Èdɔwɔ̀wɔwo 27
27
Wo ɖo Paolò ɖoɖa Romà
1Wàlɛbɛ kè wo ɖè ègbè be mia ɖo ètɔ̀jihũ yì Italìaa, wo sɔ Paolò ku ègàmènɔ̀tɔ buwo do àsi na àhùaga ɖe kè wo yɔna be Yulìo, eye be so àhùakɔ̃ kè wo yɔna be: “Agustò be àhùakɔ̃a#27.1 Agustò be àhùakɔ̃: àhùakɔ̃ kè nɔ̀nà èfìɔ ŋutia.” mè. 2Mi ɖo Adramitò be ètɔ̀jihũ ɖe kè la hɔ̃, la to Azìa be èhũjèpewoa. Aristarkò kè so Tɛsalonikà lè Màkedonìaa, ɖo ètɔ̀jihũa ku mi. 3Ekè èŋù kèa, mi ɖo Sidɔ̀n, eye Yulìo kè le wɔ̀ àdɔ̀mè nyuɛ̃ na Paolòa, na ɛ̀ ègbè, be yì kpɔ èxlɔ̃awo, na yebe èhiãwo. 4Ekè mi jo lè funua, mi gba èhũa, to Kiprò be ètɔ̀dòmèkɔ̃ɛa xa jo, ɖoa, èhũa le kpe àya. 5Ekè mi to Kilikìa ku Pãfilìa be àpùa jia, mi va jè èdù kè wo yɔna be Mirà a mè, lè Likìa nyigbã ji. 6Lè funua, àhùagaa kpɔ Àlɛ̀ksãdrìa be ètɔ̀jihũ ɖe kè le yì Italìaa, eye be na mi ɖo e mè. 7Mi zɔ̃ blɛ̀wù, ŋùkèkè sùgbɔ, eye e sɛ̃ŋu ŋutɔ gbɔ̀xue mi ɖo Knidò gbɔ. Ekè àya mu lɔ̃ ènu na mi be mia yì ŋùkɔ̀ lè àgo ŋua ji òa, mi to Kretà be ètɔ̀dòmèkɔ̃ɛa xa, lè Salmɔnè be àlɔ̀ji. 8Mi jè àgbàgba ŋutɔ, sɔ kù ètɔ̀jihũa to àpùa nu, va jè àfi ɖe, kè wo yɔna be Ètɔ̀jihũ-jèpe nyuɛ̃a lè Lazìa be èdùa gbɔ.
9Mi gũ gàmè sùgbɔ lè àpùa ji, eye ètɔ̀ ji toto wàlɛbɛ kèa, nyi àfɔ̀kunu gã ɖe, ɖo *ènubabla be gàmè va yì vɔ̀. Eŋuã ŋuti ye Paolò ɖo àɖàŋù na èhũkùtɔawo be:
10“Èxlɔ̃ nyèwo, mù kpɔ be ne mi jè ètɔ̀a ji wàlɛbɛ kèa fifìa, mi la yì jè àfɔ̀ku gã ɖe, eye mu nyi àgbã kèwo lè èhũa mè ku èhũa ɖèɖe kpò ye la gũ ò, vɔ̀a mia ŋutɔwo miabe àgbèwo cã.” 11Àhùagaa le dojì ɖo ènyà kèwo èhũkùtɔa ku èhũtɔawo le gblɔ̃a ŋuti wu ènyà kèwo Paolò le gblɔ̃a. 12Ekè ètɔ̀jihũ jèpe kèa mu nyɔ ne woa nɔ̀ lè àvìvɔ hùenu òa, àmè sùgbɔ lɔ̃ ɖo e ji be mia hɔ̃ jo, ne mia tè è kpɔ, ne mi teŋuã, mia yì Foenikè kè nyi Kretà be ètɔ̀jihũ jèpea, ne mia nɔ̀ funua àvìvɔ hùenu, ɖo èdù kèa jè ŋùkɔ̀ Àpùgo-Èwèɖoxɔ̀pe, ku Àvego-Èwèɖoxɔ̀pe.
