Èdɔwɔ̀wɔwo 22
22
1“Nɔ̀vi nyè ku ètɔ nyèwo, mì ɖo èto ne mìa sè ènyà kè lè àsi nyè, ma gblɔ̃ na mì fifì, la sɔ ɖè kunù na ɖokoe nyè so ènu kèwo be hùɛ mì le do do mùawo ŋuti.” 2Ekè wo kpɔ be Aràmgbe mè ye be le gblɔ̃ ènyàa na yèwo lèa, woawo keŋu gbà zĩ tototo kpe è. Eye Paolò gblɔ̃ be: 3“Yudàvi ye mù nyi. Wo jì mù lè Tarsò, lè Kilikìa, vɔ̀a Yèruzàlɛm fikèa ke kpò ye wo hɛ̃ mù lè, eye mù nyi Gamaliɛl be nukplavi. E fiɔ mù mia tɔgbewo be èsea kito-kito, eye mù sɛ̃nà Mawu ku veve do ènu, sìgbè àlekè mìawo cã mì le sɛ̃ ɛ̀ egbèa nène. 4Mù tĩ àmè kèwo le to èmɔ kèa#22.4 To èmɔ kèa: èmɔ kè ye ŋutɔ le to fifìa ye (Kristò to). jiawo yomè veve ɖe, kaka be àmè ku lè woa dòmè kpɔ. Mù gbà le ŋusù ku nyɔ̃nùwo yì do ègàkpa mè. 5Mawunɔ gãa ku èdùmèmègãwo keŋu la teŋu ɖù ɖase be mù le to nyàwo. Mù xɔ̀ xoma lè woa si ŋutɔ cã na nɔ̀vi nyè Yudàvi kèwo ye lè Damaskòawo. Funua ye mù le yì, la le xɔ̀sètɔ kèwo lè funuawo, la kplɔ̀ wo va Yèruzàlɛm, ne woa dɔ̃ èto na wo.”
Paolò pò nupo so yebe èjì mè trɔtrɔ ŋuti
6“Èmɔa ji ye mù lè, gogo Damaskò, wàlɛbɛ kè, sìgbè dɔ̃ŋùkusu gà woèvè mè nènea, kɔ̀kɔ̀ɛ gã ɖe so jiŋùkusi, klɛ̃ pòxla mù. 7Mù jè ànyi, eye mù sè ègbè ɖe, kè biɔ mù be: 'Saolò! Saolò! Nukɛ ŋuti wò le tĩ yo nyè mè ɖo ò?' 8Mù biɔ ɛ̀ be: 'Èwò àmè kɛ ye ò, Tɔhonɔ̀?' Eye e ɖo e ŋuti na mù be: 'Ènyè Yesù Nazarɛttɔ̀, kè yomè wò le tĩa ye.' 9Àmè kèwo le zɔ̃ èmɔa ku mùawo kpɔ kɔ̀kɔ̀ɛa; vɔ̀a, wo mu sè àmè kè le pò nupo na mùa be ègbè ò. 10Mù gbà biɔ ɛ̀ be: 'Nukɛ mù ɖo la wɔ̀ ò, Tɔhonɔ̀?' Eye Tɔhonɔ̀a gblɔ̃ na mù be: 'Sitè, yì Damaskò. Ne wò yì funua, wo la gblɔ̃ ènu kèwo Mawu be wòa wɔ̀a keŋu na wò.' 11Vɔ̀a, kɔ̀kɔ̀ɛ be kɛ̃klɛ̃ kèa, na be nyè mu gbà teŋu lè kpɔ ènu ò. Àmè kèwo zɔ̃ èmɔ ku mùa, wo ye le àlɔ̀ nyè, kaka kplɔ̀ mù yì Damaskò.”
12“Ŋusù ɖe kè wo yɔna be Ànanìa a, lè funua. E nyi ŋusù ɖe kè le Mawu be èsea ɖo àsi sɛ̃sɛ̃ ɖe. E sina Mawu, eye Yudàvi kèwo keŋu lè èdùa mèawo gblɔ̃nà yebe ènyà nyuɛ̃. 13Ŋusù kèa, va kpɔ mù eye be gblɔ̃ na mù be: 'Nɔ̀vi nyè Saolò, ŋùkuvi wòwo ne hũ ne wòa gbà kpɔ ènu!' Troloa, ŋùkuvi nyèwo hũ, eye mù kpɔ Ànanìa. 14E gblɔ̃ be: 'Mia tɔgbewo be Mawu cã wò, ne wòa nya yèbe èjro, ne wòa kpɔ Mawu be Jɔ̀jɔɛtɔ ɖèka tigɔ̃a, ne woa sè ènyà kè la to so yebe ènu mèa. 15Đo, wò la nyi yebe ɖàsèfo, la gblɔ̃ ènu kè wò kpɔ, eye wò sè a, lè àgbètɔwo keŋu be ŋùkɔ̀. 16Fifìa, nukɛ ye wò le nɔ̀tè kpɔ ò? Sitè, yɔ yebe nyikɔ, ne woa lè mawusi na wò, sɔ ɖè wò so èvuɛ̃ wòwo mè!'”
