Bàruk 2
2
Tɔhonɔ̀ be nyàsòsoa lè jɔ̀jɔɛ
1“Eye, Tɔhonɔ̀, wò wɔ̀ ènu kè wò ɖoa ku mi, kudo miabe kòjoɖotɔ kèwo ɖo la nɔ sò jɔ̀jɔɛ, lè Izràɛl, kudo miabe èfìɔwo, gbàkudo miabe èdùnyàgblɔ̃tɔwo, kudo Izràɛl ku Yudà be èdù mèviwo. 2Wò pò Yeruzàlɛm veve ɖe, eye be nyi jɔ̀gbèvuɛ̃ sɛ̃ŋu ɖe kè mu jɔ̀ lè ànyigbã ji kpɔ nène ò. Co gãke a, wo ŋlɔ̀ ɛ̀ ɖo Mosè be èsea mè. 3Ekè a na be àmè ɖewo va le ɖù woa ŋutɔ woabe ŋusùviwo be èlã, àlo, woa ŋutɔ, woabe nyɔ̃nùviwo be èlã. 4Gbà sɔ wua, Tɔhonɔ̀, wò sɔ wo ɖo èfìɔɖùpe kèwo ye trɔ do woa be ŋusɛ̃ gɔ̃mè. Nène a, dùkɔ̃ kèwo mè Tɔhonɔ̀ kãkã wo yì a, zũ wo eye wo do wo ŋùkpɛ̃. 5Eye, kè mi ɖo la nyi àpetɔwo a, mi jo va trɔ zũ kluviwo, ɖo mi jè àgɔ̀ do Tɔhonɔ̀, miabe Mawu, eye mi mu sè ègbè kè be do àsi na mia ò. 6Tɔhonɔ̀ miabe Mawu a lè jɔ̀jɔɛ, vɔ̀a, miawo ku mia tɔgbewo tɔ̀ ye nyi ŋùkpɛ̃, sìgbè lekè be lè egbè a nène. 7Tɔhonɔ̀, wò gblɔ̃ bùsu-nyà sùgbɔ ɖo yomè na mi, eye wo va jɔ̀ ɖo mia ji nyàwo. 8Vɔ̀a, mi mu fã yɔ Tɔhonɔ̀ be ne trɔ mia dòmètɔ ɖekpekpe jo lè yebe susu vuɛ̃wo yomè ò. 9Ye ŋuti wò ɖè èmɔ̃ na jɔ̀gbèvuɛ̃ kèawo be wo ne jɔ̀ ɖo mia ji ɖo. Ɖoa, ènu kè èwò, Tɔhonɔ̀, wò biɔ so mia si be mia wɔ̀a lè jɔ̀jɔɛ. 10Vɔ̀a, mi mu ɖo èto wò ò, eye mi mu le ŋùku ɖo èse kè wò sɔ ɖo ŋùkɔ̀ na mia ŋuti ò.
