èfɛ̃ na wò.” Nyɔ̃nùa xɔ̀ ɖèvia, eye be nana ɛ̀ ànɔ. 10Ekè ɖèvia sĩa, e kplɔ̀ ɛ̀ va na Faraɔ̀n be èvia. Faraɔ̀n be nyɔ̃nùvia sɔ ɛ̀ wɔ̀ èvi, eye be ɖo nyikɔ na ɛ̀ be Mosè, eye e gblɔ̃ be: “Ètɔ̀ mè ye mù ɖè è so.” 11Wàlɛbɛ ŋua, kè Mosè sĩa, e yì nɔ̀via Izràɛlviwo gbɔ, gbè ɖèka, eye be kpɔ àkpasɛ̃sɛ̃dɔ kè wo wɔ̀nàa. E kpɔ Ejiptèvi ɖe le pò Izràɛlvi, nɔ̀via ɖe. 12Kè Mosè sãŋùku eye mu kpɔ àmè ɖe òa, e pò Ejiptèvia wù, eye be sɔ àmèkpòtia wla ɖo èkɔ mè. 13Kè èŋù kèa, e gbà yì, eye be kpɔ Hebrùvi ɖèɖe èvè, wo le wɔ̀ àvũ. E gblɔ̃ na àmè kè jè àgɔ̀a be: “Nukɛ ŋuti wò le pò nɔ̀vi wòa ɖo ò?” 14Ŋusùa ɖo e ŋuti na ɛ̀ be: “Àmè kɛ ye ɖo wò èga ku kòjoɖotɔ ɖo mia nu ò? Wò ji be yèa wù nyè cã, sìgbè lekè wò wù Ejiptètɔa nènea?” Mosè tɔ vɔ̃vɔ̃, eye be gblɔ̃ be: “Eŋuã, àmèwo nya ènyàa!” 15Ekè Faraɔ̀n sè ènyàa, e ji be yèa wù Mosè. Vɔ̀a Mosè si to lè àxue mè. E yì zɛ̃ Madìan be èdù mè. Funua, e va yì nɔ̀ ànyi ɖo vudo to. 16Nyɔ̃nùvi adrɛ̃ lè Madìan be hũbonɔa si. Wo va èsì kù gbe ɖo èsìnùnuwo mè, ne woa na èsì woa tɔ be èlãhaa. 17Èlãkplɔ̀tɔ buwo va nyà wo jo. Mosè sitè, xɔ̀ ènyà ɖo woa ta, eye be na èsì woabe èlãwo. 18Wo trɔ gbɔ̀ va Reùɛl, woa tɔa gbɔ. E biɔ wo sè be: “Àlekè wɔ̀ ye mì gbɔ̀ egbèa kaba lekea ò?” 19Wo ɖo e ŋuti na ɛ̀ be: “Ejiptètɔ ɖe xɔ̀ mi lè èlãkplɔ̀tɔawo si; ye ŋutɔ cã ye ku èsìa na mi, eye be na èsì èlãhaa be nù.” 20Reùɛl biɔ èvia nyɔ̃nùawo be: “Vɔ̀a, fikɛ ŋusùa ɖe? Nukɛ ŋuti ye mì gble è ɖo funua ɖo ò? Mì yì yɔ ɛ̀ va! Ne va ɖùnu!” 21Eye Mosè lɔ̃ be yèa va zɛ̃ ŋusù kèa gbɔ. Reùɛl sɔ èvia Sèforà na Mosè be ɖè. 22Sèforà jì ŋusùvi, eye Mosè ɖo nyikɔ na ɛ̀ be Gɛrsɔ̀m, ekè gɔ̃mè ye nyi 'Àmè kè si va fikèa', ɖo e gblɔ̃ be: “Mù si va àmèjro-nyigbã ji!”
Tɔhonɔ̀ yɔ Mosè, dɔ̃ ɛ̀
23Kè hùenuwo va le yìa, Ejiptè be èfìɔa va ku. Izràɛl be èviwo le ŋɛ̃ lè woabe èdɔ sɛ̃sɛ̃ wɔ̀wɔwo mè, ye wo le na àle. Woabe veve sèse lè àkpasɛ̃sɛ̃ be èdɔwɔ̀wɔ mè be àpadodowo va ɖo Mawu gbɔ. 24Mawu ɖo èto woabe àlenana eye be ɖo ŋùku èzò kè be ɖù ku Abràham, Izàk kudo Yakɔb ji. 25Mawu kpɔ Izràɛlviwo be àyàɖùɖu eye be ku ŋuzĩzĩ na wo.
Mina Bible © Bible Society of Togo, 2014.