Èdɔwɔ̀wɔwo 13
13
Wo dɔ̃ Barnabas ku Saolò
1Gblɔ̃ɖɛtɔ ku ènufiɔtɔ ɖewo nɔ̀ Ãtiokìa be èhabɔ̀bɔa mè. Woabe nyikɔwo ye nyi Barnabas, Simeɔ̀n kè wo yɔna be Àmèyìbɔa, Lukìɔs, so Kirenè, Manahɛ̀n, àmè kè nɔ̀ ɖèvimè ku Herod, èfìɔgbɔfìɔa, ku Saolò#13.1 Saolò àlo Paolò: Saolò lè Hebrùgbe mè; Paolò lè Romà gbe mè.. 2Gbè ɖèkaa, wo le sumɔ Tɔhonɔ̀, eye wo le bla ènu. Gbɔ̃gbɔ̃ Kɔ̀kɔ̀ɛ a gblɔ̃ na wo be: “Mì ɖè Barnabas ku Saolò ɖovò na mù, ne woa yì wɔ̀ èdɔ kè ŋuti mù yɔ wo ɖoa.” 3Ekè wo bla ènu, eye wo fãkue vɔ̀a, wo ɖo àsi èta na Barnabas ku Saolò, eye wo dɔ̃ wo.
Barnabas ku Saolò lè Kiprò
4Ekè Gbɔ̃gbɔ̃ Kɔ̀kɔ̀ɛ a dɔ̃ Barnabas ku Saolò nènea, wo yì Selekìa. Wo ɖo ètɔ̀jihũ so funua, yì ètɔ̀dòmèkɔ̃ɛ̃ kè wo yɔna be Kipròa ji. 5Ekè wo jè èdù kè wo yɔna be Salaminàa mèa, wo yì bɔ̀bɔ̀pewo, le do Mawu be àŋɛ̀a, eye Yòhanɛ̀s-Markò lè woa gbɔ, le do wo àlɔ̀. 6Eŋuã yomè a, wo to ètɔ̀dòmèkɔ̃ɛa keŋu ji, kaka va èdù kè wo yɔna be Pafɔ̀s-a mè. Wo kpɔ Yudàvi ŋùdãnuwɔ̀tɔ ɖe kè wo yɔna be Bar-Yesùa#13.6 Bar-Yesù: Yesù be vi (mu Yesù Kristò ò.) lè funua, eye e sɔ ye ɖokoe sɔ ɖo gblɔ̃ɖɛtɔ. 7E lè èdùjiɖùtɔ Sɛrgìo Palùs, àmè kè nyi ŋusù àyètɔa gbɔ. Àmè kèa jro la sè Mawu be ènyà, eye e na be woa yɔ Barnabas ku Saolò va na yè. 8Vɔ̀a, Elimàs kè wo yɔna be ŋùdãdɔwɔ̀tɔa ɖo, nènea ye wo yɔna ɛ̀ lè Grikgbe mè, mu na wo èmɔ̃ ò, e le ji la trɔ èdùjiɖùtɔa be susu, ne mu gbà sè ènyàa, ne bèa va xɔ̀ e ji sè ò. 9Wàlɛbɛ ŋua, Gbɔ̃gbɔ̃ Kɔ̀kɔ̀ɛ a ɖɔ Saolò, àmè kè wo gbà yɔna be Paolòa, fuu. E kpɔ Elimàs dũu, 10eye be gblɔ̃ na ɛ̀ be: “Àyè gɛdɛ gɛdɛme, àmèflùtɔ ye wò nyi; Àbòsam be èvi ye wò nyi, eye wò nyi ènu nyuɛ̃ ɖe sia ɖe be kɛ̃tɔ! Kaka na gà kɛ mè wò la va tɔtè Tɔhonɔ̀ be èmɔ jɔ̀jɔɛa hɛ̃hɛ̃ gble ò? 11Fifìa ɖo èto: Tɔhonɔ̀ la dɔ̃ èto na wò. Àpo ŋùkuviwo la gbã, wò mu la gbà kpɔ èwè ò, kaka na àzã ɖe.” Eye troloa, vìvìti klìkò ɖe cɔ̃ e ji, eye be le flù, le ji àmè kè la le àlɔ̀ na ɛ̀, la fiɔ ɛ̀ èmɔa. 12Ekè èdùjiɖùtɔa kpɔ ènu kè jɔ̀ kèa, e xɔ̀ ènyàa ji sè, ɖo ènu kè wo fiɔ so Tɔhonɔ̀ ŋutia, wɔ̀ ŋùdã na ɛ̀ ŋutɔ.
