2Tɛsalonikà 2
2
Ènu kè la jè ŋùkɔ̀ na Tɔhonɔ̀ be vavaa
1Fifìa nɔ̀viwo, sɔ kù ɖo mia Tɔhonɔ̀ Yesù Kristò be tɔtrɔ va kudo miabe bɔ̀bɔ lè e gbɔa ŋutia, mi le biɔ mì be: 2mì mu gbà na ne woa titɔ susu na mì, àlo woa sò àdìka na mì kudo ènyàgblɔ̃ɖɛ ɖe, àlo xoma ɖe kè wo la be e so mia gbɔ, eye wo la na mìa xɔ̀sè be Tɔhonɔ̀ be kòjoɖozãa va ɖo vɔ̀ ò. 3Mì mu gbà na àmè ɖe ne flù mì lè èmɔ ɖekpekpe nu ò. Đo Tɔhonɔ̀ be àzã mu la va, ne àgla jèje ɖo Mawu ŋuti mu va cucugbã, eye ne èvuɛ̃me, kè jè na cɔ̃crɔ̃a mu ɖè ye ɖokoe fiɔ ò. 4Àmè kèa la sitè ɖo ènu kèwo keŋu kɔ̀a ŋuti, eye be la gbà sitè ɖo ènu kèwo àgbètɔwo sɛ̃nàa ŋuti. E la yì nɔ̀ ànyi lè Mawu be gòxɔa mè, la fiɔ ye ɖokoe be, èyè ye nyi Mawu.
5Mì mu ɖoŋù be, wàlɛbɛ kè mù kpɔ̀tɔ̀ lè mìa gbɔa, mù to ènu kèawo na mìa? 6Fifìa, mì nya ènu kè xe èmɔ na ɛ̀, eye mu la ɖè ye ɖokoe fiɔ, ne yebe gàmè mu sù ò. 7Đo èvuɛ̃ be àmlìmànu tɔ yebe èdɔwɔ̀wɔ xoxo. Vɔ̀a e lè be, woa ɖè àmè kè le xe èmɔ na ɛ̀ kaka va na fifìa jo gbɔ̀xue. 8Wàlɛbɛ ŋua ye wo la ɖè èvuɛ̃mea fiɔ. Tɔhonɔ̀ Yesù la crɔ̃ ɛ̀ kudo yebe ènu mè be gbɔ̃gbɔ̃, eye e la gũ ì to yebe vava be ɖèɖèfiɔa ji. 9Àmè ŋua be vava la zɔ̃ ɖo Satana be hɔ̃hlɔ̃ ji, lè àjè be ŋusɛ̃, ku jèsìdowo kudo ŋùdãnuwo keŋu be wɔ̀wɔ mè. 10Ekèa la kpe ɖo màjɔ̀ màjɔ nyinyi be àmè fùflu keŋu ŋuti lè àmè kèwo le crɔ̃a dòmè, ɖo wo mu xɔ̀ nyàwo be lɔ̃lɔ̃ a, ne woa gã ò. 11Đo ekèa ŋuti Mawu la dɔ̃ àmè fùflu be ŋusɛ̃ ɖoɖa wo, ne woa xɔ̀ àjèɖàɖa ji sè, 12àleke be woa ɖo kòjo na àmè kèwo keŋu mu xɔ̀ nyàwo a ji sè ò, vɔ̀a jɔ̀nà jì lè màjɔ̀ màjɔ wɔ̀wɔ mèa.
Wo cã mì ne woa hlùɛ̃ mì gã
13Miawo yaa, mi ɖo la nɔ̀ do àkpe na Mawu wè sia wè ɖo mì, nɔ̀vi kèwo Tɔhonɔ̀ ɖève a ta. Đo Mawu cã mì be mìa nyi àmè cucugbã kèwo be la hlùɛ̃gãa. E sɔ Gbɔ̃gbɔ̃ Kɔ̀kɔ̀ɛ a kɔ̀ mìa ŋuti, eye mì xɔ nyàwo a ji sè. 14Ekèa ŋuti, e to àŋɛ̀nyuɛ̃ kè mi do na mìa ji, yɔ mì, be mìa kpɔ màma lè mia Tɔhonɔ̀ Yesù Kristò be gogoa mè. 15Ye ŋuti fifìa, nɔ̀viwo, mì nɔ̀tè goŋu-goŋu eye mì le ɖoɖo kèwo mi kpla mì, to ènyà ji, àlo to miabe xoma kèwo mi ŋlɔ̀ ɖoɖa miawo mèa, ɖo àsi.
16Mia Tɔhonɔ̀ Yesù Kristò ŋutɔ kudo Mawu, mia Tɔ, àmè kè lɔ̃ mi eye be na mi àkɔfa kòkòɖàbì kudo ŋùɖo nyuɛ̃ to màje jia, 17ne fa àkɔ na mì, eye bèa do mì ŋusɛ̃ lè mìabe wɔ̀na kudo ènupo pòpo mè.
Mina Bible © Bible Society of Togo, 2014.