Àmos 7
7
Àmos be àvìmènu cucugbãa: Tìkpotìkpowo
1Kpɔɖa ènu kè Tɔhonɔ̀ Mawu ɖèfiɔ mù lè àvìmèa ye kè: Tìkpotìkpowo bɔ̀ sìgbè lilikpo nène, wàlɛbɛ kè ne wo yà nukuwo be àkpa cucugbã tɔ̀a na èfìɔ, eye ègbeawo trɔ tɔ totoa. 2Wàlɛbɛ kè tìkpotìkpoawo ɖù ànyigbã be ègbewo keŋu vɔ̀a, mù gblɔ̃ be: “Mù ɖèkuku Tɔhonɔ̀ Mawu, Sɔ kè dùkɔ̃ wòa. Ne mu nyi nène òa, leke e ye vitukui ŋua la wɔ̀ sɔ nɔ̀ àgbè ò?” 3Eye Tɔhonɔ̀ trɔ yebe ɖoɖo a. E gblɔ̃ be: “Ekèa mu la gbà va e mè ò.”
Àvìmènu èvègɔ̃a: Èzò
4Ènu kè Tɔhonɔ̀ gbà ɖèfiɔ mù a, ye nyi ekèa: Tɔhonɔ̀ Mawu sɔ èzò le ɖokòjo. Èzòa bì èsì kè lè èdo gãa mè, eye e fiɔ̃ Izràɛl ɖiwaa. 5Nène ye mù gblɔ̃ be: “Tɔhonɔ̀ Mawu, mù ɖèkuku, nɔ̀tè. Ne mu nyi nène òa, leke dùkɔ̃ vitukui wòa la teŋu wɔ̀ sɔ nɔ̀ àgbè ò?” 6Eye Tɔhonɔ̀ trɔ yebe ɖoɖo a. E gblɔ̃ be: “Ekèa mu la gbà va e mè ò.”
Àvìmènu ètɔ̃gɔ̃a: Jijeka kè nu suŋubui lèa
7Tɔhonɔ̀ gbà ɖè ènu kèa fiɔ mù: Ye ŋutɔ nɔ̀tè lè èglìkpa ɖe gbɔ eye e le jijeka kè nu suŋubui lèa, ɖo àsi. 8E biɔ mù ènyà kèa: “Nukɛ ye wò kpɔ ò, Àmos?” Mù ɖo e ŋuti be: “Mù kpɔ jijeka kè nu suŋubui lèa.” Tɔhonɔ̀ yì e ji gblɔ̃ be: “Ɛ̃ɛ, mù sɔ jijekaa le kpɔ ɖa be Izràɛl dùkɔ̃ nyèa jɔ̀ nyuɛ̃ ɖe mà a. Ɖo nyè mu la gbà ku ŋuzĩzĩ na ɛ̀ ɖe ò.
9Mù la kãkã Izàk be jìjimèviwo be vòdukpawo.
Mù la gudu Izràɛl be vɔsawɔ̀pewo,
eye mù la sɔ àhùa ɖo Yèrobòam be xòmèa ŋuti.”
Wo nyà Àmos lè Betɛ̀l
10Betɛ̀l be hũbonɔ Àmasìa, do àŋɛ̀ kèa ɖoɖa Izràɛl be èfìɔ Yèrobòam gblɔ̃ be: “Àmos le ji la xɔ̀ Izràɛl be èfìɔɖùɖua lè àsi wò. Dùkɔ̃a mu la gbà teŋu dojì lè yebe ènyàwo nu ò. 11Lè nyàwototo mèa, ènyà kè Àmos le gblɔ̃a ye nyi ekèa:
“Yèrobòam la ku, èku kpàtà,
eye wo la kplɔ̀ Izràɛlviwo
yì gàtɔnugbe boo lè yebe èdùa gbɔ.”
12Àmasìa gblɔ̃ na Àmos be: “Ènukpɔtɔ, pòtɛ àgbã ne wòa jo lè fikèa, tùtà Yudà be ànyigbã ji. Funua, wò la kpɔ ènuɖùɖu lè gblɔ̃ɖɛtɔ be èdɔa mè. 13Vɔ̀a, tɔtè gblɔ̃ɖɛtɔ be èdɔa lè Betɛ̀l fikèa. Ɖo e nyi tèpe kɔ̀kɔ̀ɛ na èfìɔ, gbà nyi gòxɔ na fìɔdua.” 14Àmos ɖo e ŋuti na Àmasìa be: “Nyè mu nyi gblɔ̃ɖɛtɔ kaka la va nyi gblɔ̃ɖɛtɔ ɖe be èvi ò. Èlãnyìnyi ye mè mù kpɔna nuɖùɖu lè eye mù gbà dànà gboti be àgblè. 15Èlãwo dòmè ye Tɔhonɔ̀ yɔ mù lè, eye e gblɔ̃ na mù be ma va gblɔ̃ ènyà na Izràɛl, yèbe dùkɔ̃a. 16Eye fifìa, èwò Àmasìa, wò le do èse na mù be nyè mu gbà yì gblɔ̃ Mawu be ènyà na Izràɛl ò; vɔ̀a ma yì gblɔ̃ ɛ̀ na Izàk be àxuedo a. Fifìa, ɖoto ne wòa sè Tɔhonɔ̀ be ènyà: 17Tɔhonɔ̀ gblɔ̃ be:
“Èsrɔ̃ wò la trɔ zũ àhasìtɔ lè èdùa mè.
Wo la crɔ̃ èvi wò ŋusù ku nyɔ̃nùwo.
Wo la jije ànyigbã wòa sɔ ma.
Wò ŋutɔ wò la yì ku lè ànyigbã mà-kɔ̀ mà-kɔ ɖe ji,
eye wo la kplɔ̀ Izràɛl dùkɔ̃a yì
gàtɔnugbe boo lè yebe ànyigbã a gbɔ.”
Mina Bible © Bible Society of Togo, 2014.