Àmos 3
3
Mawu be dùkɔ̃ ɖo la na àkɔ̃ŋùta
1Izràɛlviwo, mì àmè kèwo Tɔhonɔ̀ kplɔ̀ so Ejiptè a, mì ɖoto ènu kè be le gblɔ̃ so mìa ŋutia:
2“Mìawo ɖèka kpò ŋuti mù tɛ ɖo
lè ànyigbã ji be xomèawo kpata dòmè.
Eŋuã ŋutia, mù la biɔ àkɔ̃ŋùta so mìa si
lè hũnyànyrã kèwo kpata mì wɔ̀a mè.”
Gblɔ̃ɖɛtɔ mu la teŋu si lè Mawu nu ò
3Ŋusù èvè teŋu zɔ̃ èmɔ̃ ɖodu
wàlɛbɛ kè wo mu pò èse sã òa?
4Jãŋùta la teŋu hlɔ̃ lè àve mè
ne mu kpɔ yebe nuɖùɖu òa?
Eye e la teŋu gbo lè yebe mlɔ̃pe
ne mu le ènu ɖekpe òa?
5Xèvi ɖe la teŋu jè èmɔ̃ mè
ne ènu ɖe mu dɔ̃ ɛ̀ yì e gbɔ òa?
Èɖɔ la teŋu miɔ̃ lè ye ɖokoe sinu
ne mu le ènu ɖekpe òa?
6Àhùakpɛ̃ la ɖì lè èdù ɖe mè
kè vɔ̃vɔ̃ mu la jè èdùamètɔwo ji òa?
Gbledo la jè èdù ɖe ji
ne mu nyi Tɔhonɔ̀ ye ɖè èmɔ̃ òa?
7Nyàwo be nyi be Tɔhonɔ̀ Mawu mu wɔ̀nà ènu ɖe eye be la gbe fɛ̃kãkã yebe sumɔ̃vi gblɔ̃ɖɛtɔawo ò.
8Ne jãŋùta le gboa,
àmè kɛ mu la vɔ̃ ò?
Ne Tɔhonɔ̀ Mawu le pò nupoa,
àmè kɛ ye la gbe yebe àŋɛ̀a dodo ò?
Sàmarìa be kòjoɖoɖo
9Mì do àpa lè Asdɔ̀d kudo Ejiptè
be èxɔ̀ nyuɛ̃wo tamè be:
“Mì bɔ̀ lè Sàmarìa be ètowo tamè,
ne mìa kpɔ gbegble kudo èfũwɔ̀amè kèwo le jɔ̀ a ɖa.”
10Eŋuã ŋuti Tɔhonɔ̀ le gblɔ̃ be:
“Sàmarìatɔwo mu nya ànùkua wɔ̀wɔ ò.
Wo bɔ̀ èhlɔ̃dãnuwo kudo èfĩnuwo
ɖo woabe àxue nyuɛ̃wo mè.”
11Ɖo ènu kèawo ŋutia, Sàmarìa, ènu kè
Tɔhonɔ̀ gblɔ̃ so ŋuti wòa ye nyi ekèa:
“Kɛ̃tɔwo la pòxla èdùa,
wo la gbã ŋusɛ̃ wòwo keŋu
eye wo la lɔ ènuwo kpata
lè àpo àxue nyuɛ̃wo mè.”
12Ènu kè Tɔhonɔ̀ gblɔ̃a ye nyi ekèa:
“Ne jãŋùta le àlɛ̃ ɖe a,
àlɛ̃kplɔ̀tɔa la teŋu hlɔ̃ ɖè
àfɔ̀ti èvè àlo èto kãkã lè yebe ènu mè.
Nène ye be la nyi na Izràɛlvi
kèwo lè Sàmarìa nyigbãa ji,
mlɔ̃ kocìvi àlo àbàti jia yeŋu.”
Àfɔ̀ɖoàfɔ̀ji-nyawo
13Tɔhonɔ̀ Mawu, àhùadù Mawu a gblɔ̃ be:
“Mì ɖoto eye mìa gblɔ̃
àfɔ̀ɖoàfɔ̀ji-nya kèawo na Yakɔb be dùkɔ̃a:
14Wàlɛbɛ kè mù la sitè ne ma dɔ̃to
na Izràɛl ɖo yebe vuɛ̃wo ŋutia,
mù la sitè ɖo Betɛ̀l be vɔsakpewo cã ŋuti
eye mù la gbã wo pu ànyi.
15Mù la gbã fàfa hùenu kudo zòmè hùenu be àxuewo kpata.
Eye àxue kèwo wo ɖo àcɔ na ku ènyìɖuwo cã mu la gbà nɔ̀ ànyi ò.
Àxue ɖìnyiwo la bu keŋu.”
Nène a ye Tɔhonɔ̀ gblɔ̃a yeŋ
Mina Bible © Bible Society of Togo, 2014.