Èsea gbìgbɔ̀ hlɛ̃ 3

Izràɛlviwo ɖo àlɔ̀ Ɔg be èfìɔdua ji

1Kè mi trɔ jè èmɔ ɖota Basàn-nyigbã jia, Ɔg, kè nyi Basàn be èfìɔa to va dogò mi ku yebe àhùakɔ̃ bliboa, be yèwoa wɔ̀ àhùa ku mi, lè Edreì-nyigbã ji. 2Wàlɛbɛ ŋua, Tɔhonɔ̀ gblɔ̃ na mù be: “Mù gbà vɔ̃ na ɛ̀ ò, ɖoa, mù sɔ ye ŋutɔ, yebe àhùakɔ̃ bliboa ku yebe ànyigbãa do àsi na wò. Ènu, kè wò wɔ̀ ku Sihɔ̀n, Àmorìtɔwo be èfìɔ kè nɔ̀nà Hɛsbɔ̀n nyigbã jia ke wò la wɔ̀ ku ì. 3Nène a ye Tɔhonɔ̀, miabe Mawu a sɔ Ɔg, Basàn be èfìɔa cã ku yebe àhùakɔ̃ bliboa do àsi na mi, eye mi ɖù woa ji, kè àmè ɖekpe mu ci àgbè òa. 4Mi xɔ̀ yebe èdùwo kpata, eye èdù ɖekpe mu kpɔ̀tɔ̀ na ɛ̀, kè mi mu xɔ̀ ò. Woa kpata, wo lè èdù èkà-takpo lè Argɔv be nuto mè blibo kè ji Ɔg, le ɖùfìɔ lè, lè Basàn-nyigbã jia. 5Èdù kèawo kpata nyi àgbògbò-dù kèwo be èglìwo kɔ yìji, èdù kèwo be àgbowo hũnà ɖo èvè, eye wo tunawo ku lɔkèa. Kɔpe sùgbɔ trɔ do èdù kèawo. 6Mi crɔ̃ wo keŋu gbidi, sìgbè lekè mi wɔ̀ ku Sihɔ̀n, Hɛsbɔ̀n be èfìɔa nène. Mi crɔ̃ èdù sia èdù gbidi ku ŋusùwo, nyɔ̃nùwo kudo ɖèviwo cã. 7Mi le èlãwo kpata jo, ku ènu kèwo mi hlàawo.

Mosè mã Gilead be ànyigbãa

8Nène a ye mi xɔ̀ ànyigbã lè Àmorìtɔwo be èfìɔ èvè si, lè Yɔrdàn be ètɔ̀a godo, so kaka Arnɔ̀n be ètɔ̀a be èto èvèa nu, va yì tɔ Hɛrmɔ̀n be ètoa. 9Sidɔ̀ntɔwo yɔna Hɛrmɔ̀n be ètoa be Siriyɔ̀n, eye Àmorìtɔwo yɔna ɛ̀ be Senìr. 10Mi xɔ̀ èdù kèwo keŋu lè èto gbàjàa jiawo, mi xɔ̀ Gilead bliboa, mi gbà xɔ̀ so Basàn bliboa, va ɖo Salkà ku Edreì, kpe ɖo Basàn be èdù kèwo ji Ɔg le ɖùfìɔ ɖoa ŋuti. 11Ɔg, Basàn be èfìɔa ye nyi àmè ɖèka kè ci ànyi lè Refayìvi kèwo kpɔ̀tɔ̀awo dòmè. Yebe ègàbàti#3.11 Ŋɔ̀ŋlɔ̃ buwo mèa, ɖo ègàbàti tèpea, wo pò nupo so àmèkuku-ɖakà ŋuti na Ɔg kè nyi àmè jɔ̀ àsua. kè dìdì àbɔglìgo àsiɖèkɛ, eye be kèkè àbɔglìgo ènèa gbà kpɔ̀tɔ̀ lè Rabà kè nyi Amɔ̀nviwo be èfìɔdua mèa egbè.

12Wàlɛbɛ ŋua, mi ɖo àlɔ̀ ànyigbã kè kpata lè àvego na Àroà, lè Arnɔ̀n be ètɔ̀a toa ji. Mù sɔ Gilead be èto-nyigbãa ku èdù kèwo ye lè e jiawo be mamãmè na Rubɛ̀n ku Gad be jìjimèviwo. 13Màmãmè kè kpɔ̀tɔ̀ so Gilead ŋutia ku Basàn bliboa, Ɔg be èfìɔdu xoxoa, mù sɔ wo na Manasè be hɛ̃nua be mamãmè. Argɔv be ànyigbã bliboa ku Basàn be ènutomè bliboa, wo gbà yɔna ɛ̀ be Refayìviwo be ànyigbã. 14Yàir kè nyi Manasè be ŋusùvia ɖo àlɔ̀ Argɔv be ànyigbãa kpata ji, kaka yì ɖo Gɛsur be jìjimèviwo ku Maakà be jìjimèviwo be ànyigbãwo be lipòwo ji. E sɔ ye ŋutɔ be nyikɔ ɖo na Basàn be ènuto kèawo mè, àleke be, egbèa, wo gbà yɔna funuawo be “Yàir Kɔpe”. 15Makìr ye mù sɔ Gilead be ànyigbãa na. 16Mù sɔ ànyigbã kè so Gilead kaka yì tɔ Arnɔ̀n nyigbã jia na Rubɛ̀n be jìjimèviwo ku Gad be jìjimèviwo. Arnɔ̀n be ètɔ̀a be tope ye nyi lipòa, kaka yì tɔ Yàbɔk be ètɔ̀ kè nyi Amɔ̀n be èviwo be lipòa. 17Sɔ kpe Àrabà be ànyigbãa, Yɔrdàn be ètɔ̀a nyi lipò na wo, so Kinerɛ̀t be gbàgàa nu, yì tɔ Àrabà be gbàgà kè nyi èjè be gbàgàa, lè Pisgà be ètoa be bàlìa mè, lè èwèzɛ̃pe.