Wo dɔ̃ Paolò ɖoɖa àgbàlèwo dòmè
17“Ekè mù trɔ va Yèruzàlɛm-a, mù va le fãkue gbè ɖèka lè mawuxɔa mè, eye mù kpɔ àvìmènu. 18Mù kpɔ Tɔhonɔ̀ le gblɔ̃ na mù be: 'Kèɖì ne wòa ɖèbla to lè Yèruzàlɛm, ɖo ɖase kè wò la ɖù na mù lè fikèa, èdù kèa mè tɔwo mu la xɔ̀ ɛ̀ sè ò.' 19Mù ɖo e ŋuti be: 'Tɔhonɔ̀, woawo ŋutɔ nya nyuɛ̃ ɖe sãa be mù yìnà bɔ̀bɔ̀pewo, nana be wo lena àmè kèwo xɔ̀ èji wò sèawo do ègà, eye wo pònà wo. 20Wàlɛbɛ kè wo le wù ɖàsèfo wò Stefanɔ̀a, nyè cã mù lè funua, eye mù lɔ̃ ɖo e ji; ènyè ye xɔ̀ àmè kèwo wù ìawo be àwùwo ɖo àsi.' 21Tɔhonɔ̀ gblɔ̃ na mù be: 'Yì, ɖo àfi dìdì mù la dɔ̃ wò ɖoɖa, lè àmè kèwo mu nyi Yudàvi òawo dòmè.'”
22Yudàvi kèwo ye ɖo èto Paolò kaka va ɖo ènyà kèawo jiawo gbà tɔ àpa dodo sɛ̃sɛ̃ ɖe be: “Mì bu ŋùmè na ŋusù kèa, lè ànyigbã ji! Mì wù ì! Mu ɖo la nɔ̀ àgbè ò!” 23Wo do àpa lelele, zɛ̃ woabe àwùwo, lɔ èkɔ hlɛ̃ ɖo àya mè. 24Àhùaga gãa ɖè ègbè be woa kplɔ̀ Paolò yì *àgbògbòa mè, woa pò è, ne woa biɔ ɛ̀, ne bèa gblɔ̃ ènu kè ŋuti ye àmèawo le do àpa ɖo e ta nènea ɖoa. 25Ekè wo bla ɛ̀, ne woa pò èa, e biɔ àhùaga kè nɔ̀tè ɖo e gbɔa be: “Èsea ɖè èmɔ be wo ne pò Romàtɔ kè wo mu gblehùɛ do ò a, ku àtãŋùa?” 26Ekè àhùaga kèa sè nènea, e yì kpɔ àhùaga gãa, gblɔ̃ na ɛ̀ be: “Nukɛ wò le ji la wɔ̀ ŋua ò? Ŋusù kèa Romàtɔ be nyi loo!” 27Eye àhùaga gãa va Paolò gbɔ, biɔ ɛ̀ be: “Romàtɔ ye wò nyi nyàwo a?” Paolò ɖo e ŋuti be: “Ɛ̃ɛ, Romàtɔ ye mù nyi.” 28Àhùaga gãa gblɔ̃ be: “Ènyè yaa, ègà sùgbɔ mù zã gbɔ̀xue wo va hlɛ̃ mù ɖo Romàtɔwo dòmè.” Paolò gblɔ̃ be: “Nyè ya Romàvi jìji ye mù nyi.” 29Zè ɖèkaa, àmè kèwo keŋu ɖo la pò èawo, ɖèbla jo lè funua. Vɔ̃vɔ̃ jè àhùaga gãa ŋutɔ cã ji, ɖo e va kpɔ be Romàvi ye, yè na be woa bla.
Paolò lè èdùnyagblɔ̃haa be ŋùkɔ̀
30Ekè èŋù kèa, àhùaga gãa jro la nya ènu kè tututu ŋuti Yudàviwo dohùɛ do Paolò ɖoa. E na be wo tu èkà na ɛ̀, eye e na * mawunɔ gãawo ku èdùnyagblɔ̃tɔwo keŋu bɔ̀. E kplɔ̀ Paolò, na be nɔ̀tè ɖo woabe ŋùkɔ̀.
Mina Bible © Bible Society of Togo, 2014.