Èsea gbìgbɔ̀ hlɛ̃ 27
27
Izràɛlviwo ɖù zòɖùɖua be àzã
27–28
Wo li èkpewo ɖo Gerizìm be ètoa ji
1Mosè ku Izràɛl be àmè sĩsĩwo sɔ ɖoɖo kèawo do àsi na dùkɔ̃a be: “Mì le èse kè mù sɔ le do àsi na mì egbèa sɛ̃sɛ̃ɖe. 2Gbè kè gbè mì la sò Yɔrdàn be ètɔ̀a, tùtà ànyigbã kè Tɔhonɔ̀, àpo Mawu sɔ lè na wòa jia, wò la sɔ èkpe gãwo, kè wò la li ɖotè, eye wò la sì àkalo do wo. 3Ne wò sò Yɔrdàn be ètɔ̀a vɔ̀a, wò la ŋlɔ̀ èse kèawo be ènyàwo keŋu ɖo woa ji. E yomè a, wò la teŋu yì ànyigbã kè Tɔhonɔ̀, àpo Mawu sɔ le na wòa ji, ànyigbã kè ji nyìnɔsi ku ànyisi bɔ lèa#27.3 Kpɔ Tot 3.8, sìgbè lekè Tɔhonɔ̀, tɔgbe wòwo be Mawu a fìã àjɔ̀gbè na wòa nène. 4Ne mì sò Yɔrdàn be ètɔ̀a vɔ̀a, mì la li èkpe kèawo, zɔ̃ ɖo ɖoɖo kè mù la na mì, egbè, lè Ebàl be ètoa jia nu, eye mì la sì àkalo do wo. 5Wò la tù vɔsakpe ɖo funua, na Tɔhonɔ̀, àpo Mawu; wò la sɔ èkpe kè ŋuti ègà be èdɔwɔ̀nu ɖekpe mu tɔ ò a, tù vɔsakpe kèa; 6èkpe gbalo ye wò la sɔ tù vɔsakpea na Tɔhonɔ̀ àpo Mawu#27.6 Kpɔ Tot 20.25. Funua ye wò la wɔ̀ ènumème vɔsa kè be àzìzɔ la yì Tɔhonɔ̀, àpo Mawu gbɔa lè. 7Wò la wɔ̀ ŋuti fàfa be vɔsa, wò la ɖùnu lè funua, eye wò la kpɔ jìjɔɛ lè Tɔhonɔ̀ àpo Mawu be ŋùkɔ̀. 8Wò la ŋlɔ̀ èse kèa be ènyàwo kpata ɖo èkpeawo ji. Wò la ŋlɔ̀ wo, ne ènyàawo mè ne kɔ̀#27.8 Kpɔ Yos 8.30-32.'
9Ekèa yomè a, Mosè ku Levì hũbonɔwo gblɔ̃ na Izràɛl dùkɔ̃ bliboa be: “Izràɛl, ɖo èto, ne wòa sè! Egbèa, Tɔhonɔ̀, àpo Mawu na, wò trɔ zũ dùkɔ̃ na ɛ̀. 10Ekèa ŋutia, wò la nɔ ɖo èto Tɔhonɔ̀, àpo Mawu be ègbè. Wò la nɔ wɔ̀ ɖo yebe èse ku yebe ɖoɖo kèwo mù sɔ le na wò egbèa ji.” 11Gbè ŋua gbèa, Mosè ɖè ègbè kèa na dùkɔ̃a be: 12“Ne mì sò Yɔrdàn be ètɔ̀a vɔ̀a, Simeɔ̀n be kɔ̀ta, Levì be kɔ̀ta, Yudà be kɔ̀ta, Isakàr be kɔ̀ta, Yosɛ̀f be kɔ̀ta ku Bɛnyamìn be kɔ̀ta la yì Gerizìm be ètoa ji, ne woa tusì na dùkɔ̃a. 13Nène a kèa, Rubɛ̀n be kɔ̀ta, Gad be kɔ̀ta, Àsɛr be kɔ̀ta, Zabulɔ̀n be kɔ̀ta, Dàn be kɔ̀ta ku Neftalì be kɔ̀ta la yì Ebàl be ètoa ji, la gblɔ̃ kpɛ̃sɛ̃ be ènyàwo.”
