Àmos 5
5
Fũlòha na Izràɛl
1Izràɛlviwo, mì ɖoto mù: èfũlòha ɖe ye mù la jì na mì.
2Sìgbè tùgbɛ̀jɛvi kè kua
nènea ye Izràɛl ci ànyigbã,
e vlũ lòmì ɖo èkɔa mè
àmè ɖekpe mu lè la fɔ̃ ɛ̀ sitè ò!
3Ɖo, ènyà kè Tɔhonɔ̀ Mawu gblɔ̃
sɔ Izràɛl be dùkɔ̃a ŋutia ye nyi ekèa be:
“Lè ŋusù àkpe ɖèka kè bla àhùakpa
lè èdùa mè yì àhùa dòmèa,
àlɔ̀ ɖèka kpò ye la kpɔ̀tɔ̀.
Lè àmè àlɔ̀ ɖèka kèwo so kɔpe ɖe mèa dòmèa,
àmè èwo kpò ye la kpɔ̀tɔ̀.”
Tɔhonɔ̀ be yɔyɔ gbɔ̀xue gbàdà ne yì
4Ènu kè Tɔhonɔ̀ gblɔ̃ na Izràɛl be dùkɔ̃a ye kè:
“Ne mì le ji la nɔ̀ àgbèa,
ènyè gbɔ mì la nɔ kã biɔ lè.
5Vɔ̀ mì mu gbà yì kã biɔ lè
Betɛ̀l be mawuxɔa mè ò,
mì mu gbà yì Gilgàl be vɔsawɔ̀pea ò,
mì mu gbà yì Bɛrcebà be kɔ̀kɔ̀ɛpea cã ò.
Ɖo Gilgàl la trɔ àhùale be èdù
eye Betɛ̀l la trɔ vòduwo be nɔ̀pe.”
6Ne mì le ji la nɔ̀ àgbèa,
Tɔhonɔ̀ gbɔ ye mì la nɔ kã biɔ lè.
Ne mu nyi nène òa, Yosɛ̀f be àxuedo a,
la fiɔ̃ Betɛ̀l kpata sìgbè èzò nène
eye àmè ɖekpe mu la xɔ̀ na ɛ̀ ò.
7Aà, mì trɔ jènaa wɔ̀ màjɔ̀ màjɔ,
eye mì sɔ jɔ̀jɔɛsòso wɔ̀ àfɔ̀ɖojinu!
8E ye ɖo wètrivi bɔ̀ ɖoduwo,
Kòklovinɔ̀ (wètri adrɛ̃awo) kudo wètrivi ènè kɔ̀ ceŋu-ceŋu,
e trɔna vìvìti klìkòa wɔ̀nà ŋùdekɛ̃nyɛ be kɔ̀kɔ̀ɛ.
E cɔ̃na ènu ŋùkèkè, ne èzã ne do.
Àpù be èsìa, e kãkã ɛ̀ ɖo ànyigbã ji.
Yebe nyikɔ ye nyi: Tɔhonɔ̀.
9E nana àjò sònà kãlìsuka,
eye gbledo jènà àgbògbò be èdùa ji.
10Wo crìnà àmè kè le dɔ̃ àmèwo
va jèna gbɔ lè kòjoɖope,
eye àmè kè le to nyàwoa
be ènu vena àdɔ̀mè na wo.
11“Mì ɖikina wɔ̀amènɔ̀a,
mì hlànà yebe ènukuyàya be àkpa ɖe.
Ekèa ŋuti ye mì mu la kpɔ gomè lè
àxue nyuɛ̃ kèwo mì tùa mè ò.
12Ɖo, mìabe èhlɔ̃dãdãwo sùgbɔ,
mù nya mìabe àgɔ̀jèjewo be kpɛ̃kpɛ̃ mè:
mà-nyã ɖewo be kɛ̃tɔ mì nyi,
mì ɖùnà èzãnu fàa.
Lè kòjoɖopea, mì tùnàfɔ̀
wɔ̀amènɔ̀wo be jèna mè.”
13Hùenu kèa nyi gbledo be hùenu,
ekèa ŋuti ye àmè kè nyanua bɔ̀nu kpoo ɖo.
14Nène a, mì ji ènu kè nyɔa,
mu nyi ènu kpòtoe wɔ̀wɔ ò.
