2Timòteo 2
2
Xɔ̀ àpo àyàɖùɖua be màma
1Fifìa, èwò, èvi nyè, sɛ̃ŋu lè màje kè lè Kristò Yesù mèa mè. 2Sɔ ènufiɔfiɔ kèwo wò sè so ènu nyè, lè ɖàsèfo sùgbɔ be ŋùmè a, do àsi na ànùkuame ɖewo. Ànùkuame kèawo cã teŋu sɔ wo fiɔ ènu àmè buwo.
3Kpe èfũ kudo mù, sìgbè Kristò Yesù be gbãdãgbã àdodoe nène. 4Gbãdãgbã kè le wɔ̀ àhùa, eye be ji be yèa jè yebe àhùaga nua, mu wɔ̀nà èdɔ bu wu gbãdãgbã be èdɔa ò. 5Nène a ke, ne àmè ɖe le drɛ̃ àvũa, wo mu cɔ̃na jègbà na ɛ̀, ne mu drɛ̃ àvũa tututu ò. 6Àgblèdàtɔ kè dè àgblèa, ye ɖo la ɖù lè èku sɛ̃sɛ̃ a mè cucugbã. 7Bù ènu kèwo mù le gblɔ̃a ŋuti kpɔ, kpɔ̀tɛa, Tɔhonɔ̀ la na wò la ŋɔjè e mè.
8Đo ŋùku Yesù Kristò, David be jìjimèvi, kè Mawu fɔ̃ so èku, zɔ̃ ɖo àŋɛ̀nyuɛ̃ kè mù do a ji. 9Àŋɛ̀nyuɛ̃ kèa ŋuti mù kpe èfũ ɖo, kaka wo do mù ègà, sìgbè èvuɛ̃wɔ̀tɔ nène. Vɔ̀a Mawu be ènyà yaa, wo mu do è ègà ò. 10Ye ŋuti mù dojì lè ènuwo keŋu mè ɖo àmè cãcãwo ŋuti ɖo, ne woawo cã, woa kpɔ hlùɛ̃gã kè lè Kristò Yesù mèa kudo gogo kòkòɖàbìa xɔ̀. 11Ekèa nyi ènyà àdodoe:
“Ne mi ku ku ìa, mi la nɔ̀ àgbè cã kudo è.
12Ne mi ɖù àyà ku ìa, mi la ɖù èfìɔ cã kudo è.
Ne mi gbe èa, Ye cã la gbe mi.
13Ne mi mu nyi ànùkuamewo na ɛ̀ òa,
e ya nyi ànùkuame, ɖo mu teŋu gbe ènu lè ye ɖokoe gbɔ ò.”
Mawu be èdɔwɔ̀tɔ nyuɛ̃a
14Đoŋù ènu kèawo na àmè sia àmè. Gbe na wo, lè Mawu be ŋùmè be, wo ne na àsà ènyà dɔ̃dɔ̃wo. Ekèa mu ɖènà àlè ɖe wu àmè kèwo le sèawo be cɔ̃crɔ̃ ò. 15Do veve ènu, ne wòa sɔ ɖokoe wò fiɔ Mawu sìgbè àmè likè ku èdɔwɔ̀tɔ kè mu ɖo la kpɛ̃ŋù ò nène, èdɔwɔ̀tɔ kè mana nyàwo be ènyàa pɛpɛpɛa. 16Na àsà àseŋu kpòtoewo; ɖo woawo ye nana àmèwo mu gbà vɔ̃na Mawu ò. 17Woabe ènufiɔfiɔ ɖùnà àmè sìgbè àbì vuɛ̃ nène. Àmè kèawo dòmè ye Himenìo ku Filetò lè. 18Àmè kèawo trã èmɔ lè nyàwo a gbɔ, eye wo le trɔ ŋùmè cɔ̃ ànyi na àmè sùgbɔ be xɔ̀sè, ekè wo le gblɔ̃ be, fɔ̃fɔ̃ so èku va yì xoxo vɔ̀a. 19Gãkea Mawu be dodoea ya lè ètè màhùã-màhuã, eye tetre kè lè e nua nyi ènyà kèa: “Tɔhonɔ̀ jèsi àmè kèwo nyi ye tɔ̀awo.” Ku: “Àmè sia àmè kè yɔna Tɔhonɔ̀ be nyikɔa, ne na àsà ènu kpòtoe wɔ̀wɔ.”
20Mu nyi sìka ku klòsalò be èsìkùnuwo kpò ye nɔ̀nà àxue gãwo mè ò, àti tɔ̀wo ku èkɔ tɔ̀wo cã nɔ̀nà ànyi. Èɖewo lè na bùbu be zãzãwo, kpɔ̀tɛawo ya lè na zãzã gbalowo. 21Ye ŋutia, ne àmè lè ye ɖokoe ɖì, lè ènu kèawo mèa, e la nyi èsìkùnu kè ŋuti bùbu lèa, ekè kɔ̀, ekè jè na Àpetɔa be zãzã, ekè sɔ̀gbè na èdɔ nyuɛ̃ siasìa.
22Si lè ɖèkajɛ mè be ènulɔ̃ɛwo nu, ne wòa jè jɔ̀jɔɛ nyinyi, xɔ̀sè, lɔ̃lɔ̃, fàfa yomè, bɔ̀ ɖo àmè kèwo keŋu le fã yɔ Tɔhonɔ̀, lè èjì kɔ̀kɔ̀ɛ mèawo ŋuti. 23Na àsà sùkunɔ̀ ku yàkà nyàbiɔsèwo. Nya be, àjrè ye wo hɛ̃nà va. 24Mu jè be, Tɔhonɔ̀ be sumɔ̃vi ne nɔ wɔ̀ àjrè ò, vɔ̀a ne wɔ̀ blɛ̀wù kudo àmèwo keŋu; e teŋu fiɔ ènu, eye bèa hɛ̃ àdòdò lè èvuɛ̃ mè. 25Ègbè blɛ̀wù ye be la sɔ nɔ fiɔ ènu àmè kèwo sinatè ɖo Mawu be ènyà ŋutia. Èta mu nyɔ òa, Mawu la na wo èdɛ̃ ɖɔ̀lì, ne woa jèsi nyàwo a, 26ne woa fɔ̃ lè woa ɖokoewo mè, eye woa vò so Àbòsam, kè le wo, sɔ wɔ̀ gàmènɔ̀tɔwo, lè yebe èjro gɔ̃mèa be èmɔ̀ tetre mè.
Mina Bible © Bible Society of Togo, 2014.