Àɖàŋùɖètɔ 9
9
Àgbèa mu sùnà àmè ò
1Ɛ̃ɛ, mù bù ènu kèa ŋuti eye mù yì kè ɖo e ŋuti be: àmè kè wɔ̀nà nyuɛ̃a, ènunyatɔa kudo yebe wɔ̀nawo sona Mawu gbɔ. Àgbètɔ mu nyana be yè la va lɔ̃ àmè loo, àlo yè la va crì àmè ò. Mu la teŋu ɖè yebe àɖàŋù jè ŋùkɔ̀ cã ò. 2Nène a ye be lè na àmè sia àmè. Ekèa vana na àmè kè le wɔ̀ ènu nyuɛ̃ àlo ènu vuɛ̃ a, na àmè nyuɛ̃ àlo àmè vuɛ̃, na àmè kè kɔ̀, àlo àmè kè mu kɔ̀ òa, na àmè kè le wɔ̀ vɔsa àlo àmè kè mu le wɔ̀ ɛ̀ òa. Vòvòtoto ɖe mu lè ènunyuɛ̃wɔ̀tɔ kudo ènuvuɛ̃wɔ̀tɔ dòmè ò, àlo lè àmè kè le fìã àjɔ̀gbè na Mawu ku àmè kè le vɔ̃ na ekèa be wɔ̀wɔ dòmè ò. 3Ènu ɖèka ŋùkumè ye jɔ̀nà ɖo àmè sia àmè ji eye e nyrã na ènu kè le jɔ̀ a kpata. Ènu kèa ŋuti ye àgbètɔ be èjì ɖɔ kudo àdɔ̀mèvuɛ̃ flãŋu, eye e wɔ̀nà ènu totro lè yebe àgbèa kpata mè. E yomè a, e kuna. 4Vɔ̀ àmè kè lè àgbèa, ye teŋu sè ènyà ɖe gɔ̃mè. Àvũ kè lè àgbèa, dɔ̃ àmè ji wu jãŋùta kuku. 5Ɛ̃ɛ, àmè kèwo lè àgbèa nya be yèwo la va ku, vɔ̀ àmè kèwo kuawo mu gbà nya ènu ɖekpe ò. Woawo ya mu gbà nɔ̀tè kpɔ ènu ɖe ò, ɖo wo ŋlɔ̀be wo vɔ̀. 6Ènu kè wo lɔ̃ àlo crìa kudo woabe ènuhũawo bu kudo wo. Wo mu gbà ɖo mamã ɖekpe lè ènu kè le jɔ̀ a mè ò.
7Nène a, ɖù àpo nuɖùɖu ku jìjɔɛ, nù àpo vɛ̃ ne bèa dè èjì gbɔ na wò, ɖo Mawu dà àsi ɖo ènu kè wò le wɔ̀a ji, so blèmà ke. 8Nɔ jrà ɖokoe wò ɖo gà sia gàmè eye mù gbà ŋlɔ̀be anùwɛtrɛ̀ zãzã ò. 9Kpɔ gomè lè àgbèa mè kudo nyɔ̃nù kè wò lɔ̃a gbè sia gbè lè àgbènɔ̀zã vi kè Mawu na wòa mè. Ɛ̃ɛ, àgbènɔ̀zã wòa kpòkpòe eye ekèa ye le nyi fɛ̃tu kè wò xɔ̀ lè àgbàgba kè wò le jèa mè. 10Wɔ̀ ènu kè wò la teŋu wɔ̀ kudo àpo ŋusɛ̃a kpata. Ɖo lè àmè kukuwode fikè wò la va yìa, wo mu la gbà teŋu wɔ̀ ènu ɖekpe ò. Wo mu la gbà teŋu bù ètamè ò, ènunya kudo ènunya cã mu lè ò.
Ènunya kpò mu sù ò
11Mù gbà kpɔ nɔ̀nɔmè buwo cã. Èjiɖùɖu mu sùnà àmè kè puna èdù kaba kabaa si gà sia gàmè ò. Àmè kè dona èjìa, mu ɖùnà èji tɛ̀gbɛ̀ ò. Ènunyatɔ mu ɖùnà àgbè nyuɛ̃ gà sia gàmè ò. Mu nyi ècitɔwo kpata ye ɖo ènunya ò. Ènu mèkùtɔwo kpata mu xɔ̀nà kàfù kafu ò. Nyàwo, woa kpata nya jɔ̀gbè nyuɛ̃ kudo jɔ̀gbè vuɛ̃. 12Gbèɖe, àgbètɔ mu nyana ènu kè la va jɔ̀ ɖo e ji ò. Jɔ̀gbè vuɛ̃ jènà àgbètɔ ji lè àvòmè sìgbè àlekè èlãviwo jènà èɖɔ mè nène, sìgbè àlekè xèviwo jènà gàmɔ mè nène.
13Mù gbà kpɔ ènu ɖe kè na mù bù ètamè so ènunya ŋuti. 14Èdù viɖe lè eye àmè mu sùgbɔ lè e mè ò. Èfìɔ sɛ̃ŋu ɖe sɔ àhùa ɖo èdù kèa ŋuti eye be ɖè ègũ trɔ do è. 15Lè èdùa mèa, ŋusù wɔ̀amènɔ̀ ɖe kè nyi ènunyatɔa lè. E ye hlùɛ̃ dùkɔ̃a gã to yebe nunya ji. Vɔ̀ e yomè a, àmè ɖekpe mu gbà ɖoŋùku ye ji ò. 16Nène a mù gblɔ̃nà be: Ènunya xɔ̀ àsì wu ŋusɛ̃, vɔ̀ ne ènunyatɔ ɖe nyi wɔ̀amènɔ̀a, àmèwo mu ɖona bùbu na yebe ènunya kaka la va ɖoto è ò. 17Gãkea, wo ɖonato ènunyatɔ kè le pò nupo kudo èjìgbɔ̃ɖɛa wu àhùaga kè le ɖègbè na hɔ̃viwoa. 18Ènunya nyɔ wu àhùawɔ̀nuwo. Vɔ̀, àmè ɖèka kè àlɔ̀nu mu jɔ̀ na òa, teŋu gble ènu nyuɛ̃ kè wo wɔ̀ sãa.
Mina Bible © Bible Society of Togo, 2014.