Paolò ku Barnabas yì Ãtiokìa kè lè Pisidìaa
13Paolò ku ye tɔ̀wo ɖo ètɔ̀jihũ so Pafɔ̀s, yì jè Pɛrgè, lè Pãfilìa be àgo ji. Yòhanɛ̀s-Markò tàsi wo ɖo funua, trɔ yì Yèruzàlɛm. 14Woawo yaa, wo to Pɛrgè ŋuti, yì Ãtiokìa, lè Pisidìa be àgo ji. Lè jɛ̃gbɔ̃zã gbèa, wo yì bɔ̀bɔ̀pea, eye wo nɔ̀ ànyi. 15Ekè wo hlɛ̃ èsea lè Mawu be gblɔ̃ɖɛtɔwo be xoma a mè vɔ̀a, bɔ̀bɔ̀pe be ŋùkɔ̀nɔ̀tɔwo ɖo àmè ɖoɖa wo, gblɔ̃ be: “Nɔ̀viwo, ne mì ɖo ènyà ɖe la sɔ do ŋusɛ̃ dùkɔ̃a, mì gblɔ̃ ɛ̀ fàa.” 16Paolò sitè, mì àsi na wo, gblɔ̃ be: “Mìa Izràɛlviwo ku mì, àmè kèwo sɛ̃nà Mawu a, mì ɖo èto mù. 17Izràɛl be dùkɔ̃a be Mawu cã mia tɔgbewo, eye e wɔ̀ wo dùkɔ̃ yì ŋùkɔ̀ ɖe, wàlɛbɛ kè wo nɔ̀ Ejiptè be ànyigbã jia. Mawu kplɔ̀ wo ku ŋusɛ̃ jo lè Ejiptè. 18E kpɔ woa ji, nyì wo sìgbè èpè èkà sɔ̃ŋu nène lè zògbè ji. 19E crɔ̃ dùkɔ̃ adrɛ̃ lè Kanàn-nyigbã ji, sɔ woabe èdùa na Izràɛlviwo, eye ànyigbã kèa zũ woa tɔ̀. 20Ènu kèawo keŋu xɔ̀ sìgbè èpè èkà woeɖèka ci èwo nène.”
“Ekèa yomè a, e ɖo kòjoɖotɔwo ɖo woa nu, kaka va na yebe gblɔ̃ɖɛtɔ Samuɛl be hùenu. 21Woa ŋutɔwo va biɔ be woa ɖo èfìɔ na yèwo, eye Mawu sɔ Saolò, Kis be èvia, lè Bɛnyamìn be xòmèa mè, be ɖùfìɔ ɖo woa nu, èpè èkà. 22Ekèa yomè a, Mawu ɖè Saolò jo lè èfìɔzìkpea ji, sɔ David ɖo e tèpe. David kèa ŋuti ye Mawu ɖù ɖase so be: 'Mù kpɔ David, Jesè be èvia, be e nyi àmè kè be ènu jɔ̀jì na mùa, be e la wɔ̀ ɖo èjro nyèwo keŋu ji.' 23Yebe jìjimè ye Yesù kè Mawu sɔ wɔ̀ Hlùɛ̃tɔ na Izràɛl be dùkɔ̃a, to lè, ne bèa wɔ̀ ɖo àjɔ̀gbè kè e fìã na woa ji. 24Gbɔ̀xue Yesù ne vaa, Yòhanɛ̀s do àŋɛ̀a na Izràɛl be dùkɔ̃a, be àmèwo keŋu ne ɖɔ̀lì èdɛ̃, eye woa lè mawusi na wo. 25Wàlɛbɛ kè be le wu èdɔ kè be le wɔ̀a nua, e biɔ be: 'Àmè kɛ ye mì bù be mù nyi ò? Nyè mu nyi àmè kè mì le nɔ̀tè kpɔa ò. Vɔ̀a, àmè ŋua jè yo nyè mè gbãnà, eye nyè mu sù la ɖè àfɔ̀kpa lè àfɔ̀ na ɛ̀ ò.'”