Àya sɛ̃sɛ̃ pò lè àpùa ji
13Ekè àpùgo-ya fàfa le pòa, wo bù be, yèwo teŋu wɔ̀ ènu kè yèwo jro a, eye wo kɔ seŋuge, to Kretà xa. 14Vɔ̀, zãa ɖe a, àya sɛ̃sɛ̃ kè wo yɔna be “Àvego-Èwèzɛ̃pe be àyaa” tɔ pòpo so ètɔ̀dòmèkɔ̃ɛa be ètowo ji. 15Àyaa kɔ èhũa, dɔ̃ ɛ̀ ɖo nu, eye ekè wo mu teŋu kù èhũa kpe àya òa, mi tàsi mia ɖokoewo na àyaa. 16Mi va to ètɔ̀dòmèkɔ̃ɛ̃ vi ɖe kè wo yɔna be Kaodàa xa. Mi jè àgbàgba ŋutɔ gbɔ̀xue miabe àlɔ̀ sù àkloa#27.16 Àklo: E nyi ètɔ̀jihũvi kè wo sɔ hlùɛ̃nà àmè gã, ne ètɔ̀jihũa le ji la gbãa. ji. 17Mi kɔ ɛ̀ do ètɔ̀jihũa mè. Mi trɔ sɔ èkà to ètɔ̀jihũa gɔ̃mè, bla ɛ̀#27.17 Èkà sɔ bla ètɔ̀jihũa: xoxo be ètɔ̀jihũawo nyi èhũ kè wo sɔ èkà blanaa.. Ekè mi le vɔ̃ be èhũa la yì gbã lè Sirtà, lè Libìa be àpùtaa, mi ɖiɖi àbaɖa a, tàsi mia ɖokoe ɖo nènea, eye àyaa kplɔ̀ àkloa ku èhũa yì. 18Ekè àya sɛ̃sɛ̃a gbà kpɔ̀tɔ̀ lè nyàmà mi kaka èŋù kèa, wo tɔ àgbãwo fɔ̀fɔ̀ dãŋùgbe ɖo àpùa mè. 19Ŋùkèkè ètɔ̃gɔ̃a gbèa, èhũkùtɔawo sɔ woawo ŋutɔ be àlɔ̀wo ɖè ènu kpɛ̃kpɛ̃ kèwo ye lè èhũa ŋutiawo dãŋùgbe ɖo àpùa mè. 20Ŋùkèkè ɖewo ye nyi ekèa, mi mu gbà kpɔ èwè ku wètriviwo kpɔ ò. Àya sɛ̃sɛ̃a kpɔ̀tɔ̀ le pò kpò ye, eye mi mu gbà ɖo ŋùɖo ɖekpe be mi la gbà gã ò.
21Mi nɔ̀ ènu màɖù dìdì ɖe. Paolò sitè lè àmèawo dòmè, gblɔ̃ na wo be: “Mia tɔ̀wo, ne mì kè ɖo èto mù, eye mi mu jo lè Kretà òa, mi mu la va kpe àfɔ̀ku kèa, eye miabe ènuwo la gũ ò. 22Kpɔɖa fifìa, mì mu gbà vɔ̃ ò. Àmè ɖekpe mu la gũ yebe àgbè lè mìa dòmè ò. Èhũa kpò ye la gbã. 23Đo Mawu kè tɔ̀ ye mù nyi, ekè ye mù le sumɔa be àtikplɔtɔ ɖè va gbɔ nyè ègbè èzã mè. 24E gblɔ̃ na mù be: 'Paolò, mù gbà vɔ̃ ò, ɖo wò la yì Romà-Fìɔgãa be ŋùkɔ̀ godo, eye, ɖo ŋuti wòa, Mawu la na àgbè àmè kèwo keŋu lè ètɔ̀a ji ku wòa.' 25Ye ŋutia, mia tɔ̀wo, àgbɔ̃ ne jèpò na mì, ɖo mù kã ɖo Mawu ji be ènu kè be gblɔ̃ na mùa, kpò ye la jɔ̀. 26Vɔ̀a, miabe èhũa la gbã ɖo ètɔ̀dòmèkɔ̃ɛ̃ ɖe ji.”
