Efesòtɔwo 2
2
So èku mè yì àgbè mè
1Sãa, mì ku lè mìabe àgɔ̀jèje kudo ènuvuɛ̃ wɔ̀wɔ mè, vɔ̀ fifìa wo gbɔ̀ mì àgbè. 2Lè hùe ŋua nua, mì zãna àgbèa sìgbè xixe kèa mè tɔwo nène. Mì sènà ètonu na gbɔ̃gbɔ̃ vuɛ̃wo be èfìɔ. E ye nyi gbɔ̃gbɔ̃ kè le wɔ̀ èdɔ fifì, lè àmè kèwo gbe be yèwo mu la sè ètonu na Mawu ò a mè. 3Mia kpata mi nɔ̀ sìgbè woawo nène sã. Mi zɔ̃nà ɖo èjro kèwo hɔ̃nà lè miabe ŋutilã mèa nu, eye mi wɔ̀nà ènu kè miabe ŋutilã kudo susu ji be mia wɔ̀a. Ekèa ŋuti ye Mawu do àdɔ̀mèze ɖo mia ŋuti, sìgbè àlekè be do è ɖo àmè ŋuawo ŋutia nène.
4Vɔ̀a, Mawu be ŋuzĩzĩkuku na àmè sùgbɔ, kudo lɔ̃lɔ̃ kè be ɖo na mia ŋuti ye, 5wàlɛbɛ kè mi ku lè gbɔ̃gbɔ̃ mè ɖo miabe àgɔ̀jèjewo ŋutia, e gbɔ̀ mi àgbè kudo Kristò. Đo, Mawu be màjea mè ye mì kpɔ hlùɛ̃gã lè. 6Ekè mi wɔ̀ ɖèka ku Kristò Yesùa, Mawu fɔ̃ mi so èku kudo è, eye be na mi nɔ̀ ànyi ɖo Kristò gbɔ lè jiŋùkusi. 7E wɔ̀ ekèa, sɔ ɖè yebe màjea be àdɔ̀kùnu gãa, fiɔ, to yebe àdɔ̀mènyuɛ̃ wɔ̀wɔ, to Kristò Yesù ji, na hùenu kèwo la vaa keŋu. 8Đo Mawu be màjea mè ye mì kpɔ hlùɛ̃gã lè, to mìabe xɔ̀sè ji. Ekèa mu so mìa gbɔ ò, Mawu be ènu nana be nyi. 9Mu nyi àmè ɖe be àgbàgba jèje ye be nyi, ne bèa sɔ ɛ̀ yigò ò. 10Đo Mawu ye wɔ̀ mi kudo ye ŋutɔ be àlɔ̀, be mia wɔ̀ ɖèka kudo Yesù Kristò, ne mia wɔ̀ èdɔ nyuɛ̃, kèwo Mawu jrà ɖo ɖɛ na mia.
Àmè kèwo xɔ̀ Kristò ji sè a nyi dùkɔ̃ ɖèka
11Mì ɖo ŋùku e ji, be mu nyi Yudàvi jìjiwo ye mì nyi ò. Yudàvi, àmè kèwo kpɔna woa ɖokoewo be yèwo kpò wo sò èvo na a, yɔna mì be àtɔ̀tɔ̀nɔ̀wo. Sĩ vɔ̀a, *èvosòso kèa, ŋutilãmènu kpò be nyi, eye àgbètɔ kpò ye sɔ àsi wɔ̀ ɛ̀. 12Mì ɖo ŋùku e ji, be hùenu ɖe va yìa, mì nɔ̀ àzɔ̀ge na Kristò, eye mì mu nyi Izràɛl dùkɔ̃a be dùmèviwo lè èmɔ ɖekpe nu klua ò. Mì mu nya ènu ɖekpe lè ènu kèwo be èzò Mawu ɖù kudo yebe dùkɔ̃a, kudo ènu kèwo be àjɔ̀gbè be fìã na ɛ̀ ŋuti ò. Wu ekèa, ŋùɖo ɖekpe mu nɔ̀ mìa si ò, eye mì mu jèsi Mawu cã ò. 13Vɔ̀ fifìa, lè ɖèkawɔ̀wɔ mè kudo Yesù Kristò, wo kplɔ̀ mì, àmè kèwo nɔ̀ àzɔ̀ge boo sãa, va Mawu gbɔ, to Kristò be vɔsa ji. 14E ye hɛ̃ fàfa va mia dòmè, bɔ̀ Yudàvi kudo àmè kèwo mu nyi Yudàvi òa wɔ̀ ɖèka, eye e mù màma be èglì kè wɔ̀ mi kɛ̃tɔwoa pu ànyi. 15E gũ Yudàviwo be èsea kudo yebe ɖoɖowo, gbàkudo yebe ègbèɖèɖewo, ne bèa sɔ kɔ̀ta èvèawo sɔ wɔ̀ dùkɔ̃ yeye ɖèka, lè ɖèka wɔ̀wɔ mè kudo ye ɖokoe. Nène a ye be hɛ̃ fàfa va. 16Kristò, to èku kè be ku lè àtisòga ŋutia jia, gũ èta na èkɛ̃. E ɖa àvũ lè kɔ̀ta èvèawo dòmè. 17E va do fàfa be àŋɛ̀a na mì, àmè kèwo nɔ̀ àzɔ̀gea eye be hɛ̃ fàfa va na àmè kèwo lè kpòepeawo. 18Đo to Kristò ji ye mia kpata, Yudàvi kudo àmè kèwo mu nyi Yudàvi ò a teŋu yì Mawu be ŋùkɔ̀ kudo Gbɔ̃gbɔ̃ Kɔ̀kɔ̀ɛ a be àlɔ̀do.
19Nène a, mì mu gbà nyi àmèjrowo, àlo èmɔzɔ̃tɔ kèwo va to ànyigbã ɖe ji kpò le yìa ò. Vɔ̀ bòhũa, mìa ku àmè kèwo ŋuti wo kɔ̀a, mì zũ dùkɔ̃ ɖèka be èdùmèviwo kudo Mawu be àxomètɔwo. 20Gɔ̃mèɖokpe kè *àmèdɔ̃dɔ̃wo ku Mawu be gblɔ̃ɖɛtɔwo ɖo ànyia ji, ke ji wo li mì ɖo; eye Kristò Yesù ŋutɔ ye nyi koŋùjikpea. 21E ye ji ye wo kpe èxɔ̀tùtua be àkpa vòvòvòawo kpata ɖo, be bla, zũ èxɔ̀ ɖèka, eye kè nana èxɔ̀ bliboa sĩnà ɖo e ji va zũnà mawuxɔ kɔ̀kɔ̀ɛ na Tɔhonɔ̀. 22Wo sɔ mìawo cã ɖo èxɔ̀a be àkpa ɖe, be ne mìa keŋu mìa zũ àxue na Mawu to Gbɔ̃gbɔ̃ a ji, lè ɖèka wɔ̀wɔ mè ku Kristò.
Mina Bible © Bible Society of Togo, 2014.