2Petrò 3
3
Wo fìã be Àpetɔa la va
1Àmè ɖèvewo, ekèa ye nyi xoma èvègɔ̃ kè mù le ŋlɔ̀ ɖoɖa mì fifìa. Lè xoma èvèawo mèa, mù fɔ̃ mìabe susu ɖo ènu kèwo nyɔa ŋuti, sìgbè ŋùkuɖoɖo ènu ji na àmè nène. 2Mì ɖo ŋùku ènyà kèwo Mawu be gblɔ̃ɖɛtɔ kɔ̀kɔ̀ɛwo gblɔ̃ ɖɛ, kudo Tɔhonɔ̀, Hlùɛ̃tɔa be *èse kè mìabe *àmèdɔ̃dɔ̃awo xɔ̀ vaawo ji. 3Cucugbãa, e mè ne kɔ̀ na mì be, lè àzã mlɛ̃awo jia, àmè kòtɔwo la va. Wo la nɔ̀ àgbè, zɔ̃ ɖo woabe ŋutilã be èjrowo ji, eye wo la ɖè àlɔmè lè mìa ŋuti. 4Wo la gblɔ̃ be: “Àmè kè fìã be ye la vaa ŋutɔ ɖe? Đo, so wàlɛbɛ kè mia tɔwo#3.4 Mia tɔwo: wo le nyi Izràɛlvi kèwo xɔ̀ àjɔ̀gbè fìãfìã so gɔ̃mèjèje a, e gbà le nyi xɔ̀sètɔ cucugbã tɔ̀awo. ku, kaka va na fifìa, ènu sia ènu gbà le yì e ji kpò sìgbè àlekè wo lè so xixea be gɔ̃mèjèje a nène.” 5Àmè kòtɔ kèawo ɖo è be yèwoa ŋlɔ̀be ènu kèa: Mawu ɖo jiŋùkusi ku ànyigbã to yebe ènyà ji. Ànyigbã ma jo lè èsì kè mè Mawu ɖè è to lèa ŋuti. 6Eye èsì ɖɔɖɔ gã ɖe ke ye Mawu sɔ crɔ̃ sã xoxotɔwo, to yebe ènyàa ke mè. 7Nène a ke ye Mawu be ènyàa jrà egbè be jiŋùkusi kudo ànyigbã ɖo ɖɛ na àzã kè gbè Mawu la ɖo kòjo na kɛ̃tɔwoa. Gbè ŋua gbèa Mawu la sɔ èzò sɔ crɔ̃ jiŋùkusi kudo ànyigbãa.
8Àmè ɖèvewo, nyàwo be ènyà kè mù la gblɔ̃ fifìa ne nɔ̀ àyè mè na mì. E ye nyi be lè Mawu gbɔa, ŋùkèkè ɖèka lè sìgbè èpè èkà èwì vɔ àtɔ̃ nène, eye èpè èkà èwì vɔ àtɔ̃ cã lè sìgbè ŋùkèkè ɖèka nène. 9Lè àmè ɖewo be susu mèa, Tɔhonɔ̀ be àjɔ̀gbè ji wɔ̀wɔ mu cina ŋùgbe ò. Gãkea, àmè buwo susu be Tɔhonɔ̀ mu le hũa ɖo àjɔ̀gbè kè be fìãa ji wɔ̀wɔ ŋuti ò. Vɔ̀a, e le ɖè èjì blɛ̀wù, ɖo, mu jro be àmè ɖekpe ne crɔ̃ ò, vɔ̀a ne àmèwo keŋu ne ɖɔ̀lì èdɛ̃.
10Mawu be kòjoɖoɖo zã la va ɖo sìgbè àlekè fìãfìtɔ vanaa nène. Gbè ŋua gbèa, jiŋùkusi la klo va yì kudo ègbèɖèɖe sɛ̃sɛ̃ ɖe, eye jiŋùkusi be ènuwo kpata la bì èzò, la fiɔ̃ keŋu. Nène a ke ye ànyigbã kudo ènuwɔ̀wɔ kèwo keŋu lè e jiawo cã la fiɔ̃. 11Ekè ènu kèawo keŋu la crɔ̃ nènea ɖe, àmè kɛ ŋùkumè ye e jè be mìa nyi ò? E jè be mìa nɔ̀ àgbè kɔ̀kɔ̀ɛ, eye mìa vɔ̃ Mawu. 12Mì le kpɔ èmɔ, le ci ji be Mawu be kòjo ɖo zãa ne ɖè bla va, àzã kè gbè jiŋùkusiwo la bìzò, la fiɔ̃, eye ènu sia ènu la crɔ̃ keŋu eye èzò la srè ènu kèwo keŋu lè jiŋùkusia. 13Miawo yaa, mi le nɔ̀tè kpɔ jiŋùkusi yeye kudo ànyigbã yeye kè Mawu fìãa. Fikèa ye ènu jɔ̀jɔɛwɔ̀wɔ sò àxue ɖo.
14Ye ŋutia àmè ɖèvewo, ekè mì le kpɔ èmɔ na ènu kèawoa, mì do veve ènu, àlekea be, ne e ɖo e jia, wo mu gbà kpɔ èɖi ɖekpe lè mìa ŋuti, àlo woa kã ŋùmè na mì lè yebe ŋùmè ò, vɔ̀ bòhũa, ne fàfa ne nɔ̀ mìa ku Mawu dòmè. 15E jè be mìa bù àlekè mia Tɔhonɔ̀a ɖè èjì blɛ̀wùa, be e nyi èmɔnukpɔkpɔ na mì be wo la hlùɛ̃ mì gã. Ènyà kèa ke ye mia nɔ̀vi ɖève, Paolò cã ŋlɔ̀ ɖoɖa mì, zɔ̃ ɖo ènunya kè Mawu na ɛ̀a ji. 16Nyàwo a, ekèa nyi ènyà kè be gblɔ̃ ɖo yebe xomawo keŋu mè. Ènyà ɖewo be gɔ̃mèsèse sɛ̃ŋu, lè yebe xomawo mè, eye àmè ci bòlìmèwo ku àmè màlikèwo trɔ woabe gɔ̃mèɖèɖe ɖo èbu, sìgbè àlekè wo wɔ̀nà kudo mawunya buwo cã a nène. Ekèa wɔ̀wɔ nana be wo crɔ̃na.
17Vɔ̀a àmè ɖèvewo, mìawo yaa, mì nya ènu so ènu kèawo ŋuti xoxo. Ye ŋutia, mì kpɔ mìa ɖokoewo ji nyuɛ̃ ɖe, mì mu gbà na ne àmè màvɔ̃ Mawu kèwo bu èmɔa, woa trã mìa cã, eye woa xɔ̀ mìabe kãkã ɖo e jia lè mìa si ò. 18Tɔhonɔ̀ kudo Hlùɛ̃tɔ Yesù Kristò be màje kudo yebe nyanya ne nɔ sĩ lè mìa mè. Gogo ne nyi ye tɔ̀ so fifì kaka yì. * Àmèn.
Mina Bible © Bible Society of Togo, 2014.