Ɛstà-G 9
9
Yudàviwo gũ èta na woabe kɛ̃tɔwo
1 Lè ekèa mèa, lè wètri woèvègɔ̃ kè tɔ̀ Àdar be ŋùkèkè woètɔ̃gɔ̃a gbèa, xoma kèwo èfìɔ ŋlɔ̀a, va ɖo woabe tèpewo. 2 Gbè ŋua gbè kea, wo crɔ̃ Yudàviwo be èfũtɔwo. Àmè ɖekpe mu teŋu kpe àkɔ ku wo ò. 3 Wɔ̀widùnunɔ̀tɔwo, fìɔ-xomè be ètatɔwo ku èfìɔa be xomaŋlɔ̀tɔwo, ɖo bùbu na Yudàviwo; ɖo Màrdokìa be vɔ̃vɔ̃a ŋuti. 4 Èfìɔa be ègbèɖèɖea wɔ̀ be yebe nyiɖìɖia kãkã ɖo fìɔdu bliboa mè. 5 [Ɛstà be xomaa mu ɖo hɛ̃hlɛ̃ àtɔ̃gɔ̃a (5) lè Grikgbe mè ò.] 6 Lè Suzè be èdù gãa mèa Yudàviwo wù ŋusù àmè èkà woèvè takpo (500) 7 kaka jè Fàrsanestaìn, Dɛlfɔ̀n, Fasgà, 8 Fàrdatà, Bàreà, Sàrbakà, 9 Màrmazìm, Arufayìɔs, Arsayìɔs ku Zàbutayìɔs, 10 Hamàn kè tɔ̀ Mɛ̀wɔ̀glòjòa, Yudàviwo be kɛ̃tɔa, Hàmadatɔ̀s be èvia be èvi èwoawo. E yomèa, wo hlà àmɔnyɔnuwo. 11 Gbè ŋua gbè kea, wo yɔ àmè nènè kèwo wo wù lè Suzèa be èdù gã mè be hɛ̃hlɛ̃ mè na èfìɔa. 12 Kpòa èfìɔa gblɔ̃ na Ɛstà be: “Yudàviwo wù ŋusù èkà woèvè takpo (500) lè Suzè be èdù gãa mè. Lè àpo kpɔkpɔ mèa, àleke ye wo wɔ̀ lè nutowo mè ò? Eŋua nukɛ wò la gbà biɔ ò? Wò la kpɔ ekèa cã xɔ̀.” 13 Ɛstà ɖoeŋuti na èfìɔa be: “Wo ne na Yudàviwo be woa wɔ̀ nèneake èsɔ̀ kè gbãnà ne woa sɔ Hamàn be èvi èwoawo kù sekple ɖo àti ŋuti.” 14 E ɖè èmɔ be ne nyi nène eye e ŋlɔ̀ èse ɖo èdùa mè ɖo Yudàviwo ŋuti be wo ne sɔ Hamàn be èviawo kù sekple ɖo àti ŋuti. 15 Ye ŋutia Suzè be Yudàviwo bɔ̀ lè Àdar be ŋùkèkè woènɛ̀gɔ̃a gbè; wo wù ŋusù èkà adrɛ̃ takpo (300), mà hlà àmɔnyɔnuawo.
16 Izràɛlvi kèwo lè èfìɔdua be àkpa kpɔ̀tɛawo cã bɔ̀, sɔ hlùɛ̃ woa nɔ̀nɔwo. Eye wo va kpɔ vòvofɛ̀ɖɛ̀a xɔ̀ lè woabe èfũtɔwo simè; ɖoa wo tùkù àgbètɔ hotu adrɛ̃ èkà wìvɔàtɔ̃ (15000) lè Àdar be ŋùkèkè woètɔ̃gɔ̃a gbè mà hlà àmɔnyɔnuawo. 17 Ye ŋutia wo gbɔ̃jɛ̃ lè wètri ŋua ke be ŋùkèkè woènègɔ̃a gbè eye wo sɔ jɛ̃gbɔ̃gbɔ̃ be ŋùkèkè ŋua sɔ nɔ̀ jìjɔɛ ku yɛyìwuwu ji, 18 Izràɛlvi kèwo biɔhlɔ̃ ɖo woabe kɛ̃tɔwo ji lè wètria be ŋùkèkè woènègɔ̃a gbè jɛ̃gbɔ̃gbɔ̃ mà kpɔa, wo sɔ ŋùkèkè woeàtɔ̃gɔ̃a sɔ gbɔ̃jɛ̃. Eye wo ɖù àzã ku jìjɔɛ lè ŋùkèkè ŋua ji. 19 Ekèa ŋuti ye Yudàvi kèwo kãkã ɖo èdù-nyigbãwo kpata ji lè àmèjrowo dòmèa, ɖùnà àzã lè Àdar be ŋùkèkè woènègɔ̃a gbè. Wo kpɔna jìjɔɛ ŋutɔ lè àzã ŋua ji eye wo nana woa nɔ̀nɔwo ènunanawo. Vɔ̀a èdù gãgã kèwo trɔ do woa mèviwo cã gbɔ̃nà jɛ̃ lè Àdar be ŋùkèkè woeàtɔ̃gɔ̃a gbè. Woa cã ɖùnà àzã, gbà dona yɛyì woa nɔ̀nɔwo ŋuti.