Kpɛ̃sɛ̃ woèvèawo
14Levìwo la sɔ ègbè sɛ̃sɛ̃ ɖe gblɔ̃ na Izràɛlviwo keŋu be:
15“Hèlu na àmè kè la wɔ̀ legba, àlo èkpetata kè nyi àlɔ̀nu-dɔwɔ̀tɔ be àɖàŋùdɔ#27.15 Kpɔ Tot 20.4; Lev 19.4, vɔ̀a nyi ènu nyɔŋu na Tɔhonɔ̀a, eye be la sɔ wlaa!” Eye dùkɔ̃ bliboa la ɖo e ŋuti be: “Àmèn!”
16“Hèlu na àmè kè le crì ètɔa ku ènɔaa#27.16 Kpɔ Tot 20.12!” Eye dùkɔ̃ bliboa la ɖo e ŋuti be: “Àmèn!”
17“Hèlu na àmè kè la ɖɔ̀lì tèpe na nɔ̀via be ànyigbã be lipòa!” Eye dùkɔ̃ bliboa la ɖo e ŋuti be: “Àmèn!”
18“Hèlu na àmè kè la na, ŋùkuvi gbãgbãnɔ̀ la bu yebe èmɔa#27.18 Kpɔ Lev 19.14!” Eye dùkɔ̃ bliboa la ɖo e ŋuti be: “Àmèn!”
19“Hèlu na àmè kè la trɔ èta dogũ na àmèjro, ècɔɛ̀vi, àlo àhòsì be ènyà jɔ̀jɔɛa#27.19 Kpɔ Tot 22.21; 23.9; Lev 19.33-34!” Eye dùkɔ̃ bliboa la gblɔ̃ be: “Àmèn!”
20“Hèlu na àmè kè la dɔ̃ ku ètɔa be èsrɔ̃wo dòmètɔ ɖe a, ɖoa, ètɔa ɖèka kpò be èsrɔ̃ ye#27.20 Kpɔ Lev 18.8; 20.11!” Eye dùkɔ̃ bliboa la gblɔ̃ be: “Àmèn!”
21“Hèlu na àmè kè la dɔ̃ èlã gbɔa#27.21 Kpɔ Tot 22.18; Lev 18.23; 20.15-16!” Eye dùkɔ̃ bliboa la gblɔ̃ be: “Àmèn!”
22“Hèlu na àmè kè la dɔ̃ nɔ̀via nyɔ̃nù kè nyi ètɔa be èvi, àlo, ènɔa be èvi gbɔa#27.22 Kpɔ Lev 18.9; 20.17!” Eye dùkɔ̃ bliboa la gblɔ̃ be: “Àmèn!”
23“Hèlu na ŋusù kè la dɔ̃ lɔ̃xoa gbɔ#27.23 Lev 18.17; 20.14!” Eye dùkɔ̃ bliboa la gblɔ̃ be: “Àmèn!”
24“Hèlu na àmè kè la wù àmè, lè bèbe mèa!” Eye dùkɔ̃ bliboa la gblɔ̃ be: “Àmèn!”
25“Hèlu na àmè kè la xɔ̀ ègà ne bèa wù àmèa!” Eye dùkɔ̃ bliboa la gblɔ̃ be: “Àmèn!”
26“Hèlu na àmè kè mu la le Mawu be èsea be ɖoɖowo ɖo àsi, ne bèa zɔ̃ ɖo woa ji ò#27.26 Kpɔ Gal 3.10!” Eye dùkɔ̃ bliboa la gblɔ̃ be: “Àmèn!”
Currently Selected:
Èsea gbìgbɔ̀ hlɛ̃ 27: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