Kuku ɖèɖe
11Tɔhonɔ̀, Izràɛl be Mawu, wò ɖè dùkɔ̃ wòa to lè Ejiptè be ànyigbã ji ku àpo àbɔ sɛ̃sɛ̃ ku àpo ŋusɛ̃ gã a, to nùkunuwo ku ŋùdãnuwo ji, eye wò ɖè ɖokoe wò fiɔ, sìgbè lekè wò lè, eye mi gbà le kpɔ egbè a nène. 12Fifìa, mi do è jèsì be mi jè àgɔ̀, eye mi jè àgla, ɖo mi mu wɔ̀ ɖo èse wòwo ji ò. 13Tɔ̀ wò jò, trɔ àdɔ̀mèze wòa jo lè mia ji jro! Dùkɔ̃ vi ɖe kpò mi trɔ zũ, lè dùkɔ̃ kpɔ̀tɛ kèwo dòmè wò kã mi hlɛ̃ ɖoawo mè. 14Tɔhonɔ̀, ɖo èto ènu kè mi le fã biɔ wò a. Àmè kè wò nyi na mia ŋutia, hlùɛ̃ mi gã jro, eye na, ne mia kpɔ màje lè àmè kèwo kplɔ̀ mi àhùaleawo gbɔ! 15Leke a, ànyigbã blibo a la do è jèsì be èwò, Tɔhonɔ̀, miabe Mawu tɔ̀ ye mi nyi, eye mi, Izràɛlviwo a, mi nyi dùkɔ̃ ɖè ɖo vò na wò. 16Tɔhonɔ̀, ɖè èkɔ̀, ne wòa kpɔ mi ɖoɖa, so àpo nɔ̀pe kɔ̀kɔɛ a, ne wòa ɖè susu so mia ŋuti. Pu èto ànyi, ɖoɖa mia gbɔ, ne wòa ɖo èto mi. 17Hũ ŋùkuviwo, ne wòa kpɔ ɖa. Ne mi kua, ne miabe èkla to lè miabe ŋutilã mèa, mi mu la gbà teŋu na wò gogo kè jè a, àlo, la do jèsì àpo jɔ̀jɔɛ sòso ò, Tɔhonɔ̀! 18Vɔ̀a, àmè kè ɖɔ ku vevesèse a, àgbètɔ xòmè kè be èjì gbã, kè àdɔ̀ le wù, be gbɔjɔ, eye be xa gòbà a, kè be ŋùkuviwo le kpɔ flìflì, eye be le zɔ̃ ŋuzĩzĩ tɔ̀ a, ye la na wò gogo ku kafu, e ye la jèsi àpo jɔ̀jɔɛ wɔ̀wɔ, Tɔhonɔ̀! 19Ye ŋutia, ne mi va àpo ŋùkumè ku miabe kuefã, be mi a va ɖè kuku na wò, Tɔhonɔ̀, miabe Mawu a, mu nyi be ɖe ye mi le gba ɖo mia tɔgbewo, àlo, miabe èfìɔwo be jɔ̀jɔɛwɔ̀wɔ ŋuti ye ò, Tɔhonɔ̀ miabe Mawu! 20Ɖo a, miawo ŋuti ye wò do àdɔ̀mèze hɛli hɛli wòa ɖo, sìgbè lekè sumɔvi wò, gblɔ̃ɖɛtɔwo gblɔ̃ ɛ̀a nène be: 21Ènyà kè Tɔhonɔ̀ gblɔ̃ a ye nyi ekè a: “Mì xa mìabe èjìmè, ne mìa sumɔ Babɛ̀l be èfìɔa, àleke be mìa nɔ̀ ànyigbã kè mù sɔ na mìa tɔgbewo a ji. 22Vɔ̀a, ne mì gbe be yèwo mu la sumɔ Babɛ̀l be èfìɔa sìgbè lekè mù biɔ ɛ̀ so mìa sia nène òa, 23mù la na be, lè Yudà ku Yeruzàlɛm be èdùwo mè a, wo mu la gbà sè àzãɖùɖu be zigìdi, jìjɔɛ be àpadodo ku èsrɔ̃ɖèɖe be èhàjìjiwo ò. Èdù a kpata la trɔ sìgbè zògbèji, àfikè ye èdùa mètɔwo kpata to jo lèa nène#2.23 Yèr 7.34.”