20 Màrdokìa ŋlɔ̀ ènu kèawo ɖo xoma ɖèka kè be ɖo ɖoɖa Yudàvi kèwo lè Artazɛ̀rzɛs be fìɔdua mè, ɖoɖa àmè kèwo lè àzɔ̀gea gbàkudo àmè kèwo lè kpòepea cã, 21 sɔ ɖo ŋùkèkè nyuɛ̃ kèawo, Àdar be ŋùkèkè woènègɔ̃a ku woeàtɔ̃gɔ̃a, ɖo ànyi, 22 ɖoa ŋùkèkè ŋuawo ji ye Yudàviwo va kpɔ vòvofɛ̀ɖɛ̀a xɔ̀ lè woabe kɛ̃tɔwo simè. Nèneake wo gbà sɔ wètri kèa ɖo ànyi: e ye mè ye wo to ŋuzĩzĩ mè yì ɖo jìjɔɛ mè, jo lè àyàɖùɖu mè yì ɖo ŋùkèkè nyuɛ̃ mè; wo la nɔ ɖù wètri bliboa sìgbè èsrɔ̃ɖèzã ku yɛyìwuwu be ŋùkèkè nène, la nɔ sɔ nuɖùɖuwo ɖoɖa èxlɔ̃wo ku wɔ̀amènɔ̀wo.
23 Yudàviwo xɔ̀ ègbè lè ènu kè Màrdokìa ŋlɔ̀ ɖɛ na woa ji: 24 àlekè Màkedonìa-tɔ Hamàn, Hàmadatɔ̀s be èvia sɔ àhùa kpe wo ɖoa, àlekè e do èdùsea eye e dà àkɔ̀ la sɔ crɔ̃ wo ɖoa, 25 àlekè e va èfìɔa gbɔ, gblɔ̃ na ɛ̀ be ne na woa sɔ Màrdokìa kù sekple ɖo àti ŋuti ɖoa; gãke jɔ̀gbèvuɛ̃ kèwo kpata e ɖo be yè la hɛ̃ va Yudàviwo jia, wo va jè ye ŋutɔ ji eye àmè kèa ku èviawo, wo sɔ wo kù sekple ɖo àti ŋuti. 26 Ye ŋuti ye ŋùkèkè ŋuawo xɔ̀ nyikɔ be “Àkɔ̀dàdawo àlo Pùrim”: ɖo àkɔ̀ kèwo wo dàa ŋuti, ekèa ŋuti wo tɔ̀nà nyikɔ lè woade gbe mè be: Àkɔ̀dàdawo ɖoa; ekè xoma kèa mè be ènyàtiwo lè nènea, sɔ kù ɖo ènu kèwo kpata wo va kpe gbàkudo ènu blibo kè jɔ̀ ɖo woa jia ŋuti. 27 Màrdokìa sɔ ɛ̀ wɔ̀ ɖoɖo ɖèka eye Yudàviwo xɔ̀ ègbè be yèwo ŋutɔ ku yèwo be jìjimèviwo kudo èxlɔ̃wo, lɔ̃ be yèwo mu la wɔ̀ ènu ɖe tovò na ekèa ò. Ŋùkèkè ŋuawo la nyi ŋùɖo zɔ̃sù so àkɔ ɖe yì àkɔ bu, lè èdù sia èdù, àxue sia àxue, èdù-nyigbã ɖe sia ɖe mè. 28 Wo ɖo la ɖù Àkɔ̀dàdawo be ŋùkèkè kèawo be àzã lè hùenuwo kpata mè. Vevetɔa, yebe ŋùɖo mu la gbà bu lè jìjimè kè la ɖɛ va mè ò!
29 Ɛstà èfìɔsrɔ̃a, Aminadàb be èvia ku Màrdokìa Yudàvia, ŋlɔ̀ woabe wɔ̀nawo ɖɛ gbàkudo Àkɔ̀dàdawo be xoma be ɖasea. 30[Ɛstà be xomaa mu ɖo hɛ̃hlɛ̃ ègbãgɔ̃a (30) lè Grikgbe mè ò.] 31 Yudàvi Màrdokìa ku Ɛstà èfìɔsrɔ̃a wɔ̀ ɖoɖo ɖèka ɖo woa ŋutɔ nu lè ènu kèwo kã woa gomèa. Woa ŋutɔ ɖo la kpɔ gomè lè ɖoɖoa mè. 32 To Ɛstà be ègbè jia, wo sɔ àzã kèa wɔ̀ ɖoɖo tɛ̀gbɛ̀dò; wo ŋlɔ̀ ɛ̀ ɖo ŋùɖo be xomaa mè.
Currently Selected:
Ɛstà-G 9: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.