Eŋuã mì la nɔ̀ àgbè eye Tɔhonɔ̀ àhùadù Mawu a
la nɔ̀ ku mì sìgbè àlekè mì le susu ìa nène.
15Mì crì èvuɛ̃ ne mìa lɔ̃ ènyuɛ̃.
Lè kòjoɖopea, mì sò jɔ̀jɔɛ.
Nène a, Tɔhonɔ̀ àhùadù Mawu a
la trɔ ŋùmè ɖoɖa mìa Yosɛ̀f be
jìjimè kpɔ̀tɛawo gbɔa yeŋu.
16Ekèa ŋuti Tɔhonɔ̀ àhùadù Mawu a gblɔ̃ be:
“Wo la sè mɔɛ̃làlawo lè tèpe kèwo wo bɔ̀nà lèa.
Lè èmɔ̃wo kpata toa, àmè la do àpa gblɔ̃ be:
“Gbledo kɛ kèa! Gbledo kɛ kèa!”
Wo la bɔ̀ àgblèdàtɔwo na èfũlòlo,
eye àviha fãtɔwo na ècɔwɔ̀wɔ be èhàwo.
17Lè vɛ̃-gblewo kpata mèa,
Àvifãfã be èhàwo ye la sò àxue
ne mù va to mìa dòmè yì vɔ̀a.”
Tɔhonɔ̀ ye gblɔ̃ ɛ̀.
Tɔhonɔ̀ be ŋùkèkèa
18Gbledo kɛ ye nyi na àmè kèwo le
kpɔ Tɔhonɔ̀ be ŋùkèkèa sinu ò!
Nukɛ ye wo kpɔ xɔ̀ so ŋùkèkè kèa mè ò?
Nyɔna be ŋùkèkè ku kɛ̃klɛ̃a?
Gbèɖe, ŋùkèkè jiŋɔ ɖe ye!
19Nène ye be nyina na
ŋusù kè si lè jãŋùta nu,
va yì dogò sisiblìsia.
E yì àxomè, sɔ àlɔ̀ gba ɖo èglì ŋuti
eye èdã ɖù àlɔ̀ na ɛ̀.
20Tɔhonɔ̀ be ŋùkèkèa la nyi kɛ̃klɛ̃a?
Gbèɖe, ŋùkèkè yìbɔ ɖe be la nyi,
vìvìti klìkò ɖe be la nyi,
kɛ̃klɛ̃ ɖekpe mu la ze viɖe tètè ò!
Sùmɔ̀ sumɔ màɖè àlè
21“Mù crì mìabe èmɔ̃zɔ̃zɔ̃wo,
nyè mu ji la gbà nya ŋutɔ cã ò.
Mìabe gòdowo nyi èŋɔjinu na mù,
22kaka jè ènumème vɔsa kèwo mì wɔ̀nàa ji.
Mìabe àgblèmènuku be vɔ̀sawo cã mu le wɔ̀ ènu ɖe na mù ò.
Nyè mu le kpɔ èlã doàmì kèwo be vɔsa
mì le wɔ̀ lè gbèkpli mè na mù a cã ò.
23Mì jìjɔ mìabe lɛ̀gɛ̀dɛ̀ be èhàwo jìji na mù;
nyè mu gbà le ji la sè mìabe èhàjìnuwo be ègbè ò.
24Mì na ne jɔ̀jɔɛ ne nɔ̀ mìa dòmè sìgbè lekè èsì jinaa nène.
Eye jɔ̀jɔɛsòso bèa srà sìgbè ètɔ̀ sàsra gbɛ̀lu ɖe nène!
25Izràɛlviwo, wàlɛbɛ kè mì nɔ̀ zògbè a ji èpè èkàa, mì wɔ̀ vɔsa ɖe na mù kpɔ, kaka va jè ènunana jia? 26Mì dona mìabe vòduwo be jèsì sìgbè lekè mì gbà le do è egbèa nène. Mìabe èfìɔ-vòdu Sìkutè kudo wètrivi vòdu Kiyɔ̀n.
27Ènu kèa ŋuti ye mù la na
wo la kplɔ̀ mì àhùale yì kaka Dàmaskò godo.”
Nène a ye Tɔhonɔ̀, àhùadù Mawu a gblɔ̃ yeŋu.
Mina Bible © Bible Society of Togo, 2014.