18Eye mù ɖè ègbè na mì be: 'Tɔhonɔ̀, mìabe Mawu ye sɔ ànyigbã kèawo do àsi na mì. Mìa kpata kè nyi àhùawɔ̀tɔwoa, mì la bla àkpà, la sɔ sò Yɔrdàn be ètɔ̀a, lè mìa nɔ̀vi Izràɛliviwo be ŋùmè. 19Mìa srɔ̃wo, mìabe èviwo ku mìabe èlãhawo, mù nya be mì ɖo èlãha sùgbɔ, kpò ye la ci èdù kèwo mù sɔ na mìawo mè. 20Mì la do àlɔ̀ mìa nɔ̀vi Izràɛlviwo, kaka va na gà kè mè Tɔhonɔ̀ la na wo gbɔ̃jɛ̃, sìgbè lekè be na mìawo cã a nène, àleke be woawo cã, woa xɔ̀ ànyigbã kè Tɔhonɔ̀, mìabe Mawu a sɔ le na wo, lè Yɔrdàn be ètɔ̀a godoa, gbɔ̀xue àmè sia àmè la va ànyigbã ke mù na mìa ji'#3.20 Yos 1.12-15.

21Mù do ɖoɖo àsi na Yosùa be: 'Wò ŋutɔ wò kpɔ ènu kèwo keŋu Tɔhonɔ̀, mìabe Mawu a wɔ̀ ku èfìɔ èvè kèawoa. Nène a ke ye Tɔhonɔ̀ la gbà wɔ̀ ku èfìɔdu kèwo keŋu mì la kpɔ lè àgo ɖèa jiawo cã. 22Mì mu gbà vɔ̃ wo ò, ɖoa, Tɔhonɔ̀, mìabe Mawu a ŋutɔ lè wɔ̀ àhùa na mì.'

Mosè biɔ ènu Tɔhonɔ̀

23E yomè a, mù ɖè kuku na Tɔhonɔ̀ be: 24'Oò! Tɔhonɔ̀ Mawu, wò ŋutɔ wò tɔ àpo àlɔ̀ be ŋusɛ̃ gãa ɖèɖè fiɔ sumɔ̃vi wò. Mawu ɖe gbà lè jiŋùkusi àlo ànyigbã ji kè la tɛŋu wɔ̀ ènu gã ku nùkunu kèwo wò wɔ̀nàawo hatia? 25Na, ma yì àgo ɖèa ji jro, ne ma gbe sɔ ŋùkuvi kpɔ ànyigbã nyuɛ̃ kè lè Yɔrdàn be ètɔ̀a godoa kpò, Libàn be èto-nyigbã nyakpɔkpɔ ŋua!' 26Vɔ̀a, ɖo mìa ŋutia, Tɔhonɔ̀ do àdɔ̀mèze veve ɖe do mù, eye mu ɖo èto mù ò. Tɔhonɔ̀ gblɔ̃ na mù be: 'Ma sè ènu! Tɔtè ènyà ŋua gbɔ̃gblɔ̃ na mù! 27Yì Pisgà be ètoa tamè, ne wòa kɔ èta yìji, wòa kpɔ èwèzɛ̃pe ku èwèɖoxɔ̀pe, àpùgo ku àvego: le ŋùkuvi ɖo ènu kè wò la kpɔa ŋuti nyuɛ̃ ɖe, ɖoa, wò mu la sò Yɔrdàn be ètɔ̀ kèa ò#3.27 Hɛ̃h 27.12-14; Gbì 32.48-52! 28Wɔ̀ ɖoɖowo do àsi na Yosùa; do è ŋusɛ̃, ne èjì ne nɔ̀ e si, ɖoa, e ye nyi àmè kè la kplɔ̀ dùkɔ̃ kèa sò Yɔrdàn be ètɔ̀a. E ye la sɔ ànyigbã kè wò le kpɔa do àsi na dùkɔ̃a.' 29Nène a ye mi ci bàlìa mè, lè èdù kè jè ŋùkɔ̀ Bɛt-Peɔr be èdùa mè.

Currently Selected:

Èsea gbìgbɔ̀ hlɛ̃ 3: GEN

Highlight

Copy

Compare