26“Nɔ̀viwo, mì, àmè kèwo jɔ̀ lè Abràham be kɔ̀ta mè, ku mì, àmè kèwo sɛ̃nà Mawu a, mìawo ye wo do hlùɛ̃gã be àŋɛ̀ kèa ɖoɖa. 27Đo àmè kèwo nɔ̀ Yèruzàlɛm a ku woabe ègawo mu jèsi àmè kè nyi Yesù ò, eye wo na gblɔ̃ɖɛtɔwo be ènyà kèwo wo hlɛ̃nà, jɛ̃gbɔ̃zã sia jɛ̃gbɔ̃zãa zɔ̃ sù, wàlɛbɛ kè wo gblehùɛ do èa. 28Wo mu kpɔ ènu kè ŋuti wo la ɖo èku kòjo na ɛ̀ ɖo ò, gãkea, wo ji so Pilatò si be ne na woa wù ì. 29Ekè wo wɔ̀ ènu sia ènu kè mawunya gblɔ̃ so e ŋutia kudo è vɔ̀a, wo ɖè yebe àmèti kukua lè àtisògaa ŋuti, sɔ ɛ̀ yì mlɔ̃ èyɔ̀do mè. 30Vɔ̀a Mawu fɔ̃ ɛ̀ so àmè kukuwo dòmè, 31eye, lè ŋùkèkè sùgbɔ mèa, e ɖè ye ɖokoe fiɔ àmè kèwo kplɔ̀ ɛ̀ do, so Galilea, va Yèruzàlɛm awo. Àmè kèawo ye va lè ɖù ɖase so e ŋuti fifìa, lè dùkɔ̃a be ŋùkɔ̀. 32Miawo cã, mi va le do Àŋɛ̀nyuɛ̃ kèa na mì: Àjɔ̀gbè kè Mawu fìã na mia tɔgbewoa, 33E wɔ̀ ɖo e ji na mi, woabe èviwo, wàlɛbɛ kè e fɔ̃ Yesù so èku, sìgbè lekè wo ŋlɔ̀ ɖo Salmɔ̀wo be èta èvègɔ̃a mè nènea be:
'Èwò ye nyi Èvi nyè,
eye nyè yaa, mù jì wò egbè.'
34Mawu gblɔ̃ ɖɛ be Yè la fɔ̃ ɛ̀ so èku, ne mu gbà nyìnyɔ̀ ò. Ènu kèa ye be gblɔ̃ be:
'Mù la na mì nyɔna kɔ̀kɔ̀ɛ,
nyɔna kè mù fìã na David-a.'
35Eŋuã ŋuti ye be gbà gblɔ̃ lè àkpa bu cã be:
'Wò mu la ɖè àsi lè àpo àɖèsãmea ŋuti be la nyìnyɔ̀ ò.'