27Ŋùkèkè woènègɔ̃a gbè be èzã mèa, àya sɛ̃sɛ̃a kpɔ̀tɔ̀ lè kplɔ̀ mi dã, lè àpù kè wo yɔna be Adrìa ji. Sìgbè èzã gà woèvè nènea, Sɛlifòawo susu be mi le gogo ànyigbã ɖe. 28Ekè wo dà jijekaa, wo kpɔ be àpùa be ègũ wɔ̀wɔa lè àbɔ èwì. Ekè mi gbà yì ŋùkɔ̀ viɖea, wo gbà dà jijekaa ke, eye wo kpɔ àbɔ woeàtɔ̃. 29Ekè wo lè vɔ̃ be èhũa la va yì gbã ɖo àkpã ɖe ŋutia, wo dà seŋuge ènè lè èhũsikea. Wo ji be èŋù ne kè kaba. 30Vɔ̀a, ekè Sɛlifòawo jro la si gble èhũa ɖɛa, wo ɖiɖi àklo ɖo àpùa ji, wɔ̀ sìgbè àmè kèwo ji la dà seŋugewo ɖo èhũtaa nène. 31Paolò gblɔ̃ na àhùagaa ku gbãdãgbãawo be: “Ne àmè kèawo mu nɔ̀ èhũa mè òa, mìa cã mì mu la gã ò.” 32Eye gbãdãgbãawo sò èkà na àkloa, tàsi ì, èsìa kplɔ̀ ɛ̀ jo.
33Lè fɔ̃fɔ̃ mèa, Paolò gblɔ̃ na woa kpata be woa ɖù ènu. E gblɔ̃ na wo be: “Ŋùkèkè woènè sɔ̃ŋu ye nyi ekèa, mì ci jojojoe, lè èmɔ kpɔkpɔ mè, ènu màɖù. 34Ye ŋutia, mù le ɖè kuku na mì be, mìa ɖù ènu, ɖo ekèa lè veve ɖe na mìabe gãgã. Mù gbà le to na mì be èɖà ɖèka mu la gɛ̃ lè èta na mìa dòmètɔ ɖe ò.” 35Ekè Paolò gblɔ̃ ekèa, e sɔ kpɔ̃nɔ, do àkpe na Mawu ɖo e ta, lè àmèawo keŋu be ŋùmè, kã ɛ̀, eye e tɔ ɛ̀ ɖùɖu. 36Ènu kèa do ŋusɛ̃ woawo keŋu, eye woa cã wo ɖù ènu. 37Mi, àmè èkà àdɛ̃ takpo ci woeàdɛ̃ sɔ̃ŋu ye nɔ̀ èhũa mè. 38Ekè mi ɖù ènu, ɖɔpò vɔ̀a, mi fɔ̀ *èlù kòtòkuwo lè èhũa mè dãŋùgbe ɖo àpùa mè, ne èhũa ne fò.
Àpùsrɔ̀ke gbã èhũa
39Ekè èŋù kèa, Sɛlifòawo mu jèsi àfi kè wo lèa ò. Vɔ̀a, wo kpɔ èdɔ̃ ɖe, ku àpùta ɖoɖa, eye wo ɖo è be yèwoa jè àgbàgba, la kpɔ be yèwo la teŋu gba èhũa ɖo funua màa. 40Wo sò seŋugeawo, eye wo gble wo ɖo àpùa mè, eye wo tu èhũɖotia#27.40 Èhũɖoti: èhũjɔ̀ti; àti kè nɔ̀nà èhũ be àsike, eye wo sɔ jɔ̀nà èhũa. be èkàwo. Ekè wo do àbaɖa ɖo àya jia, wo tùtà àpùa ta. 41Èhũa va ɖota èkɔ mè, eye ètaa tɛ gbãŋu, ci èkɔa mè. Àsrɔ̀keawo be ŋusɛ̃ gbã èhũsikea.
42Gbãdãgbãawo jro la wù ègàmènɔ̀tɔ kèwo keŋu lè èhũa mèawo, ne woa dòmètɔ ɖe mu gbà pu èsì, si jo ò. 43Vɔ̀a, àhùagaa, mu lɔ̃ na wo ò, ɖo e jro la hlùɛ̃ Paolò gã. E na ègbè be àmè kèwo ye nya èsì pupuawo ne jè àpùa mè jè ŋùkɔ̀, ne woa pu èsìa yì àgo. 44Àmè kèwo ye kpɔ̀tɔ̀awo yaa ne kù ɖo gboŋugblo, àlo èhũa be fɛ̃fɛ̃wo ŋuti, ne woa jè woa yomè jè àgo. Nène ye woawo keŋu va yì jè àgo gãgãɖe.
Mina Bible © Bible Society of Togo, 2014.