24Vɔ̀ a mi mu ɖo èto àpo ègbè, wàlɛbɛ ke wò le to na mì be mì a bɔ̀bɔ̀ mìa ɖokoewo ɖo Babɛ̀l be èfìɔ a gɔ̃mè ò. Ekè a ŋuti wò wɔ̀ ɖo ènyà kè wò gblɔ̃ ɖɛ, to àpo sumɔ̃vi gblɔ̃ɖɛtɔwo be ènu mè a ji be: wo la lɔ miabe èfìɔwo ku mia tɔgbewo be èpuwo to lè woabe yɔ̀dowo mè. 25Eye kpɔ ɖa, mia tɔgbewo ku miabe èfìɔwo ku lè nɔ̀nɔmè bàɖa ɖe mè: wo ku àdɔ̀ku, àlo, èdɔku, wo wɔ̀ fùnya-fùnya ku wo, wo kplɔ̀ wo àhùàle. Eye, kpɔɖa, wo lɔ woabe àmèkpòtiwo ŋutɔ cã kɔ̀ŋùgbe ɖo yɔ̀do a godo, eye lè ŋùkèkè mè a, dɔ̃ŋùkusu ɖù wo. Eye lè èzà mè a, fafa le wo#2.25 Yèr 8.1-2. 26Eye Àxue kè ji wo pò àpo nyikɔ ɖo a, wò sɔ ɛ̀ ɖo nɔ̀nɔmè kè mè mi le kpɔ ɛ̀, be lè egbè a mè, ɖo Izràɛl ku Yudà be àxuedowo be èvùɛ̃jɔ̀jɔ ŋuti. 27Gãke a, Tɔhonɔ̀, miabe Mawu, wo ɖè kpɔkpɔ ɖo e mè ku èjì trɔ trɔ ɖo àmè ŋuti be nɔ̀nɔ̀mè gã ɖe fiɔ, 28sìgbè leke wò gblɔ̃ ɛ̀ to àpo sumɔvi Mose ji, gà kè mè wò ɖè ègbè na ɛ be ne ŋlɔ̃ Èse Èwoawo na Izràɛlviwo a. Wo gblɔ̃ be: 29'Ne mì mu ɖo èto àpe ègbè ò a, eŋua, dùkɔ̃ sùgbɔ ke mì nyi egbè a la trɔ zù dùkɔ̃ vi ɖe lè dùkɔ̃ kèwo dòmè, mù nyà mì ɖoɖaawo mè. 30Ɖo a, mù nyã nyuɛ̃ ɖe be mì mu la ɖo èto mù o, ɖo a dùkɔ̃ jè àgla ye mì nyi. Vɔ̀a, ne wo kplɔ̀ mì jo a, mì la tɔ ètamè bùbu, 31eye mì la nyã be ènyè ye nyi Tɔhonɔ̀, mìabe Mawu a. Gà ŋua mè a, mù la na, mì èjì sè ètonu ku èto kè sènà ènu a. 32Eye lè àfi kè wo la kplɔ̀ mì yì a mì la jì kafuhàwo na mù, eye mì la ɖo ŋùku mù. 33Mì la kpɔ àfi kè, èmɔ̃ kè mìa tɔ̀gbèwo sɔ a kplɔ̀ wo yì, wàlɛbɛ kè wo sitè ɖo ènyè, Tɔhonɔ̀ ŋuti a. Mì la trɔ lè mìabe àglajèjè be nɔ̀nɔ̀mèwo yomè, eye mì la ɖè àsi le mìabe wɔ̀nà bàɖàwo ŋuti. 34Eye mù la trɔ kplɔ̀ mì gbɔ̀ va ànyigbã kè be àtaŋu mù kã na mìa tɔ̀gbè, Abràham, Izak ku Yakɔb a, ji, eye mì la nyi èdù à be kplɔ̀tɔwo. Eye nyè mu la na, mì la, ɖè kpɔ̀tɔ̀ ò; bòhũ a, mì la jì ɖo e ji. 35Mù la trɔ wɔ̀ zòɖùɖu kòkòɖàbì ku mì. Mù la nyi mìabe Mawu, eye mì la nyi dùkɔ nyè. Eye nyè mu la gbà ɖè èmɔ̃, be woa kplɔ̀ dùkɔ nyè, Izràɛl jo lè èdù kè mù sɔ na ɛ̀ à mè, yì dìdìpe ke ò.
Mina Bible © Bible Society of Togo, 2014.