36Đo hùenu kè David nɔ̀ àgbè, wɔ̀ ɖo Mawu be èjro ji vɔ̀a, e va ku, eye wo ɖì ì ɖo tɔgbeawo gbɔ, eye yebe àmèti kukua nyìnyɔ̀ lè èyɔ̀do mè. 37Vɔ̀a, Àmè kè Mawu fɔ̃ so èkua, yebe àmètikukua mu nyìnyɔ̀ ò. 38Nɔ̀viwo, mì ɖo la nya nyuɛ̃ ɖe be Yesù ji ye wo to, do èvuɛ̃ sɔ kè be àŋɛ̀a na mì. Ènu kèawo ye Mosè be èsea mu teŋu sɔ kè mì ò. 39Eye, to e jia, wo la sɔ ènuwo keŋu kè àmè sia àmè kè xɔ̀sèa. 40Ye ŋutia, mì kpɔ nyuɛ̃ ɖe, ne ènu kèwo gblɔ̃ɖɛtɔwo gblɔ̃awo, mu gbà ɖì mìa ŋuti be:
41'Kpɔɖa, mìa èvlodotɔwo,
mì ci ŋùdã mè, ne mìa crɔ̃.
Đo ènu kèwo mù la wɔ̀
lè mìabe hùenua,
ne àmè ɖe ɖè e mè na mì ŋutɔ cã a,
mì mu la xɔ̀ e ji sè ò!'”
42Ekè Paolò ku Barnabas to so bɔ̀bɔ̀pea, àmèwo biɔ so woa si be woa gbà va pò nupo na yèwo so ènu kèawo keŋu ŋuti, lè jɛ̃gbɔ̃zã kè gbãnà a gbè. 43Ekè àgũa kã vɔ̀a, Yudàvi sùgbɔ ku àmè kèwo ye ɖo Yudàviwo be sɛ̃sɛ̃a mèa, sùgbɔ kpàsà Paolò ku Barnabas do. Paolò ku Barnabas pò nupo na wo, lè do wo ŋusɛ̃ be woa likè lè Mawu be màje kè be na woa mè.
44Lè jɛ̃gbɔ̃zã kè jè e ŋua yomè a gbèa, èdùa mè tɔwo keŋu kloe bɔ̀ be yèwoa sè Mawu be ènyàa. 45Ekè Yudàviwo kpɔ àlekè àmèwo sùgbɔ ɖoa, wo ɖɔ ku ŋuhuã, eye wo gblɔ̃ bùsu-nya, sitè ɖo ènu kèwo Paolò gblɔ̃awo ŋuti. 46Paolò ku Barnabas pò nupo ku èji ɖèɖe be: “Mìawo bòhũ ye e jè be woa gblɔ̃ Mawu be ènyà na cucugbã, gbɔ̀xue! Ekè mì gbe bù mìa ɖokoe be yèwo mu jè ne àgbè mà-vɔ òa, fifìa mi la jo yì àmè kèwo mu nyi Yudàvi òawo gbɔ. 47Đo ekèa nyi ègbè kè Tɔhonɔ̀ do àsi na mia be:
'Mù sɔ wò
ne wòa nyi kɔ̀kɔ̀ɛ
na dùkɔ̃wo,
ne wòa do hlùɛ̃gã be àŋɛ̀a
kaka yì ànyigbã be vɔ̀vɔnu.'”
48Ekè àmè kèwo mu nyi Yudàvi òawo sè ènyà kèa, èjì jɔ̀ wo, eye wo kafu Tɔhonɔ̀ be ènyàa; àmè kèwo keŋu Mawu cã ɖɛ na àgbè mà-vɔawo, xɔ̀sè. 49Tɔhonɔ̀ be ènyàa gbãkpe àgo ŋuawo keŋu ji. 50Vɔ̀a, Yudàviwo na, nyɔ̃nù ɖìnyi kèwo sɛ̃nà Mawu awo ku èdùmèmègãwo sitè ɖo Paolò ku Barnabas ŋuti, nyà wo to lè woabe àgowo ji. 51Paolò ku Barnabas hũhũ woabe àfɔ̀kɔ kɔ̀ ɖo ànyi na wo, eye wo jo yì èdù kè wo yɔna be Ikonìaa mè. 52Yesù be *nukplavi kèwo lè Ãtiokìaawo ɖɔ ku jìjɔɛ ku Gbɔ̃gbɔ̃ Kɔ̀kɔ̀ɛ.
Mina Bible © Bible Society of Togo, 2014.